ཝཱ་ཎ་བོད་ཀྱི་གཙུག་ལག་སློབ་གཉེར་ཁང་ལོ་༥༠ འཁོར་བ།

ཟླ་འདིའི་ཚེས་༡ ཉིན་སྤྱི་ནོར་༸གོང་ས་མཆོག་དབུ་བཞུགས་ཐོག་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གསར་འཛུགས་བྱས་ནས་མི་ལོ་ཧྲིལ་པོ་༥༠ འཁོར་བའི་དུས་དྲན་མཛད་སྒོ་གཟབ་རྒྱས་ངང་སྲུང་བརྩི་བྱས་ཡོད་པ་རེད།

དུས་དྲན་མཛད་སྒོའི་ཐོག་སྲིད་སྐྱོང་བློ་བཟང་སེང་གེ་དང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ།  དགའ་ལྡན་ཁྲི་རིན་པོ་ཆེ། བཀའ་བློན་ཁྲི་ཟུར་མཁས་དབང་སློབ་དཔོན་ཟམ་གདོང་རིན་པོ་ཆེ། སི་ཀིམ་མངའ་སྡེའི་སྲིད་སྐྱོང་ཟུར་པ་སྐུ་ཞབས་བྷི་པི་སིངྒ་། ཁྲ་འགུ་རིན་པོ་ཆེ་སོགས་སྐུ་མགྲོན་དུ་ཕེབས་ཡོད་པ་རེད།
སྐབས་དེར་ཐོག་མར་གཙུག་ལག་སློབ་ཁང་གི་རིགས་བདག་དགེ་བཤེས་ངག་དབང་བསམ་གཏན་གྱིས་ངོ་སྤྲོད་ཀྱི་གསུང་བཤད་གནང་རྗེས་༸གོང་ས་མཆོག་གིས་གཙུག་ལག་སློབ་ཁང་གི་དཔེ་སྐྲུན་ཚན་པས་པར་སྐྲུན་ཞུས་པའི་དཔེ་དེབ་ཁག་གཅིག་དབུ་འབྱེད་དང་། སློབ་ཟུར་ཡོངས་ནས་༸གོང་ས་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་འབུལ་ལམ་ཞུས་ཡོད་པ་རེད། དེ་བཞིན་བཀའ་བློན་ཁྲི་ཟུར་སློབ་དཔོན་མཁས་དབང་ཟམ་གདོང་རིན་པོ་ཆེ་ལ་བཀའ་དྲིན་རྗེས་དྲན་གྱི་གཟེངས་རྟགས་དང་། གཙུག་ལག་སློབ་གྲྭའི་སློབ་དཔོན་ཆེན་མོ་ཁག་གཅིག་ལའང་ཆེ་བསྟོད་དང་བཀའ་དྲིན་རྗེས་དྲན་གྱི་གཟེངས་རྟགས་ཕུལ་ཡོད་པ་རེད།
མཛད་སྒོའི་ཐོག་༸གོང་ས་མཆོག་གིས་བཀའ་སློབ་བསྩལ་དོན། “སྔོན་ལ་རིམ་པ་དང་པོ་འདིར་སློབ་གཉེར་ཁང་འདི་འདྲ་ཞིག་བཙུགས་ནས་གྲུབ་འབྲས་འདི་ཙམ་ཞིག་ཐོན་ཡོད། ཉིན་གཅིག་དང་ལོ་གཅིག་ནང་བསྒྲུབ་ཐུབ་རྒྱུ་མ་རེད། ལོ་མང་པོའི་རིང་ལ་འབད་བརྩོན་བྱས་ནས་དེ་ཁོངས་ནས་མི་མང་པོ་ཞིག་འདས་གྲོངས་སུ་གྱུར་ཟིན་ཡོད། དེར་བརྟེན་མི་རབས་ནས་མི་རབས་འབད་བརྩོན་སྙིང་སྟོབས་སྐྱེས་པའི་འབྲས་བུ་རེད། དེ་འདྲ་ཡིན་སྟབས་འདས་པོ་ཚོའང་དྲན་གསོ་བྱ་དགོས་པ་རེད། ད་ལྟ་ཡོད་པ་ཚོས་ཀྱང་ཧུར་ཐག་གནང་བཞིན་ཡོད། ཐུགས་རྗེ་ཆེ་ཟེར་གྱི་ཡིན་”ཞེས་བཀའ་སློབ་གནང་།

