ཆོས་ལུགས་མཐུན་སྒྲིལ་ནི་ངོ་ཐོག་ལག་ལེན་ཐུབ་རྒྱུ་ཞིག་ཡིན།

༧གོང་ས་མཆོག་ཐེངས་འདིར་ཨི་ཊ་ལི་རུ་ཆིབས་བསྒྱུར་གནང་བ་དང་སྟབས་བསྟུན། ཕྱི་ཟླ་༦ ཚེས་༡༢ཉིན་གསར་འགོད་པའི་དྲི་བར་བཀའ་ལན་གནང་སྐབས། འགྲོ་བ་མིའི་བཟང་སྤྱོད་དང་ཆོས་ལུགས་མཐུན་སྒྲིལ་གོང་སྤེལ་གཏོང་དགོས་པའི་ལམ་སྟོན་གནང་འདུག

གསར་འགོད་པ་ལྷན་འཛོམས། tibet.net
གསར་འགོད་པ་ལྷན་འཛོམས། tibet.net

དེ་ཡང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བ་ལྟར་ན། ཕྱི་ཟླ་༦ ཚེས་༡༢ཉིན་༸གོང་ས་མཆོག་གིས་ཨི་ཊ་ལིའི་ཊུ་སི་ཀན་ནི་མངའ་སྡེའི་པོ་མ་ཡ་ (Pomaia) གྲོང་གསེབ་ཏུ་ཨི་ཊ་ལིའི་ནང་གསར་ཤོག་གྲགས་ཆེ་ཤོས་ཡིན་པ་(Corriere della Sera) ཞེས་པའི་གསར་འགོད་པ་སྐུ་ཞབས་བྷེ་པེ་སེ་ཝར་གི་ནིའི་(Mr. Beppe Severgnini) ཆེད་དོན་དྲི་བར་བཀའ་ལན་བསྩལ་ཡོད་པ་རེད།

༸གོང་ས་མཆོག་ཨི་ཊ་ལིའི་ནང་ཆིབས་སྒྱུར་བསྐྱངས་སྐབས་གསར་འགྱུར་བརྒྱུད་ལམ་ཁག་ནས་དོ་སྣང་ཆེན་པོ་ཞུས་བཞིན་ཡོད་སྟབས་། དེའི་ཉིན་གསར་འགོད་པ་ཁྱོན་མི་གྲངས་ ༨༠ཙམ་ལ་མཇལ་ཁ་དང་བཀའ་སློབ་སྩོལ་སྐབས། ངོས་རང་ཨི་ཊ་ལིའི་ནང་བཅར་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་།ངོས་རང་ཐོག་མར་འདིར་བླ་མ་ཙོང་ཁ་པའི་ཆོས་ཚོགས་སུ་བཅར་བ་ནས་བཟུང་ད་བར་མི་རབས་བརྗེས་ཟིན་ཡང་། ཆོས་ཚོགས་འདིའི་ཐོག་མའི་དམིགས་ཡུལ་བསྒྲུབ་རྒྱུར་འབད་བརྩོན་མུ་མཐུད་ནས་བྱེད་བཞིན་ཡོད་པ་དེར་ངོས་རང་ཧ་ཅང་དགའ་པོ་བྱུང་། དེ་བཞིན་གསར་འགོད་པ་ཚོས་དོ་སྣང་ཆེན་པོའི་ཐོག་འདི་གར་ཕེབས་པར་ངོས་ཀྱིས་བསྔགས་བརྗོད་ཞུ་རྒྱུ་ཡིན།

