ཆབ་སྲིད་བཙོན་ཟུར་ཚེ་མགོན་རྒྱལ་རྒྱ་ནག་གིས་བསྐྱར་དུ་འཇུ་བཟུང་།

གྲགས་ཆེན་ཆབ་སྲིད་བཙོན་ཟུར་ཚེ་མགོན་རྒྱལ་ཕྱི་ཟླ་༡༢ ཚེས་༩ ཉིན་རྒྱ་ནག་གཞུང་གིས་གསེང་བའི་ཐོག་བསྐྱར་དུ་འཇུས་ཏེ། བོད་ཨ་མདོ་སྨད་མཚོ་བྱང་བོད་རིགས་རང་སྐྱོང་ཁུལ། རྐང་ཚ་རྫོང་སྤྱི་བདེ་བཀག་ཉར་ཁང་དུ་བཀག་ཉར་བྱས་ཡོད་འདུག

tesgon-gyalདེ་ཡང་ཟླ་འདིའི་ཚེས་༢༢ ཉིན་དྷ་ས་གངས་སྐྱིད་དུ་བོད་ཀྱི་འགྲོ་བ་མིའི་ཐོབ་ཐང་མང་གཙོ་འཕེལ་རྒྱས་ལྟེ་གནས་ཁང་གིས་ཆབ་སྲིད་བཙོན་ཟུར་ཚེ་མགོན་རྒྱལ་འཇུ་བཟུང་བྱས་པའི་སྐོར་ལ་གསར་འགོད་ལྷན་ཚོགས་ཤིག་བསྐོངས་པ་དང་། ཁོང་ནི་མཚོ་བྱང་ཁུལ་མདའ་བཞི་རྫོང་ནས་འཛིན་བཟུང་བྱས་པ་དང་། འཛིན་བཟུང་གི་དོན་རྐྱེན་གང་ཡིན་ཕྱིར་བསྒྲགས་བྱས་མེད་པ་རེད། ལྟེ་གནས་ཁང་དེ་ནས་ཚེ་མགོན་རྒྱལ་གྱི་བདེ་འཇགས་ལ་དོ་སྣང་ཤུགས་ཆེན་བྱེད་ཀྱིན་པར་མ་ཟད།  རྒྱ་ནག་གཞུང་ལ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་གཞིར་སྲུང་བརྩི་དང་ཁོང་གི་ལུས་སེམས་བདེ་ཐང་ལ་ཁག་ཐེག་བྱེད་དགོས་ཀྱི་ཡོད་ལ།   སྒོས་སུ་མི་སྤྱོད་ལས་འདས་པའི་སྡུག་སྦྱོང་དང་གཅར་རྡུང་།  ད་དུང་མི་ཆོས་ལས་འགལ་བའི་ཁྲིམས་ལས་སོགས་ལག་བསྟར་མི་བྱེད་པར་འབོད་བསྐུལ་བྱེད་ཀྱི་ཡོད།      དེ་མཚུངས་སུ་མྱུར་དུ་ནང་མིར་ཐུག་འཕྲད་ཆོག་པ་དང་ཁྲིམས་རྩོད་པ་གླ་ཆོག་པའི་ཐོབ་ཐང་སྤྲོད་དགོས་ཞེས་བརྗོད་སོང་།

