བོད་ནང་གི་གངས་རུད་ལ་ཚན་རིག་པ་ཡ་མཚན་སྐྱེས་པ།

ཟླ་གཉིས་ནང་ཚུན་ལ་བོད་ནང་དུ་གངས་རུད་ཆེ་ཆུང་མི་འདྲ་བ་གཉིས་བྱུང་ཡོད་འདུག་པ་དང་། ཚན་རིག་པས་དེ་གཉིས་ནི་སྔོན་ཆད་བྱུང་མ་མྱོང་བ་ཡིན་པས་ཡ་མཚན་སྐྱེས་ཏེ་བརྟག་དཔྱད་བྱེད་བཞིན་ཡོད་འདུག
དེ་ཡང་ཟླ་འདིའི་ཚེས་༢༤ ཉིན་ཚན་རིག་དང་གནམ་གཤིས་འབྲེལ་བའི་བརྒྱུད་ལམ་ཁག་ཅིག་ཏུ་གནས་ཚུལ་སྤེལ་གསལ། འདི་ལོའི་ཟླ་༧ པའི་ཚེས༡༧ ཉིན་མའང་རིས་རུ་ཐོག་རྫོངས་ཁུལ་དུ་གངས་རུད་ཤུགས་ཆེན་ཞིག་བྱུང་ནས། གངས་དང་འཁྱགས་པ་ཤོ་གཟུགས་མི་ཊར་ས་ཡ་༦༥ ཙམ་སྤོ་ཤུད་ཐེབས་ནས། རྫི་བོ་༩ དང་སྒོ་ཕྱུགས་བརྒྱ་ཕྲག་ཁ་ཤས་བསད་ཡོད་པ་དང་། དེ་རྗེས་ཟླ་༩ པའི་ཚེས་༢༡ ཉིན་དེ་སྔོན་ས་ཁུལ་དེ་ནས་སྤྱི་ལེ་ཁ་ཤས་སར་གངས་རུད་ཤུགས་ཅུང་ཆུང་བ་ཞིག་བྱུང་ཡོད་འདུག
ཚན་རིག་པ་ཚོར་ཡ་མཚན་སྐྱེས་དགོས་དོན་གཙོ་བོ་ཞིག་ནི། གངས་རུད་དང་པོ་དེ་བྱུང་སྐབས་སུ་ཚ་གྲང་ནི་ཆ་སྙོམས་ཡིན་འདུག་པ་དང་། འཁྱགས་རོམ་དེ་ས་ཆ་ཁོད་སྙོམས་པོར་ཆགས་ཡོད་པས་ཡིན་འདུག ནོར་ཝེ་ཨོ་སེ་ལོའི་གཙུག་ལག་སློབ་གཉེར་ཁང་གི་འཁྱག་རོམ་ཞིབ་འཇུག་པ་ཨེན་ཌེ་རེ་ས་ཀབ་ཀྱིས། ཨ་རིའི་མཁའ་སྐྱོད་བཟོ་སྐྲུན་དང་བར་སྣང་ལས་དོན་ཁང་ལ། གངས་རུད་ཆེན་པོ་དེ་འདྲ་བྱུང་བ་དེ་སྤྱིར་བཏང་བ་ཞིག་མིན་པ། དེ་བཞིན་གངས་རུད་དེ་གཉིས་ས་ཐག་ཉེ་བའི་ས་ལ་བྱུང་བ་དེ་འདྲའི་རིགས་སྔོན་ཆད་བྱུང་མྱོང་མེད་སྐོར་འགྲེལ་བརྗོད་བྱས་ཡོད་འདུག
རྒྱལ་སྤྱིའི་འཁྱགས་རིམ་ཞིབ་འཇུག་པའི་ཚོགས་པ་ཁག་ཅིག་གིས། བོད་ནང་དུ་གངས་རུད་དང་པོ་དེ་བྱུང་རྗེས། དེའི་འབྱུང་རྐྱེན་བརྟག་དཔྱད་བྱས་ཡོད་འདུག་པ་དང་། ཁོ་ཚོའི་ཞིབ་འཇུག་ལྟར་ན། དེ་ནི་འཁྱགས་པ་མྱུར་པོའི་ངང་འཁྱགས་རོམ་གྱི་མགོ་ནས་མཇུག་ལ་བརྒྱུགས་པ་དང་། དེའི་རྐྱེན་གྱིས་འཁྱགས་རོམ་གྱི་ནང་དུ་ཆུ་བསགས་ནས། འཁྱགས་རོམ་གྱི་འཁྱགས་པའི་རྨང་གཞི་བརྟན་པོ་མེད་པ་ཆགས་ནས་རྡིབ་ཡོད་པར་ཚོད་དཔག་བྱས་ཡོད་འདུག དེ་རྗེས་ཟླ་༩ པའི་ཚེས་༢༡ ཉིན་ཚན་རིག་པ་ཚོས་བོད་ནང་དུ་གངས་རུད་གཉིས་པ་ཞིག་འབྱུང་ཉེན་ཡོད་པ་ཤེས་ཏེ། རྒྱ་ནག་ལ་ཉེན་བརྡ་བཏང་འདུག་ཀྱང་། ཉིན་དེ་ལ་གངས་རུད་གཉིས་པ་དེ་བྱུང་ཡོད་འདུག
ཚན་རིག་པ་ཚོས་ཉེན་བརྡ་དེ་རྗེས་ལུས་ཐེབས་ཡོད་ཀྱང་། དེ་ལས་ཚན་རིག་པ་ཚོས་གངས་རུད་ཀྱི་འབྱུང་རྐྱེན་ལ་ཤེས་རྟོགས་ཆེ་རུ་འགྲོ་བཞིན་ཡོད་པས། མ་འོངས་པར་སྔོན་ཚུད་ནས་གྲ་སྒྲིག་བྱེད་ཐུབ་པ་ཡོང་སྲིད་སྐོར་བརྗོད་འདུག དེ་བཞིན་སྐུ་ཞབས་ཨེན་ཌེ་རེ་ས་ཀབ་ཀྱིས་གངས་རུད་དེ་གཉིས་བར་ལ་འབྲེལ་བ་གང་ཡོད་སྐོར་དཔང་རྟགས་ཁུངས་བཙན་མེད་ཀྱང་། བོད་ནང་གི་གནམ་གཤིས་འགྱུར་ལྡོག་དེ་འབྱུང་རྐྱེན་ཞིག་ཡིན་སྲིད་སྐོར་བརྗོད་འདུག །
གསར་འགོད་པ་སྐལ་བཟང་དོན་གྲུབ།

Share on Facebook13Tweet about this on TwitterShare on Google+0Share on LinkedIn0Email this to someone
0 commentsViews: 248

Leave a Reply