རྩོམ་ཉུག

 

ཚེ་འདིའི་དྲིན་ཆེན་མ་ལོ།

དྲིན་ཆེན་མ་ལོ་དྲན་པའི་གདུང་དབྱངས།

 རྩོམ་ཡིག་འདི་སྤེལ་ལོང་མ་བྱུང་བའི་ལོ་མང་ཕྱིན་ཡང་ཕལ་ཆེར་རྐུ་ཁྱེར་བྱུང་ཡོད་སྲིད། ཧ་གོ་ངེས་ཡོད་ན་གསུང་རོགས།

 ལྷོ་སྤྲིན་རླུང་གིས་གཏོར་བའི་ཕྱི་དྲོ་རེད།  

ཁེར་འགྲོ་གོམ་པས་རྒྱ་ལམ་ཉུལ་བའི་དུས།། 

སྟོན་ལོ་ས་ལ་ཟགས་པའི་ཤག་སྒྲའི་ཁྲོད།། 

ཨ་མའི་མ་ཎིའི་དབྱངས་རྟ་རྣ་བར་འཁོར།།

 

ནམ་མཁའ་སྐར་མས་གང་བའི་མཚན་མོ་རེད།།

བསིལ་བསིལ་རླུང་བུ་གདོང་ལ་ཕོག་པའི་དུས།།

དྲན་གདུང་མཆི་མ་བསྐྱིལ་བའི་མཚེའུ་ངོགས་སུ།།

ཨ་མའི་ཞལ་རས་ཟླ་གཟུགས་བཞིན་དུ་སྐྱོམས།།

 

ཁྱི་སྐད་རྒྱང་ཟུག་ཆེ་བའི་མཚན་མོ་རེད།།

རྣམ་ཤེས་རྨི་ལམ་ཞིང་ལ་འགྲིམ་པའི་དུས།།

བྱམས་ལྡན་ཨ་མ་ཐེངས་གཅིག་མཇལ་བ་རྨིས།།

དགའ་སྐྱོའི་ཟུག་རྔུ་མ་བཟོད་མགུལ་ལ་འཁྱུད།།

 

དྲིན་ཆེན་མ་ལོའི་ཕྱག་ཟུང་ཉོམ་པོ་ཡིས། །

བུ་ངའི་མགོ་ལ་བྱིལ་བྱིལ་བྱས་པ་ན།།

དགའ་སྤྲོའི་སེམས་པ་ཁེངས་བཞིན་ཨ་མ་ཡི།།

པང་ལ་མགོ་བོ་བཞག་ནས་ངལ་ཞིག་གསོས།།

 

ནམ་ལངས་ཉེ་བའི་ཐོ་རེངས་ཤར་བའི་ཚེ། །

དེ་ཕོས་ལངས་བརྡའི་ཅོང་སྒྲ་སྒྲོག་པའི་དུས།།

སྐྱིད་པའི་རྨི་ལམ་བར་ཆད་དབང་དུ་ཤོར།།

ཨ་མ་དྲན་པའི་གདུང་བས་སླར་ཡང་མནར།།  

                               བློ་བཟང་ཕུན་ཚོགས་ཀྱིས་ཕྱི་ལོ་༢༠༠༧ ཕྱི་ཟླ་༣ ཚེས་༩ ཉིན། 

 

Share this:
༡༠༩ ཀློག་གྲངས།