ཕ་མེས་ཚོས་གང་བྱས་པ་དེ་རང་ལ་འཁོར་ན་རྒྱ་ཆེན་པོ་ཆགས་ཐུབ་ཀྱི་མ་རེད།

གནས་ཚུལ་མང་པོ་ཞིག་མཐོང་པའི་ཐོག་ནས་ཕྱོགས་བསྡོམས་བརྒྱབ་པ་ཡིན་ན་རྣམ་དཔྱོད་ཅན་ཆགས་ཐུབ་ཀྱི་ཡོད་པ་ལས་ཕ་མ་དང་མེས་པོ་ཚོས་གང་བྱེད་ཀྱི་ཡོད་པ་དེ་རང་ལ་བསྐོར་བ་བརྒྱབ་ནས་བསྡད་པ་ཡིན་ན་རྒྱ་ཆེན་པོ་ཆགས་ཐུབ་ཀྱི་མེད་ཅེས་༧གོང་ས་མཆོག་གིས་གསུངས་འདུག

ཟླ་འདིའི་ཕྱི་ཚེས་༩ ཉིན་གྱི་སྔ་དྲོར་༧གོང་ས་མཆོག་གིས་དྷ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་བོད་ནས་ཕེབས་པའི་དད་ལྡན་ཆོས་མཇལ་བ་དང་། སྨན་རྩིས་ཁང་མཐོ་སློབ། ལྷ་སྤྱི་ཚོགས་ཞབས་ཞུ་ཚོགས་པ། རིགས་ལམ་སློབ་གཉེར་ཁང་གི་སློབ་གཉེར་བ། གཞན་ཡང་རྒྱ་གར་བ་དང་འབྲུག་པ། ཧི་མ་ལ་ཡའི་རི་རྒྱུད་ཀྱི་མི་རིགས། ནུབ་ཕྱོགས་ཡུལ་གྲུ་ཁག་ནས་ཕེབས་པའི་མི་སྣ་ཁག་ཅིག་བཅས་ལ་མཇལ་ཁ་དང་བཀའ་སློབ་སྩལ་ཡོད་འདུག

དེ་ཡང་༧གོང་ས་མཆོག་གིས་བོད་ནས་གསར་དུ་འབྱོར་བ་རྣམས་ལ་བཀའ་སློབ་སྩལ་སྐབས་གསུང་དོན་དུ་“ཁྱོད་རང་ཚོ་བོད་ནས་ཡོང་བ་རེད། ངོས་ནས་རྒྱུན་དུ་བཤད་ཀྱི་ཡོད། བོད་ནང་གི་རྒྱ་ཆེའི་མི་མང་དེ་བོད་ཀྱི་དོན་གྱི་བདག་པོ་རེད། དུས་ད་ལྟ་བར་དུ་འཛམ་གླིང་འདིར་བོད་ཅེས་མངོན་ཐུབ་པའི་མ་རྩ་ལྟ་བུ་ནི་བོད་རྒྱ་ཆེའི་མི་མང་རེད། ཁྱོད་རང་ཚོས་སེམས་ཤུགས་རི་བཞིན་བཙུགས་ཧ་ཅང་བརྟན་པོ་བྱས་པ་རེད། ཞེད་སྣང་ཡོད་པ་རེད། སྲོག་གི་ཉེན་ཁ་ཡང་ཡོད་པ་རེད། དེ་ལྟ་བུའི་དཀའ་ངལ་གྱི་འོག་ནས་ཁྱོད་རང་ཚོ་མི་རིགས་ཀྱི་ཞེན་ཁོག་ཧ་ལས་པ་བྱས་ཏེ་བསྡད་འདུག དེ་བཞིན་སངས་རྒྱས་པའི་ཆོས་ལ་དད་པ་བྱེད་པ་དང་། བར་སྐབས་ནས་སློབ་གཉེར་བྱེད་རྒྱུ་ཡང་ཤུགས་ཆེ་རུ་ཆེ་རུ་འགྲོ་བ་ཞིག་ཆགས་ཀྱི་འདུག གང་ལྟར་གཞིས་ལུས་རྒྱ་ཆེའི་མི་མང་དེ་ང་ཚོ་བོད་ཀྱི་དོན་གྱི་བདག་པོ་རེད།”ཅེས་གསུངས་ཡོད་འདུག

