རྒྱ་གཞུང་གི་ལངས་ཕྱོགས་ལ་འགྱུར་བ་འགྲོ་རྒྱུའི་རེ་བ་ཡོད།

༧གོང་ས་མཆོག་གིས་བོད་ཀྱི་གནད་དོན་ཐོག་རྒྱ་གཞུང་གི་ལངས་ཕྱོགས་ལ་བཟང་ཕྱོགས་ཀྱི་འགྱུར་བ་འགྲོ་རྒྱུའི་རེ་བ་ཡོད་སྐོར་དང་། རྒྱ་གཞུང་གི་ངོས་ནས་རྒྱ་བོད་གཉིས་ཀྱི་བར་ལ་བཟང་ཕྱོགས་ཀྱི་གྲོས་བྱེད་འཆར་ཡོད་ན། ང་ཚོའི་ངོས་ནས་གྲ་སྒྲིག་ཆ་ཚང་ཡོད་ཅེས་གསུངས་འདུག

དེ་ཡང་བོད་གཞུང་དྲ་བར་སྤེལ་བའི་གནས་ཚུལ་ལྟར་ན། ཟླ་འདིའི་ཕྱི་ཚེས་༢༩ ཉིན་བཞུགས་སྒར་ཕོ་བྲང་དུ་རུའི་ཊར་གསར་འགོད་པ་སྐུ་ཞབས་ཇོན་ཅལ་མར་སི་ John Chalmers དང་། ཕེ་རེངྐ་ཇེཀ་ཌེ་ནིལ་ Frank Jack Daniel རྣམ་གཉིས་ཀྱི་དྲི་བར་༧་གོང་ས་མཆོག་གིས་ལན་འདེབས་གནང་དོན། བོད་ཀྱི་གནད་དོན་ཐོག་རྒྱ་ནག་གཞུང་གི་ལངས་ཕྱོགས་ལ་བཟང་ཕྱོགས་ཀྱི་འགྱུར་བ་འགྲོ་རྒྱུའི་རྟགས་མཚན་གང་ཙམ་འཐོན་བཞིན་ཡོད་པར་བརྟེན། ཐུགས་རེ་ཆེན་པོ་མཛད་བཞིན་ཡོད་སྐོར་བཀའ་ལན་སྩལ་བ་མ་ཟད། པེ་ཅིང་གཞུང་ནས་དོན་དམ་གྱི་ལངས་ཕྱོགས་ལ་བསྒྱུར་བཅོས་བཏང་བ་ཡིན་ན། བཙན་བྱོལ་བོད་མིའི་འགོ་ཁྲིད་ཀྱིས་རྒྱ་ནག་གཞུང་དང་ལྷན་བསྐྱར་དུ་གྲོས་མོལ་བྱ་རྒྱུའི་གྲ་སྒྲིག་ཨང་གསར་ཡོད་ཅེས་གསུངས་ཡོད་འདུག་ལ།

