ཆོས་བརྒྱུད་ཆེན་པོ་བཞིའི་བཞེད་མཚམས་སྐོར་གྱི་བགྲོ་གླེང་།

ཟླ་འདིའི་ཚེས་༢༥ ནས་ཉིན་གསུམ་གྱི་རིང། “སེམས་ཙམ་པའི་ལྟ་གྲུབ་ཐོག་བོད་ཀྱི་ཆོས་བརྒྱུད་ཆེན་པོ་བཞིའི་བཞེད་མཚམས་ཀྱི་རྒྱལ་ཡོངས་བགྲོ་གླེང་ཚོགས་འདུ་”ཞིག་འཚོགས་པ་དང་། ཚོགས་འདུ་དབུ་འབྱེད་མཛད་སྒོར་བཀའ་ཁྲི་ཟུར་པ་མཁས་དབང་ཟམ་གདོང་རིན་པོ་ཆེ་ཕེབས་ཡོད་པ་རེད།

1549279_72096_nདེ་ཡང་རིག་འཛིན་ལྷུན་གྲུབ་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། གནས་མཆོག་ཝཱ་རཱ་ཎ་སཱི་དབུས་བོད་ཀྱི་གཙུག་ལག་སློག་གཉེར་ཁང་གི་ཤེས་རིག་ལས་གཞི་ནང། སྤྱིར་ཕྱི་ནང་ལྟ་གྲུབ་དང་། ནང་བསྟན་དང་དེང་རབས་ཚན་རིག། དེ་བཞིན་བོད་ཀྱི་ཆོས་བརྒྱུད་ཆེན་པོ་བཞིའི་བར་བགྲོ་གླེང་ཚོགས་འདུ་གོ་སྒྲིག་ཞུས་དང་ཞུ་མུས་ལྟར། འདས་པའི་ལོ་འགའི་སྔོན་བོད་ཀྱི་ཆོས་བརྒྱུད་ཆེན་པོ་བཞིའི་དབུ་མའི་ལྟ་བའི་བཞེད་མཚམས་སྐོར་༧གོང་ས་༧སྐྱབས་མགོན་ཆེན་པོ་མཆོག་དབུ་བཞུགས་ཐོག་འཚོགས་ཡོད་པ་དང། འདི་ལོ་སྤྱི་ལོ་༢༠༡༤ ཟླ་༩ ཚེས་༢༥ ནས་༢༧ ཉིན་གསུམ་གྱི་རིང། སེམས་ཙམ་པའི་ལྟ་གྲུབ་ཐོག་བོད་ཀྱི་ཆོས་བརྒྱུད་ཆེན་པོ་བཞིའི་བཞེད་མཚམས་ཀྱི་རྒྱལ་ཡོངས་བགྲོ་གླེང་ཚོགས་འདུ། འདི་ཟླའི་ཚེས་༢༥ཞོགས་པ་དབུ་འབྱེད་མཛད་སྒོར་བཀའ་ཁྲི་ཟུར་པ་མཁས་དབང་ཟམ་གདོང་རིན་པོ་ཆེ་ཕེབས་པ་དང་། གཞན་ཡང་བོད་ཀྱི་ཆོས་བརྒྱུད་ཆེན་པོ་བཞིའི་གདན་ས་དང་བཤད་གྲྭ་ཁག་གི་སྐུ་ཚབ་མཁན་པོ་དང། དགེ་བཤེས་དང་། སློབ་དཔོན་རྣམས་དང་། དེ་བཞིན་གཙུག་ལག་སློབ་གཉེར་ཁང་གི་རྒྱ་གཞུང་དང་། རང་གཞུང་གི་དགེ་བའི་བཤེས་གཉེན་རྣམས་དང། ཉམས་ཞིབ་པ་དང་སློབ་མ་བྱིངས། དགེ་འོས་སློབ་གཉེར་བ་བཅས་ཚང་འཛོམས་བྱུང་ཡོད་པ་རེད།

