ལོ་༡༡༣ ཞེས་པའི་གྲངས་ཀའི་འོག་གི་འཁྲབ་སྟོན་ཆེན་མོ།

ངོ་སྤྲོད།

ཆབ་སྲིད་བཙོན་ཟུར་དང་༢༠༡༦ ལོའི་སྲིད་སྐྱོང་འོས་མི་ཀླུ་མཁར་བྱམས་ཀྱིས་ཨེ་ལིའོ་སུ་པ་ལིང་Elliot Sperling རྗེས་དྲན་གྱི་དོན་དུ་ཁ་བྱང་དུ་” ལོ་༡༡༣ ལ་བཞུགས་དགོས་པའི་མི་དེ་ཁྱེད་ཡིན་” ཞེས་པའི་རྩོམ་ཞིག་བྲིས་པ་དེའི་སྔ་ཕྱི་བར་གསུམ་དུ་༧གོང་ས་མཆོག་གི་མཚན་ཙམ་བརྗོད་མེད་ན་ཡང་། མགོ་བདེ་དྲན་འཕྲུལ་ཅན་རེ་འགས་རྩོམ་དེ་རྣོ་ངར་ཅན་གྱི་ལག་ཆ་ཞིག་ལ་མཐོང་བ་དང་། དེ་ནི་༧སྐུ་མདུན་ལ་ཟུར་ཟ་ཞུས་པ་ཡིན་པའི་དཀྲོག་གཏམ་རྫིག་པོ་རེ་དང་། འགྲེལ་བཤད་སྙིང་རྗེ་མོ་རེ་བརྒྱབ་པའི་རྐྱེན་གྱིས། རྩོམ་དེས་བོད་ཕྱི་ནང་གཉིས་ཀྱི་ཀློག་པ་པོ་ཧ་ཅང་མང་པོའི་དོ་སྣང་དྲངས་ནས་སྤྱི་ཚོགས་བརྡ་འཕྲིན་བརྒྱུད་ལམ་ཐོག་བགོ་འགྲེམས་དང་ཀློག་གྲངས་མང་ཤོས་ཀྱི་རྩོམ་ཡིག་ཅིག་ཏུ་གྱུར།

གསལ་བཤད།

ངས་འདིར་ཀླུ་བྱམས་ཀྱི་རྗེས་དྲན་རྩོམ་ཡིག་དེ་༧གོང་ས་མཆོག་ལ་ཟུར་ཟ་ཞུས་པ་ཡིན་པའི་དབང་དུ་བཏང་ནས་ཚིག་ཕྲེང་འགའ་འབྲི་བར་འདོད། ཡིན་ན་ཡང་གསར་འགོད་གསལ་བསྒྲགས་དང་། ས་ཡིག་བསྡུ་རུབ་ཀྱིས་མཚོན་པའི་ལས་འགུལ་ཛ་རེ་ཛོ་རེ་དག་ནི་དོན་མེད་དང་འབྲས་མེད་ཡིན་པས་རེ་ཞིག་གླེང་བར་མི་བྱ། སྐབས་སུ་བབ་པའི་གླེང་གཞི་གཙོ་བོ་ནི་གནས་རིམ་མི་འདྲ་བའི་རང་གཞུང་གི་མཛད་གཙོ་རྣམ་པ་གསུམ་གྱིས་རྩོམ་པ་པོ་དང་རྩོམ་ཡིག་གཉིས་ལ་རྒོལ་བའི་གཏམ་བཤད་སྤེལ་བའི་ཡུལ་དུས་དང་བྱུང་རིམ་ལ་བརྟག་དགོས་པ་དེ་རེད།

