ཚུལ་ཁྲིམས་དཔལ་ལྡན།

ཕྲན་གྱི་མིང་ལ་ཚུལ་ཁྲིམས་དཔལ་ལྡན་ཟེར་ཞིང༌། སྐྱེས་ཡུལ་ནི་དབུས་ལྷ་སའི་ལྷོ་ཁ་གོང་དཀར་ཕྱོགས་སུ་ཡིན། ཕ་མ་གཉིས་ཀྱིས་རེ་བ་དང་ཕུགས་བསམ་གྱི་དར་དཀར་མཇིང་པར་གཡོགས་ཏེ་ཆུང་དུས་ནས་བཙན་བྱོལ་དུ་བརྫངས་ཀྱང་དེ་ལྟར་དུ་མ་བྱུང༌། དེ་རིང་བར་གྱི་མི་ཚེ་ཆོས་སྒོར་བསྐྱལ་ཞིང་འབྱུང་འགྱུར་ལ་དེ་ལྟར་ཡོང་བའི་རེ་བས་ད་ལྟ་ས་རཱ་མཐོ་སློབ་ཏུ་སློབ་སྦྱོང་བྱེད་ཁུལ་ལགས། ངས་གོ་སྐབས་འདི་བཟུང་སྟེ་གངས་ཅན་པའི་ན་གཞོན་རྣམས་ལ་འབོད་སྐུལ་ཞིག་ཞུ་འདོད་པ་དེ་ནི། བྱུང་ན་ཁྱེད་ཀྱི་ལས་ལ་བརྩོན་ཞིང་དཔའ་ངར་ལྡན་པའི་བོད་མི་རིགས་ཀྱི་ཆོ་ལོ་ཐོགས་ཏེ་གང་བསམ་པ་དེ་བཤད་ཕོད་པ་དང༌། བཤད་ཕོད་པ་ཇི་བཞིན་ལས་ཕོད་པ་ཞིག་གནང་སྟེ་རྒྱ་ཟས་ལེའུ་བཅོ་བརྒྱད་ལ་འགྱུར་བ་གནང་རོགས། མ་བྱུང་ན། གཏམ་རྫིག་པོ་དང་ལས་ཆེན་པོ་དེ་ཚོ་དོར་ཏེ། སོ་སོའི་སྒོ་གསུམ་གྱི་འགུལ་ཤུགས་རེ་རེའི་ཁྲོད་ན་གདོང་དམར་བའི་དར་རྒུད་ཤེས་པའི་རྩམ་པ་ལྷད་མེད་པ་ཞིག་གནང་རོགས། ཧ་་་་ཧ་མདོར་བསྡུས་ནས་ཞུ་འདོད་པའི་ཚིག་གཉིས་ནི། ཁ་བཤད་ཆུ་ཡི་ལྦུ་བ། ལག་ལེན་གསེར་གྱི་ཐིགས་པས་བོད་རྒྱལ་ཁབ་མ་སྐྱོང་རོགས་གནང༌། ཐུགས་རྗེས་གཟིགས།

Share this:
༣༦ ཀློག་གྲངས།