ཝཱཎ་གཙུག་ལག་སློབ་གཉེར་ཁང་གི་རིགས་བདག་གིས་གསུང་བཤད་གནང་དོན། སྟོན་པ་བཅོམ་ལྡན་འདས་བྱོན་ཏེ། ལྟ་བ་བཀའ་བརྟགས་ཀྱི་ཕྱག་རྒྱ་བཞི་གསུངས་ནས་དེའི་དུས་དེའི་ཚེ་རྒྱ་གར་ནང་ལྟ་བ་དང་ཆོས་ཀྱི་ནང་གསར་བརྗེ་ཆེན་པོ་གཉིས་བྱུང་ཡོད་པ་ནི། ཆོས་ཀྱི་ནང་འཁོར་འདས་འཇུག་ལྡོག་གམ་བཅིངས་གྲོལ་གྱི་རྣམ་གཞག འདུས་བྱས་ཐམས་ཅད་མི་རྟག་པ།། ཟག་བཅས་ཐམས་ཅད་སྡུག་བསྔལ་བ།། ཞེས་གསུངས་ཏེ། ཆོས་ཐམས་ཅད་མི་རྟག་རང་བཞིན་དང་། བཅིངས་བ་སྡུག་བསྔལ་དང་གྲོལ་བ་བདེ་བའི་རྒྱུ་གང་ཡིན་པ་བསྟན་ནས། དེའི་དུས་དེའི་ཚེ་རྒྱ་གར་གྱི་ཆོས་ལུགས་ཁག་གི་བདེ་སྡུག་གི་རྒྱུ་བླང་དོར་བྱེད་པའི་ཚུལ་ལ་གསར་བརྗེ་ཆེན་པོ་ཞིག་བྱུང་ཡོད་ཚུལ་དང། དེ་བཞིན་ལྟ་བ་ནི། ཆོས་ཐམས་ཅད་སྟོང་ཞིང་བདག་མེད་པ།། ཞེས་གསུངས་ཏེ་ཆོས་རྣམས་སྟོང་ཉིད་དང་། བདག་མེད་པའི་གནས་ལུགས་རང་བཞིན་གང་ཡིན་བསྟན་ནས། དེའི་སྐབས་གྲུབ་མཐའ་ཁག་གིས་འཛིན་པའི་ལྟ་ཚུལ་ལ་གསར་བརྗེ་ཆེན་པོ་བྱུང་ཚུལ་སོགས་སངས་རྒྱས་པ་བསྟན་སྤྱིའི་དགེ་མཚན་སྐོར་གསུངས་ཡོད་པ་རེད།

དེ་ནས་མཁས་དབང་ཟམ་གདོང་རིན་པོ་ཆེས་“བོད་དུ་སེམས་ཙམ་པ་ཡིན་ཞེས་པའམ། སེམས་ཙམ་པའི་གྲུབ་མཐའ་འཛིན་མཁན་ཡིན་ཞེས་པའི་གང་ཟག་སྒེར་བྱུང་མེད་ཚོད་ཀྱང། བོད་ཀྱི་མཁས་པ་རིམ་བྱོན་གྱིས་སེམས་ཙམ་ལྟ་གྲུབ་སྐོར་འཆད་ཉན་དང་། བསླབ་བ་སློབ་གཉེར་གྱི་གནས་ཚུལ་ཧ་ཅང་གི་རྒྱ་ཆེན་པོ་དང། གཏིང་ཟབ་པོ་བྱུང་ཡོད་”ཅེས་དང། ཁོང་རང་ཉིད་ལ་དྭོགས་སློང་དང་གསོལ་འདེབས་ཞུ་རྒྱུ་གསུམ་ཡོད་པ་ལས། “དང་པོ། སེམས་ཙམ་པའི་ཤེས་བྱ་རྩ་བའི་མདོ་དང་བསྟན་བཅོས་གང་དག་ཐུན་མོང་དང་ཐུན་མིན་གྱི་ཚུལ་དུ་བཀའ་བསྟན་གཉིས་ནང་ཇི་ལྟར་བཞུགས་ཡོད་མེད་ཁ་གསལ་སྒྲིག་སྦྱོར་བྱེད་གལ་ཆེ་བ་དང། གཉིས་པ། རྣམ་ཤེས་ཚོགས་བརྒྱད་འདོད་པའི་དགོས་དོན་གང་ཡིན། ཀུན་གཞི་དང་ཉོན་ཡིད་རྣམ་གཞག་བཞེད་དགོས་དོན་གནད་གང་ལ་ཐུག་ཡོད་མེད་དང། གསུམ་པ། རང་རིག་བཞེད་དགོས་དོན་དང་། དབང་ཡིད་མངོན་གསུམ་ནང་མ་བཙུད་པའི་རང་རིག་མངོན་གསུམ་འཇོག་པའི་གནད་གང་ཡིན།” ཞེས་སོགས་དྭོགས་སློང་དང་འབྲེལ་བའི་གསུང་བཤད་གནང་ཡོད་པ་རེད།

