ཐུན་མོང་གི་གཞི་རྟེན་འཚོལ་བ་ཞེས་པའི་བོད་རྒྱའི་རྒྱབ་སྐྱོར་ཚོགས་ཆེན།

ཐའེ་ཝན་རྒྱལ་ས་ཐའེ་པེ་རུ་འཚོགས་པའི་“ཐུན་མོང་གི་གཞི་རྟེན་འཚོལ་བ་”ཞེས་པའི་བོད་རྒྱའི་རྒྱབ་སྐྱོར་ཚོགས་ཆེན་ཐོག ༧གོང་ས་མཆོག་གིས་བརྙན་འཕྲིན་བརྒྱུད་བཀའ་སློབ་གནང་ཡོད་པ་རེད།

Dalai-Lama-007ཚོགས་ཆེན་དེ་དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱས་པའི་དབྱིན་ཡུལ་བོད་ཀྱི་ཐེབས་རྩའི་ (Tibet House Trust) མཐུན་འགྱུར་འོག་ཐེ་ཝན་སྐུ་ཚབ་དོན་ཁང་གི་གོ་སྒྲིག་འོག ཐའེ་ཝན་རྒྱལ་ས་ཐའེ་པེ་རུ་“ཐུན་མོང་གི་གཞི་རྟེན་འཚོལ་བ་”ཞེས་པའི་བོད་རྒྱའི་རྒྱབ་སྐྱོར་ཚོགས་ཆེན་ཉིན་གསུམ་རིང་འཚོག་གི་ཡོད་པ་དང་། ཟླ་འདིའི་ཕྱི་ཚེས་༢༢ ཉིན་ཚོགས་ཆེན་དབུ་འབྱེད་ཀྱི་མཛད་སྒོའི་ཐོག་༸གོང་ས་མཆོག་གིས་བརྙན་འཕྲིན་བརྒྱུད་ཚོགས་བཅར་བ་རྣམས་ལ་བཀའ་སློབ་གནང་ཡོད་པ་རེད།

༧གོང་ས་མཆོག་གིས་བོད་རྒྱའི་མི་རིགས་བར་འབྲེལ་བ་བྱུང་སྟངས་སྐོར་གསུང་དོན། “ད་ལམ་ཐེ་ཝན་ལ་རྒྱ་རིགས་གྲོགས་པོ་དང་ང་རང་ཚོ་བོད་རིགས་རྒྱ་སྐད་ཤེས་མཁན་ཚོ་ལྷན་འཛོམས་ཐོག་ཚོགས་ཆེན་ཞིག་གོ་སྒྲིག་གནང་ཡོད། ང་ཚོའི་དཀའ་ངལ་དེ་རྒྱ་བོད་ཟུང་འབྲེལ་ཐོག་ནས་སེལ་རྒྱུ་ཞིག་ཡིན་པར་བརྟེན་དམིགས་བསལ་བར་སྐབས་ཤིག་ནས་རྒྱ་རིགས་གྲོགས་པོ་གྲོགས་མོ་རྣམས་དང་ལྷན་དུ་ཐུག་ནས་ང་ཚོས་དངོས་ཡོད་བདེན་པའི་གནས་ཚུལ་གསལ་བཤད་བྱེད་རྒྱུ་དང་། རྒྱ་རིགས་ཚོའི་བསམ་ཚུལ་གང་ཡོད་པ་དེ་དག་ང་ཚོས་ཉན་ནས་གོ་བསྡུར་བྱ་རྒྱུ་ཞིག་བྱུང་བ་རེད། དངོས་གནས་བྱས་ན་གནམ་སྡེ་སྒོ་མོ་ཆེའི་དོན་རྐྱེན་གྱི་གནས་ཚུལ་མ་བྱུང་གོང་ནས་ཡིན་གཅིག་མིན་གཉིས་ང་ཚོ་དང་ཐུག་ནས་འབྲེལ་བ་མཐུད་ནས་འབྲེལ་བ་བྱེད་དགོས་ཀྱི་འདུག་ཅེས་འབོད་སྐུལ་བྱེད་བསྡད་ཀྱི་ཡོད། འོན་ཀྱང་གནམ་སྡེ་སྒོ་མོ་ཆེའི་དོན་རྐྱེན་གནས་ཚུལ་མ་བྱུང་བར་དུ་རྒྱ་རིགས་ཚོར་ཕར་ང་ཚོས་འབྲེལ་བ་བྱེད་རྒྱུ་དེ་ཡང་ཁག་པོ་བྱུང་ཡོད། དོན་རྐྱེན་གནས་ཚུལ་དེ་བྱུང་རྗེས་རྒྱ་རིགས་མཉམ་པོར་འབྲེལ་བ་བྱེད་རྒྱུ་དེ་སྟབས་བདེ་རུ་ཕྱིན་པ་དང་འབྲེལ་བ་བྱེད་བདེ་རུ་ཕྱིན་པ་རེད། དེ་སྔ་རྒྱ་བོད་གྲོགས་པོ་ཁག་གཅིག་རུག་རུག་བྱེད་རྒྱུ་བྱུང་བ་རེད་ལ། ད་ལན་ཐེ་ཝན་ནང་གཞི་རྒྱ་ཆེ་ཙམ་བྱས་ནས་ཚོགས་རྒྱུ་ཡིན་པ་རེད། དེར་བརྟེན་ཚོགས་ཞུགས་ཁྱེད་རང་ཚོ་ཚང་མར་ཕྱོགས་གཅིག་ནས་འཚམས་འདྲི་ཞུ་རྒྱུ་དང་། ཕྱོགས་གཅིག་ནས་ཐུགས་རྗེ་ཆེ་ཞེས་ཞུ་རྒྱུ་ཡིན་”ཞེས་གསུངས་ཡོད་པ་རེད།

༧གོང་ས་མཆོག་གིས་བོད་རྒྱའི་བར་གྱི་ཆབ་སྲིད་ཀྱི་དཀའ་ངལ་སྐོར་དང་འབྲེལ་ནས་གསུང་དོན། “ངོས་ཀྱིས་བོད་ཀྱི་ཆབ་སྲིད་འགན་བླངས་པའི་སྐབས་ལ་ཉམས་མྱོང་མང་པོ་ཞིག་ཕྱོགས་བསྡོམས་བྱས་པའི་འབྲས་བུ་དེ་ང་ཚོ་རང་རྒྱལ་གཞན་ཕམ་ཞེས་པ་དེ་མ་ཡིན་པར་གཉིས་སྨན་ཞིག་ཡོང་ཐབས་བྱས་པ་རེད། རྒྱ་ནག་རྒྱལ་ཁབ་ཆ་བཞག་ནའང་བོད་རྒྱ་ནག་ནས་ཁ་བྲལ་མི་དགོས་པར་ཁྱིམ་ཚང་ཆེན་པོ་གཅིག་གི་ནང་ལ་མཛའ་མཐུན་བྱས་ནས་སྡོད་ཐུབ་རྒྱུ་ཞིག་དང་། ང་ཚོ་བོད་པར་ཆ་བཞག་ནའང་བོད་མིི་རིགས་ཀྱི་ཐུན་མོང་མ་ཡིན་པའི་སྐད་ཡིག་དང་། དེ་དང་འབྲེལ་བའི་ཤེས་ཡོན་མང་པོ་ཞིག་ཡོད་པ་དེ་དག་བོད་པ་རང་གིས་བདག་གཉེར་ཡག་པོ་ཞིག་བྱེད་ཐུབ་རྒྱུ། དེ་བཞིན་ཁོར་ཡུག་སྲུང་སྐྱོབ་ཡག་པོ་ཞིག་བྱེད་ཐུབ་རྒྱུ་བཅས་གཉིས་སྨན་གྱི་བསམ་བློ་ཞིག་བཏང་ནས། ང་ཚོ་ཁ་བྲལ་བྱེད་ཀྱི་ཡིན་ཞེས་མཐའ་གཅིག་བྱས། ད་ལྟ་ཡོད་པ་འདི་འགྲིག་གི་འདུག་ཅེས་མཐའ་གཅིག་བྱས་ནས་མཐའ་གཉིས་དང་བྲལ་བའི་གཉིས་ཕན་གྱི་དབུ་མའི་ལམ། ཞེས་པ་ཞིག་ངོས་ཀྱི་འགན་འཁྱེར་བའི་སྐབས་དེ་འདྲ་ཞིག་བཟོས་པ་རེད། གཙོ་ཆེ་ཤོས་རྒྱ་མིའི་ཤེས་ཡོན་ཅན་མང་པོ་ཞིག་གིས་དེའི་ཐོག་ལ་དོ་སྣང་དང་རྒྱབ་སྐྱོར་བྱེད་ཀྱི་འདུག