མཐོན་པོའི་སྤྱན་དང་དམའ་མོའི་མིག

བོད་ཀྱི་བང་ཆེན་སྤྱིའི་འདོན་ཐེངས་ ༥༦༧  ཕྱི་ལོ་ ༢༠༡༥/༡༠/༢༨
ད་ལྟ་བཙན་བྱོལ་བོད་པའི་སྤྱི་ཚོགས་ནང་སྲིད་སྐྱོང་དང་སྤྱི་འཐུས་ཀྱི་འོས་བསྡུ་ཆེན་མོ་འགྲོ་བཞིན་པ་དང། ཕྱི་ནང་གང་ས་ནས་དེ་ལ་དོ་སྣང་ཧ་ཅང་ཆེན་པོ་བྱེད་བཞིན་པའི་སྐབས་ཡིན། དེར་བརྟེན་སླར་ཡང་འོས་བསྡུ་དང་འབྲེལ་བའི་གནད་དོན་ཁག་ཅིག་གི་སྐོར་གླེང་དགོས་པ་གལ་ཆེན་པོར་གྱུར་ཡོད། བོད་ཀྱི་མ་འོངས་པའི་གནད་དོན་སྤྱི་དང། ལྷག་པར་དུ་བཙན་བྱོལ་བོད་པའི་སྤྱི་ཚོགས་དེ་ཉིད་རྒྱུན་རིང་སྲ་བརྟན་དང་གཅིག་སྒྲིལ་དུ་གནས་ཐུབ་མིན་གྱི་གནད་འགག་གཙོ་བོ་བཙན་བྱོལ་བོད་པའི་སྤྱི་ཚོགས་ཀྱི་མང་གཙོ་འདི་ཉིད་སྲ་བརྟན་ཡིད་ཆེས་འཕེར་བ་ཞིག་ཡོང་ཐུབ་མིན་ལ་རག་ལས་པ་དང། མང་གཙོ་ཚད་དང་ལྡན་པ་ཞིག་ཡོང་བར་བྱེད་པ་ལ་འོས་བསྡུ་ཁོ་ན་གཙོ་བོ་མིན་ནའང། མང་གཙོ་ཡོང་བར་བྱེད་པའི་ཆ་ལག་གལ་ཆེ་ཤོས་ཤིག་འོས་བསྡུའི་ལམ་ནས་རང་ཉིད་ཀྱི་འགོ་ཁྲིད་འདེམས་པ་འདི་ཉིད་ཡིན། དེར་བརྟེན་འོས་བསྡུའི་ལམ་ལུགས་དང་འགྲོ་སྟངས་དེ་དག་རེ་རེ་བཞིན་མང་གཙོ་དར་སྤེལ་གྱི་ཕྱོགས་སུ་བསྐྱོད་དགོས་པ་དེ་ཧ་ཅང་གལ་ཆེན་པོར་གྱུར་ཡོད།

འོས་བསྡུ་ལས་ཁང་གི་ངོས་ནས་འོས་བསྡུ་དེ་དག་ཚད་ལྡན་ཞིག་ཡོང་བ་དང། ལྷག་པར་དུ་བཙན་བྱོལ་བོད་མིའི་འོས་བསྡུའི་སྒྲིག་གཞི་དང་མི་འགལ་བ་ཞིག་ཡོང་ཐབས་སུ་འབད་བརྩོན་དང་ཐུགས་སྣང་ཆེན་པོ་གནང་བཞིན་འདུག སྲིད་སྐྱོང་གི་འོས་མི་དང། སྤྱི་འཐུས་ཀྱི་འོས་མི་དག་གི་འོས་བསྡུའི་དྲིལ་བསྒྲགས་སྐབས་འགྲོ་སོང་གཏོང་ཕྱོགས་སོགས་ཕྱི་གསལ་ནང་གསལ་ཞིག་ཡོང་ཐབས་སུ་དམིགས་ནས། ཆ་ཚང་གནད་ལ་སྨིན་ཡོད་མེད་ལ་མ་ལྟོས་པར་ད་ལན་འོས་བསྡུ་ཆེན་མོའི་སྐབས་སུ་འོས་བསྡུའི་སྒྲིག་གཞིའི་དགོངས་དོན་བཞིན་ལམ་སྟོན་གསར་པ་ཞིག་ཀྱང་གནང་ཡོད་པ་རེད། དེ་དག་ལ་བརྟེན་ནས་ཉམས་མྱོང་རིམ་གསོག་དང་གོམ་པ་རིམ་སྤོས་ཀྱིས་ཕྱི་གསལ་ནང་གསལ་ཡིད་ཆེས་འཕེར་བ་ཞིག་ཏུ་འགྱུར་བའི་རམ་འདེགས་སུ་འགྲོ་ངེས་པའང་སྨྲོས་མ་དགོས་པ་རེད། དེར་བརྟེན་ཐོག་མ་འགོ་འཛུགས་པའི་སྐབས་ཞིབ་ཚགས་མིན་དང། ཚད་དང་ལྡན་མིན་སྣ་ཚོགས་ཤིག་ཡོང་སྲིད་ཀྱང་རིམ་པས་འཐུས་སྒོ་ཚང་དུ་བཏང་ན་ཕྱི་ནང་སུས་བལྟས་ཀྱང་ཡིད་རྟོན་འཕེར་བ་ཞིག་ཏུ་འགྱུར་ངེས་རེད་སྙམ།

