ཨ་དཀོན་རིན་པོ་ཆེ་རྒྱ་ནག་ཁྲིན་ཏུའུ་རུ་སྐུ་བཀྲོངས་པ།

1375121_606284149417929_1682836573_nདེ་ཡང་ཕྱི་ཟླ་༡༠ ཚེས་༨ ཉིན་གྱི་སྔ་དྲོ་དབྱིན་ཡུལ་དུ་གནས་བཞུགས་བོད་ནང་གི་སློབ་གསོའི་ཐད་མཛད་རྗེས་ཧ་ཅང་ཆེ་ཞིང་རྒྱལ་སྤྱིའི་རོགས་པ་ཚོགས་པའི་ཚོགས་གཙོ་ཨ་དཀོན་རིན་པོ་ཆེ་མཆོག་དང། ཁོང་གི་ཚ་བོ་བློ་དགའ། ཁ་ལོ་པ་འཇིགས་མེད་དབང་རྒྱལ་བཅས་ལ་ལག་དམར་བས་གྲིས་བརྒྱབ་ནས་སྐུ་སྲོག་འཕྲོགས་ཡོད་འདུག ད་ལྟའི་ཆར་ལག་དམར་བ་ཡིན་པའི་དོགས་གཞིའི་འོག་རྒྱ་གཞུང་གི་ཉེན་རྟོག་པས་བོད་མི་གསུམ་འཛིན་བཟུང་བྱས་པ་དེ་དག་གིས་ལག་དམར་བ་ཡིན་པ་ཁས་ལེན་བྱས་མེད་སྟབས། ལག་དམར་བ་ངོ་མ་སུ་ཡིན་མིན་དང་ཕྱི་ནང་གི་རྒྱུ་རྐྱེན་དང་རྒྱབ་ལྗོངས་ངོ་མ་དེ་གང་ལ་བརྟེན་ནས་ཡིན་མིན་ཁྲིམས་ཐོག་ནས་ད་དུང་ཁ་གསལ་བྱུང་མེད་པ་དང། ཅིག་བྱས་ན་གཏན་དུ་མི་གསལ་བ་ཞིག་ཏུའང་འགྱུར་སྲིད་པ་རེད།

ཨ་དཀོན་སྐུ་ཕྲེང་གཉིས་པ་ཀརྨ་བཤད་སྒྲུབ་ཆོས་ཀྱི་ཉི་མ་ནི། ཆབ་མདོ་རི་བོ་རྫོང་ཁོངས་ངོམ་རྒྱུད་མདའ་རག་གྲོང་སྡེར་ཡབ་ཝ་རྒྱུད་བཀྲ་ཤིས་རིན་ཆེན་དང། ཡུམ་ཁ་ལུ་དོན་འགྲུབ་ཆོས་སྐྱིད་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ལྕགས་འབྲུག ཕྱི་ལོ་༡༩༤༠ ལོར་ཞང་ཚང་གི་ཆུ་ཟངས་འོ་མ་ལྟར་དཀར་པོར་གྱུར་པ་དང། གཡོག་མོའི་རྨི་ལམ་དུ་ཁང་སྟེང་དུ་གདུགས་བཙུགས་པར་རྨིས་པ་དང། སྔར་དང་མི་འདྲ་བར་བྱ་རོག་གཉིས་ཀྱིས་རྟག་པར་སྲུང་བའི་ཚུལ་བྱེད་པ་སོགས་ངོ་མཚར་བའི་ལྟས་དུ་མ་དང་བཅས་སྐུ་འཁྲུངས། རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ་རིག་པའི་རྡོ་རྗེ་མཆོག་གིས་ཨ་དཀོན་སྐུ་གོང་མའི་ཡང་སྲིད་དུ་ངོས་འཛིན་དང། མཚན་ཀརྨ་བཤད་སྒྲུབ་ཆོས་ཀྱི་ཉི་མ་ཕྲིན་ལས་ཀུན་ཁྱབ་དཔལ་བཟང་པོ་ཕྱོགས་ལས་རྣམ་པར་རྒྱལ་བའི་སྡེ་ཞེས་གནང། དགུང་གྲངས་བཞི་བཞེས་པའི་སྐབས་སུ་ཁྲི་འདོན་མངའ་གསོལ་ཞུས།