༧གོང་ས་མཆོག་གིས་ལོ་གསར་པ་དང་འབྲེལ་ནས་བཀའ་སློབ་གནང་དོན། “ཕྱི་ལོ་༢༠༡༨ ཟླ་༡ ཚེས་༡ རེད། སྤྱིར་སྟངས་ང་ཚོས་ལོ་བརྩི་བཞིན་པ་དེར་བཏགས་དོན་བཙལ་ན་རྙེད་རྒྱུ་གང་ཡང་མེད།  འོན་ཀྱང་འཇིག་རྟེན་གྲགས་པའི་སྒོ་ནས་ཞག་དང་ཟླ་བ། ལོ་ཞེས་ཤོད་བཞིན་ཡོད། དེར་བརྟེན་འཇིག་རྟེན་གྲགས་པའི་སྒོ་ནས་དེ་རིང་ལོ་གསར་པ་རེད།  དུས་ཚོད་ནི་རྟག་ཏུ་འགྱུར་བཞིན་ཡོད། དེ་དང་ཆབས་ཅིག་དངོས་ཡོད་གནས་སྟངས་ཡང་འགྱུར་བཞིན་ཡོད།  ལོ་གསར་པ་འགོ་འཛུགས་བཞིན་ཡོད། ང་ཚོས་ལོ་འདིའི་ནང་གནས་ཚུལ་གསར་པ་གང་འདྲ་ཞིག་ཡོང་བཞིན་འདུག དེ་དང་བསྟུན་ནས་འབད་བརྩོན་བྱ་རྒྱུ་ཧ་ཅང་གལ་ཆེན་པོ་རེད། གཉིས་ནས་ང་ཚོ་ནི་མི་རེད། བྱ་རི་དྭགས་དུད་འགྲོའི་རིགས་ལ་དུས་ཚོད་འགྱུར་བ་གཏོང་རྒྱུའི་ནུས་པ་གང་ཡང་མེད། ང་ཚོ་མིར་དུས་ཚོད་དང་བསྟུན་ནས་བསམ་བློ་བཏང་སྟེ་ཐབས་ཤེས་འདི་འདྲ་ཞིག་བྱས་ན་གྲུབ་འབྲས་འདི་འདྲ་ཞིག་ཡོང་སྲིད་པ་རེད་བསམས་པ་དེ་ང་ཚོ་མིས་བྱེད་ཐུབ་རྒྱུ་རེད། དེར་བརྟེན་ལོ་གསར་པ་འདིའི་ནང་ད་ཆ་ང་ཚོར་བྱ་རྒྱུ་གང་འདུག འཆར་ཅན་ལྟ་བུ་བྱས་ནས་ཆུ་ཚོད་བསྐོར་བ་བརྒྱབ་པ་ལྟར་མིན་པར་བསམ་བློ་གསར་པ་གཏོང་རྒྱུ་འདི་ཧ་ཅང་གལ་ཆེན་པོ་རེད། གལ་ཆེ་ཤོས་དེ་ང་ཚོས་ཀླད་པ་དཀྲུག་རྒྱུ་རེད།  ཀླད་པ་འཐོམ་ནས་མ་བསྡད་པར་འཆར་ཅན་ལྟ་བུ་མིན་པར་ཀླད་པ་དཀྲུག་དགོས། ཀླད་པ་དཀྲུག་པར་ཕྱོགས་ཡོངས་ཀྱི་གནས་ཚུལ་ཤེས་པ་བྱ་རྒྱུ་ཧ་ཅང་གལ་ཆེན་པོ་རེད། ཕྱོགས་གཅིག་གི་གནས་ཚུལ་ཁོ་ན་མིན་པར་ཕྱོགས་མང་པོར་བསམ་བློ་བཏང་བ་ཡིན་ན་ང་ཚོའི་ཀླད་པར་དམིགས་བསལ་གྱི་ནུས་པ་ཞིག་ཡོད་”ཅེས་གསུངས་སོང་།