གནད་དོན་ཁག་ཅིག་གི་ཐོག་ནས་ཁྲིམས་སྒྲིག་གི་དགོངས་དོན་དང། ལམ་སྲོལ་གང་ཐད་ནས་མི་མཐུན་བཞིན་དུ་ལག་བསྟར་གསར་སྤྲོས་ཁག་ཅིག་ཀྱང་བྱས་འདུག། དཔེར་ན་ད་ལན་གྱི་འོས་བསྡུ་ཆེན་མོ་འདིའི་སྐབས་སུ་འོས་འཕེན་པ་མང་པོ་ཞིག་གིས་རང་ཉིད་ཀྱིས་སྲིད་སྐྱོང་གི་འོས་ཤོག་འོས་མི་འདི་ལ་བླུགས་པ་ཡིན་ཞེས་འོས་ཤོག་པར་བརྒྱབ་ནས་ངོ་དེབ་དང་འཕྲིན་ཕྲན་བཅས་སུ་བཀོད་པ་དང། རླུང་འཕྲིན་སོགས་སུའང་ཁ་གསལ་གྱི་ཐོག་ནས་བཤད་འདུག དབུས་འོས་བསྡུ་ལས་ཁང་ནས་ས་གནས་ཁག་ཅིག་དང། ལྷག་དོན་དྷ་རམ་ས་ལའི་ས་གནས་འོས་བསྡུ་ལས་ཁང་ལ་འོས་ཤོག་ཨང་གྲངས་འདི་བྱས་པ་དེ་རྩིས་མེད་གཏོང་དགོས་ཞེས་ཡིག་ཐོག་ནས་བཀའ་ཁྱབ་ཕེབས་པ་བཞིན། ཀླུ་མཁར་བྱམས་ལ་འོས་འཕངས་པའི་འོས་ཤོག་གཅིག་རྩིས་མེད་བཏང་འདུག།དབུས་འོས་བསྡུ་ལས་ཁང་ནས་འགྲེལ་བརྗོད་གནང་བ་ལྟར་ན་གཅིག་ཙམ་མ་ཡིན་པར་དེ་ལྟ་བུའི་འོས་ཤོག་རྩིས་མེད་བཏང་བ་གྲངས་ལྔ་དྲུག་ཅིག་ཡོད་ཚུལ་འདུག