བཀའ་ཟུར་འབྲོང་ཆུང་དངོས་གྲུབ།

ཀླུ་མཁར་བྱམས་ཀྱིས་༢༠༡༧ ལོའི་ཟླ་བ་༠༡ ཚེས་༠༥ ལ་རྩོམ་ཡིག་དེ་ཁོ་རང་སྒེར་གྱི་ངོ་དེབ་ཐོག་ལ་སྤེལ་བ་རེད། དེ་སྤེལ་ནས་བདེ་སྲུང་བཀའ་ཟུར་འབྲོང་ཆུང་དངོས་གྲུབ་ཀྱིས་བོད་ཀྱི་ལོ་གསར་ཚེས་གཅིག་སྟེ། སྤྱི་ཟླ་༠༢ པའི་ཚེས་༢༧ ལ་གཏམ་བཤད་མ་སྤེལ་བར་དུ་ཕྱི་ནང་གི་སྤྱི་ཚོགས་ནང་དུ་རྩོམ་ཡིག་དེའི་སྐོར་ལ་བཟང་ངན་གཉིས་ཀའི་ཐོག་ནས་ཟླ་བ་གཉིས་མ་ཟིན་ཙམ་གྱི་རིང་ལ་ལབ་གླེང་ཧ་ཅང་མང་པོ་ཞིག་བྱས་པ་དང་། མང་པོ་ཞིག་ཐང་ཆད་ནས་གླེང་མཚམས་བཞག་ལ་ཉེ་སྐབས། སྐུ་ཞབས་འབྲོང་ཆུང་དངོས་གྲུབ་ཀྱིས་རྡི་ལིའི་བོད་ཀྱི་ལོ་གསར་ཚེས་པ་གཅིག་གི་མཉམ་འཛོམས་ཀྱི་ཚེས་བཟང་དུས་བཟང་དེ་བེད་སྤྱད་ནས་༧བཀྲ་མི་ཤིས་པའི་ནང་འཁྲུག་གི་གཏམ་བཤད་དེ་སྤེལ་བ་རེད། དེ་ནི་འཆི་བཞིན་པའི་མེ་རོའི་སྒང་ལ་ཤིང་སྐམ་སྤུངས་པ་དང་སྣུམ་བླུགས་པ་ལྟར་གྱུར་ནས་མེ་དེ་རྨང་ནས་སླར་ཡང་གསོས་བ་རེད། མ་གཞི་༧སྐུ་མདུན་ལ་རྒྱབ་སྐྱོར་ཞུ་བ་དང་ཀླུ་བྱམས་ལ་དགག་པ་རྒྱབ་པའི་གཏམ་བཤད་དེ་སྤེལ་བར་ཟླ་བ་གཉིས་མ་ཟིན་ཙམ་དང་། དེ་ཡང་བོད་ཀྱི་ལོ་གསར་ཚེས་གཅིག་བར་དུ་བསྒུགས་པ་ནི། ཡུལ་དུས་གནས་སྐབས་གང་ལ་བསམས་ན་ཡང་ཡ་མཚན་རེད། འབྲོང་ཆུང་གི་ཀླུ་དགག་གཏམ་བཤད་དེ་སྤྱི་ཚོགས་དྲ་ལམ་ཐོག་ཁྱབ་བརྡལ་གང་ཙམ་ཡག་པོ་ཕྱིན་པ་དང་། དེས་གཞན་ལ་སྐུལ་མ་བྱས།