ཁོང་གིས་མུ་མཐུད་གསུང་དོན། “ཕྱོགས་ཡོངས་ཀྱི་གནས་ཚུལ་རྟོགས་པའི་ཐོག་ནས་ཕན་པའི་ངོ་བོར་འགྲོ་རྒྱུ་དེ་ཀླད་པ་གཅིག་པུས་བྱ་ཐབས་མེད། ལྷག་བསམ་དགོས།   རྣམ་དཔྱོད་ཀྱི་ཤེས་རབ་དང་ལྷག་བསམ་གཉིས་ཟུང་དུ་འབྲེལ་ནས་འགྲོ་དགོས་པ་དེ་ཧ་ཅང་གལ་ཆེན་པོ་རེད། དེ་རིང་ཁ་སང་འཛམ་གླིང་སྒང་གི་རྙོག་གྲ་ལུང་པ་གང་ཡོད་པ་དེ་དག་མིའི་རྣམ་དཔྱོད་ཀྱི་ཐོག་ནས་ཕལ་ཆེར་ཡོང་བཞིན་ཡོད།  ལྷག་བསམ་བཟང་པོས་མ་འདང་བར་རྣམ་དཔྱོད་གཅིག་པུས་ཐོག་ནས་འགྲོ་སྐབས་འཕྲལ་སེལ་མིག་རྒྱང་ཐུང་ཐུང་གི་བསམ་བློ་བཏང་ནས་འགྲོ་སྐབས་རྙོག་གྲ་མང་པོ་ཞིག་ཡོང་བཞིན་ཡོད།  དེར་བརྟེན་རྣམ་དཔྱོད་ཀྱི་ཤེས་རབ་དང་གཞན་ཕན་གྱི་ལྷག་བསམ་གཉིས་ཟུང་དུ་འབྲེལ་དགོས་པ་ཧ་ཅང་གལ་ཆེན་པོ་རེད་”ཅེས་གསུངས་སོང་།

༧གོང་ས་མཆོག་གིས་ལས་དོན་ཧུར་ཐག་དགོས་སྐོར་དང་འབྲེལ་གནས་བཀའ་སློབ་བསྩལ་དོན།  “ངོས་རང་ཡང་ཉི་མ་དང་ཟླ་བ་ལོ་བྱས་ནས་འགྲོ་དགོས། ཁྱེད་རང་ཚོས་ཀྱང་ཉི་མ་དང་བདུན་ཕྲག  ཟླ་བ་ལོ་བྱས་ནས་འགྲོ་དགོས། ཕྱི་ལོ་༢༠༡༩ སླེབ་སྐབས་ཕྱི་ལོ་༢༠༡༨ ལོ་དེ་ངས་དོན་དང་ལྡན་པ་ཞིག་བྱས་འདུག་བསམས་པ་བྱུང་ན་སྐྱིད་པོ་ཡོད། དེ་མིན་ལོ་དེ་འཕྲོ་བརླག་ཕྱིན་སོང་བསམས་པ་དང་། སྡུག་ས་ནས་བཤད་ན་ལོ་དེར་རྙོག་གྲ་ཁོ་ན་བཟོས་ནས་ཕྱིན་པ་ཡིན་ན་ཧ་ཅང་ཐབས་སྐྱོ་པོ་རེད། དེར་བརྟེན་ང་ཚོས་ལོ་གསར་པ་འདིར་དངོས་གནས་དོན་དང་ལྡན་པ་ཞིག་བྱ་རྒྱུ་ཡིན་བསམས་ནས་ལོ་རྗེས་མ་སླེབ་སྐབས་བློ་བདེ་པོ་བྱ་རྒྱུ་ཞིག ངས་འདས་པའི་ལོ་དེ་དོན་དང་ལྡན་པའི་མི་ཚེ་བསྐྱལ་བ་ཡིན་བསམས་པ་ཞིག་བྱུང་ན་ཡག་པོ་ཡོད་”ཅེས་བཀའ་སློབ་བསྩལ་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

 

Print Friendly, PDF & Email
Share this: