༢༠༡༦ ལོའི་དུས་འཁོར་དབང་ཆེན་ལོ་གཅིག་རིང་ཕར་འགྱངས་བྱས་འདུག

༧གོང་ས་མཆོག་གིས་རྒྱ་གར་རྡོ་རྗེ་གདན་དུ་༢༠༡༦ ལོའི་ཕྱི་ཟླ་༡ པོའི་ནང་དཔལ་དུས་ཀྱི་འཁོར་ལོའི་དབང་ཆེན་གནང་འཆར་ཡོད་པ་དེ། སྐུའི་མཛད་བྲེལ་ལ་བསྟེན་ནས་ཕར་འགྱངས་བྱེད་དགོས་བྱུང་ཡོད་པ་རེད།

124དེ་ཡང་ཟླ་འདིའི་ཚེས་༣༡ ཉིན་གྱི་སྔ་དྲོ་བོད་མིའི་སྒྲིག་འཛུགས་བཀའ་ཤག་གིས་དྷ་ས་གངས་སྐྱིད་ལྷག་པ་ཚེ་རིང་ཚོགས་ཁང་དུ་གསར་འགོད་ལྷན་ཚོགས་ཤིག་བསྐོང་པ་དང་། དེར་སྲིད་སྐྱོང་བློ་བཟང་སེང་གེ་དང་། ཆོས་དོན་བཀའ་བློན་པདྨ་ཆོས་འབྱོར། བདེ་སྲུང་བཀའ་བློན་འབྲོང་ཆུང་དངོས་གྲུབ་བཅས་ཕེབས་ཏེ། དུས་འཁོར་དབང་ཆེན་ལོ་གཅིག་རིང་འཕར་འགྱངས་བྱས་ཡོད་སྐོར་གསུངས་སོང་།