ངོས་རང་ རྒྱ་མི་ཧ་ཅང་མང་པོ་ཐུག་མྱོང་། རྩོམ་ཡིག་ཆ་བཞག་ནའང་རྒྱ་ཡིག་ནང་རྩོམ་ཡིག་བཏོན་པ་ཧ་ལམ་སྟོང་ཕྲག་སྐོར་ཞིག་ནང་དུའང་དབུ་མའི་ལམ་ལ་རྒྱབ་སྐྱོར་གནང་བཞིན་འདུག དེས་ག་རེ་མཚོན་གྱི་ཡོད་ཅེས་ན། རྒྱའི་གྲོགས་པོ་ཤེས་ཡོན་ཅན་ཚོའི་ནང་ལ་དེ་དངོས་གནས་གཉིས་སྨན་རེད་འདུག དེ་དཀའ་ངལ་སེལ་རྒྱུའི་ཐབས་ལམ་ཁ་ཡོད་ལག་ཡོད་ཅིག་རེད་འདུག་ཅེས་ངོས་འཛིན་བྱས་ནས་རྒྱབ་སྐྱོར་བྱེད་ཀྱི་འདུག་”ཅེས་བཀའ་སློབ་གནང་ཡོད་པ་རེད།

༧གོང་ས་མཆོག་གིས་དཀའ་ངལ་ཡོད་པ་དེ་སེལ་དགོས་སྐོར་དང་འབྲེལ་ནས་གསུང་དོན། “གང་ལྟར་རྒྱ་བོད་གཉིས་དབར་དཀའ་ངལ་ཞིག་ཡོད་པ་དང་། དཀའ་ངལ་དེ་དེ་འདྲ་བྱས་ནས་བསྡད་པ་ཡིན་ན་རྒྱ་ནག་གཞུང་ཡིན་ནའང་ངོ་ཚ་བོ་ཞིག་དང་། རྒྱ་ནག་གཞུང་གིས་ཀྱང་རྒྱ་ནག་མི་མང་ཚོར་འགྲེལ་བཤད་རྒྱག་སྐབས་འཁྱོག་བཤད་བརྒྱབ་པ་དང་། ང་ཚོ་བོད་མི་རིགས་རྣམས་རྒྱ་མི་རིགས་ལ་ངོ་རྒོལ་ཡིན་པ་ལྟ་བུ། ཏཱ་ལའི་བླ་མ་ཞེས་ལབ་དུས་ཁ་བྲལ་བྱས་ནས་རྒྱ་ནག་རྒྱལ་ཁབ་ལ་རྒྱབ་གཏོད་བྱེད་ཀྱི་ཡོད་པ་ལྟ་བུ་བཤད་སྐབས། རྒྱ་མི་བསམ་བློ་ཞེ་དྲགས་འཁོར་མ་ཐུབ་མཁན། ཕྱོགས་ཚང་མའི་གནས་ཚུལ་མ་རྟོགས་མཁན་ཞིག་གི་སེམས་ནང་ཁོང་ཁྲོ་བཟའ་རྒྱུ་དེ་འདྲ་ཡོང་གི་རེད། དེ་དགོས་མེད་རེད། དངོས་ཡོད་གནས་ཚུལ་མ་རེད། དེར་བརྟེན་ང་རང་ཚོ་ཕན་ཚུན་ཐུག་ནས་དངོས་ཡོད་གནས་ཚུལ་དེ་ཤེས་པ་བྱས། ང་ཚོ་མཐུན་མོང་གི་དཀའ་ངལ་སེལ་རྒྱུ་དེ་ཕན་ཚུན་ཚང་མར་འགན་ཡོད། འཛམ་གླིང་ཕྱི་ལོགས་སུ་བལྟས་པ་ཡིན་ནའང་ཤེས་གསལ་རེད། མི་དང་མིའི་དཀའ་ངལ་སེལ་བར་གོ་མཚོན་བེད་སྤྱོད་སྤྱད་ནས་གནོན་ཤུགས་སྤྲད་པ་ཡིན་ན་དཀའ་ངལ་སེལ་ཐུབ་ཀྱི་མེད། བོད་ཀྱི་གནས་སྟངས་མཚོན་ནའང་རྒྱ་མིའི་དམག་དཔུང་ཧ་ལས་པའི་སྟོབས་ཆེན་པོ་ཡོད་ནའང་། དམག་དཔུང་གཅིག་