ལྷ་བ་ཁྲོས་འདུག

ལྷ་སྡེ་གནམ་ལོ་ཡག

ལྷ་བ་ཁྲོས་འདུག སྲིད་སྐྱོང་གི་བློ་ཁོག་ཚོགས་གཙོ་ལས་ཆེ་བ་འདུག ཨ་མདོ་བ་རེ་ཟུང་གིས་ལྷ་བའང་ཆོལ་ཞེན་འདུག་ལབ་མི་སྲིད་པ་མིན་མོད། དོན་ལ་དེ་འདྲ་ཞིག་རྩ་བ་ནས་མ་རེད་འདོད།

བོད་ཀྱི་ལྷ་འབེབས་སྟངས་འདི་ཡ་ཐོག་སྲིད་པ་བོན་གྱི་དུས་སྐབས་ནས་བརྒྱུད་འགྱུར་བྱས་པ་ཞིག་རེད་ལ། གཡང་དྲུང་བོན་གྱི་དབུ་བརྙེས་རྗེས་ཀྱང་བརྒྱུད་འཛིན་གནང་འདུག དཔེར་ན། 《རྒྱལ་རབས་གསལ་བའི་མེ་ལོང》ལས། “རྒྱུའི་བོན་པོ་རིགས་བཞི་ནི། སྣང་གཤེན་བལ་ཐོད་ཅན། འཕྲུལ་གཤེན་བལ་ཚོན་ཅན། ཕྱཱ་གཤེན་ཇུ་ཐིག་ཅན།དུར་གཤེན་མཚོན་ཆ་ཅན་ནོ། །དེ་ལ་སྣང་གཤེན་ བལ་ཐོད་ཅན་གྱིས་ཕྱཱ་དང་གཡང་འགུག་ལྷ་དང་སྨན་གསོལ། དགེ་ལེགས་དང་དཔལ་བསྐྱེད་ནས་མི་ནོར་རྒྱས་པར་བྱེད། འཕྲུལ་གཤེན་བལ་ཚོན་ཅན་གྱིས་མདོས་དང་ཡས་གཏོང༌། སྲིད་དང་རྟེན་འཛུགས། འཕྲལ་ཕུགས་ཀྱི་འགལ་རྐྱེན་ཐམས་ཅད་སེལ་བར་བྱེད། ཕྱཱ་གཤེན་ཇུ་ཐིག་ཅན་གྱིས་ལེགས་ཉེས་སྟོན། ཡིན་མིན་གྱི་ཐེ་ཚོམ་སེལ། ཟག་བཅས་ཀྱི་མངོན་ཤེས་འཆད་པར་བྱེད་དོ། །དུར་གཤེན་མཚོན་ཆ་ཅན་གྱིས་གསོན་གྱི་བགེགས་སེལ། གཤིན་གྱི་དུར་འདེབས། ཆུང་གི་སྲི་གནོན། གནམ་གྱི་རྒྱུ་སྐར་ལ་བལྟ། སའི་འདྲེ་འདུལ་བ་ཡིན་ནོ” དེ་བས། དེང་གི་ལྷ་བ་ནི་གནའ་བོའི་འཕྲུལ་གཤེན་རེད་ལ། མོ་བ་དང་རྩིས་པའང་རིམ་བཞིན་བསྟན་ཡོད་པ་ལྟར་རེད།

བཙན་པོ་ཁྲི་སྲོང་ལྡེ་བཙན་གྱིས་བོན་ལ་འགོག་སྡོམ་སྲིད་ཇུས་ལག་བསྟར་གནང་རྗེས། སློབ་དཔོན་པདྨ་འབྱུང་གནས་ལགས་བོན་གྱི་སློབ་དཔོན་དྲན་པ་ནམ་མཁའ་ལ་འབྲེལ་ནས་གཞི་བདག་མང་བོ་ཞིག་གི་མིང་ལ་འགྱུར་བ་བཏང་ནས་༼བསྟན་སྲུང༽དང༼དཀོར་བདག༽ལ་སོགས་པའི་མཚན་དུ་མ་གསོལ་འདུག རྒྱལ་བོ་རིགས་ལྔ་ལ་སོགས་ཀྱིས་མཚོན་པའི་བོན་གྱི་སྲིད་པ་རྒྱལ་མོར་བན་གྱིས་དཔལ་ལྡན་ལྷ་མོ་འབོད་པ་སོགས་བགྲང་ལས་འདས་པ་ཡོད།

