སྲིད་སྐྱོང་འོས་མི་གསར་པ་བཀྲ་ཤིས་དབང་འདུས་ལགས་ངོ་སྤྲོད།

Tawang1བཀྲ་ཤིས་དབང་འདུས་ལགས་ནི། ཕྱི་ལོ་༡༩༧༢ ལོའི་ཟླ་༤ ཚེས་༡༢ ལ་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ། ཕ་ཁམས་སྦྲ་ཆེན་བ་དགའ་གྲགས་དང། མ་མངའ་རིས་རུ་ཐོག་པ་ཀརྨ་སྒྲོལ་མ་གཉིས་ཀྱི་བུ་རུ་སྐྱེས། རིམ་བཞིན་སྦེལ་ཀོབ་ཉིན་སློབ་དང་མ་སུ་རི་གཏན་སློབ་ནས་ཐོན་རྗེས། མེ་སོར་གཙུག་ལག་སློབ་གཉེར་ཁང་ནས་ཚོང་ལས་རབ་འབྱམས་པ་དང། བྷེང་ལོར་St.Joseph College ནས་ཚོང་ལས་འཛིན་སྐྱོང་ཐོག་(PGDBA) ཐོན། དེ་རྗེས་ཧྤུལ་བྷི་རའེ་ཊི་(Fullbright Scholarship)སློབ་ཡོན་ཐོག ཨ་རིའི་གྲོང་ཁྱེར་ནིའུ་ཡོག་གཙུག་ལག་སློབ་གྲྭ་ཆེན་མོར་(New York University) རྒྱལ་སྤྱིའི་འབྲེལ་ལམ་རིག་པའི་ཐོག་གཙུག་ལག་རབ་འབྱམས་པའི་སློབ་སྦྱོང་གནང་བ་མ་ཟད། ས་རཱ་བོད་ཀྱི་མཐོ་སློབ་ཏུ་ཟླ་ཤས་རིང་བོད་ཀྱི་རིག་གནས་ལ་སྦྱངས་པ་གནང།

ཕྱི་ལོ་༡༩༩༥ ནས་ཚོགས་དྲུང་ལས་ཁུངས་ཀྱི་རྩིས་པ་དང། དེ་ནས་ལྡི་ལི་སྐུ་ཚབ་དོན་གཅོད་ཁང་གི་རྩིས་པ་དང། དེ་རྗེས་སྐུ་ཚབ་དོན་གཅོད་ཁང་གི་དྲུང་ཆེ་གནང་། ལྷོ་ཨ་ཧྥི་རི་ཁའི་སྐུ་ཚབ་དོན་གཅོད་ཁང་གི་དྲུང་ཆེ་གནང་ཞིང། ལྷོ་ཨ་ཧྥི་རི་ཁའི་བོད་དོན་རྒྱབ་སྐྱོར་ཚོགས་པ་གསར་འཛུགས་དང། ཨ་ཧྥི་རི་ཁའི་མཛའ་འབྲེལ་ཚོགས་པ་གསར་འཛུགས། ལྷོ་ཨ་ཧྥི་རི་ཁའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་གསར་འཛུགས། ལྷོ་ཨ་ཧྥི་རི་ཁའི་མང་གཙོ་ཚོགས་པའི་ཚོགས་གཙོ་དྷ་སར་གདན་ཞུ་སོགས་གནང།

སྦེལ་ཀོབ་བདེ་སླར་གཞིས་ཆགས་དང། ལུགས་བསམ་གཞིས་ཆགས་ཀྱི་ས་གནས་འགོ་འཛིན་གཅིག་ལྕོགས་གནང་། ལྷོ་གཞིས་ཁག་ལྔའི་ལྷོ་སྤྱི་གནང་རིང། སྦེལ་ཀོབ་ཏུ་བོད་ནས་འབྱོར་བའི་གྲྭ་པ་དང་བཙུན་མ། སློབ་ཕྲུག་བཅས་གྲངས་༡༧༠༠ ལྷག་ལ་སྐྱབས་བཅོལ་ལག་དེབ་བཟོ་མ་ཐུབ་པ་རྣམས་གསར་བཟོ་གནང། ཕྱི་ལོ་༢༠༠༧ ལོར་གྲངས་ཉུང་མི་རིགས་ལྷན་ཚོགས་ནས་བདེ་སླར་གཞིས་ཆགས་ཀྱི་སློབ་ཕྲུག་༡༠ ཙམ་ལ་མཐོ་རིམ་སློབ་ཡོན་ཐབས་འཚོལ་དང་། དེང་སྐབས་ལྷོ་ཕྱོགས་ཀར་ན་ཊ་ཀ་མངའ་སྡེའི་ནང་བོད་ཕྲུག་བརྒྱ་ལྷག་ལ་ལོ་རེར་ཧིན་སྒོར་༣༥༠༠༠ ཙམ་ཐབས་ཤེས་བྱས་ཡོད་པ་རེད།