དེ་བཞིན་ཁོང་གིས་འདས་པའི་ལོ་རྒྱུས་དང་འབྲེལ་ནས་བོད་ཀྱི་གནས་སྟངས་ཀྱི་སྐོར་ལ་གསུང་དོན་དུ་“འདས་པའི་ལོ་སྟོང་ཕྲག་རིང་ལ་ང་ཚོ་བོད་མི་རིགས་ཞེས་ཆབ་སྲིད་ཀྱི་སྒང་ལ་དར་རྒུད་སྣ་ཚོགས་ཤིག་བྱུང་ཡོད་ཀྱང་། མི་རིགས་དང་རིག་གཞུང་། སྐད་ཡིག་བཅས་འདས་པའི་ལོ་སྟོང་ཕྲག་གཉིས་ཙམ་རིང་བསྡད་པ་རེད། ང་ཚོས་ཆོས་རྒྱལ་མེས་དབོན་རྣམ་གསུམ་ཞེས་བརྗོད་པའི་དུས་ཚོད་ལ་བོད་དེ་ཨ་རིའི་གཙུག་ལག་སློབ་གྲྭ་ཆེན་མོའི་མཁས་པ་ཞིག་གིས་ཞིབ་འཇུག་བྱས་ཡོད་པ་རེད། གཙོ་བོ་རྒྱ་ཡིག་ལ་གཞི་བཞག་ནས་ཞིབ་འཇུག་བྱས་ཏེ་དེབ་ཅིག་བཏོན་འདུག དེའི་ནང་དུ་དུས་རབས་བདུན་པ་དང་བརྒྱད་པ། དགུ་པ་ལོ་སུམ་བརྒྱ་ལྷག་གི་རིང་དུ་ཨེ་ཤ་ཡའི་ནང་དུ་རྒྱལ་པོ་ཡོད་པའི་སྟོབས་ལྡན་རྒྱལ་ཁབ་གསུམ་འདུག རྒྱ་ནག་དང་སོག་པོ། བོད་བཅས་གསུམ་འདུག རྒྱ་ནག་གིས་ཆབ་སྲིད་ཀྱི་ཐོག་ལ་དོ་སྣང་ཆེན་པོ་བྱས་འདུག སོག་པོས་དམག་གི་ཐོག་ལ་དོ་སྣང་ཆེན་པོ་བྱས་འདུག བོད་ཀྱི་རྒྱལ་པོས་ཆོས་ཕྱོགས་ཀྱི་ཐོག་ལ་དོ་སྣང་ཆེན་པོ་བྱས་འདུག་ཅེས་ལོ་རྒྱུས་ཉམས་ཞིབ་བྱས་ཏེ་ཐོན་འདུག ངའི་ངོ་ཤེས་པའི་རྒྱ་མི་མཁས་དབང་ལོ་རྒྱུས་ལ་ཉམས་ཞིབ་བྱེད་མཁན་ཞིག་ཡོད། ངེད་གཉིས་ཚར་མང་པོ་ཐུག་པ་རེད། མཁས་དབང་གི་ཚོགས་འདུ་ཞིག་ལ་ཕེབས་ནས་སྐད་ཆ་བཤད་འདུག ཁོང་གིས་རྒྱ་ཡིག་གི་ཡིག་ཆའི་ནང་དུ་ཆོས་རྒྱལ་སྲོང་བཙན་སྒམ་པོའི་སྐབས་ཀྱི་རྒྱ་ནག་རྒྱལ་པོ་གོང་མ་ཐང་ནས་མར་མན་ཇུ་གོང་མ་བར་དུ་ལོ་བརྒྱ་ཕྲག་ཁ་ཤས་རིང་གི་རྒྱ་ཡིག་ཡིག་ཆའི་ནང་དུ་བོད་རྒྱ་ཁུངས་ཡིན་པ་མི་འདུག བོད་རྒྱ་ཁུངས་ཡིན་པའི་ཁུངས་སྐྱེལ་བའི་ཡིག་ཆ་དེ་ཚོ་བོད་ཀྱི་ཡི་གེ་རེད་ཅེས་ཟེར། ང་ཚོ་བོད་ཀྱི་མི་ཆེན་བླ་ཆེན་དེ་ཚོ་ནང་ཚགས་མ་འཆམ་པར་རྒྱ་ནག་གོང་མའི་རྒྱབ་སྐྱོར་བཙལ་ནས་རྒྱ་ནག་གོང་མའི་ལྷ་འབངས་ཡིན་ཟེར་བ་ལྟ་བུ་དང་། དཔེར་ན་སྐུ་མདུན་སྐུ་གོང་མའི་ཞལ་གདམས་ནང་དུ་དེ་ལྟ་བུ་ཞིག་ཡོང་བ་ཡོད། དབྱིན་ཇིའི་བཙན་འཛུལ་ཡོང་བའི་སྐབས་སུ་རྒྱ་ནག་ལ་ཕེབས་ནས་གོང་མ་ཡུམ་སྲས་ལ་བདེ་སྡུག་ཞུ་རུ་བཅར་བ་ཡིན་ཞེས་པ་ཞིག་མི་འདུག་གམ། དེ་སྔ་ངོས་ནས་དྲན་པ་དེ་༸རྒྱལ་མཆོག་བདུན་པ་བསྐལ་བཟང་རྒྱ་མཚོའི་སྐབས་སུ་དཔོན་པོ་མི་དབང་གིས་རྙོག་དྲ་ཅུང་བཟོས་པའི་སྐབས་སུ་རྒྱ་ནག་གོང་མ་ལ་འབྲེལ་བ་གནང་སྟེ། གོང་མས་ཁྲིམས་ཞིབ་པ་ལྟ་བུ་ཡར་བཏང་ནས་རྗེས་སུ་ང་ལུམ་སྦྱར་གསུམ་གསོད་པ་སོགས་བྱུང་བ་རེད། རྒྱ་མིས་དེས་བོད་རྒྱ་ཁུངས་ཡིན་པའི་སྒྲུབ་བྱེད་བཀོད་པ་དེ་ཚོ་གཙོ་བོ་གུང་ཁྲན་ཏང་དང་གོ་མིན་ཏང་གཉིས་ཀས་བོད་ཡིག་བེད་སྤྱོད་གཏོང་གི་འདུག རྒྱ་ཡིག་ནང་དུ་ཁྱོན་ནས་མི་འདུག་ཅེས་ཟེར།”ཞེས་དང་།