འཛམ་གླིང་འདིའི་ནང་མི་འབོར་ཐེར་འབུམ་བདུན་ཡོད་ཁོངས་ནས་ངོས་རང་དེའི་ཆ་ཤས་ཤིག་ཡིན་པར་ངོས་འཛིན་བྱེད་བཞིན་ཡོད། ང་ཚོ་ཚང་མ་བྱམས་པ་དང་བརྩེ་བ།བདེ་སྐྱིད་འདོད་མཁན་ཡིན་པ་གཅིག་མཚུངས་ཆགས་ཡོད།དེར་བརྟེན་ངོས་ཀྱིས་དུས་རྟག་ཏུ་འགྲོ་བ་མིའི་རྒྱུད་ལ་ཡོད་པའི་བྱམས་བརྩེ་སོགས་བཟང་པོའི་རིན་ཐང་དེ་དག་གོང་མཐོར་གཏོང་རྒྱུའི་འབད་བརྩོན་བྱེད་བཞིན་ཡོད། བྱམས་བརྩེ་ནི་བདེ་སྐྱིད་ཀྱི་རྩ་བ་ཡིན། ང་ཚོར་ཆོས་དད་ཡོད་མེད་དང་།རིག་གཞུང་འདྲ་མིན་གང་ཡིན་ལ་མ་ལྟོས་པར་ང་ཚོ་ཚང་མར་བྱམས་བརྩེའི་དགོས་མཁོ་ཡོད་མཁན་གཅིག་མཚུངས་ཆགས་ཡོད།
དེ་ནས་ཆོས་ལུགས་ཕན་ཚུན་དབར་མཐུན་སྒྲིལ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ངོས་རང་དུས་རྟག་ཏུ་ཆོས་ལུགས་གཞན་གྱི་ཉམས་ལེན་གནང་མཁན་རྣམ་པར་མཐུན་སྒྲིལ་དམ་ཟབ་སྤེལ་བཞིན་ཡོད། ཆོས་ལུགས་ཚང་མས་བྱམས་བརྩེ་དང་། སྙིང་རྗེ། བཟོད་བསྲན་བྱེད་དགོས་ལུགས་གཅིག་མཚུངས་གསུངས་ཀྱི་ཡོད། རྒྱ་གར་ནང་ལོ་ངོ་སྟོང་ཕྲག་མང་པོའི་རིང་ཆོས་ལུགས་འདྲ་མིན་རྣམས་ཕན་ཚུན་འཆམ་མཐུན་ངང་འཚོ་གནས་བྱས་དང་བྱེད་མུས་ཡིན།ངོས་རང་རྒྱ་གར་ནང་གནས་སྡོད་བྱས་ཏེ་ལོ་ངོ་ ༥༠ ལྷག་འགྲོ་བཞིན་ཡོད།རྒྱ་གར་ནི་ལོ་ངོ་༢༠༠༠ལྷག་ནས་ཆོས་ལུགས་འདྲ་མིན་ཞི་ལྷིང་ཐོག་མཉམ་གནས་བྱེད་བཞིན་པའི་དཔེ་མཚོན་ཡག་ཤོས་ཤིག་རེད། ཅེས་ངོས་ཀྱིས་རྒྱུན་དུ་བརྗོད་བཞིན་ཡོད།དེར་བརྟེན་ཆོས་ལུགས་མཐུན་སྒྲིལ་ནི་ངོ་ཐོག་ལག་ལེན་ཐུབ་རྒྱུ་ཞིག་ཡིན།

ངོས་རང་བོད་མི་ཞིག་ཡིན་པའི་ཆ་ནས་དུས་རྟག་ཏུ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱེད་རྒྱུར་འབད་བརྩོན་བྱེད་བཞིན་ཡོད། ད་ཆ་ངོས་རང་བོད་མིའི་ཆོས་ཕྱོགས་ཀྱི་འགོ་ཁྲིད་ཅིག་ཆགས་ཡོད། ཕྱི་ལོ་ ༢༠༡༡ལོར་ངོས་ཀྱི་བོད་མིའི་ཆབ་སྲིད་ཀྱི་འགོ་ཁྲིད་ནས་རྒས་ཡོལ་ཆ་ཚང་ཞུས་ནས་ད་ཆ་བོད་མིའི་ཆབ་སྲིད་ཀྱི་འགོ་ཁྲིད་མི་མང་གིས་མང་གཙོའི་ལམ་ནས་འོས་འདེམས་བྱེད་བཞིན་ཡོད། ངོས་ཀྱིས་བོད་མིའི་ཆབ་སྲིད་ཀྱི་དབང་ཆ་དེ་མང་གཙོའི་ལམ་ནས་འོས་འདེམས་བྱས་པའི་འགོ་ཁྲིད་ལ་དང་བླངས་ཐོག་ནས་དགའ་བཞིན་སྤྲོ་བཞིན། སྤོབས་པ་དང་བཅས་དབང་ཆ་ཡོངས་རྫོགས་རྩིས་སྤྲོད་བྱས་པ་ཡིན། ཁྱེད་རང་ཚོ་གསར་འགོད་པར་འགྲོ་བ་མིའི་བཟང་པོའི་རིན་ཐང་དང་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུར་འོས་འགན་གལ་ཆེ་ཞིག་ཡོད། གསར་འགོད་པ་ཚོས་གླང་པོ་ཆེའི་སྣ་ཁུག་ལྟར་རྒྱབ་མདུན་ཕྱོགས་གཉིས་ཀའི་གནས་ཚུལ་ཤེས་པའི་ཐོག་ནས་མང་ཚོགས་ལ་ཕྱོགས་ལྷུང་མེད་པའི་དངོས་ཡོད་ཀྱི་གནས་ཚུལ་མཁོ་སྤྲོད་བྱེད་དགོས། ཞེས་བཀའ་སློབ་བསྩལ་གྲུབ་མཚམས། གསར་འགོད་པ་རྣམས་ཀྱི་དྲི་བ་ཁག་ལ་བཀའ་ལན་བསྩལ་ཡོད་པ་རེད།