པུས་བོད་ཀྱི་དཀའ་ངལ་དེ་སེལ་ཐུབ་ཀྱི་མ་རེད། གལ་སྲིད་དེ་ལྟར་སེལ་ཐུབ་ཀྱི་ཡོད་ན་ད་གཟོད་བོད་ཀྱི་དཀའ་ངལ་དེ་སེལ་ནས་རྫོགས་ཚར་དགོས་པ་ཞིག་ཆགས་ཡོད། མི་རབས་བརྗེ་འགྲོ་གི་ཡོད་རུང་དཀའ་ངལ་ད་དུང་ལྷག་ཡོད། མི་དང་མིའི་དཀའ་ངལ་ཞེས་པ་འདི་གཙོ་བོ་སེམས་ནང་གཅིག་གིས་གཅིག་ལ་ཕན་ཚུན་བརྩི་བཀུར་བྱས། གཉིས་ཕན་གྱི་བསམ་བློ་བཏང་། ཕྱོགས་གཅིག་རྒྱལ། ཕྱོགས་གཅིག་ཕམ་ཞེས་པ་དེ་མ་ཡིན་པར་ཕུགས་རྒྱང་རིང་པོར་རྒྱུ་མཚན་ལྡན་པའི་ཐོག་ནས་བསམ་བློ་བཏང་ན་ང་ཚོའི་དཀའ་ངལ་སེལ་ཐུབ་པ་ཞིག་རེད། ད་རིང་ཁྱེད་རང་ཚོའི་ཚོགས་འདུའི་ཐོག་ལ་དེ་སྔ་ཕན་ཆད་ཀྱི་དངོས་ཡོད་གནས་ཚུལ་གྱི་ཉམས་མྱོང་ཕྱོགས་བསྡོམས་ཤིག་བྱས་ནས་ང་ཚོས་གང་འདྲ་ཞིག་གི་ཐོག་ལ་ཤུགས་བརྒྱབ་དགོས་ཀྱི་འདུག རྒྱ་རིགས་གྲོགས་པོའི་ནང་ཆ་བཞག་ན་དངོས་ཡོད་གནས་ཚུལ་མ་ཤེས་མཁན་ཧ་ཅང་མང་པོ་འདུག ངོས་ཀྱི་ནམ་རྒྱུན་རྟག་པར་འདི་ཤོད་ཀྱི་ཡོད། རྒྱ་ནག་མི་མང་དུང་ཕྱུར་བཅུ་གསུམ་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད་རེད། ཅེས་དངོས་ཡོད་གནས་ཚུལ་ཤེས་པའི་མཚམས་ལ་ལེགས་ཉེས་འབྱེད་པའི་རྣམ་དཔྱོད་ཡོད་པ་རེད། དངོས་ཡོད་གནས་ཚུལ་བཀབ་ནས་སོ་སོའི་སྲིད་གཞུང་གི་སྲིད་བྱུས་མཁྲེགས་པོ་ཡོད་པ་འདི་གཞིར་བཟུང་གི་དྲིལ་བསྒྲགས་བྱས་ནས་ཕྱིན་པ་ཡིན་ན་འདི་ཡག་པོ་མི་འདུག ཅེས་ངོས་ནས་ནམ་རྒྱུན་དེ་འདྲ་ཤོད་ཀྱི་ཡོད། འཁྱོག་བཤད་དང་། གསར་འགྱུར་བཀག་བསྡོམས་བྱས་པ་འདི་དག་རྒྱ་ནག་ནང་ཁུལ་ལ་བྱེད་རྒྱུ་རེད་མ་གཏོགས་རྒྱ་གར་དང་འཛམ་གླིང་གཞན་བཅས་ལ་ཁྱབ་རྒྱུ་མ་རེད་”ཅེས་བཀའ་སློབ་གནང་།

