རྩོམ་པ་པོ་བློ་མིག་རྔ་པ་ནས་རྒྱ་གཞུང་གིས་བཙན་ཁྲིད།

ཟླ་འདིའི་ཚེས་ ༡༧ ཉིན་གྱི་མཚན་མོའི་ཆུ་ཚོད་བཅུ་གཅིག་དང་ཕྱེད་ཀ་ཡས་མས་ཙམ་ལ་བོད་མདོ་སྨད་རྔ་བ་རྫོང་ཐོག་ནས། རྒྱ་གཞུང་གིས་རྩོམ་པ་པོ་བློ་མིག་འཛིན་བཟུང་བཙན་ཁྲིད་བྱས་པ་དང་། ད་སྐབས་ཁོང་གང་དུ་བཀག་ཉར་བྱས་ཡོད་མེད་ཤེས་རྟོགས་ཐུབ་ཀྱི་མེད་པ་རེད།

unnamedདེ་ཡང་འབྲེལ་ཡོད་ཀྱིས་གནས་ཚུལ་འགྲེལ་བརྗོད་བྱས་པ་ལྟར་ན། རྩོམ་པ་པོ་ཁོང་གི་དངོས་མིང་ལ་ཇོ་འཇམ་དབྱངས་དང་། ཡོངས་གྲགས་སུ་བློ་མིག་ཏུ་ཟེར་གྱི་ཡོད་པ་དང་། ཁོང་རྒྱ་གཞུང་གིས་འཛིན་བཟུང་བཙན་ཁྲིད་བྱེད་དགོས་དོན་ཁ་གསལ་བྱུང་མེད་ནའང་། ཁོང་བཙན་ཁྲིད་བྱས་རྗེས་རྩོམ་པ་པོ་ཉི་ཤུ་ལྷག་གིས་ཁོང་གི་སྐོར་ལ་རྩོམ་ཡིག་བྲིས་པ་རྣམས་ཀྱི་ནང་དོན་དང་འབྲེལ་ཡོད་རྣམས་ཀྱིས་ཚོད་དཔག་བྱས་པ་ལྟར་ན། ཁོང་གིས་ ༢༠༠༨ ལོའི་ཞི་རྒོལ་དང་རང་ལུས་མེར་སྲེག་གི་རྒྱབ་ལྗོངས། ཁོར་ཡུག་གཏོར་བཅོམ་དང་སྨྲ་བརྗོད་རང་དབང་བཙན་འཕྲོག་བྱས་དང་བྱེད་བཞིན་པ་སོགས་རྒྱ་གཞུང་ལ་ཐེར་འདོན་གྱི་རྩོམ་ཡིག་བྲིས་ཤིང་། བགྲོ་གླེང་དང་གཏམ་བཤད་སྔ་ཕྱི་མང་པོར་བྱས་པའི་རྐྱེན་གྱིས་ཡིན་པ་ངོས་འཛིན་བྱེད་ཀྱི་ཡོད་འདུག

རང་ལོ་ཉེར་བདུན་ཡིན་པའི་རྩོམ་པ་པོ་ཁོང་ནི་ཨ་མདོ་རྔ་བ་རྨེའུ་རུ་མའི་རུ་ཆེན་གསུམ་པ་ནས་ཡིན་པ་དང་། ཇོ་ཚང་གི་ཕ་མིང་ལ་རྡོར་ཁོ་དང་མ་མིང་ལ་འཛམ་དཀར་ཟེར་གྱི་ཡོད་འདུག ལོ་དྲུག་གི་སྟེང་རྔ་བ་ཀིརྟི་དགོན་པར་གྲྭ་པ་བྱས་ཤིང་། ཀིརྟིའི་ནང་བསྟན་གཞོན་ནུའི་སློབ་གྲྭར་ཞུགས་ཏེ་སློབ་སྦྱོང་རྒྱུན་སྐྱོང་བྱེད་བཞིན་པའི་སྐབས་སུ། རྒྱ་གཞུང་གིས་གྲྭ་ཕྲུག་བདུན་བརྒྱ་ལྷག་ཡོད་པའི་ནང་བསྟན་གཞོན་ནུའི་སློབ་གྲྭའི་སྒོ་བརྒྱབས་རྗེས། རྔ་བ་ཀིརྟི་དགོན་པ་གཙོས་བྱས་ཏེ་བྲག་འགོ་དགོན་དང་རེབ་སྐོང་། བླ་རུང་སྒར་སོགས་ནས་ནང་ཆོས་དང་རྩོམ་རིག་སོགས་ལ་སློབ་སྦྱོང་བྱས་ཤིང་། ད་སྐབས་རྔ་བ་ཀིརྟི་དགོན་པའི་ཕར་ཕྱིན་འཛིན་གྲྭ་ཡིན་འདུག