སྐབས་དེར་གསར་འགོད་པ་ཞིག་གིས་དེང་སྐབས་རྒྱ་ནག་སྐམ་སའི་ནང་རྒྱ་རིགས་ནང་པ་ཧ་ཅང་མང་དུ་འགྲོ་བཞིན་པའི་གནད་དོན་སྐོར་བཀའ་འདྲི་ཞུས་པར་བཀའ་ལན་བསྩལ་དོན། དེང་སྐབས་འཛམ་གླིང་ནང་དུ་ནང་པ་མང་ཤོས་རྒྱ་ནག་ནང་ཡོད།རྒྱ་ནག་ནང་དུ་ནང་པ་ས་ཡ་ ༤༠༠ ཡོད་སྐོར་བརྗོད་བཞིན་འདུག རྒྱ་ནག་སྐམ་སའི་རྒྱ་རིགས་མང་པོས་ནང་ཆོས་ལ་དོ་སྣང་ཧ་ཅང་ཆེན་པོ་བྱེད་བཞིན་འདུག ཁོང་ཚོས་རྒྱ་གར་ནང་ངོས་ཀྱི་སར་ནས་གསུང་ཆོས་ཉན་དུ་ཡོང་བཞིན་ཡོད།ཅེས་བཀའ་ལན་སྩལ་བ་དང་སྦྲགས། བོད་མིའི་ཆབ་སྲིད་ཀྱི་འཐབ་རྩོད་སྐོར་བཀའ་བསྩལ་དོན། བོད་མི་ཚོས་མིང་དོན་མཚུངས་པའི་རང་སྲིད་རང་སྐྱོང་ཁོ་ན་རྩོད་བཞིན་ཡོད་པ་ལས་རྒྱ་ནག་དང་ཁ་བྲལ་གྱི་རང་བཙན་རྩོད་ཀྱི་མེད། ཅེས་བཀའ་ལན་བསྩལ་ཡོད་པ་རེད།

༧གོང་ས་མཆོག་གིས་དུས་འཁོར་དབང་ཆེན་ཐོག་གི་དྲི་བར་བཀའ་ལན་བསྩལ་དོན།རྒྱ་ནག་གཞུང་གིས་དུས་འཁོར་དབང་ཆེན་ལ་བཅར་མཁན་བོད་རིགས་དང་རྒྱ་རིགས་དབར་དབྱེ་བ་འབྱེད་བཞིན་འདུག དེ་སྔ་ཕྱི་ལོ་ ༢༠༡༢ལོར་ངོས་ཀྱིས་རྒྱ་གར་བྱང་ཕྱོགས་རྡོ་རྗེ་གདན་དུ་དུས་འཁོར་དབང་ཆེན་བྱེད་སྐབས།ཆོས་ཞུར་བཅར་མཁན་རྒྱ་རིགས་དང་བོད་རིགས་རྣམས་བོད་དུ་ཕྱིར་ལོག་རྗེས་རྒྱ་ནག་གཞུང་གིས་རྒྱ་རིགས་ཆོས་ཞུ་བ་ཚོར་བསུན་གཙེ་གང་ཡང་མ་བཟོས་པར་བཞག་ཡོད་ཀྱང་། བོད་རིགས་ཆོས་ཞུ་བ་ཚོར་འདྲི་རྩད་བྱས་པ་མ་ཟད། ཁང་པའི་ནང་བཟང་བཙོན་དུ་བཀག་ཉར་སོགས་བྱས་འདུགའདི་ལོར་ཆ་མཚོན་ན་ངོས་ཀྱིས་ཕྱི་ཟླ་ ༧ནང་ལ་དྭགས་སུ་དུས་འཁོར་དབང་བྱེད་བྱ་རྒྱུ་ཡིན། དེར་བརྟེན་རྒྱ་ནག་གཞུང་གིས་ད་ལྟ་ནས་བོད་རིགས་རྣམས་ལ་དམ་དྲག་བཀག་བསྡོམས་བྱེད་བཞིན་ཡོད་པ་དང་། ལྷག་པར་བོད་རང་སྐྱོང་ལྗོངས་ནས་དུས་འཁོར་དབང་ཆེན་ལ་འགྲོ་མཁན་ཚོར་དམ་དྲག་ཤུགས་ཆེ་བྱེད་བཞིན་ཡོད་ཅེས་བཀའ་སློབ་གནང་ཡོད་པ་རེད།།

Share this:
༢༠༣ ཀློག་གྲངས།