དྲུང་འཕར་ཀུན་དགའ་བཀྲ་ཤིས།

འབྲོང་ཆུང་དང་འདྲ་བར་བྱང་ཨ་རིའི་རྒྱ་རིགས་འབྲེལ་མཐུད་པ་སྐུ་ཞབས་ཀུན་དགའ་བཀྲ་ཤིས་ལགས་ཀྱིས་ཀྱང་རྩོམ་དེ་སྤེལ་ནས་ཟླ་བ་གཉིས་མ་ཟིན་ཙམ་གྱི་རྗེས་དང་། འབྲོང་ཆུང་གིས་གཏམ་བཤད་སྤེལ་ནས་བདུན་ཕྲག་གཅིག་གི་རྗེས་ལ་སྟེ། སྤྱི་ཟླ་༠༣ ཚེས་༠༤ ཉིན། ཨ་རིའི་ནང་གི་བོད་ཀྱི་ལོ་གསར་འདུ་འཛོམས་ཀྱི་ཚེས་བཟང་དུས་བཟང་ལ་དུས་ཚོད་གང་ཙམ་རིང་པོ་ཞིག་སྤྱད་ནས་བཀྲ་མི་ཤིས་པའི་སྐད་ཆ་མང་པོ་ཞིག་བཤད་ནས་བཀྲ་ཤིས་པའི་དགའ་སྟོན་རྟེན་འབྲེལ་གྱི་ཁ་དོག་ཡོངས་སུ་བསྒྱུར་བ་རེད། ཀུན་དགའ་བཀྲ་ཤིས་ཀྱི་གཏམ་བཤད་དེ་ཡང་སྤྱི་ཚོགས་དྲ་ལམ་ཁག་ཏུ་འགྲོ་རྒྱུག་ཆེ་ཙམ་བྱུང་ཡོད་པ་དང་། གོང་སོང་བཞིན་ཡུལ་དུས་གནས་སྐབས་ལ་བསམས་ན་ཀུན་དགའི་གཏམ་བཤད་དེ་འབྲོང་ཆུང་ལ་གཅིག་ཕན་གཅིག་གྲོགས་ཀྱི་རྒྱབ་རྟེན་ལྟ་བུ་དང་། ཡང་ན་འགྲན་རྩོད་ཀྱི་རྣམ་པ་ལྟ་བུར་གྱུར་པ་དང་། ༧གོང་ས་མཆོག་ལ་རྒྱབ་སྐྱོར་ཞུ་བ་ཅུང་འཕྱི་དྲགས་པའི་གནས་སྟངས་ཤིག་ཏུ་མངོན་པར་སྣང་།

སྲིད་སྐྱོང་མཁས་དབང་བློ་བཟང་སེང་གེ

སྲིད་སྐྱོང་མཆོག་ཀྱང་གོང་སོང་གི་སྣེ་ཡོད་མི་སྣ་གཉིས་དང་འདྲ་བར་༧གོང་ས་མཆོག་ལ་རྒྱབ་སྐྱོར་ཞུ་བ་དང་ཀླུ་བྱམས་ལ་དགག་པ་སྐྱོན་པའི་དུས་ཚོད་ལས་ཡོལ་ཚར་བ་རེད། སྲིད་སྐྱོང་གི་གསུམ་བཅུའི་དུས་དྲན་སྲུང་བརྩི་ཞུ་བའི་སྡིངས་ཆ་དེ་བེད་སྤྱོད་བཏང་ནས་མིང་དངོས་སུ་མ་བོས་པའི་ཐོག་ནས་ཀླུ་བྱམས་ཀྱི་རྩོམ་དེ་འགྲིག་གི་མེད་པའི་རྣམ་པ་བསྟན་ཡོད། སྤྱིར་ན་གསུམ་བཅུའི་དུས་དྲན་ནི་མི་རིགས་བདེ་དོན་ཆེད་དུ་ཚེ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་རྣམས་རྗེས་དྲན་དང་། མྱ་ངན་གུས་འདུད་ཞུ་པའི་ལོ་རྒྱུས་རང་བཞིན་ལྡན་པའི་དུས་ཚིགས་ཁྱད་པར་ཅན་ཞིག་ཡིན་པ་ལས། རྒྱལ་གཅེས་དཔའ་བོར་ཁ་རྡུང་དང་། ནང་ཁུལ་ལ་ཚིག་མཚོན་འཕེན་པའི་ལས་འགུལ་བརྩམས་པ་ནི་ཆོས་སྲིད་གཉིས་ཀྱི་ལམ་ལུགས་གང་གི་ཐད་ནས་ཀྱང་མི་འོས་པ་དང་། མི་གུས་པ་ཞིག་ཅི་ནས་ཀྱང་རེད་འདོད། ཀླུ་དགག་གཏམ་བཤད་དེ་ཡིན་གཅིག་སྤེལ་དགོས་ན། སྔ་གསར་གསར་དང་། དེ་ཡང་ལོ་གསར་འཚམས་འདྲིའི་བརྙན་ལྟ་བུ་བཟོས་མེད་པ་ཡང་ཡ་མཚན་ཅན་གྱི་གནས་ཤིག་རེད།