lo mig (4)ཕྱི་ལོ་ ༢༠༡༠ ལོར་༼ན་བུན་སེར་པོའི་འཕྱུར་སྟངས།༽ཟེར་བའི་དེབ་ཅིག་བརྩམས་ནས་ཟི་ལིང་ནས་དཔར་བསྐྲུན་བྱས་འདུག དེ་མིན་བོད་ནང་གི་མཆོད་མེ་དྲ་བ་དང་སེང་རྡོར་དྲ་བ། མཚོ་སྔོན་པོ་ཟིན་བྲིས་སོགས་སུ་ཆེད་རྩོམ་མང་པོ་སྤེལ་མྱོང་མཁན་ཞིག་ཡིན་འདུག

ལྷག་པར་ཉེ་ཆར་ཁོང་གིས་༼ལྕགས་སྒྲོག་གིས་བཀྱིགས་པའི་གཏམ་རྒྱུད།༽ ༼རྔ་བའི་ཡི་གེ་བ་དག་ལ་མཚོན་གྱིས་བསྣུན་གྱིན་ཡོད།༽ ༼ང་མ་ཤི་བར་དུ་ལྟ་ཚུལ་བཤད་ཁོ་ཐག་ཡིན།༽ ཟེར་བ་སོགས་ཀྱི་རྩོམ་ཡིག་མང་པོ་ཞིག་སྤེལ་འདུག

དམིགས་བསལ་བོད་ནང་གི་རྩོམ་པ་པོ་སྒོ་ཤེར་དང་སེང་རྡོར། དགུ་རུང་སྤུན་གྲོལ་དང་ཞོགས་ལྗང་སོགས་དང་ལྷན་དུ་༼ཟི་ལིང་གཟའ་ཉི་མའི་ཁ་བརྡ་༽སོགས་ཀྱིས་མཚོན་པའི་མཚོ་སྔོན་དགེ་འོས་སློབ་ཆེན་སོགས་ནས་བགྲོ་གླེང་མང་པོ་བྱས་མྱོང་ཡོད་འདུག  མ་ཟད་ཐོག་དང་པོར་རྔ་བ་རང་ནས་ཀྱང་༼རང་གྲོལ་བསྐྱར་ཞིབ་༽དང་༼གཟའ་ཉི་མའི་ཁ་བརྡ།༽ཟེར་བའི་བགྲོ་གླེང་གསར་འཛུགས་བྱས་ཏེ་གཞོན་སྐྱེས་མང་པོར་ཤུགས་རྐྱེན་ཆེན་པོ་ཐེབས་འདུག གཞན་རྨེའུ་རུ་མ་ནས་ཀྱང་༼སྨྲ་བརྗོད་མེད་པའི་འུ་ཅག་༽ཟེར་བའི་དམངས་ཚོགས་དང་མཉམ་དུ་བགྲོ་གླེང་ཞིག་གོ་སྒྲིག་བྱས་ཡོད་འདུག །

གསར་འགོད་པ་ཆོས་ཉིད་འོད་ཟེར།

Share this:
༣༧༨ ཀློག་གྲངས།