ཡོངས་འཛིན་བླ་མ་གྲགས་པ་བསྟན་འཛིན་གྱི་མདུན་ནས་ཡི་གེ་འབྲི་ཀློག་དང། ཆོ་ག་ཆོས་སྤྱོད་སོགས་བྱང་ཆུབ་པར་སྦྱངས་ཤིང་དབང་ལུང་ཁྲིད་སོགས་མང་དུ་ཞུས། ལྷག་པར་དུ་གྲུ་གུ་བསོད་སྙིང་སྤྲུལ་སྐུ་དང། འཛི་སྒར་ཀོང་སྤྲུལ། གྲུབ་ཆེན་ཀརྨ་ནོར་བུ། དྲུང་ཆོས་ཀྱི་རྒྱ་མཚོ། རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ། ཞེ་ཆེན་ཀོང་སྤྲུལ་པདྨ་དྲི་མེད། མཁན་པོ་གང་ཤར། དིལ་མགོ་མཁྱེན་བརྩེ་རིན་པོ་ཆེ། བྱམས་མགོན་སི་ཏུ་རིན་པོ་ཆེ་པདྨ་དོན་ཡོད་ཉིན་བྱེད་སོགས་ལས་དབང་ལུང་ཁྲིད་གསུམ་མན་ངག་དང་བཅས་པ་གསན་བསམ་ཡང་དག་མཛད།

ཕྱི་ལོ་༡༩༥༩ ལོའི་དུས་ཟིང་སྐབས་རྒྱ་གར་དུ་ཞབས་སོར་འཁོད་ནས། རིས་མེད་གྲུབ་མཐའ་སྤྱི་ཡི་སྤྲུལ་སྐུའི་སློབ་གྲྭའི་བདག་གཉེར་གྱི་འགན་ཁུར་བཞེས་ཏེ་ལོ་གསུམ་བཞུགས། ཕྱི་ལོ་༡༩༦༣ ལོར་དབྱིན་ཇིར་ཟུར་མང་དྲུང་པ་རིན་པོ་ཆེ་དང་ལྷན་དུ་ཕེབས་ཏེ་སྨན་ཁང་ནང་དུ་ལོ་གསུམ་དུ་ཕྱག་ལས་དཀྱུས་མ་མཛད་ཅིང། ཕྱི་ལོ་༡༩༦༧ ལོར་དྲུང་པ་རིན་པོ་ཆེ་དང་ལྷན་དུ་དབྱིན་ཇིར་ནུབ་ཕྱོགས་ཀྱི་བོད་དགོན་དང་པོ་བཏབ་ནས་བཀའ་བརྒྱུད་བསམ་ཡས་གླིང་ཞེས་བཏགས་ནས་ནུབ་ཕྱོགས་ཀྱི་སྐལ་ལྡན་ལས་འཕྲོ་ཅན་དུ་མ་ཆོས་ཀྱིས་ཚིམ་པར་མཛད།

དེ་བཞིན་ཁོང་གིས་བོད་ནང་གི་སློབ་གསོའི་ཐད་རོགས་སྐྱོར་གནང་བའི་སྐོར་རགས་ཙམ་ངོ་སྤྲོད་ཞུས་ན། བོད་རང་སྐྱོང་ཟེར་བའི་ཁོངས་ཀྱི་ས་གནས་༤༧ ལ་བཤད་གྲྭ་གྲངས་༨ དགེ་རྒན་སློབ་གྲྭ་༢ གསོ་རིག་སློབ་གྲྭ་༣ དྭ་ཕྲུག་སློབ་གྲྭ་ཆུང་འབྲིང་དག་གི་ཕོགས་དངུལ་གནང་བ་དང། ས་ཁུལ་ཁག་གཉིས་སུ་དྲོད་ཁང་གཉིས་བསྐྲུན་ནས་སྔོ་ཚལ་འདེབས་འཛུགས་རྟེན་གཞི་བཙུགས། བོད་ལྗོངས་གསོ་རིག་སློབ་གྲྭ་ཆེན་མོར། སྡེ་དགེ། འདབ་པ། ཆབ་མདོ་སོགས་ནས་ཟབ་སྦྱོང་མཛད་པའི་སློབ་མ་༤༠ ཙམ་ལ་སློབ་ཡོན་དང་ཟས་རིན་ཁང་གླ་བཅས་གནང། བོད་ཀྱི་གསོ་རིག་བརྒྱུད་འཛིན་དང་དར་སྤེལ་ཡོང་བའི་ཆེད་དུ་མཁན་ཆེན་ཁྲོ་རུ་ཚེ་རྣམ་རིན་པོ་ཆེས་གཙོས་བོད་ལྗོངས་སྨན་རྩིས་ཁང་གི་སྨན་པ་མཁས་པ་ཉི་ཤུ་ནས་སུམ་ཅུའི་བར་རྩ་འཛུགས་བྱས་ནས་དགུན་ཟླ་གསུམ་གྱི་རིང་ལ་རྒྱུད་བཞིའི་འགྲེལ་བ་བརྩམ་པ་དང། མན་ངག་ཟབ་མོའི་སློབ་སྦྱོང་གནང་བའི་མཐུན་རྐྱེན་གྱི་ཕོགས་དངུལ་དང། གསོ་རིག་བསྟན་བཅོས་རྣམས་ཀྱི་དཀར་ཆག་བསྒྲིགས་པ་བཅས་ཀྱི་རོགས་དངུལ་གནང།

སི་ཁྲོན་ཞིང་ཆེན་ཟེར་བའི་ཁོངས་ཀྱི་སློབ་གྲྭ་གྲངས་༤༧ དང། སློབ་མ་གྲངས་༣༠༣༩ བཤད་གྲྭ་༡༥ གྲྭ་གྲངས་༡༩༧༥ སྨན་ཁང་༡༢ རང་བྱུང་ནགས་རི་དང་ཁོར་ཡུག་སྲུང་སྐྱོབ་ཁག་༣ རིག་དངོས་སྲུང་སྐྱོབ་ཁག་༢ རྒན་གསོ་ཁང་༡ འཕྲོད་བསྟེན་སྒོ་བསྟེན་སྨན་ཁང་༡༢ བཅས་བཙུགས་ཤིང་ཕོགས་དངུལ་དང་འགྲོ་སོང་གནང།

མཚོ་སྔོན་ཞིང་ཆེན་ཟེར་བའི་ཁོངས་སུ་བཤད་གྲྭ་གྲངས་༦ བླ་གྲྭ་གྲངས་༥༢༠ དྭ་ཕྲུག་སློབ་གྲྭ་༢ སློབ་མ་གྲངས་༤༢༨ བོད་སྨན་གསོ་རིག་འཕྲོད་བསྟེན་སྨན་ཁང་༦ རྒན་གསོ་ཁང་༢ དབུལ་སྐྱོབ་ཁང་༡ རིག་དངོས་སྲུང་སྐྱོབ་ལས་ཁུངས་༣ བོད་ཀྱི་སྨན་རྩྭ་འདེབས་འཛུགས་རྟེན་གཞི་༢ དབུལ་བཅོས་ཕྱུག་བསྒྱུར་གྱི་ཚལ་ཞིང་དྲོད་ཁང་བཞི་བཅས་ཀྱི་ཕོགས་དངུལ་འགྲོ་གྲོན་དང་རོགས་པ་གནང།

ཀན་སུ་ཞིང་ཆེན་ཟེར་བའི་ཁོངས་སུ་དྭ་ཕྲུག་སློབ་གྲྭ་༣ དང། བོད་སྨན་སློབ་གྲྭ་༡ བཙུགས་པར་རྒྱུན་བཞུགས་སློབ་མ་༡༤༠ ཡོད་ལ། ནུབ་བྱང་མི་རིགས་སློབ་གྲྭ་ཆེན་མོའི་སྦྱིན་བདག་ཀྱང་གནང་མྱོང།