དེ་བཞིན་འབྱུང་འགྱུར་རྒྱ་ནག་གི་སྲིད་འཛིན་དུ་ཕལ་ཆེར་འདེམས་ཐོན་ཡོང་རྒྱུ་ཞི་ཅིང་ཕིང་ Xi Jinping གིས། ལོ་ངོ་བཅུ་ཕྲག་མང་པོའི་རིང་རྒྱ་ནག་གཞུང་གིས་བོད་ཐོག་འཛིན་བཞིན་པའི་མཁྲེག་བཟུང་གི་སྲིད་བྱུས་ལ་འགྱུར་བ་བཏང་སྟེ། ལངས་ཕྱོགས་གསར་པ་ཞིག་འཛིན་རྒྱུ་རེད་ཅེས་བརྗོད་རྒྱུ་ད་ལྟ་སྔ་དྲགས་པ་རེད། ངོས་ཀྱིས་མཐའ་གཅིག་ཏུ་བརྗོད་མི་ཐུབ་ཀྱང་ངོས་ལ་རྒྱ་རིགས་ཆོས་གྲོགས་མང་པོ་ཞིག་གིས། འབྱུང་འགྱུར་རྒྱ་ནག་གཞུང་གི་སྲིད་འཛིན་ཁོང་ཕྲན་བུ་མི་གཤིས་འཇམ་པ་ཡོད་སྐོར་བརྗོད་ཀྱི་འདུག རྡ་སར་རྒྱ་ནག་སྐམ་ས་ནས་མཇལ་ཁ་ཞུ་མཁན་མང་པོ་ཞིག་ཡོང་བཞིན་ཡོད་པའི་ཁོངས་ནས་འགའ་ཤས་ཀྱིས། རྒྱ་ནག་གུང་ཁྲན་གྱི་འགོ་ཁྲིད་མཐོ་གྲས་དང་འབྲེལ་བ་ཡོད་ཚུལ་བརྗོད་མཁན་ཡོད། འོན་ཀྱང་རྒྱ་ནག་གཞུང་གིས་ལས་དོན་ཚང་མ་རྒྱལ་ཁབ་ཀྱི་བེད་འཇགས་ལ་ཁག་དཀྲི་བྱེད་བཞིན་པར་བརྟེན། འགོ་ཁྲིད་སུ་དང་འབྲེལ་བ་ཡོད་མེད་ང་ཚོས་བརྗོད་པར་དཀའ།

འོན་ཀྱང་རྒྱ་རིགས་ཤེས་ཡོན་མི་སྣ་ཚོས་བོད་ཐོག་འཛིན་བཞིན་པའི་རྒྱ་ནག་གཞུང་གི་ལངས་ཕྱོགས་དེར། འགྱུར་བ་བཏང་སྟེ་ལངས་ཕྱོགས་གསར་པ་ཞིག་འཛིན་དགོས་པའི་བསམ་ཚུལ་འདོན་བཞིན་པ་དེར་རྒྱ་ནག་གཞུང་གི་ལས་བྱེད་པ་ཁག་གཅིག་གིས་མོས་མཐུན་བྱེད་བཞིན་ཡོད། གནས་ཚུལ་དེ་དག་མཐོང་སྐབས་ང་ཚོར་བློ་སྤོབས་ཧ་ཅང་ཡོང་བཞིན་འདུག་ཅེས་གསུངས་འདུག

ཡང་ཁོང་གིས་བོད་མིས་རང་ལུས་མེར་སྲེག་གི་དྲི་བར་ལན་འདེབས་གནང་སྐབས། ངོས་ཀྱིས་བོད་མི་ཚོར་འུ་ཐུག་ཐབས་ཟད་པའི་ལས་འགུལ་དེ་རིགས་སྤེལ་རྒྱུར་བརྒྱུད་སྐུལ་གང་ཡང་བྱེད་ཀྱི་མེད། འོན་ཀྱང་ཁོང་ཚོར་དཀའ་ངལ་ཇི་འདྲ་ཞིག་ཡོད་པ་ང་ཚོས་བསམ་ཤེས་ཐུབ་པ་ཞིག་རེད། གནས་ཚུལ་དེའི་རིགས་ནི་ཧ་ཅང་བློ་ཕམ་སྐྱེ་གཞི་ཞིག་ཡིན། དེར་བརྟེན་རྒྱ་ནག་གཞུང་གིས་བོད་མིས་རང་ལུས་མེར་སྲེག་གཏོང་དགོས་ཐུག་པའི་རྒྱུ་རྐྱེན་གཙོ་བོ་ག་པར་ཐུག་ཡོད་མེད་རྩད་གཅོད་བྱེད་དགོས། རྒྱ་ནག་གཞུང་གིས་ལས་སླ་པོའི་ཐོག་ནས་ངོས་དང་བོད་མི་ཉུང་ཤས་ཤིག་ལ་འགན་ཁག་དཀྲི་ཐུབ་ཀྱང་དེས་བོད་མིའི་དངོས་ཡོད་དཀའ་ངལ་སེལ་མི་ཐུབ་ཅེས་བཀའ་གནང་ཡོད་པ་རེད།

Share this:
༩༩ ཀློག་གྲངས།