སྨོན་ལམ་ཚིག་མཛོད་གསར་པ་དབུ་འབྱེད།

ཟླ་འདིའི་ཚེས་༡༨ ཉིན་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་སེ་ར་ཐེག་ཆེན་གླིང་བླ་སྤྱིའི་འདུ་ཁང་དུ་ ༸གོང་ས་མཆོག་གིས་གསུང་ཆོས་གནང་བ་དང་སྟབས་བསྟུན། ༸གོང་ས་མཆོག་གིས་སྨོན་ལམ་བརྡ་འཕྲིན་ཞིབ་འཇུག་ཁང་གིས་སྒྲིག་སྦྱོར་བྱས་པའི་སྨོན་ལམ་ཚིག་མཛོད་གསར་པ་དབུ་འབྱེད་གནང་ཡོད་པ་རེད།

TashiLhunpo-G0སྐབས་དེར་༧གོང་ས་མཆོག་གིས་བཀའ་སློབ་བསྩལ་དོན། “ལོ་མང་རིང་མྱོང་བ་ཁྱད་གསོད་ཀྱིས་ཕུགས་རྒྱང་རིང་པོའི་རྒྱ་ཆེའི་ཕན་ཐོགས་དེ་འདྲ་ཞིག་གི་ཆེད་དུ་དམིགས་པའི་ལས་དོན་ཞིག་སྨོན་ལམ་ལགས་ཀྱིས་འགན་ཁུར་བླངས། དེ་བཞིན་ཁོང་གི་ཕྱག་རོགས་ཚོས་ངོས་རང་ཐུག་སྐབས། ཚིག་མཛོད་དེའི་ནང་གི་ཆོས་ཚིག་དེ་དག་ཆོས་ལུགས་སོ་སོར་སྐད་ཆ་དྲིས་ནས་ཡོད་པའི་གང་མཚམས་ཀྱིས་སྤུས་དག་པོ་ཡོད་པ་ཞིག་མཐོང་སོང་། ཧ་ཅང་ཡག་པོ་བཟོས་འདུག ཕྱོགས་གཅིག་ནས་ང་རང་ཚོའི་སྒྲ་རིག་པའམ་བོད་ཡིག་ཐོག་ལ་ཞབས་འདེགས་ངེས་ཅན་ཞིག་བསྒྲུབ་ཡོད་པར་བརྟེན་ཐུགས་རྗེ་ཆེ་ཞུ་རྒྱུ་ཡིན། ཕྱོགས་གཅིག་ནས་བོད་ནང་ད་བར་དེ་ལྟ་བུའི་ཞབས་འདེགས་སྒྲུབ་མཁན་བྱུང་མེད་པ་ལྟ་བུ་རེད། ང་ཚོ་བཙན་བྱོལ་བ་ཉུང་ཤས་ཤིག་གི་ནང་ལ་ཡིན་ནའང་སློབ་གྲྭ་ཆེན་པོ་ནས་ཐོན་པའི་མཁས་དབང་མིན་པར་གྲྭ་ས་ནས་སློབ་གཉེར་བྱེད་མཁན་ཞིག་གིས་ཁུར་བླངས་ནས་གྲུབ་འབྲས་མིག་མཐོང་ལག་ཟིན་ཡོད་པ་ཞིག་ཡིན་པར་བརྟེན་ཁྱེད་རང་ཚོས་དཀའ་ལས་བརྒྱབ་པ་དེར་རྗེས་སུ་ཡི་རང་དང་བསྔགས་བརྗོད་ཡོད། ཁྱེད་རང་ཚོས་དཀའ་ལས་བརྒྱབ་པའི་འབྲས་བུ་དེ་མི་རབས་ནས་མི་རབས་གནས་ཐུབ་རྒྱུ་ཡིན་པ་རེད། ང་ཚོ་སྔོན་གྱི་བོད་པའི་ལོ་ཙཱ་བ་ཚོས་རྒྱ་གར་གྱི་ལེགས་སྦྱར་སྐད་ནས་བསྒྱུར་བ་དང་མིང་ཚིག་གསར་པ་བཟོས་པ། ད་ལྟའི་བོད་ཡིག་གི་མིག་འབྱེད་རྒྱུའི་ཚིག་མཛོད་འདི་ལྟ་བུ་མི་རབས་ནས་མི་རབས་ཏན་ཏན་ཕན་ཐོགས་རྒྱ་ཆེན་པོ་ཡོང་ཐུབ་ཀྱི་རེད། ཁྱེད་རང་ཡིན་ནའང་སོ་སོའི་དགེ་བ་རྒྱ་ཆེན་པོ་བསྒྲུབས་པ་འདི་འཇིག་རྟེན་ཆོས་བརྒྱད་ཀྱི་བསམ་པ་དང་མ་འདྲེས་པར་སྤྱི་དོན་ལ་སྨན་པའི་ཕྱིར་བསྔོ་བ་བྱས་པ་ཡིན་ན་ཡག་པོ་ཡོང་གི་རེད། ངོས་ནས་ཀྱང་སྨོན་ལམ་འདེབས་རྒྱུ་ཡིན་”ཞེས་བཀའ་སློབ་གནང་།།

སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་བོད་ཡིག་གི་ཚིག་མཛོད་ཆེན་མོ་ཞིག་རྩོམ་སྒྲིག་བྱེད་བཞིན་ཡོད་པ་དང་། ཆོས་ལུགས་དང་འབྲེལ་བའི་ཚིག་མཛོད་དང་དེ་མིན་གྱི་དཔལ་འབྱོར་དང་ཆབ་སྲིད་སོགས་ཀྱི་མིང་ཚིག་ཚུད་པའི་ཚིག་མཛོད་སོགས་སུ་སྒྲིག་གི་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

Share this:
༧༧༢ ཀློག་གྲངས།