ཡུན་ནན་ཞིང་ཆེན་ཟེར་བའི་ཁོངས་སུ་སློབ་གྲྭ་༣ དང་བོད་སྨན་ཆེད་སྦྱོང་འཛིན་གྲྭ་བཅས་བཙུགས་པ་དང། སློབ་མ་གྲངས་༤༤༠ ལ་འགྲོ་སོང་མ་དངུལ་གནང། དབྱི་རིགས་རང་སྐྱོང་ཁུལ་ལ། སློབ་གྲྭ་༡ སློབ་མ་གྲངས་༩༣ གྱི་འགྲོ་སོང་གནང། མདོར་ན་བོད་ཀྱི་ས་ཁུལ་ལྗོངས་དང་ཞིང་ཆེན་ལྔ་ལ་མཚོན་ན་ཕྱི་ལོ་༡༩༩༠ ལོ་ནས་༢༠༡༠ ལོ་བར་རོགས་པ་བྱས་པའི་སློབ་མ་རྐྱང་པ་རགས་རྩིས་བྱས་ན་༩༡༡༨ ལྷག་ཙམ་ལ་རོགས་རམ་མཛད་པ་དང། རོགས་དངུལ་གནང་བ་རགས་རྩིས་བྱས་ན་རྒྱ་སྒོར་༡༧༨༠༩༥༥༢༦ ཙམ་གྱིས་རོགས་རམ་འཛུགས་བསྐྲུན་གནང་བར་མཛད། དེ་ཡང་རྒྱ་གཞུང་གི་ཁྲིམས་དང་མཐུན་པའི་གན་རྒྱ་ལོ་དྲུག་ནས་བཅུའི་བར་བཞག་སྟེ་ཁ་དང་བསམ་པ་ཙམ་མ་ཡིན་པར་སྦྱོར་བ་སྐུ་དངོས་ཕེབས་ཤིང་རང་གི་ལག་གིས་གནང་སྦྱིན་བསྟན་འགྲོའི་དོན་ལ་སྨིན་པར་མཛད་པ་སོགས་འཛམ་གླིང་གི་ཡུལ་གྲུ་དུ་མར་མཛད་རྗེས་རླབས་ཆེན་བསྐྱངས་ཡོད།

ཁོང་ནི་དུས་རྒྱུན་མི་རིགས་ཀྱི་ཆེད་དུ་ལ་རྒྱ་དང་བློ་ཁོག་ཆེན་པོས་ཁ་ཞེ་གཉིས་མེད་བརྗོད་མཁན་ཞིག་ཡིན་པ་དང། དཔེར་ན་ཕྱི་ལོ་༢༠༡༡ ལོར་བོད་རང་སྐྱོང་ལྗོངས་ཟེར་བ་བཙུགས་ནས་མི་ལོ་༦༠ འཁོར་མཛད་སྒོའི་ཐོག་བོད་ནང་གི་སློབ་གསོའི་ལས་དོན་སྒྲུབ་པའི་ཁོར་ཡུག་གི་ཆེད་དུ་དམིགས་ནས་ཕེབས་ཡོད་ཀྱང། མཛད་སྒོའི་སྟེང་རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁུངས་ཀྱི་འགོ་གཙོ་གཞོན་པ་ཀྲུའུ་ཝེ་ཆོན་གྱིས་གཏམ་བཤད་དོན་ཚན་ལྔ་ཅན་ཞིག་བཤད་པ་དང། དགོང་མོ་གསོལ་སྟོན་སྟེང་སླར་ཡང་འཐབ་ཕྱོགས་གཅིག་གྱུར་གྱི་འགོ་ཁྲིད་ཅིག་གིས་བསྐྱར་བཤད་བྱས་པར། དོན་ཚན་ལྔ་པ་དེ་ཏཱ་ལའི་རུ་ཚོགས་རྩ་མེད་གཏོང་དགོས་ཟེར་བ་སོགས་༧གོང་ས་མཆོག་ལ་མཚན་སྨད་སྐུར་འདེབས་དགོས་སྐོར་ཡིན་པར། “ཨ་དཀོན་རིན་པོ་ཆེས་དོན་ཚན་ལྔ་རེ་རེ་བཞིན་ལན་འདེབས་དང། གཙོ་ཆེ་ཤོས་དོན་ཚན་མཐའ་མ་དེར་ཁོང་གིས། ང་བོད་པའི་བླ་མ་ཆུང་ཆུང་ཞིག་གི་མིང་ཁུར་ནས་ལས་ཀ་བྱེད་མཁན་ཞིག་ཡིན་པའི་ཆ་ནས། ༧གོང་ས་མཆོག་ལ་མཚན་སྨད་སྐུར་འདེབས་ཞུ་རྒྱུ་དང། སྐྱག་རྫུན་ཤོད་རྒྱུའི་རིགས་དེ་ངས་ད་བར་བྱེད་མ་མྱོང། མ་འོངས་པར་ཡང་ངའི་མི་ཚེའི་ནང་རྩ་བ་ཉིད་ནས་བྱེད་རྩིས་མེད་”ཅེས་སོགས་གསུངས་པ་སྐབས་དེའི་འབྲེལ་ཡོད་ཅིག་གིས་བརྒྱུད་ལམ་ཁག་ཏུ་ཡོངས་གྲགས་གནང་ཡོད་པ་སོགས་སོ།།

Share this:
༢༣༦ ཀློག་གྲངས།