ཉིན་དང་པོའི་༼ཟླ་༩ཚེས་༢༥༽བགྲོ་གླེང་གཏམ་བཤད་ཁག་གི་བརྗོད་གཞི་དང་གཏམ་བཤད་གནང་མཁན། ༡༽སེམས་ཙམ་ལུགས་ལ་ཕྱི་དོན་སྒྲུབ་ཚད། དོལ་བུ་སྤྲུལ་སྐུ། ༢༽རིགས་པའི་རྗེས་འབྲངས་ཀྱི་སེམས་ཙམ་པའི་ནང་གསེས་ཁྱད་པར། དགེ་བཤེས་རྒྱལ་མཚན་དབང་འདུས། ༣༽སེམས་ཙམ་རྣམ་བདེན་རྗུན་གཉིས་ཀྱི་ཁྱད་པར། འཇིགས་མེད་བློ་གྲོས། སེམས་ཙམ་ལུགས་ཀྱི་རང་རིག་འདོད་ཚུལ། དགེ་བཤེས་ཟླ་བ་ཚེ་རིང། ༤༽སེམས་ཙམ་པའི་སྒྲིབ་གཉིས་རྣམ་གཞག མཁན་པོ་གཡལ་རྒྱལ།

ཉིན་གཉིས་པའི་༼ཟླ་༩ཚེས་༢༦༽བགྲོ་གླེང་གཏམ་བཤད་ཁག་གི་བརྗོད་གཞི་དང་གཏམ་བཤད་གནང་མཁན། ༡༽སེམས་ཙམ་པའི་ལུགས་ལ་སྣང་བ་སེམས་སུ་གྲུབ་ཚུལ། མཁན་པོ་བདུད་འཇོམས་རྣམ་རྒྱལ། ༢༽སེམས་ཙམ་པའི་ལུགས་ཀྱི་ཀུན་གཞིའི་རྣམ་གཞག དགེ་བཤེས་བསྟན་འཛིན་ནོར་བུ། ༣༽གཟུང་འཛིན་གཉིས་སྟོང་དང་དགོངས་འགྲེལ་ནས་གསུངས་པའི་ཡོངས་གྲུབ་གཉིས་ཀྱི་སྐོར། མཁན་པོ་འཇལ་དཔལ་ཆོས་འཛིན། ༤༽སེམས་ཙམ་པའི་ལྟ་གྲུབ་བྱུང་ཚུལ། སློབ་དཔོན་དབང་ཕྱུག་རྡོ་རྗེ། ༥༽སེམས་ཙམ་པའི་ལྟ་གྲུབ་སྐོར་མོད་བསྟན་བཅོས་ལས་གསལ་ཚུལ། ཨཱཅཱརྱ་རྒྱལ་མཚན་རྣམ་གྲོལ། ༦༽སེམས་ཙམ་པའི་ལུགས་ཀྱི་ཀུན་གཞི་འདོད་ཚུལ། སློབ་དཔོན་གྲགས་པ་སེང་གེ།

ཉིན་གསུམ་པའི་༼ཟླ་༩ཚེས་༢༧༽བགྲོ་གླེང་གཏམ་བཤད་ཁག་གི་བརྗོད་གཞི་དང་གཏམ་བཤད་གནང་མཁན། ༡༽སེམས་ཙམ་པའི་ཐུན་མིན་གྱི་རྣམ་པ་འདོད་ཚུལ། དགེ་བཤེས་བློ་བཟང་ཆོས་འཕགས། ༢༽རྣམ་རིག་ཙམ་དུ་སྒྲུབ་ཚུལ་དང་བག་ཆགས་གསུམ་གྱི་འབྲེལ་བ། དགེ་བློ་བཟང་རྒྱལ་མཚན། ༣༽སེམས་ཙམ་ལུགས་ཀྱི་མཚན་ཉིད་གསུམ་གྱི་རྣམ་གཞག དཀའ་ཆེན་བློ་བཟང་ཤེས་རབ། ༤༽སེམས་ཙམ་ལུགས་ཀྱི་ཚད་འབྲས་ཀྱི་རྣམ་གཞག དགེ་བཤེས་ངག་དབང་དབང་འདུས། ༥༽སེམས་ཙམ་ལུགས་ཀྱི་ཡུལ་ཅན་ཚད་མ་འདོད་ཚུལ། དགེ་བཤེས་བློ་བཟང་ཐབས་མཁས།

ཉིན་གསུམ་རིང་སེམས་ཙམ་པའི་ལྟ་གྲུབ་ཐོག་བོད་ཀྱི་ཆོས་བརྒྱུད་ཆེན་པོ་བཞིའི་བཞེད་མཚམས་ཀྱི་བགྲོ་གླེང་གི་བརྗོད་གཞི་ཁག་ལ་མཁས་པ་རྣམས་སེམས་ཙམ་པ་དང་སེམས་ཙམ་གྲུབ་མཐའི་སྐོར་ལ་དཔྱད་རྩོམ་སྤེལ་ཡོད་པ་རེད།།

Share this:
༡༨༧ ཀློག་གྲངས།