གྲོས་ཚོགས་ནང་ཇོ་ནང་པ་འདོད་པ་ཁེངས་པའི་ཐག་གཅོད་མ་བྱུང་ཚེ་ཁྲིམས་ཞིབ་ཁང་དུ་ཞུ་གཏུག་བྱ་འཆར།

ཟླ་འདིའི་ཚེས་༢༥ ནས་༢༨ བར་དྷ་ས་ནོར་གླིང་བོད་ཀྱི་རིག་གཞུང་ལྟེ་གནས་ཁང་གི་ཉེ་འཁྲིས་སུ་ཡོད་པའི་ཇོ་ནང་དུས་འཁོར་གྲྭ་ཚང་གི་ལྷ་ཁང་དུ། འཕགས་ཡུལ་ཇོ་ནང་འགྲོ་ཕན་ལྷན་ཚོགས་ཀྱིས་གོ་སྒྲིག་འོག  ཇོ་ནང་པའི་ཚོགས་ཆེན་ཞིག་འཚོགས་ཏེ། མ་ལོངས་ལས་དོན་བྱེད་ཕྱོགས་ལ་གྲོས་ཆོད་ཁག་ཅིག་བཞག་ཡོད་པ་རེད།

སྔོན་གྱི་བྱུང་རབས་དང་། ད་ལྟའི་གནས་བབ་གླེང་བ་ཞེས་པའི་བགྲོ་གླེང་དང་། རྒྱལ་བ་ཇོ་ནང་པའི་དམིགས་བསལ་ཚོགས་ཆེན་ཐེངས་དགུ་པ་སྐོང་འཚོགས་གནང་ཞིང་། ཚོགས་ཆེན་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་དང་། ཇོ་ནང་རྒྱལ་ཚབ་རིན་པོ་ཆེ་རྣམ་པ་གཉིས་ཀྱི་དབུས་པའི་གདན་ཞུའི་གཏམ་བཤད་པ་མཁས་དབང་བདུན་དང་།  ཚོགས་ཞུགས་པ་དང་ཟུར་ཉན་བཅས་མི་གྲངས་བརྒྱ་ལྷག་འདུ་འཛོམས་གྱིས་དཔལ་རྒྱལ་བ་ཇོ་ནང་པའི་ཆོས་འབྱུང་དང་། ལྟ་གྲུབ། དུས་འཁོར་སྦྱོར་དྲུག་ཉམས་ལེན་བཅས་ཀྱི་ཐད་བགྲོ་གླེང་ཡོད་པ་རེད།

ཚེས་༢༦ ནས་ཉིན་གཉིས་ཀྱི་རིང་དམིགས་བསལ་ཚོགས་ཆེན་ཐོག་ཨ་རི་དང་། དབྱིན་ཇི། ཨུ་རུ་སུ། སོག་པོ། བྷེལ་ལྗམ། མ་ལེ་ཤི་ཡ། བལ་ཡུལ། རྒྱ་གར་བཅས་རྒྱལ་ཁབ་བདུན་གྱི་ས་གནས་ཁག་༡༩ དང་། དགོན་སྡེ་ཁག་༧ ཆོས་ཚོགས་༢༠ ཙམ་ནས་ཕེབས་པའི་སྐུ་ཚབ་བཅས་ཁྱོན་ཚོགས་བཅར་བ་༥༠ ཙམ་ལྷན་འཛོམས་ཀྱིས་གྲོས་ཆོད་ཁག་ལྔའི་སྟེང་གྲོས་བསྡུར་རིམ་པར་བྱས་མཐར། གྲོས་ཆོད་ཁག་བཅུ་གསུམ་སྤྱི་མོས་དང་མང་མོས་ཀྱིས་གཏན་འབེབས་གནང་ཡོད་པ་རེད།

གྲོས་ཆོད་ནང་དུ་༸གོང་ས་རྒྱལ་བའི་དབང་པོ་མཆོག་གི་དགོངས་གཞི་གཙོ་བོ་གཅིག་ནི། ཆོས་ལུགས་མཐུན་སྒྲིལ་སྐོར་ཡིན་པ་ལྟར། དཔལ་རྒྱལ་བ་ཇོ་ནང་པའི་ངོས་ནས་ཀྱང་ཆོས་ལུགས་མཐུན་སྒྲིལ་ཆེད་ཆོས་བརྒྱུད་གཞན་གྱིས་བཀོད་སྒྲིག་ཞུས་པའི་རིས་མེད་བགྲོ་གླེང་སོགས་ལ་མཉམ་ཞུགས་དང་། ཇོ་ནང་པའི་ངོས་ནས་ཀྱང་ཆོས་ལུགས་རིས་མེད་ཀྱི་བགྲོ་གླེང་སོགས་གང་ཐུབ་བཀོད་སྒྲིག་བྱ་རྒྱུ་དང་། འཕགས་ཡུལ་ཇོ་ནང་འགྲོ་ལྷན་འཚོགས་ཀྱི་མ་འོངས་གནས་བབ་དང་ལས་ཀའི་ཁ་ཕྱོགས། རྒྱུན་གྲོན་དང་ལས་འགུལ་འགྲོ་སོང་འཚོལ་ཐབས་སྐོར་ལ་གྲོས་ཆོད་ཁག་ཅིག་བཞག་ཡོད་པ་རེད།

ཇོ་ནང་པར་ཆོས་བརྒྱུད་སྤྱི་མཚུངས་ཀྱི་ཐོབ་ཐང་དགོས་སྐོར་གྱི་གྲོས་ཆོད་ནང་། དཔལ་ལྡན་བོད་མི་མང་སྤྱི་འཐུས་ཁག་ས་གནས་གང་ཕེབས་དང་ས་གནས་གང་དུ་ཡོད་ན། དེར་ཡོད་ཇོ་ནང་ཆོས་བརྒྱུད་འཛིན་པ་རྣམས་ཀྱིས་སྤྱི་འཐུས་དེར་ཇོ་ནང་པའི་གནས་སྟངས་ངོ་སྤྲོད་གྱིས་མཚོན་པའི་བདེན་དོན་ལས་འགུལ་གང་ཐུབ་སྤེལ་རྒྱུ། ཕྱི་ལོ་༢༠༡༧ ཟླ་༤ ཚེས་༡༡ འཁོད་པའི་བོད་མི་མང་སྤྱི་འཐུས་ཚོགས་དྲུང་ལས་ཁུངས་ནས་“གྲོས་ཚོགས་ཚོགས་དུས་རྗེས་མ་ཞིག་ལ་ཁྲིམས་སྒྲིག་བསྐྱར་བཅོས་བསྣམས་དགོས་ཀྱི་འདུག་གམ། གཞན་ཐབས་ལམ་ཇི་དགེའི་སྐོར་སྤྱི་འཐུས་བཞུགས་མོལ་ཚོགས་འདུའི་ཐོག་བསྐྱར་དུ་གོ་བསྡུར་ལྷུག་ཙམ་བྱ་རྒྱུའི་ཐག་གཅོད་གནང་” ཞེས་པར་ཡིད་ཆེས་ཀྱིས་རང་གཞུང་ཁྲིམས་བཟོ་ལྷན་ཚོགས་ལ་མུ་མཐུད་དུ་སྙན་ཞུ་འབུལ་རྒྱུ། དཔལ་ལྡན་བོད་མི་མང་སྤྱི་འཐུས་ལྷན་ཚོགས་ནས་གཞུང་འབྲེལ་ཁྲིམས་འཆར་ཁུར་རྗེས་འདོད་པ་ཁེངས་པའི་ཐག་གཅོད་ཅིག་མ་བྱུང་ཚེ། ཆེས་མཐོའི་ཁྲིམས་ཞིབ་ཁང་དུ་ཞུ་གཏུག་མགོ་འཛུགས་བྱ་རྒྱུ་བཅས་དང་། ཙན་བྱོལ་དུ་ཡོད་པའི་དཔལ་རྒྱལ་བ་ཇོ་ནང་པའི་དགོན་སྡེ་ཁག་དང་། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་ཆོས་ཚོགས་ཁག་སྲ་བརྟན་ཡུན་གནས་དང་སློབ་གཉེར་ཡར་རྒྱས་ཡོང་ཐབས་སྐོར་ལ་གྲོས་ཆོད་ཁག་ཅིག་བཞག་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།

 

Print Friendly, PDF & Email
Share on Facebook0Tweet about this on TwitterShare on Google+0Share on LinkedIn0Email this to someone
0 commentsViews: 548

Leave a Reply