མཁས་དབང་དམུ་དགེ་བསམ་གཏན་གྱི《དྲིས་ལན་ལི་དྭངས་རང་སྒྲ》ལས། “དེའི་དུས་ཀྱི་བོན་བརྒྱུད་འགའ་ནི། ད་ལྟ་སི་ཁྲོན་ཞིང་ཆེན་གྱི་རྒྱལ་མོ་ཚ་བ་རོང་གི་བོན་དང་ཆའང་རིགས་ཞེས་པའི་མི་རིགས་ཤིག་ཡོད་པ་དེའི་ནང་དུ་ཡོད་ལ། དེ་དག་ལ་ཡི་གེ་མེད་ཀྱང་ཕས་བུ་ལ་ངག་ཐོག་ནས་སློབ་པར་བྱེད། གཡང་འགུག མདོས་གཏོ། མོ་རྩིས་སོགས་བྱེད་པ་མ་ཟད། ད་དུང་མདའ་དང་ཅོག་ཙེ་སོགས་ལ་ལྷ་ཕབ་རྒྱུ་དང༌། ལྕགས་བསྲེག་ལ་ལྕེས་བལྡག་སྟེ་སྔགས་འདེབས་པ་སོགས་འཕྲུལ་སྣང་སྣ་ཚོགས་སྟོན་རྒྱུ་ཡོད་”ཅེས་པ་ནི་དེང་གི་བར་གཡང་དྲུང་བོན་གྱིས་བརྒྱུད་འཛིན་གནང་བའི་གནས་སྟངས་ཀྱི་ངོས་གཅིག་རེད།

མི་སྒེར་བ་དང་ཁྱིམ་ཚང་སོ་སོ་ནས་ལྷ་བ་མོ་བ་རྩིས་པ་སོགས་ལ་ཡིད་ཆེས་བཅོལ་མིན་དང་ཆོ་ག་ཕྱག་ལེན་བསྟར་མིན་རང་དབང་རེད། ཡིན་ནའང་། དེང་རབས་སྲིད་དོན་གྱི་ཁྱབ་ཁོངས་སུ་བེད་སྤྱོད་གཏོང་རུང་བ་ཞིག་མ་རེད་འདོད། རྒྱུ་མཚན་གསུམ་་ཡོད། ༡ སྲིད་དོན་པ་ཚོས་རང་འགན་རང་ཐེག་བྱེད་དགོས་པ་ལས་མཐའ་འཇུག་གི་འགན་ཆ་ཚང་གཟུགས་མེད་ཀྱི་བསྟན་སྲུང་ཁག་ལ་བཀལ་རྗེས། མང་ཚོགས་ལ་ལག་པ་འཇུ་ས་ལྷག་མེད། ༢ བཙན་བྱོལ་སྤྱི་ཚོགས་ནང་དུ་དམངས་གཙོ་ལག་བསྟར་གནང་བ། རྒྱལ་བ་རིན་པོ་ཆེ་དབུ་ཁྲིད་རླབས་ཆེན་ཡིན་པ་ཚང་མས་མ་ཎི་བགྲང་བགྲང་བྱེད་ཀྱིན་པས། དུས་རབས་ཉེར་གཅིག་པའི་དེ་རིང་ད་དུང་སྲིད་དོན་ཐད་ལྷ་བ་མོ་བ་རྩིས་པ་སོགས་བཀོལ་ན་འཛམ་གླིང་གི་མཐོང་སྣང་ལ་བོད་མི་བླུན་བསྒྱུར་མཚམས་བཞག་མེད་པར་མཐོང་ངེས། ༣ རྒྱལ་བ་རིན་པོ་ཆེ་མཆོག་ནས་སྲིད་འགན་རྩིས་སྤྲོད་གནང་ཟིན་པས། གནས་ཆུང་དང་དགའ་གདོང་། ལྷ་མོ་སོགས་ཀྱིས་གཞུང་ཞབས་དྲུང་ཆེ་གནས་རིམ་གྱི་ཞབས་སྟེགས་རྩིས་སྤྲད་ནས་མང་ཚོགས་ཁྲོད་ཕྱིར་ཕེབས་དགོས་པའི་དུས་སུ་བབས་ཡོད།

Share this:
༢༢༢ ཀློག་གྲངས།