སེམས་ཀྱི་སྐད་ཆ།

 

རྒྱང་རིང་མི་ཡུལ་ཤེས་རིག་དགའ་ཚལ་ནས།། 

བྱམས་ལྡན་ཕ་མའི་རེ་བཞག་རླུང་ལ་སྐུར།། 

རྣམ་གཡེང་རྩེད་འཇོར་རོལ་བའི་སློབ་བུ་ཚོ།།

ཁྲེལ་ལྡན་ཡིན་ན་ཁྲེལ་མེད་གང་ལགས་སམ།།

ས་མཐའི་སྤྱི་ཚོགས་དྲག་ཆར་རླུང་ཚུབ་ཁྲོད།།

རི་རབ་ཇི་བཞིན་དཀའ་ཚེགས་ལྕི་ན་ཡང་།།

ནོར་བུའི་གླིང་གི་ཤེས་བྱའི་སྦྲང་རྩི་དག།

ལེན་པར་ཕྱི་བཤོལ་མ་བྱེད་ཕ་བཟང་བུ།།


 ཟ་ཟིང་མང་བའི་མི་ཡུལ་གྲུ་ཁ་ནས།།

གཡོ་ཅན་ལེ་ལོའི་རུམ་དུ་མ་ཉལ་བར།།

འོད་སྣང་འབར་བའི་མ་འོངས་མདུན་ལམ་དེ།།

སེམས་ནས་བསམ་བཞིན་སོང་དང་སློབ་བུ་ཚོ།།

 

 བློ་རིག་དཔའ་རྩལ་རྒོད་པའི་གཤོག་ཟུང་ཅན།།

མ་འོངས་ལམ་ཆེན་བཞུར་འདུན་སློབ་ཆེན་བ།།

གོ་ལའི་གོ་ས་རྒྱུ་ཡིས་བཟུང་དུས་འདིར།།

མི་གཤིས་ནོར་དང་མ་བརྗེ་སྐྱོང་བར་མཛོད།།

 

ཕ་སྐད་སྲོག་རྩ་ཕྲ་བའི་དགུན་ལྷགས་ཁྲོད།།

རང་སྐད་སྙིང་གི་ནོར་བུ་མ་སྦྱང་བར།།

གཞན་སྐད་ལན་ཟློས་བྱ་བར་འདུན་པའི་བུ།།

ཕ་སྐད་མེད་ན་ཁྱོད་ཀྱང་གང་དུ་གཏོགས།།

 

Share this:
༡༤༥ ཀློག་གྲངས།