དེ་བཞིན་༧གོང་ས་མཆོག་གིས་དངོས་ཡོད་གནས་ཚུལ་ཤེས་རྟོགས་དགོས་སྐོར་དང་འབྲེལ་ནས་གསུང་དོན། “ཕྱོགས་གཅིག་ནས་བསམ་བློ་གཏང་ན་རྒྱ་ནག་མི་མང་དུང་ཕྱུར་བཅུ་གསུམ་བཅུ་བཞི་ཡོད་པ་དེ་ཚོར་མགོ་སྐོར་གཏོང་གི་ཡོད་པ་རེད། དེང་སྐབས་འཛམ་གླིང་འདིའི་སྒང་དངོས་ཡོད་གནས་ཚུལ་གང་ཡིན་པ་དེ་དངོས་ཤུགས་བརྒྱུད་གསུམ་ནས་གོ་འགྲོ་གི་ཡོད། ལྷག་པར་དེང་སྐབས་འཕྲུལ་ཆས་མང་པོ་ཞིག་ཡོད་པ་དེ་འདྲ་ཞིག་གི་འོག་ལ་གནས་ཚུལ་དེ་བཀབ་ཐུབ་ཐབས་མེད། འབྲས་བུ་དེས་རྒྱ་ནག་མི་མང་དངོས་ཡོད་གནས་ཚུལ་ཏོག་ཙམ་ཤེས་པ་དེ་ཚོས་རྒྱ་ནག་གཞུང་ལ་ཡིད་ཆེས་བརླག་རྒྱུ་དང་ཐེ་ཚོམ་སྐྱེ་གཞི་ཞིག་ཆགས་ཀྱི་རེད། དེར་བརྟེན་གང་ལྟར་དངོས་ཡོད་གནས་ཚུལ་གསལ་པོ་ཞིག་སྔོན་ལ་བཟོས་དགོས་རྒྱུ་དེ་གལ་ཆེན་པོ་རེད། དེ་རིང་རྒྱ་རིགས་གྲོགས་པོ་ཚོ་འདིར་ཕེབས་ཡོད་པ་རེད། ཁྱེད་རང་ཚོས་བློ་གཟུ་བོར་གནས་པའི་ཐོག་ནས་དངོས་ཡོད་གནས་ཚུལ་དེ་ཉམས་ཞིབ་གནང་། དངོས་ཡོད་གནས་ཚུལ་ནང་འདས་པའི་ལོ་རྒྱུས་དེར་ཡང་འབྲེལ་བ་ཞིག་ཡོང་གི་ཡོད། རྒྱ་བོད་གཉིས་ལོ་སྟོང་ཕྲག་ཁ་ཤས་རིང་ལོ་རྒྱུས་ཡོད་པ་ཞིག་ཆགས་ཡོད། དེར་བརྟེན་གང་འདྲ་རེད་འདུག་གམ། ང་ཚོ་འདས་པའི་ལོ་རྒྱུས་གླེང་ནས་ད་ལྟ་ང་ཚོ་འདས་པའི་གནས་སྟངས་ནང་བཞིན་དགོས་ཡོད་ཅེས་སུས་ཀྱང་ཟེར་རྒྱུ་མ་རེད། དཔེར་ན། ངོས་རང་ལ་ཆ་བཞག་ན་འཛམ་གླིང་དང་དུས་རབས་ལ་འགྱུར་བ་འགྲོ་གི་ཡོད་པར་བརྟེན་དངོས་ཡོད་གནས་ཚུལ་ལ་བརྟེན་ནས་འགྲོ་དགོས་པ་ཞིག་རེད་མ་གཏོགས་འདས་པའི་གནས་ཚུལ་རྐྱང་རྐྱང་བགྲངས་ནས་ད་ལྟའི་དཀའ་ངལ་སེལ་རྒྱུ་ཡོད་མ་རེད། ང་ཚོས་འདི་བཤད་ཀྱི་ཡོད་མ་རེད། ཡིན་ནའང་ད་ལྟའི་རྒྱ་ནག་མཁྲེགས་པོ་བྱེད་མཁན་དེ་ཚོས་ལོ་རྒྱུས་ཁུངས་འཁྱོལ་ལ་མ་འཁྱོལ་དེ་འདྲ་བགྲངས་ནས་གཅིག་བཤད་ཀྱི་འདུག དེ་ཚོའི་གྲས་འདི་བློ་གཟུ་བོར་གནས་པའི་ཐོག་ནས་དངོས་ཡོད་གནས་ཚུལ་མཐུན་པ་ཞིག་ཞིབ་འཇུག་བྱ་རྒྱུ་དེ་གལ་ཆེན་པོ་རེད་འདུག