ཕྱི་ལོ་༡༩༩༣ ལོའི་འགོར། མཚོ་སྔོན་ཞིང་ཆེན་རྒྱལ་ཁབ་བདེ་འཇགས་ཅུད་ནས་ཕྱི་སྡོད་གསང་བའི་རྩ་འཛུགས་ལ་ངན་འབྲེལ་གྱིས་བོད་རང་བཙན་ཆེད་ ༼མདོ་སྨད་གཞོན་ནུ་འཆི་ཕོད་ཚོགས་པ་ ༽ ཟེར་བ་ཞིག་བཙུགས་པར་ཁ་གཡར་ཏེ་ཚེ་མགོན་རྒྱལ་དང་བཙན་བྱོལ་ནང་འབྱོར་ཟིན་པའི་ཆབ་སྲིད་བཙོན་ཟུར་ཨ་ཚོགས་ཀླུ་མཁར་བྱམས།(ཀླུ་བྷེ) ཆབ་སྲིད་བཙོན་ཟུར་གནམ་ལོ་ཡག(ལྡོང་སྲས)བཅས་འཛིན་བཟུང་གིས་གསང་བའི་བཙོན་འཇུག་དང་། ཕྱི་ལོ ༡༩༩༤ ལོའི་ཟླ ༧ཚེས ༢༨ཉིན། མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་གིས་ཚེ་མགོན་རྒྱལ་ལ་གསང་མྱུལ་བའི་ཉེས་པ་དང་གསར་བརྗེ་ངོ་ལོག་པའི་ཚོགས་པ་འཛུགས་མཁན་གྱི་ཉེས་པར་ལོ་ངོ་༡༦ དང་ཆབ་སྲིད་ཁེ་དབང་ལོ་༤  ཕྲོགས། ཀླུ་མཁར་བྱམས་ལ་གསང་མྱུལ་བའི་ཉེས་པ་དང་གསར་བརྗེ་ངོ་ལོག་པའི་ཚོགས་པ་འཛུགས་མཁན་གྱི་ཉེས་པར་ལོ་ངོ ༡༧ དང་ཆབ་སྲིད་ཁེ་དབང་ལོ་༥ ཕྲོགས། གནམ་ལོ་ཡག་ལ་གསང་མྱུལ་བའི་ཉེས་པ་དང་གསར་བརྗེ་ངོ་ལོག་པའི་ཚོགས་པ་འཛུགས་མཁན་གྱི་ཉེས་པར་ལོ་ངོ་༡༢ དང་ཆབ་སྲིད་ཁེ་དབང་ལོ་༤ ཕྲོགས།

དེ་རྗེས་དོན་རྐྱེན་འདི་རྒྱལ་སྤྱིའི་བརྒྱུད་ལམ་ཁག་ལ་ཐོན་པས།  རྒྱལ་སྤྱིའི་སྟེང་ནས་སྐབས་དེའི་རྒྱ་དམར་གཞུང་ལ་གནོན་ཤུགས་རབ་དང་རིམ་པ་སྤྲད་ནས་ལས་འགུལ་ཤུགས་ཆེན་སྤེལ་འདུག    ཕྱོགས་གཞན་གཅིག་ནས་ཕྱི་ལོ་༡༩༩༧ ལོར་རྒྱ་དམར་གཞུང་གིས་ཧོང་ཀོང་བདེ་ལེགས་ངང་རྩིས་ལེན་བྱེད་སླད་ཁྲིམས་ལུགས་ཁག་ལ་བསྐྱར་བཅོས་དང་༼གསར་བརྗེ་ངོ་ལོག་༽ཟེར་བའི་ཉེས་མིང་དེ་བཞིན་ ༼རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཟོ་བ༽བར་བསྒྱུར་ཡོད་པས། ༼གསར་བརྗེ་ངོ་ལོག་པ༽ཟེར་བ་དེ༼རྒྱལ་ཁབ་ཁ་བྲལ༽ལ་བརྗེ་བསྒྱུར་བྱས་ཡོད།

ལོ་དེའི་དགུན་ཁར་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་ཚེ་མགོན་རྒྱལ་ལ་རྒྱལ་ཁབ་ཁ་བྲལ་བའི་ཉེས་པར་ལོ་༦ དང་ཆབ་སྲིད་ཁེ་དབང་ལོ་༢ ཕྲོགས། གནམ་ལོ་ཡག་ལ་རྒྱལ་ཁབ་ཁ་བྲལ་བའི་ཉེས་པར་ལོ་༤ དང་ཆབ་སྲིད་ཁེ་དབང་ལོ་༡ ཕྲོགས། (ཀླུ་མཁར་བྱམས་སྨན་བཅོས་སྐབས་བྲོས་བྱོལ་བྱས་ཟིན)བཅས་ཀྱི་བཅད་ཁྲ་བཏང་ཡོད།    ཧ་ལམ་ཁོང་ཚོ་བོད་མིར༼རྒྱལ་ཁབ་ཁ་བྲལ་བ༽ཟེར་བའི་ཉེས་པ་ཕོག་མཁན་དང་པོ་ཆགས་འདུག