ཕྱི་ལོ་༢༠༠༨ ལོ་ནས་ཁྱད་ལས་པའི་སློབ་སྦྱོང་དང་འབྲེལ་བའི་ཟུར་སྦྱོང་(Coaching) གོ་སྒྲིག་ཞུས་ནས་བོད་ཕྲུག་མང་པོོར་སྨན་པ་(MBBS & BDS) དང། འཆར་འགོད་རིག་པའི་(Engineering) ས་མིག་ཐོབ་ཐུབ་པ་བྱུང་བ་མ་ཟད། འདི་ལོ་བྷེང་ལོར་དུ་གཙུག་ལག་སློབ་གྲྭ་ཞིག་ནས་བོད་ཕྲུག་༧༥ ལ་ཁྱད་ལས་པའི་སློབ་ཡོན་ཧིན་སྒོར་འབུམ་༥༠༠ ལྷག་གི་སློབ་ཡོན་ཐབས་ཤེས་ཐུབ་པ་བྱུང་ཡོད།

ཕྱི་ལོ་༢༠༡༠ ནས་ད་བར་བོད་མིའི་སྤྱི་མཐུན་མཉམ་འབྲེལ་གྱི་སྤྱི་ཁྱབ་འགན་འཛིན་གནང་རིང། ཕྱི་ལོ་༢༠༡༢ ལོར་རྒྱལ་སྤྱིའི་མཉམ་འབྲེལ་ལྷན་ཚོགས་ནས་རྒྱལ་སྤྱིའི་མཉམ་འབྲེལ་རྩེ་ཕུད་ཀྱི་གཟེངས་རྟགས་དང། ཕྱི་ལོ་༢༠༡༤ ལོར་རྒྱ་གར་ཆིག་སྒྲིལ་ལྷན་ཚོགས་ནས་རྒྱ་གར་རྒྱལ་ཡོངས་ར་ཇིབ་གྷན་དྷི་ཕུལ་བྱུང་གི་གཟེངས་རྟགས་ཐོབ།

ཕྱི་ལོ་༢༠༡༣ ལོ་ནས་བོད་མིའི་མཉམ་འབྲེལ་ཁག་བཅོ་ལྔ་ཡོངས་རྫོགས་ཁེ་བཟང་ཅན་དུ་འགྲོ་ཐུབ་པ་བྱུང་སྟེ། བྷེང་ལོར་དུ་བོད་ཀྱི་ཁྲོམ་ར་གཙོས་མཉམ་འབྲེལ་ཁག་ནང་ལས་ཁུངས་དང། ལས་ཤག། མགྲོན་ཁང།  ཚོགས་ཁང་། ཚོང་ཁང་བཅས་ཕྱིའི་རོགས་དངུལ་མེད་པར་ཧིན་སྒོར་ས་ཡ་༡༢༠ ལྷག་གིས་གསར་འཛུགས་དང། ཕྱི་ལོ་༢༠༡༢ ལོར་ཀར་ན་ཊ་ཀ་མངའ་སྡེ་གཞུང་ནས་སྟོན་ཉེས་རོགས་རམ་ཧིན་སྒོར་ས་ཡ་༣༥ ལྷག་ཞུ་ཐུབ་པ་བྱུང།

དེ་དག་གི་ཞོར་དུ། ལྷོ་ཨ་ཧྥི་རི་ཁ་དང། ཨ་རིའི་ནིའུ་ཡོག  སན་ཧྥ་རན་སི་སེ་ཁོ། ཐེ་ལན་ཌི། ཨུ་རུ་སུ། སོགས་སུ་རྒྱལ་སྤྱིའི་ཚོགས་ཆེན་འདྲ་མིན་ཐོག་མཉམ་ཞུགས་བྱས།

ཕྱི་ལོ་༢༠༠༣ ལོར་བོད་དུ་གཟིགས་སྐོར་དང། རྒྱ་གར་དང་ཕྱིའི་རྒྱལ་ཁབ་༡༥ རུ་ཕེབས་ནས་བོད་དོན་ལས་འགུལ་དང་གཏམ་བཤད་སྤེལ་མྱོང། ཁོང་ནི་འདས་པའི་མི་ལོ་༢༠ རིང་འཛིན་སྐྱོང་དང་ཚོང་ལས་སོགས་ཀྱི་ལས་ཀའི་ཉམས་མྱོང་ལེགས་པ་མ་ཟད། བོད་ཀྱི་ཆབ་སྲིད་ཀྱི་གནས་བབ་ལ་རྒྱུས་མངའ་ཆེ་ཞིང་། ཁ་ཡོད་ལག་ཡོད་ཀྱི་བོད་པའི་སྤྱི་ཚོགས་ལ་ཕན་ནུས་ལྡན་པའི་ལས་དོན་གནང་ཐུབ་མཁན་གྱི་མི་རབས་གསར་པའི་ཤེས་འཇོན་གཉིས་ལྡན་གྱི་མི་སྣ་ཞིག་རེད།།

མདོ་ཁམས་སྦྲ་སོག་འབྲི་གསུམ་མཉམ་སྒྲིལ་སྐྱིད་སྡུག་ཚོགས་པ་ནས་ཕྱི་ལོ་༢༠༡༥ ཟླ་༦ ཚེས་༣ ཉིན།

Share this:
༡༧༤ ཀློག་གྲངས།