དུས་དབང་ཕར་འགྱངས་སྐོར་གྱི་གསར་འགོད་གསལ་བསྒྲགས་ནང་འཁོད་དོན། དད་ལྡན་ཆོས་ཞུ་བ་ལྷན་རྒྱས་ལ། ཇི་ལྟར་དགོངས་མངའ་ལྟར། བོད་མིའི་སྒྲིག་འཛུགས་བཀའ་ཤག་ནས་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་ལོ་གཅིག་སྔོན་ནས་ཇི་ལྟར་གསོལ་འདེབས་ཞུས་པ་བཞིན། ༢༠༡༦ ལོའི་ཟླ་༡ པོའི་ནང་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་བསྩལ་རྒྱུའི་བཀའ་བཞེས་བཟང་པོ་སྨིན་སྩོལ་གསལ་བསྒྲགས་སྔོན་སོང་ལྟར་ཡང་། འདི་ལོ་སྔར་དང་མི་འདྲ་བར་༧སྐུའི་གྱ་སྟོན་གྱི་མཛད་འཆར་དང་བརྟན་བཞུགས་བཅས་ཤིན་ཏུ་མང་པོ་བྱུང་བ་དང་། རིང་མིན་ཕྱི་ཟླ་༩ པའི་ནང་ཨིན་ལེན་དུ་བདུན་ཕྲག་གཅིག་རིང་དང་། དེ་རྗེས་ཕྱི་ཟླ་༡༠ པའི་ནང་ཨ་རི་ཁུལ་དུ་བདུན་ཕྲག་གསུམ། ཕྱི་ཟླ་༡༡ པའི་ནང་རྒྱ་གར་ནང་གསུང་ཆོས་དང་གཞན་ཆིབས་བསྒྱུར་ཁག་ཅིག ཕྱི་ཟླ་༡༢ པའི་ནང་རྒྱ་གར་ལྷོ་ཕྱོགས་ཁུལ་བསྟུད་མར་བདུན་ཕྲག་གསུམ་རིང་མཛད་འཆར་ཤིན་ཏུ་དམ་པ། ལྷག་པར་༢༠༡༦ ཟླ་བ་དང་པོའི་ནང་༧དཔལ་དུས་ཀྱི་འཁོར་ལོའི་དབང་ཆེན་བསྩལ་བཞེད་ནི་ཆོས་འབྲེལ་གཞན་དང་མི་འདྲ་བར་སྔོན་འགྲོའི་གསུང་ཆོས་སོགས་ཀྱིས་དུས་ཡུན་འགོར་གཞི་རིང་ལ། སྒྲུབ་ཞག་གནང་སྒོ་ཁག་ཕྱག་བཞེས་མང་སྟབས་ཧ་ཅང་གི་སྐུ་ཐང་མཉེས་པོ་ཡོང་རྒྱུ་ཡིན་ན། དམིགས་བསལ་ཚོགས་ཆེན་ཐེངས་གཉིས་པའི་གྲོས་ཆོད་དགོངས་དོན་དང་། ཆོས་བརྒྱུད་ཁག་གི་དབུ་ཁྲིད་ཀྱི་བསྟན་བདག་བླ་ཆེན་རྣམ་པས་ཉེ་ཆར་སྐུའི་གྱ་སྟོན་སྐབས་གསོལ་འདེབས་ཞུ་སྐུལ་དང། དེ་བཞིན་མང་ཚོགས་ཁྲོད་ཀྱི་ཐུགས་ཁུར་ཅན་དང་། གཞིས་བཞུགས་ཁག་ཅིག་གིས་རྣམ་ཀུན་ནས་༧གོང་ས་སྐྱབས་མགོན་ཆེན་པོའི་མཛད་འཆར་ཉུང་འཕྲི་དང་། སྐུ་ངལ་གསོས་པའི་དུས་ཚོད་མང་ཙམ་ཡོང་ཐབས་སྐོར་ལ་ཡིག་ངག་གཉིས་ཐོག་ནས་ཞུ་མཁན་བྱུང་བ་བཅས་ལ་བརྟེན། སང་ལོའི་དུས་འཁོར་དབང་ཆེན་བསྩལ་རྒྱུ་སྔོན་དུ་ཞལ་བཞེས་སྐལ་བཟང་ཐོབ་ཟིན་ནའང་། བོད་མིའི་སྒྲིག་འཛུགས་བཀའ་ཤག་ནས་མཛད་འཆར་ཉུང་འཕྲི་ཡོང་བ་གསོལ་འདེབས་ཀྱིས་ཕར་འགྱངས་ཆོག་པའི་སྙན་གསན་སྒྲོན་འབུལ་ཞུས་པ་བཞིན་བཀའ་བཞེས་ཐོབ་སྟབས། སང་ལོའི་དུས་འཁོར་དབང་ཆེན་ལོ་གཅིག་རིང་ཕར་འགྱངས་གནང་གཏན་ཁེལ་བའི་གསལ་བསྒྲགས་ཞུ་རྒྱུ་དང་། དེའི་རྐྱེན་གྱིས་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་། དུས་དབང་སྦྱིན་བདག་ཁག དུས་དབང་གོ་སྒྲིག་ཚོགས་ཆུང་གི་ཚོགས་མི་རྣམས་དང་། དེ་བཞིན་ཕྱི་ནང་གི་དད་ལྡན་ཆོས་ཞུ་བ་མང་པོར་གང་ཅིའི་ཐུགས་སྟབས་མི་བདེ་བ་ཡོང་ངེས་ལ་བོད་མའི་སྒྲིག་འཛུགས་བཀའ་ཤག་ནས་གོ་སྐབས་འདི་བརྒྱུད་བཟོད་གསོལ་ཞུ་རྒྱུ་དང་། དེ་དོན་འབྲེལ་ཡོད་ཀུན་གྱིས་དགོངས་ཡངས་དཀྱེལ་ཆེ་ཡོང་བ་ཞུ་རྒྱུ་བཅས། བོད་མིའི་སྒྲིག་འཛུགས་བཀའ་ཤག་ནས་ཕྱི་ལོ་༢༠༡༥ ཟླ་༨ ཚེས་༣༡ ལ།།
གསར་འགོད་པ་ཆོས་ཉིད་འོད་ཟེར།

Share this:
༣༧༡ ཀློག་གྲངས།