རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་དབུ་འཛུགས།

རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་ནི། ཡོ་རོབ་ཁུལ་དུ་ཡོད་པའི་བོད་ཀྱི་གཞོན་རབས་པ་བོད་རང་བཙན་སླར་གསོའི་ལངས་ཕྱོགས་འཛིན་མཁན་ཁག་ཅིག་གིས་གོ་སྒྲིག་འོག ཕྱི་ལོ་༢༠༡༧ ལོའི་ཟླ་༨ ཚེས་༢༡ ཉིན་དབུ་འཛུགས་བྱས་ནས་ཕྱི་ཚེས་༢༣ བར་ཉིན་གསུམ་གྱི་རིང་ཡུ་རོབ་ཀྱི་རྒྱལ་ཁབ་ཧྥ་རན་སིའི་རྒྱལ་ས་པེ་རི་སིར་འཚོགས་བཞིན་ཡོད་པ་རེད།

དེ་ཡང་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་འདིར་བོད་མི་མང་སྤྱི་འཐུས་ཁག་ཅིག་དང་། སྤྱི་ཟུར་ཁག་ཅིག དེ་བཞིན་འཛམ་གླིང་ཤར་ནུབ་གང་སར་བཞུགས་པའི་བོད་རང་བཙན་སླར་གསོ་དགོས་པའི་ལངས་ཕྱོགས་འཛིན་མཁན་བཅས། ཉིན་དང་པོར་ཚོགས་ཞུགས་མི་སྣ་༡༤༠ ཙམ་འཛོམས་ཡོད་ཚུལ་ས་གནས་ནས་གོ་སྒྲིག་ཚོགས་མི་ཞིག་གིས་བརྗོད་སོང་། དེ་བཞིན་རྒྱ་རིགས་སོགས་མི་རིགས་གཞན་གྱི་སྐུ་མགྲོན་ལངས་ཕྱོགས་གཅིག་པ་ཁག་ཅིག་ཀྱང་སྐབས་འདིར་ཕེབས་ཡོད་འདུག

དེ་བཞིན་རྒྱལ་སྤྱིའི་བོད་རང་བཙན་ཚོགས་ཆེན་གྱི་བྱུང་བ་མདོར་བསྡུས་ཙམ་ཚོགས་ཆེན་ཐེངས་བཞི་པའི་ཚོགས་འདུ་གོ་སྒྲིག་ཚོགས་ཆུང་གི་ངོ་དེབ་ཏུ་གསལ་བ་ལས་སྙིང་བསྡུས་ཀྱིས་ངོ་སྤྲོད་ཞུས་ན། རྒྱལ་སྤྱིའི་བོད་རང་བཙན་ཚོགས་ཆེན་འདི་ནི་བོད་རང་བཙན་སླར་གསོའི་ལངས་ཕྱོགས་འཛིན་མཁན་གྱི་བོད་མི་ཚོས་མ་སྐུལ་དང་བླངས་ཐོག་བཀོད་སྒྲིག་བྱས་པའི་བོད་ཀྱི་རྩ་དོན་ཐད་ལངས་ཕྱོགས་གཅིག་པའི་མང་ཚོགས་ཀྱི་བསམ་ཚུལ་བགྲོ་གླེང་བྱེད་སའི་སྤྱི་ཚོགས་རང་བཞིན་ཅན་གྱི་སྡིངས་ཆ་ཞིག་ཡིན།

ཚོགས་ཆེན་འདིའི་ཐོག་མའི་ཡོང་ཁུངས་ནི་ཕྱི་ལོ་༢༠༡༢ ལོའི་ཟླ་༧ པའི་ཚེས་༢༧ ཉིན་བཙན་བྱོལ་བོད་གཞུང་གི་བསྟི་གནས་གངས་ཅན་སྐྱིད་གཤོངས་བོད་ཀྱི་དཔེ་མཛོད་ཁང་གི་ཚོགས་ཁང་དུ་འཚོགས་ཡོད་པ་དང་། སྐབས་དེར་ཚོགས་ཞུགས་པ་བཀའ་བློན་ཁྲི་ཟུར་བསོད་ནམས་སྟོབས་རྒྱལ་(དེང་སྐབས་གཤེགས་ཟིན)དང་། བོད་མི་མང་སྤྱི་འཐུས་ཚོགས་གཙོ་ཟུར་པ་ཀརྨ་ཆོས་འཕེལ་(དེང་སྐབས་གཤེགས་ཟིན)གྱིས་དབུས་སྤྱི་འཐུས་ལས་ཐོག་བཅུ་དང་། བོད་དོན་རྒྱབ་སྐྱོར་བ་ཝི་ཇེ་ཀ་རན་ཏི། བོད་རང་བཙན་འཐབ་རྩོད་པ་ལྷ་བཟང་ཚེ་རིང་དང་། འཇམ་དབྱངས་ནོར་བུ། ཤིང་བཟའ་རིན་པོ་ཆེ། རྒན་བསོད་ནམས་དབང་འདུས། བསྟན་འཛིན་བརྩོན་འགྲུས་སོགས་ཀྱིས་དབུས་དུས་རྒྱུན་རང་བཙན་དོན་གཉེར་མཁན་མི་གྲངས་ལྔ་བཅུ་མ་ཟིན་ཙམ་ཚོགས་ཞུགས་བྱས་ནས། བོད་ཀྱི་རང་དབང་རང་བཙན་འཐབ་རྩོད་དང་འབྲེལ་བའི་བགྲོ་གླེང་གནང་ཡོད་པ་རེད། (ཚོགས་འདུ་འདི་ལ་དང་པོ་རྒྱལ་སྤྱིའི་བོད་རང་བཙན་ཚོགས་ཆེན་ཟེར་གྱི་མེད་ཀྱང་། ད་ལྟའི་རྒྱལ་སྤྱིའི་བོད་རང་བཙན་ཚོགས་ཆེན་གྱི་མགོ་ཁུངས་ལྟ་བུ་ཆགས་ཡོད་པར་བརྟེན། རྒྱལ་སྤྱིའི་བོད་རང་བཙན་ཚོགས་ཆེན་ཐེངས་དང་པོར་ངོས་འཛིན་བྱས་འདུག།)

