འདས་དང་ད་ལྟའི་སྣང་བརྙན་གསོན་པོ།

གནམ་ནས་མ་བབས་པའི་སེར་རྒོད་དྲག་པོ།།   

ལྗོན་ཆུང་ཐང་སྐྱེས་ཀྱི་ཚལ་ལ་འཁུ་སྐད།།   

ས་ནས་མ་སྐྱེས་པའི་དུག་སྡོང་ངར་མོ།།      

སྐྱེ་འགྲོའི་སྲོག་དབུགས་ཀྱི་ཟས་ལ་རྔམ་སྐད།།

   

གཅིག་འདུས་གཡོ་ཆེན་གྱི་རང་འགྲོས་མྱུར་མོ།།    

ཁ་འཇམ་སྦྱོར་རྩུབ་ཀྱིས་རྟ་ལ་བརྒྱུས་པས།།   

མ་བོས་རང་ལྷགས་ཀྱི་བཅུ་གསུམ་མགྲོན་པོ།།     

མ་བསམ་ལྡོག་ཕྱོགས་ནས་ཁད་ཀྱིས་ལྡང་སྐད།།   

རང་གསོན་གཞན་འཆི་ཡི་ཐབས་ལམ་ཟབ་མོ།།    

བརྡ་བརྒྱུད་གཏད་རྒྱ་ཡིས་ལག་ཏུ་བཞེས་ཚེ།།   

གསང་ཚིག་མ་ཐུབ་པས་ཡུག་ཅིག་འཁོར་ནས།།     

དུམ་ཙམ་ཆད་པ་དེའི་ཐུན་མོང་ཉེས་སྐད།།    

བཀའ་གསར་མངའ་ཐང་གི་ཟིལ་འོད་འཕྲོས་ཚེ།།  

ཐེག་གཞན་རྒྱུ་སྐར་ཚོགས་བག་ལ་ཞ་བའི།། 

  ཉེར་བསྡོག་གཏིང་གནག་གི་ཁ་གཡང་སྙན་མོ།།    

ཞི་འཇམ་རིས་མེད་འདིའི་ཕག་ན་འཐས་སྐད།།     

 དགོས་མཁོ་ཡོད་དུས་སུ་མཐོ་ཙམ་མཐོ་ཙམ་བཏེག།  

དེ་མིན་རྟག་པ་རུ་རྐང་པའི་ཤུགས་ཀྱིས་མནན།།   

བཀྱགས་ཕབ་བར་གསེང་གི་རྡེལ་འུ་མགོ་ནག་དེའི།།   

  སྒོ་གསུམ་བྱ་བྱེད་ཀུན་དམ་ལ་བཏགས་སྐད་དོ།།    

རིས་མེད་བཤད་ཤོབ་འདི་འཆལ་མོ་གཟུགས་བཟང་འདྲ།།   

  ཆིག་སྒྲིལ་འཆམས་མཐུན་ཡང་དཔའ་བོ་ལག་ཆད་འདྲ།།  

  འདྲ་འདྲ་མང་པོ་ཡི་བར་ན་ལུས་པ་ཡི།།   

མི་རིགས་རྩ་དོན་ནི་རྩམ་སྐྱ་རླུང་བསྐུར་རེད།།

Share this:
༡༣༦ ཀློག་གྲངས།