རེབ་གོང་མགོན་ཤུལ་དུ་རང་ལུས་མེར་སྲེག་གི་ངོ་རྒོལ།

ཟླ་འདིའི་ཚེས་༡༧ བོད་ཨ་མདོ་རེབ་གོང་ཁུལ་རྩེ་ཁོག་རྫོང་། རྡོ་དཀར་མོ་ཡུལ་ཚོའི་སྲིད་གཞུང་ཡོད་སར། གསང་བདག་ཚེ་རིང་གིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་སྟེ་སྐུ་གྲོངས་ཡོད་འདུག

དེ་ཡང་ཁོང་གིས་རང་ལུས་མེར་སྲེག་སྐབས། ཟླ་འདིའི་ཚེས་ ༡༧ ཉིན་གྱི་དགོང་དྲོ་བོད་ནང་གི་ཆུ་ཚོད་ ༧ ཡིན་པ་དང་། སྐབས་དེར་རྒྱ་གཞུང་གི་སོ་སྲུང་མྱུལ་ཞིབ་མི་སྣས་མེ་རུ་འབར་བཞིན་པའི་ཁོང་གི་ལུས་སྟེང་དུ་ཆུ་གཏོར་སྟེ་མེ་གསོད་ཐབས་བྱས་ཡོད་ཀྱང་མ་ཕན་པར་སྐུ་གྲོངས་ཡོད་འདུག

ཟླ་འདིའི་ཚེས་༡༧ ཉིན་གྱི་དྲོ་རྡོ་དཀར་མོ་སྲིད་གཞུང་དུ་རྒྱ་གཞུང་གིས་འཚོགས་འདུ་བསྡུས་ཏེ།  མེར་སྲེག་གཏོང་མཁན་རྣམས་ཀྱི་ནང་མིར་ཐུགས་གསོ་དང་འཚམས་འདྲིར་འགྲོ་མི་ཆོག་པ་དང་། དགོན་པ་སུ་ཞིག་སོང་ཚེ་དེ་སྒོ་རྒྱག་གི་ཡིན་ཞེས་བཙན་བཀའ་བསྒྲགས་ཡོད་པ་དང་། ཉིན་དེའི་ཕྱི་དྲོ་རྒྱལ་གཅེས་དཔའ་བོ་གསང་བདག་ཚེ་རིང་ལགས་ཀྱིས་ས་གནས་ཞང་ཐོག་ནས་རང་ལུས་མེར་བསྲེགས་བཏང་སྟེ་སྐུ་གྲོངས་ཡོད་འདུག   སྐབས་དེར་མགོན་ཤུལ་རྡོ་རྗེ་རྫོང་དགོན་པའི་དགེ་འདུན་པ་རྣམས་དང་། གསང་སྔགས་སྨིན་གྲོལ་གླིང་གི་སྔགས་པ་རྣམས་གཙོས་རེབ་གོང་མགོན་ཤུལ་གྱི་བླ་སྔགས་ཡོངས་དང་མགོན་ཤུལ་ཚོ་སྟེང་བཅུའི་མི་མང་།  འདབས་འབྲེལ་དཔྱི་ས་དང་མགར་རྩེ་འབྲོག་སྡེ་སོགས་ཀྱི་མི་མང་བཅས་སྐྱ་སེར་སྟོང་ཕྲག་བརྒལ་བ་འདུ་འཛོམས་ཐོག    མགོན་ཤུལ་གསང་སྔགས་སྨིན་གྲོལ་དར་རྒྱས་གླིང་གི་ཉེ་འགྲམ་གྱི་དུར་ཁྲོད་ནང་དཔའ་བོ་ཁོང་གི་སྐུ་ཕུང་ཞུགས་འབུལ་བྱས་ཡོད་འདུག