རྒྱལ་སྤྱིའི་བོད་རང་བཙན་ཚོགས་ཆེན་ཐེངས་གཉིས་པ་ནི་ཕྱི་ལོ་༢༠༡༥ ལོའི་ཟླ་༥ ཚེས་༢༣ ནས་ཉིན་གཉིས་རིང་རྒྱ་གར་གྱི་རྒྱལ་ས་ལྡི་ལི་གསར་པའི་རྒྱལ་སྤྱིའི་ཚོགས་ཁང་དུ་འཚོགས། རྒྱལ་སྤྱིའི་བོད་རང་བཙན་གྱི་ཚོགས་ཆེན་འདི་ཡང་བོད་མི་སྒེར་པ་ཁག་ཅིག་གིས་གོ་སྒྲིག་བྱས་ཤིང་སྐབས་དེར་ཚོགས་ཞུགས་པ་མི་གྲངས་༡༠༠ ཙམ་འཛོམས་ཡོད་པ་དང་། ཚོགས་ཆེན་ཐོག་བོད་རང་བཙན་འཐབ་རྩོད་དང་འབྲེལ་བའི་བརྗོད་གཞི་འདྲ་མིན་ཐོག་ནང་ཁུལ་བགྲོ་གླེང་གྲོས་བསྡུར་བྱས་པ་དང་། བོད་མི་དང་རྒྱ་གར་བ་བཅས་འདུ་འཛོམས་ཐོག་རྒྱ་གར་གྱི་མཁས་དབང་ཁག་ཅིག་གིས་བོད་དོན་དང་འབྲེལ་བའི་གཏམ་བཤད་ཀྱང་བྱས་ཡོད་པ་རེད། སྐབས་དེར་དོན་ཚན་བཞི་ཅན་གྱི་བསྒྲགས་གཏམ་ཞིག་ཀྱང་སྤེལ་ཡོད་པ་རེད།

རྒྱལ་སྤྱིའི་བོད་རང་བཙན་ཚོགས་ཆེན་ཐེངས་གསུམ་པ་ནི། ཕྱི་ལོ་༢༠༡༦ ཟླ་༧ ཚེས་༣ ནས་ཉིན་གསུམ་གྱི་རིང་ཨ་རིའི་ནིའུ་ཡོག་ཏུ་ཡོད་པའི་བོད་མི་རང་བཙན་དོན་གཉེར་བ་ཁག་ཅིག་གིས་གོ་སྒྲིག་འོག་འཚོགས་ཡོད་པ་དང་། ཚོགས་ཆེན་ཐོག་རང་བཙན་ལྟ་གྲུབ་འཛིན་མཁན་མི་གྲངས་༡༠༠ ལྷག་མཉམ་ཞུགས་ཀྱིས་རྒྱལ་སྤྱིའི་སྡིངས་ཆའི་སྟེང་བོད་རང་བཙན་གྱི་ལངས་ཕྱོགས་ཐོག་ནས་གོམ་པ་མདུན་བསྐྱོད་གནང་རྒྱུས་གཙོས་རང་བཙན་འཐབ་རྩོད་རྒྱུན་གནས་ཡོང་ཆེད་གྲོས་ཆོད་དོན་ཚན་དྲུག་གཏན་འབེབས་དང་སྦྲགས། མ་འོངས་པར་བཅའ་ཁྲིམས་ནང་ཆབ་སྲིད་ཚོགས་པའི་ལམ་ལུགས་གཏན་འབེབས་དགོས་པའི་དགོས་འདུན་བཏོན་ཡོད་པ་རེད།

ད་ལན་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་བཞི་པ་དེ་ཉིད་ཧྥ་རན་སིའི་རྒྱལ་ས་པེ་རི་སིར་འཚོགས་བཞིན་པའི་གནས་ཚུལ་རྒྱས་པ་རྗེས་སུ་རིམ་པས་འགོད་འགྲེམས་ཞུ་རྒྱུ་ཡིན།

གསར་འགོད་པ་བཀྲ་ཤིས་དོན་གྲུབ།

Print Friendly, PDF & Email
Share on Facebook0Tweet about this on TwitterShare on Google+0Share on LinkedIn0Email this to someone
0 commentsViews: 1077

Leave a Reply