སྐུ་ཞབས་ཚེ་མགོན་རྒྱལ། མིང་གཞན་རྐང་གཞོང་ཨ་ཚེ། ཕྱི་ལོ་༡༩༦༣ ལོའི་ཟླ་༨ ཚེས་༡༢ ཉིན་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གི་འབྲོག་ཁྱིམ་ཞིག་ཏུ་འཁྲུངས་པ་དང་། ད་ལྟ་ཁོང་གི་ཕ་ཚེ་ལོ་ལོ་ན་༨༣ དང་ཨ་མ་ཚེ་དབང་སྐྱིད་ལོ་༧༩ ཟིན་ཡོད་འདུག

ཁོང་སློབ་ཆེན་སློབ་མཐར་ཕྱིན་རྗེས། རིམ་པས་ས་གནས་གཞུང་གི་དགེ་རྒན་དང་རྫོང་ཉེན་རྟོག་ལས་ཁུངས་ནང་ཆེད་ལས་ལག་རྩལ་པའི་ཕྱག་ལས་གནང་། དེ་བཞིན་མཚོ་སྔོན་བོད་ཡིག་གསར་འགྱུར༽དང་༼མཚོ་སྔོན་ཁྲིམས་ལུགས་ཚགས་པར༽གཉིས་ཀྱི་གསར་འགོད་པ་ཡང་བྱེད་མྱོང་ཡོད་འདུག

ཚེ་མགོན་རྒྱལ་ཁོང་བཙོན་གྲོལ་རྗེས་རྐང་ཚ་དཀྱིལ་དུ་བཟུང་བའི་མཚོ་བྱང་ས་ཁུལ་གྱི་དབང་བོ་སྐྱོན་ཅན་ལ་སེམས་ཤུགས་དར་སྤེལ་དང་ནུས་པ་བསྔོག་འདོན་གྱི་ལས་གཞི་ཞིག་འགོ་འཛུགས་གནང་ཡོད་ཅིང་། ཁོང་ལ་རྒྱ་ནག་གི་གསང་བའི་ལས་ཁུངས་སོགས་ཀྱིས་འགོག་རྐྱེན་མང་བོ་བཟོས་པར་བརྟེན་ནས་ཚོགས་པ་དེ་ས་གནས་གཞུང་ལ་རྩིས་སྤྲོད་བྱས་ཡོད་འདུག

ཁོང་གིས་ཕྱི་ལོ་༢༠༡༥ ལོ་ནི་མཚོ་སྔོན་པོའི་གནས་འདུས་ཡིན་པས། མདོ་དབུས་ཁམས་གསུམ་ནས་གནས་བསྐོར་ལ་ཕེབས་མཁན་རྒྱུན་མི་ཆད་པས། ཁོང་གིས་མཚོ་སྔོན་པོའི་ཁར་སྔར་རྒྱལ་དབང་ལྔ་བ་ཆེན་མོ་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས་དེར་གནས་བསྐོར་བར་༼ཏཱ་ལའི་སྐོམ་ཆུ་༽གཙོས་པའི་ཟས་རིགས་རིན་མེད་དུ་འགྱེད་པས།  མཇལ་བསྐོར་བ་ཡོངས་ལ་བོད་པའི་སྔ་སྲོལ་དྲི་མ་མེད་པར་བསྐྱར་དྲན་དང་ཕན་ཚུན་རོགས་རེས་ཀྱི་དགེ་ཕན་ལ་བསམ་བློ་གཏོང་བའི་ཕྱོགས་སུ་བསྐུལ་འདེད་ཐུབ་ཡོད།

འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། ༡༩༩༣ ལོར་མཚོ་སྔོན་ཞིང་ཆེན་གྱིས་ཚེ་མགོན་རྒྱལ། ཀླུ་མཁར་བྱམས་དང་གནམ་ལོ་ཡག་བཅས་འཛིན་བཟུང་གིས་ཆེད་ཞིབ་ཚོགས་ཆུང་བཙུགས་ཤིང་།  ཚོགས་གཙོ་ནི་སྐབས་དེའི་ཞིང་ཆེན་སྤྱི་བདེ་ཐིང་གི་འགོ་གཙོ། དྲག་ཆས་ཉེན་རྟོག་རུ་དཔུང་གི་ཆབ་སྲིད་སློབ་སྟོན་པ་དང་ཞིང་ཆེན་སྲིད་ཁྲིམས་ལྷན་ཚོགས་ཀྱི་དྲུང་ཆེ་བཅས་ཀྱི་འགན་འཁུར་བཞིན་པའི་ཐང་ཀྲིན་རིན( Tang Zhengren)རེད།    རྒྱ་དམར་མཐོ་རིམ་དཔོན་རིགས་ཡོངས་ལ་ཡོད་པའི་ཁྱད་ཆོས་གཅིག་ནི་དོན་དག་ཆེ་མ་ཆུང་གསུམ་གང་ཡིན་ཡང་ཛ་དྲག་བཟོས་ནས་དངུལ་དངོས་སློང་བ་དང་དཔོན་ས་སྤར་བྱེད་ཐད་བེད་སྤྱོད་གཏོང་གི་ཡོད་ཅིང་།  ཐང་ཀྲིན་རིན་ནི་དེའི་ཐད་བྱང་ཆ་ལྡན་མཁན་ཞིག་ཡིན་པས། དོན་རྐྱེན་འདི་ལམ་སང་ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་ཁབ་བདེ་འཇགས་ལྷན་ཁང་ལ་སྙན་བསྒྲོན་ཞུས་ནས་༼ཉེས་དོན་བརྩད་གཅོད༽འགྲོ་གྲོན་ལ་རྒྱ་སྒོར་ས་ཡ་གཅིག་རག་འདུག(སྐབས་དེའི་ས་ཡ་གཅིག་ནི་དེང་གི་འཛའ་ལ་ཕབ་ན་ཧ་ལམ་ས་ཡ་བཅུ་ལས་བརྒལ་ཡོད། )

ལོ་ཤས་རྗེས་ནས་རྒྱ་གཞུང་གིས་དོན་རྐྱེན་ཞིག་ལ་བརྟེན་ཏེ་ཐང་ཀྲིན་རིན་སོགས་ཀྱི་ལྐོག་ཟ་རུལ་སུངས་ལ་བརྩད་ཞིབ་བྱས་པས།  ཆེད་ཞིབ་ཚོགས་ཆུང་གི་ཚོགས་མི་གཅིག་གིས་རང་སྲོག་བཅད་ཡོད་པ་དང་ཕྱི་ལོ་༡༩༩༧ ལོར་ཐང་ཀྲིན་རིན་གྱི་གོ་སའང་ཤོར་འདུག ཡིན་ནའང་། ཐང་ཀྲིན་རིན་ལ་ཁྲིམས་ལྟར་རུལ་སུངས་བྱ་སྤྱོད་ལ་བརྩད་གཅོད་བྱས་མི་འདུག