ཡང་ཁོང་གིས་སྐུ་ཕྱྭ་དང་འབྲེལ་ནས་གསུངས་དོན་དུ་“ངོས་རང་བཙན་བྱོལ་ལ་སླེབས་ནས་ལོ་༥༨ ཕྱིན་འདུག སྐུ་མདུན་༸སྐུ་གོང་མ་དགུང་ལོ་༥༨ བཞུགས་པ་རེད། ཕལ་ཆེར་སྐུ་མདུན་༸སྐུ་གོང་མའི་མི་ཚེ་ལྟ་བུ་ཞིག་ང་ཚོ་བཙན་བྱོལ་ལ་བསྡད་པ་རེད། ད་ལོ་༨༢ ལ་སླེབས་བསྡད་ཡོད། གཟུགས་པོ་ཧ་ཅང་ཡག་པོ་ཡོད། མཁྱེན་སོང་ངམ། བར་སྐབས་ནས་ཐང་ཆད་རྒྱུ་ཏོག་ཙམ་སྡུག་ཏུ་ཕྱིན་འདུག དེ་མ་གཏོགས་གཞན་གཟུགས་པོའི་མ་རྩ་ཡག་ཐག་ཆོད་ཡོད། ཁྱོད་རང་ཚོས་བློ་བདེ་པོ་བྱོས། རྒྱ་ནག་ལ་ག་ལེར་ག་ལེར་འགྱུར་བ་ཏན་ཏན་འགྲོ་གི་རེད་བསམ་གྱི་འདུག  ཞི་ཅིན་ཕིང་གིས་པེ་རི་སུ་དང་ལྡི་ལིར་ནང་པའི་ཆོས་དེ་རྒྱ་ནག་གི་རིག་གཞུང་ནང་དུ་གལ་ཆེན་པོ་ཞིག་ཡིན་ཞེས་བཤད་ཡོད་པ་རེད། ཞི་ཅིན་ཕིང་གིས་ཨ་མ་ནང་པ་རེད། ཁོ་རང་གི་བཟའ་ཟླ་དེའང་ནང་པ་ཡིན་པ་ལྟ་བུ་འདུག རྒྱ་ནག་ནང་དུ་དེང་སང་ནང་པ་ས་ཡ་བཞི་བརྒྱ་ལྷག་ཡོད་པ་བཤད་ཀྱི་འདུག ནང་པ་ཧ་ཅང་མང་པོ་འཕེལ་ཡོང་གི་འདུག དེར་བརྟེན་འགྱུར་བ་འགྲོ་བའི་རེ་བ་ཏན་ཏན་ཡོད་པ་རེད། ཁྱོད་རང་ཚོ་སེམས་ཤུགས་མ་ཆགས་པར་སེམས་སྐྱིད་པོ་སྡོད།”ཅེས་དང་།“ཆབ་སྲིད་ཀྱི་ཐོག་ནས་བཤད་ན་ང་ཚོར་རང་བཙན་དགོས་ཞེས་བཤད་ཀྱི་ཡོད་པ་མ་རེད། དེ་སྔ་ལོ་རྒྱུས་ཀྱི་ཐོག་ནས་ང་ཚོ་རང་བཙན་རེད། ཡིན་ནའང་འཛམ་གླིང་འགྱུར་བ་འགྲོ་བཞིན་ཡོད་པ་རེད། དེར་བརྟེན་ང་ཚོ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ནང་ཐོབ་ཐང་འདྲ་མཉམ་ཡོད་པ་བྱས་ཏེ་བསྡད་པ་ཡིན་ན་ང་ཚོ་ལའང་ཕན་གྱི་རེད། རྒྱ་ནག་དཔལ་འབྱོར་ཧ་ཅང་ཡག་པོ་ཡོད་པ་རེད། བོད་ལའང་དཔལ་འབྱོར་ཡར་རྒྱས་ཕྱིན་འདུག     