དཔའ་བོ་ཚོ་ལ་ཕུལ།

ཚེ་སྲོག་གི་མེ་ལྕེ་མཆོད་སྟངས་དེས།། 

ཤར་ཕྱོགས་ཙི་ནའི་ཡུལ་གྱི་གཤིན་རྗེ་ཡི་ཁ་རླངས།། 

ཆོས་ལྡན་ཁ་བ་ཅན་གྱི་ཞིང་ས་ལ་ཕོགས་པས།། 

འཚེ་མེད་ཞི་བདེའི་ལྗང་མྱུག་སྨག་སྨོག་ཏུ་སྒྱུར་དུས།། 

གངས་རིའི་དཔའ་བོའི་ཚེ་སྲོག་བསྲེག་ཟ་ཡིས་བཅོམ་སོང་།།

 འདས་སོང་མི་ལོ་ལྔ་བཅུའི་སྐྱོ་གར་གྱི་མེ་ལྕེ།། 

མ་བཟོད་ཡ་ཆུང་སེམས་ཀྱི་གཏིང་རུམ་ནས་འབར་བས།། 

དབྱིག་མཆོག་གསེར་ལས་འཕགས་པའི་ཚེ་སྲོག་གི་མཆོད་པ།། 

བསླུ་མེད་མཆོག་གསུམ་སྤྱན་ལ་ལྷམ་ལྷམ་དུ་ཕུལ་སོང་།།

 

སྙིགས་མའི་རང་མཚང་བརྡོལ་བའི་ཉེར་གཅིག་གི་དུས་སུ།།

ཟོག་པོ་རླུང་རྟ་དར་བའི་ལྔ་བདོ་ཡི་ལོ་ཟླར།།

དྲང་དབང་སྐྱེས་བུའི་འདྲེན་བྱེད་གཡོ་རྫུན་གྱིེས་སླུ་དུས།།

གངས་རིའི་དཔའ་བོས་ཚེ་སྲོག་སྣང་གསལ་ལ་བསྒྲོན་སོང་།།

 

གཅིག་དགུ་ལྔ་དགུའི་ལོ་ཟླ་ནག་པོ་ནས་བཟུང་སྟེ།།

གངས་ཕྲུག་མེ་ལ་སྒྲོན་པའི་དེ་རིང་གི་དུས་བར།།

མཐོ་སྒང་ཕ་ས་དྲོན་མོ་དམྱལ་ཁམས་སུ་བསྐྲུན་པས།།

                              ཟླ་མེད་དཔའ་བོའི་ཚེ་སྲོག་བདེན་དཔང་དུ་ཕུལ་སོང་།།

 

 

རང་དབང་བ་དན་དཀར་པོ་དུད་སྨུགས་ཀྱིས་བཀབ་ཅིང་།།

འདྲ་མཉམ་འགྲོ་བའི་བདག་དབང་འཇའ་ཚོན་བཞིན་ཡལ་དུས།།

ཡུན་རིང་སྡུག་གིས་མནར་བའི་སྨྲེ་སྔགས་ཀྱི་འབོད་ཚིག།

རིན་ཆེན་སྲོག་གིས་བརྗེ་བའི་དཔའ་བོ་རྣམས་ཨེ་མ།།

 

རུལ་སུངས་གུང་ཁྲན་ཚང་གི་ཟློས་གར་གྱི་འོག་ཏུ།།

མ་ཡུམ་ཁ་བ་ཅན་གྱི་ཟུངས་ཁྲག་དེ་འཛད་དུས།།

ལ་ཞེན་དམ་བཅའ་ཟབ་མོ་སེམས་ཁོངས་སུ་བཅངས་ཏེ།།

གཅེས་སྲོག་བདེན་པར་བརྗེ་བའི་དཔའ་བོ་རྣམས་ཨེ་མ།།

 

སྐྱབས་མགོན་གསེར་ཞལ་དྲན་པའི་གདུངས་བ་ཡི་ཁུར་བོ།།

མ་བཅོས་ཡིད་ལ་བརྣགས་པའི་ལོ་ཟླ་ཡི་ཕྲེང་བར།།

དད་སེམས་རབ་ཏུ་དཀར་བའི་སེམས་ངོགས་ཀྱི་གདུང་འབོད།།

མེ་མདའི་སོ་ཁའི་འོག་ནས་སྒྲོག་པ་དེ་ཨེ་མ།།

 

གདུག་རྩུབ་ལས་ལ་གོམས་པའི་ཙི་ན་ཡི་རྗེ་བོས།།

ཆོས་ལྡན་ཁ་བའི་ཞིང་ཁམས་ཁྲག་ཐིགས་ཀྱིས་ནོགས་དུས།།

ཉ་གང་དུང་ཟླ་དཀར་པོའི་འོད་སྣང་ལ་སྒུག་པའི།།

མ་ཡུམ་ས་ལའི་ལྗོངས་ཀྱི་སྤུན་ཟླ་རྣམས་ཀྱེ་མ།།

 

