རྔ་པ་རུ་བསྐྱར་དུ་མི་གཉིས་ཀྱིས་རང་ལུས་མེར་སྲེག་གི་ངོ་རྒོལ།

ཟླ་འདིའི་ཚེས་༡༣ ཉིན་གྱི་བོད་ནང་གི་ཆུ་ཚོད་ ༦།༥༠ ཙམ་ལ་མི་སྐྱ་བཀྲ་ཤིས་དང་། གྲྭ་ལུང་རྟོགས་གཉིས་ཀྱིས་རྔ་པ་ཀིརྟི་དགོན་པའི་མཐའ་འཁོར་གྱི་དཔའ་བོའི་སྲང་ལམ་ནས་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་སྟེ། གྲྭ་ལུང་རྟོགས་གྲོངས་ཟིན་ཡོད་འདུག

དེ་ཡང་དྷ་ས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་ཟླ་འདིའི་ཚེས་༡༤ ཉིན་གནས་ཚུལ་མཁོ་སྤྲོད་བྱས་པ་ལྟར་ན།  གྲྭ་ལུང་རྟོགས་ཀྱིས་དཔའ་བོའི་སྲང་ལམ་ནས་སྐད་འབོད་བྱེད་བཞིན་གཞུང་ལམ་དབུས་མའི་བཞི་མདོར་སླེབས་མཚམས་ཉེན་རྟོག་པ་ཁག་ཅིག་གིས་རུབ་ནས་མེ་བསད་དེ་བཙན་ཁྲིད་བྱས་འདུག་ལ། བཀྲ་ཤིས་ཀྱིས་དཔའ་བོའི་སྲང་ལམ་ནས་སྐད་འབོད་བྱེད་བཞིན་ཡོང་སྐབས་གཞུང་ལམ་དུ་མ་སླེབས་ཙམ་ལ་ཉེན་རྟོག་པ་མང་པོས་རུབ་བརྡུང་བྱས་ནས་མེ་བསད་དེ་རླངས་འཁོར་ནང་བཙན་ཁྲིད་བྱས་ཡོད་ཀྱང་། སྐབས་དེར་ཁོང་གཉིས་ཀ་གྲོངས་ཡོད་མེད་གསལ་པོ་ཤེས་རྟོགས་བྱུང་མེད་པ་རེད། ཁོང་གཉིས་སྐབས་ཐོག་དེར་རྔ་པའི་སྨན་ཁང་དུ་ཁྱེར་ནས་དུས་ཚོད་ཕྱེད་ཀ་མིན་ཙམ་རིང་བསྡད་རྗེས་འབར་ཁམས་ལ་ཁྱེར་ཡོད་ཀྱང་དངོས་སུ་མཐོང་མཁན་གྱིས་བརྗོད་པར། གཉིས་ཀ་མེས་ཚིག་པའི་རྨས་སྐྱོན་ཚབས་ཆེན་ཡིན་སྟབས། གསོན་པོ་ཡོང་རེ་མེད་ཚུལ་བརྗོད་འདུག

ཁོང་གཉིས་ཀ་རྔ་པ་རྫོང་ཆོས་རྗེ་མ་ཞང་། སོ་རུ་མ་སྡེ་བ་ནས་ཡིན་པ་དང་། རང་ལོ་༢༡ ཡིན་པ་བཀྲ་ཤིས་ཀྱི་མ་མིང་ལ་རྔ་པོ་ཟེར་གྱི་ཡོད་འདུག་ལ། དེ་སྔོན་ཀིརྟི་དགོན་པའི་གྲྭ་པ་ཡིན་པ་ཕྱི་ལོ་ ༢༠༡༡ ལོར་སྐྱ་སར་བབས་ནས་ཕ་མའི་རྩར་བསྡད་ཡོད་འདུག