དབུས་འོས་བསྡུ་ལས་ཁང་ནས་དེ་ལྟར་རྩིས་མེད་བཏང་བ་ནི་འོས་བསྡུའི་སྒྲིག་གཞི་དོན་ཚན་སོ་བཞི་པའི་ནང་གསེས་གཉིས་པའི་ཀ་པ། “འོས་ཤོག་ངོས་སུ་འོས་འཕེན་པ་སུ་ཡིན་ངོས་འཛིན་ཐུབ་པའི་རྟགས་སམ། མི་མིང་འཁོད་པ།”ཞེས་པའི་དགོངས་དོན་ཡིན་ཚུལ་འགྲེལ་བརྗོད་གནང་གི་འདུག་ཀྱང། དོན་དངོས་ཐོག་དོན་ཚན་དེ་ནི་འོས་ཤོག་གི་ངོས་སུ་འོས་འཕེན་པ་སུ་ཡིན་མིན་ངོས་འཛིན་ཐུབ་པའི་རྟགས་སམ། མིའི་མིང་འཁོད་མི་རུང་བ་དང། དེ་ལྟར་འཁོད་ན་འོས་རྩིས་མེད་དུ་གཏོང་དགོས་ཚུལ་བཤད་པ་ལས། འགེངས་ཤོག་ཚད་ལྡན་བཀང་ཟིན་པ་གང་ཞིག་པར་བརྒྱབ་ནས་ངོ་དེབ་སོགས་སུ་བཀྲམ་ཆོག་མིན་གྱི་གོ་དོན་གཏན་ནས་མེད་ལ། འོས་བསྡུ་ལས་ཁང་ནས་འོས་འཕེན་པ་ཞིག་གིས་འོས་སུ་ལ་བླུགས་ཡོད་པ་ངོ་རྟགས་ཆོད་པའི་རྒྱུ་མཚན་ལ་བརྟེན་ནས་རྩིས་མེད་བཏང་བ་ཞིག་རེད་འདུག སྒྲིག་གཞིའི་དོན་ཚན་དེའི་དགག་བྱ་དང་དགོས་པ་གང་ཐད་ནས་འོས་བསྡུ་ལས་ཁང་གི་ཐག་གཅོད་དེ་སྒྲིག་དོན་དང་མཐུན་མེད་པ་གསལ་པོ་རེད།

གལ་སྲིད་འོས་འཕེན་པ་ཞིག་གིས་འོས་སུ་ལ་བླུགས་པ་ངོ་རྟགས་ཆོད་པས་རྩིས་མེད་གཏོང་དགོས་ན། ཉེ་ཆར་འོས་བསྡུའི་སྐབས་སྲིད་སྐྱོང་གི་འོས་མི་ཁག་ཅིག་གིས་རང་ཉིད་ཀྱིས་རང་ཉིད་ལ་འོས་བླུགས་ཚུལ་བརྗོད་སོང་བ་དང། ནོར་ཝེ་རླུང་འཕྲིན་དུ་མི་མང་པོ་ཞིག་གིས་སྲིད་སྐྱོང་གི་འོས་སུ་ལ་བླུགས་མིན་ཁ་གསལ་བརྗོད་འདུག སྔོན་མ་བཀའ་ཁྲིའི་འོས་བསྡུའི་སྐབས། ༧གོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་གྱིས། འོས་སུ་ལ་བླུགས་ཡོད་པ་ཨེ་ཤི་ཡ་རང་དབང་རླུང་འཕྲིན་ཁང་བརྒྱུད་ནས་ཡོངས་ཁྱབ་གནང་སོང། དེ་དག་གིས་ཀྱང་སུ་ལ་འོས་བླུགས་མིན་ངོ་རྟགས་གསལ་པོ་ཆོད་ཡོད་པས་རྩིས་མེད་གཏོང་དགོས་པ་གཅིག་མཚུངས་ཡིན། ད་ལན་ངོ་དེབ་ནང་བཀྲམ་འདུག་ཅེས་པའི་འོས་ཤོག་དེ་དག་སྟབས་ཉེས་པ་ཞིག་ལ་ཀླུ་མཁར་བྱམས་ཡིན་པ་ལས། འོས་མི་གཞན་ཞིག་ཡིན་ན་རྩིས་མེད་བཏང་ཡོད་མེད་ཀྱང་ཐེ་ཚོམ་རེད། དེ་བཞིན་ཁྲིམས་སྒྲིག་གི་གོ་དོན་འགྲེལ་སྐབས་རིགས་འགྲེ་དང་ཤུགས་བསྟན་རེད་ཅེས་བརྗོད་མི་འོས་པ་དང། ད་ལན་གྱི་གནང་སྟངས་འདི་ཉིད་ལ་མཚོན་ན་མི་ཕལ་ཆེ་བས་མཐོན་པོའི་སྤྱན་དང་དམའ་མོའི་མིག་ཅེས་པ་ལྟ་བུར་མཐོང་སྲིད།།

Share this:
༡༠༣ ཀློག་གྲངས།