སྐུ་ཞབས་ཚེ་མགོན་རྒྱལ་གྱི་ནང་མི་དང་གྲོགས་པོ་ཚོའི་སེམས་ཁྲལ་ཆེ་ཤོས་ནི༼ད་རེས་མཚོ་བྱང་དང་མཚོ་སྔོན་ཞིང་ཆེན་གྱི་གསང་བའི་ལས་ཁུངས་ཀྱི་དཔོན་རིགས་འདི་དག་གིས་རྒྱལ་ཁབ་བདེ་འཇགས་ཁ་ལ་ཁུར་ནས་ཡང་བསྐྱར་ཚེ་མགོན་རྒྱལ་མཆོག་དངུལ་བཟོ་བྱེད་དང་དཔོན་ས་སྤར་བྱེད་དུ་བཀོལ་སྤྱོད་གཏོང་སྲིད། ༽ ཚེ་མགོན་རྒྱལ་གྱི་བཙོན་གྲོགས་གནམ་ལོ་ཡག་གིས་བཤད་དོན། ༼ཞིས་ཅིན་ཕེན་གཞུང་གིས་དེང་སྐབས་དོན་གྱིས་ལྐོག་ཟ་རུལ་སུངས་ལ་རྡུང་རྡེག་གཏོང་གི་ཡོད་ན།   བོད་པ་ཆབ་སྲིད་བཙོན་མ་རེ་རེ་འཛིན་བཟུང་བྱས་པའི་རྒྱབ་ལོགས་ཀྱི་འགྲོ་གྲོན་ལ་ཞིབ་འཇུག་བྱོས་དང་།  སྟག་དང་སྦྲང་མ།   ད་དུང་ཝ་དང་ཁྱི།  སྤྱང་ཀི་སོགས་གང་མང་ཐོན་སྲིད་པར་ཡིད་ཆེས་གཙང་མ་ཡོད༽ཟེར།

གནམ་ལོ་ཡག་ལ་ད་དུང་ཡོད་པའི་སེམས་ཁྲལ་ནི༼སྔར་བཙོན་ཁང་དུ་ཚེ་མགོན་རྒྱལ་མཆོག་གིས་ཐེངས་མང་ཟས་བཅད་ངོ་རྒོལ་གནང་མྱོང་ཡོད་པས།  ད་རེས་མུ་མཐུད་དུ་ཟས་བཅད་ངོ་རྒོལ་གྱི་ལམ་ནང་ཞུགས་ཚེ་ཁོང་གི་ལུས་པོའི་བདེ་ཐང་གནད་དོན་ཆེན་པོ་ཞིག་ཆགས་ངེས།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཆབ་སྲིད་བཙོན་མའི་ཐོ་གཞུང་ལྟར་ན། ཕྱི་ལོ ༡༩༩༡ལོ་ནས་ཕྱི་ལོ  ༢༠༡༦  ལོ་བར་བོད་ནང་བསྡོམས་པས་ཆབ་སྲིད་བཙོན་མ་༥༠༠༡འཛིན་བཟུང་བྱས་ཡོད་ཅིང་།  ལྟེ་གནས་ཁང་དེས་རྒྱལ་སྤྱིའི་ཐོག་དང་རྒྱ་ནག་གཞུང་ལ་དགོས་འདུན་ཁག་བཞི་བཏོན་ཡོད་པ་དང་། ༡   སྐུ་ཞབས་ཚེ་མགོན་རྒྱལ་ལགས་འཛིན་བཟུང་བྱེད་རྐྱེན་ལམ་སང་ཕྱི་བསྒྲགས་ཀྱིས་ཁོང་གི་ནང་མི་ཐུག་འཕྲད་དང་ཁྲིམས་རྩོད་པ་བཙལ་བའི་ཁེ་དབང་ལ་སྲུང་བརྩི་བྱེད་དགོས།
༢ སྐུ་ཞབས་ཚེ་མགོན་རྒྱལ་གྱི་ལུས་སེམས་བདེ་ཐང་ལ་ཁག་ཐེག་བྱེད་དགོས།
༣  གལ་སྲིད་དགོས་མཁོ་ཡོད་ན།  སྐུ་ཞབས་ཚེ་མགོན་རྒྱལ་ལ་སྨན་པར་ཐུག་འཕྲད་དང་སྨན་བཅོས་ཀྱི་མཐུན་རྐྱེན་སྦྱོར་དགོས།
༤  སྐུ་ཞབས་ཚེ་མགོན་རྒྱལ་གང་མགྱོགས་གློད་གྲོལ་བྱེད་རྒྱུ་ལས་གསང་བའི་བཀག་ཉར་དང་ནག་ཉེས་བཀལ་མི་ཆོག
གསར་འགོད་པ་ཆོས་ཉིད་འོད་ཟེར།

 

Print Friendly, PDF & Email
Share on Facebook65Tweet about this on TwitterShare on Google+0Share on LinkedIn0Email this to someone
0 commentsViews: 273

Leave a Reply