རྒྱལ་གཅེས་དཔའ་བོ་གསང་བདག་ཚེ་རིང་ལགས་ནི་རང་ལོ་ ༢༤ དང་།  རེབ་གོང་རྩེ་ཁོག་མགོན་ཤུལ་སྒར་བ་རུ་ཁག་བརྒྱད་པ་ནས་ཡིན་པ་དང་།  ཕའི་མིང་ལ་ཆོས་དབྱིངས་(ལོ་ ༥༡) དང་། མའི་མིང་ལ་སྨན་བླ་མཚོ་(ལོ་ ༤༩)  ཡིན་འདུག ཁོང་གི་བཟའ་ཟླའི་མིང་ལ་རྟ་མགྲིན་མཚོ་(ལོ་ ༢༤ )ཡིན་པ་དང་། ཁོང་གཉིས་ལ་བུ་ འདན་སྐྱབས་ཟེར་བའི་རང་ལོ་༣ ཅན་ཞིག་ཡོད་འདུག  །

འབྲེལ་ཡོད་བརྒྱུད་གནས་ཚུལ་ཤེས་རྟོགས་བྱུང་གསལ།  རྒྱལ་གཅེས་དཔའ་བོ་ཁོང་གིས་རྟག་པར་བོད་ལ་རང་དབང་མེད་པ་དང་། ༸རྒྱལ་བོ་རིན་པོ་ཆེ་བོད་ལ་ཕེབས་ཐུབ་ཀྱི་མེད་པ། ༸པཎ་ཆེན་རིན་པོ་ཆེ་བཙོན་ཁང་དུ་ལྷག་ཡོད་པ། བོད་ཀྱི་དཔའ་བོ་རྣམས་གཅིག་འཕྲོར་གཅིག་མཐུད་ཀྱིས་སྐུ་ལུས་མེར་བསྲེགས་གནང་སྟེ་ཕེབས་ཕྱིན་པ་ཡིན་ན།  འཇིག་རྟེན་འདིར་སྡོད་འདུན་མི་འདུག་ལ་བསྡད་ཀྱང་སྙིང་བོ་མི་འདུག་ཅེས་བཟའ་ཟླ་ལ་ཡང་ཡང་བཤད་ཀྱི་ཡོད་སྟབས། བཟའ་ཟླས་དེའི་ཐད་ཇུས་གཏོགས་བྱེད་དགོས་པ་མ་རེད་ཅེས་སེམས་གསོ་ཇི་ལྟར་བཤད་ཀྱང་། ཁོང་གིས་དེའི་སྐོར་ཤ་སྟག་གླེང་ནས་སེམས་སྐྱིད་པོ་མེད་པར་སྡོད་ཀྱི་ཡོད་འདུག

དེ་བཞིན།  ཉིན་བདུན་བརྒྱད་ཙམ་གྱི་སྔོན་ལ་ཁོང་གི་འདྲ་པར་ཞིག་གི་སྟེང་གྲོགས་པོ་ཞིག་ལ་གློག་ཀླད་ནང་། གདུང་དམར་བོད་ཀྱི་རྒྱུད་པ། ། གངས་སེང་དཀར་མོའི་ཚ་བོ། ། གངས་རིའི་ཕོ་རྒོད་རྣམ་པ། ། གངས་དཀར་ལ་རྒྱ་མ་བརྗེད། ། ༢༠༡༢ ལོར་ཞེས་འབྲི་རུ་བཅུག་ཡོད་པ་དང་།  ཉིན་གསུམ་གྱི་སྔོན་དེར་སྡེ་བ་ནང་གི་ཕོ་གསར་ཞིག་ལའང་བོད་ལ་རང་དབང་མེད་པ་དང་། ༸རྒྱལ་བ་རིན་པོ་ཆེ་བོད་ལ་ཕེབས་མ་ཐུབ། ༸པཎ་ཆེན་རིན་པོ་ཆེའང་བཙོན་ལ་བཅུག་ནས་བཞག་ན་འཇིག་རྟེན་འདིར་བསྡད་ཀྱང་སྙིང་བོ་མི་འདུག་ཅེས་ཁ་བརྡ་བྱས་ཡོད་འདུག

Share this:
༡༢༧ ཀློག་གྲངས།