ཐུབ་བསྟན་སྲོག་ལྟར་འཛིན་པའི་གངས་རི་ཡི་དཔའ་བོས།།

སྐུ་ལུས་མེ་ལྷ་དམར་པོའི་ཞལ་དཀྱིལ་དུ་བསྟབས་ཏེ།།

རྒྱ་འདྲེ་གུང་ཁྲན་སྲིན་མོར་གཡུལ་འཐབ་རེ་བྱེད་དུས།།

ཡབ་མེས་སྲོན་བཙན་སྒམ་པོའི་དཔའ་རྟགས་ལ་འགྲན་སོང་།།

 

ས་མཐའི་སྐྱོ་གར་མྱོང་བའི་ཡུལ་གྱར་གྱི་སྤུན་ཟླས།།

འདྲ་མཉམ་བདེན་པའི་རྒྱབ་ལངས་རྒྱལ་ཚོགས་ཀྱི་མདུན་ན།།

གངས་རིའི་དཔའ་བོ་དཔའ་མོའི་དཀའ་སྡུག་དེ་སྒྲོག་གིན།།

ཡངས་པའི་གོ་ལ་བདེན་པའི་འབོད་སྒྲ་ཡིས་བསླངས་སོང་།།

 

ཟ་རྔམ་གདོན་གྱིས་མྱོས་པའི་དགྲ་དམར་གྱིས་འདྲེ་ལག།

ཕ་ཡུལ་གངས་ཅན་ལྗོངས་ཀྱི་ལྟེ་བ་རུ་བརྐྱངས་ཏེ།།

བྲག་སྲིན་བུ་ཚ་སྟོང་གི་རང་དབང་དེ་འཕྲོག་དུས།།

ཞུམ་མེད་དགྲ་ལ་བརྒོལ་བའི་དཔའ་བརྟུལ་ཚོ་ཨེ་མ།།

 

སྲིད་པའི་གངས་རི་དཀར་པའི་མཛེས་སྡུག་ལ་ཞེན་པའི།།

ཤར་གྱི་ཟླ་བ་ནག་པོས་མཁའ་དབྱིངས་ལ་འཕྱན་ནས།།

ནོར་ལྡན་ཁ་བ་ཅན་གྱི་ལང་ཚོ་དེ་འཇོམས་དུས།།

ཁྱེད་ཅག་གངས་ལྗོངས་སྐྱོབ་པའི་དཔའ་བོ་རུ་བཞེངས་བྱུང་།

དམ་པའི་ཆོས་སྡེ་བན་དེའི་བཙོན་ཁང་དུ་བསྐྲུན་ཅིང་།།

རྩྭ་ཐང་འབྲོག་མོའི་ལས་དབང་ཁྲོམ་ར་ལ་འགྲིམ་དུས།།

ཁྱེད་ཀྱིས་གཅེས་སྲོག་བཟང་པོའི་འགྲོ་འགྲོན་ཞིག་བཏང་སྟེ།།

ཕ་ཡུལ་འཆི་བདག་རྒྱལ་པོའི་སོ་ཁ་ནས་བསྐྱབས་བྱུང་།།

 

བསྟན་པའི་དོན་དུ་ཚེ་སྲོག་འབུལ་བ་ལ་བསམས་ན།།

ས་གནས་བྱང་སེམས་རྣམས་ཀྱང་སྤྱན་མིག་རེ་བགྲད་བྱུང་།།

རྒྱལ་ཞེན་ལ་རྒྱ་ཟབ་པའི་སྤྱོད་ཚུལ་ལ་བསམས་ན།།

བདག་གི་དམར་ཆུང་སེམས་ལ་བཞུད་ལམ་ཞིག་སྩལ་བྱུང་།།

 

གངས་རིའི་ལྷ་སྐལ་ཕྱག་ན་པདྨོ་ཡི་སྤྱན་ཟུང་།།

ནམ་ཡང་གཡོ་མེད་གངས་ཕྲུག་ལས་དབང་ལ་གཟིགས་ཐལ།།

ཤུལ་ལུས་སྤུན་ཟླ་ཁྲི་མ་འབུམ་ཕྲག་གི་སེམས་པ།།

ཁྱེད་ཀྱི་རྣམ་ཤེས་ཕྲ་མོར་སྐྱེལ་མ་ལབརྩོན་ཐལ།།

 

སྤྲེལ་སྲིན་ཨ་མས་བསྐྱངས་པའི་དཔའ་བོ་དང་དཔའ་མོ།།

ཁྱེད་རྣམས་ཕྱི་མའི་ཡུལ་ལ་བདེ་བ་རུ་ཕེབས་ཤིག།

འདི་ནས་ལས་དབང་གཅིག་པའི་ཁ་བ་ཡི་བུ་ཚས།།

ཁྱེད་ཀྱི་རེ་བའི་ཕུང་པོ་དབྱིག་མཆོག་བཞིན་སྲུང་ཡོད། 

Share this:
༡༥༤ ཀློག་གྲངས།