དཔལ་འབྱོར་གྱི་ཐོག་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ནང་ལ་བསྡད་པ་ཡིན་ན་ང་ཚོར་ཁེ་ཕན་ཡོད་པ་རེད། ང་ཚོར་སྐད་ཡིག་མ་འདྲ་བ་ཡོད་པ་རེད། ཆོས་དང་རིག་གཞུང་གཏིང་ཟབ་ཅིག་ཡོད་པ་རེད། དེ་བཞིན་ང་ཚོའི་ཁོར་ཡུག་ཡག་པོ་ཞིག་སྲུང་སྐྱོབ་བྱེད་ཐུབ་པ་ཡིན་ན་ང་ཚོར་གཉིས་ཕན་རེད། རྒྱ་མི་ལ་ཆ་བཞག་ནའང་ཁ་བྲལ་འགྲོ་མི་དགོས་པར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ནང་ལ་བསྡད། ང་ཚོའི་བོད་ལ་ཆ་མཚོན་ནའང་དཔལ་འབྱོར་ཡོད་པ་དང་ཆོས་དང་རིག་གཞུང་སོགས་ལ་བདག་པོ་ཆ་ཚང་རྒྱག་ཐུབ་པ་བྱུང་ན་དེ་གཉིས་ཕན་རེད། ལོ་གཉིས་གསུམ་གྱི་གོང་ལ་བོད་ནང་གི་མི་ཞིག་གིས་ཡི་གེ་བྲིས་ཡོད་པ་ཞིག་ངོས་ཀྱིས་མཐོང་སོང་། ད་ལྟ་ཆབ་སྲིད་ཀྱི་ཐོག་ལ་རྒྱ་མིས་ང་ཚོར་དབང་བསྒྱུར་བསྡད་ཡོད་པ་རེད། མ་འོངས་པར་ཆོས་ཕྱོགས་ཀྱི་ཐོག་ནས་ང་ཚོ་བོད་པས་རྒྱ་ལ་ཕར་དབང་བསྒྱུར་ཐུབ་པ་ཞིག་ཡོང་གི་རེད་ཅེས་བྲིས་འདུག དེ་ལ་རྒྱུ་མཚན་མེད་པ་མ་རེད་ཡོད་པ་རེད།”ཅེས་དང་། སྐབས་དེར་༧གོང་ས་མཆོག་གིས་གནས་ཚུལ་མང་པོ་ཞིག་མཐོང་པའི་ཐོག་ནས་ཕྱོགས་བསྡོམས་བརྒྱབ་པ་ཡིན་ན་རྣམ་དཔྱོད་ཅན་ཆགས་ཐུབ་ཀྱི་ཡོད་པ་ལས་ཕ་མ་དང་མེས་པོ་ཚོས་གང་བྱེད་ཀྱི་ཡོད་པ་དེ་རང་ལ་བསྐོར་བ་བརྒྱབ་ནས་བསྡད་པ་ཡིན་ན་རྒྱ་ཆེན་པོ་ཆགས་ཐུབ་ཀྱི་མེད་པ་དང་། རིགས་ལམ་སློབ་ཐོན་པ་རྣམས་དང་ལྷ་སྤྱི་ཚོགས་ཞབས་ཞུ་ཚོགས་པ། སྨན་རྩིས་མཐོ་སློབ་གསུམ་ལ་བསྟོད་བསྔགས་ཀྱང་གནང་ཡོད་འདུག །

གསར་འགོད་པ་བཀྲ་ཤིས་དོན་གྲུབ།

Print Friendly, PDF & Email
Share on Facebook0Tweet about this on TwitterShare on Google+0Share on LinkedIn0Email this to someone
0 commentsViews: 236

Leave a Reply