མཐའ་སྡོམ།

གང་ལྟར་ཐལ་རྡུལ་མང་བའི་ད་རེས་ཀྱི་ནང་ཁུལ་འཐབ་འཛིང་གི་ཁྲོད་དུ། སྒེར་པ་འགའ་ཐོན་མེད་ན། འབྲོང་ཆུང་ཐོན་མི་སྲིད་པ་དང་། འབྲོང་ཆུང་ཐོན་མེད་ན། ཀུན་དགའ་བཀྲ་ཤིས་ཁུ་སིམ་མེར་བསྡད་གཏན་འཁེལ་བ་དང་། བློ་མཐུན་”སྒེར་འབྲོང་ཀུན་”གསུམ་མེད་ན་སྲིད་སྐྱོང་ཡང་མདུན་དུ་ཐོན་ནས་དེ་ལྟ་བུའི་གཏམ་བཤད་སྤེལ་མི་སྲིད་པ་ནི་ཁོ་ཚོས་དགག་ལན་བརྒྱབ་པའི་དུས་ཚོད་ལ་བལྟས་ན་ཧ་ཅང་གསལ་པོ་རེད། དེ་ཡང་ཕྱོགས་གཅིག་ནས་གཅིག་རྒྱབ་གཅིག་ལངས་བྱས་པ་ལྟ་བུ་དང་། ཕྱོགས་གཞན་ཞིག་ནས་བསམ་གཞིགས་བྱེད་དུས་འགྲན་བསྡུར་གྱི་རྣམ་པའི་ཐོག་ནས་གཅིག་རྒྱབ་གཉིས་མཆོང་བྱས་པ་ལྟ་བུར་སྣང་། ལས་འགུལ་དེས་༧རྒྱལ་དབང་མཆོག་གི་མཚན་སྙན་སྲུང་སྐྱོབ་ལ་ཕན་འབྲས་འབྱུང་མིན་ལྟ་དགོས། མདོར་ན་མ་འོངས་པར་དེ་འདྲ་ཡི་རིགས་བྱུང་ན་གཅིག་གིས་གཅིག་མ་བསྒུགས་པར་དུས་ཐོག་ལས་འགུལ་བརྩམ་དགོས་པ་དང་། ཚོད་དཔག་བྱས་ནས་ཉེས་པ་བཙན་འགེལ་མི་བྱེད་པར། བདེན་པ་ར་སྤྲོད་བྱེད་དགོས་པ་ཧ་ཅང་གལ་ཆེ། དེ་མིན་སྤྱིར་ན་༧གོང་ས་མཆོག་གི་མཚན་སྙན་ལ་གནོད་པ་དང་། ཡང་སྒོས་སུ་ནང་ཁུལ་མཐུན་སྒྲིལ་གྱི་འགོག་རྐྱེན་ཆགས་མི་སྲིད་པ་ཡང་གཏན་ནས་མ་རེད།།

མི་ཉག་ཀུན་དགའ་བཀྲ་ཤིས་ཀྱིས་སྤྱི་ལོ་༢༠༡༧ སྤྱི་ཟླ་༠༣ ཚེས་༡༢ མཚན་མོར་བྲིས།།

Print Friendly, PDF & Email
Share on Facebook0Tweet about this on TwitterShare on Google+0Share on LinkedIn0Email this to someone
0 commentsViews: 1122

Leave a Reply