རང་ལོ་༢༠ ཡིན་པ་གྲྭ་ལུང་རྟོགས་ནི་ཕ་འདས་པོ་རིས་ཆུང་དང་། མ་ཀླུ་མོ་གཉིས་ཀྱི་བུ་ཡིན་འདུག ཁོང་རྔ་པ་ཀིརྟི་དགོན་པའི་སྨན་པ་གྲྭ་ཚང་ཡིན་ཞིང་བཀྲ་ཤིས་གྲྭ་པ་ཡིན་སྐབས་ཁོང་གཉིས་འཛིན་གྲྭ་གཅིག་པ་ཡིན་འདུག ཕྱི་ཚེས་ ༡༣ ཉིན་གྱི་སྔ་དྲོ་སྨན་པ་གྲྭ་ཚང་ཚོགས་འཚོགས་སྐབས་ལུང་རྟོགས་ཀྱིས་བོད་ཀྱི་རྒྱལ་གཅེས་དཔའ་བོ་དཔའ་མོ་ཡོངས་ཀྱི་ཆེད་དུ་དགེ་འདུན་རེ་ལ་རྒྱ་སྒོར་གཅིག་རེ་སྐུ་འགྱེད་བཏང་ནས་བསྔོ་བ་སྨོན་ལམ་དང་སྐྱབས་འཇུག་ཞུ་སྐུལ་གནང་འདུག

དོན་རྐྱེན་བྱུང་མ་ཐག་ཉེ་འཁོར་གྱི་མི་མང་གིས་ཀི་ལྡིར་བྱས་ཏེ་སྐད་འབོད་སྣ་ཚོགས་བྱས་འདུག་པར་དྲག་ཆས་ཉེན་རྟོག་པ་དང་དམིགས་བསལ་ཉེན་རྟོག་པ་སོགས་འབོར་ཆེན་སླེབས་ནས། མི་མང་ལ་ལྕགས་མདུང་འཛེར་མ་ཅན་སོགས་ཀྱིས་གང་བྱུང་གཅར་རྡུང་བྱས་ཏེ། མི་མང་པོ་ཞིག་རྨས་སྐྱོན་བཟོས་ཤིང་། མི་ཁག་ཅིག་སྐབས་ཐོག་དེར་འཛིན་བཟུང་བཙན་ཁྲིད་བྱས་པ་མ་ཟད། མི་གཅིག་གི་མགོ་ལ་ལྕགས་མདུང་འཛེར་མ་ཅན་གྱིས་གཞུས་ཏེ་མགོ་ཡོངས་རྫོགས་ཁྲག་གིས་ཁེངས་ཡོད་པ་མ་ཟད། མི་དེའི་རྗེས་ཀྱི་གནས་ཚུལ་གསལ་པོ་ཤེས་རྟོགས་མ་བྱུང་། དེ་རྗེས་རྔ་པ་རྫོང་མཁར་ཡོངས་ལ་དམིགས་བསལ་ཉེན་རྟོག་པ་སོགས་ཧ་ཅང་མང་པོ་འགྲེམས་འཇོགས་བྱས་འདུག་ལ། ཕྱི་ཚེས་ ༡༤ ཉིན་ཡང་རྔ་པའི་རྫོང་མཁར་ལ་དམིགས་བསལ་ཉེན་རྟོག་པ་དང་སྤྱི་བདེ་ཉེན་རྟོག་པ་མང་པོ་འགྲེམས་འཇོག་བྱས་ཡོད་འདུག

ཕྱི་ཚེས་ ༡༤ ཉིན་ཤེས་རྟོགས་བྱུང་བར་གྲྭ་ལུང་རྟོགས་འདས་གྲོངས་སུ་གྱུར་ཡོད་ཀྱང་ཁོང་གི་སྐུ་ཕུང་འབར་ཁམས་ལ་ཁྱེར་ཡོད་སྟབས་ནང་མིར་སྤྲད་ཡོད་མེད་ཤེས་རྟོགས་མ་བྱུང་། ཁ་སང་རྔ་པའི་སྨན་ཁང་ནས་འཁྱེར་སྐབས་མི་གཅིག་སྨན་ཁང་གི་ཛ་དྲག་ནད་པ་སྐྱེལ་འདྲེན་བྱེད་སའི་རླངས་འཁོར་ནང་ཁབ་ཆེན་བརྒྱབ་ནས་ཁྱེར་ཡོད་འདུག་ལ། གཞན་དེ་དམག་མིའི་རླངས་འཁོར་ནང་བཞག་ཡོད་ཀྱང་དེའི་གནས་སྟངས་ཤེས་རྟོགས་བྱུང་མེད་པ་རེད།།

Share this:
༦༨ ཀློག་གྲངས།