མ་འོངས་པར་ཆ་བཞག་ན་རྒྱ་བོད་གཉིས་ལོ་རྒྱུས་ཡོད་པའི་མི་རིགས་གཉིས་རེད། ལོ་ངོ་སྟོང་ཕྲག་རིང་འབྲེལ་བ་ཡོད་པ་ཞིག་རེད། སྔར་དུས་སྐབས་འགའ་ཤས་སྐབས་དངོས་གནས་དྲང་གནས་ང་ཚོ་གཉེན་འབྲེལ་མཛའ་གཅུགས་ལྡན་པ་བྱས་ནས་བསྡད་ཡོད་པ་རེད། དེར་བརྟེན་ང་ཚོ་ཚང་མས་མཐུན་མོང་གིས་འབད་བརྩོན་གྱི་ཐོག་ནས་མ་འོངས་པར་ཡིན་ནའང་ཕན་ཚུན་མཛའ་གཅུགས་ལྡན་པ་ཞིག་དང་གཉིས་ཕན་ཡོང་བ་ཞིག་ཁྱེད་རང་ཚོའི་དགོངས་པར་བཅང་རོགས་གནང་ཞུ་རྒྱུ་ཡིན། མཐའ་དོན་ཁྱེད་རང་ཚང་མ་ལས་བྲེལ་ཡོད་པ་ཤ་སྟག་རེད། ཡིན་ནའང་ཚོགས་འདུ་འདི་གལ་ཆེན་པོ་ཞིག་ལ་བརྩིས་ནས་ཚོགས་འདུར་མཉམ་ཞུགས་གནང་པར་ཐུགས་རྗེ་ཆེ་ཞེས་ཞུ་རྒྱུ་ཡིན། སྔ་མོ་ངོས་རང་རྒྱ་ནག་ཏུ་ཡོད་སྐབས་ ༡༩༥༤ ལོར་རྒྱལ་ཡོངས་མི་དམངས་འཐུས་མི་ཚོགས་ཆེན་ཚོགས་པ་རེད། ཚོགས་འདུའི་སྐབས་འདྲ་ཆག་ཆག་བྱས་པ་ཞིག་ལས་གོ་བསྡུར་ལྷུག་པོ་བྱ་རྒྱུ་དེ་འདྲ་བྱུང་མེད། དེ་ནས་ལྔ་བཅུ་ང་དྲུག་ལོར་རྒྱ་གར་དུ་བསླེབས་པ་རེད། རྒྱ་གར་གྲོས་ཚོགས་ནང་ལ་གོ་བསྡུར་ཧ་ཅང་ལྷུག་པོ་ཡོད་པ་དང་། སྐབས་རེ་རྩོད་པ་ཤོར་བ་སོགས་བྱུང་ཡོད། དེ་དུས་ལྡི་ལིར་རྒྱ་ནག་གི་སྲིད་བློན་ཀྲུ་ཨན་ལའི་དང་ཧོ་ལུང་ཕེབས་པ་རེད། སྐབས་དེ་དུས་ཁོང་རྣམ་གཉིས་ལ་ངོས་ཀྱིས་དེ་ལྟར་ཞུས་པ་ཡིན། ང་ཚོ་རྒྱ་ནག་པེ་ཅིང་རྒྱལ་ཡོངས་མི་དམངས་འཐུས་མི་ཚོགས་ཆེན་དང་ལྡི་ལིར་རྒྱ་གར་གྲོས་ཚོགས་ཚོགས་སྟངས་འདི་འདྲ་གི་མི་འདུག ང་ཚོ་བསམ་འཆར་བཤད་མཁན་ཞེ་དྲགས་མི་འདུག ལྡི་ལིར་བསམ་འཆར་བཤད་མཁན་དང་ཧ་ཅང་འཁྲུག་པོ་འདུག ཅེས་ཞུ་སྐབས་ཀྲུས་ཁྱེད་རང་རྒྱ་ནག་ནས་ཕྱིན་ཚར་རྗེས་ང་ཚོ་འགྱུར་བ་ཧ་ཅང་ཕྱིན་ཡོད། ཅེས་དེ་འདྲ་ཞིག་གསུངས་པ་རེད། དེར་བརྟེན་ཁྱེད་རང་ཚོ་ཚོགས་འདུ་འཚོགས་སྐབས་ཁ་གསལ་གཏིང་གསལ་བྱས་ནས་གང་ལྟར་ང་ཚོ་མཐུན་མོང་གི་དཀའ་ངལ་སེལ་རྒྱུ་ནི་ང་ཚོ་ཚང་མའི་མཐུན་མོང་གི་ལས་འགན་བྱས་ནས་ཁྱེད་རང་ཚོས་འདིར་ཕེབས་པ་རེད། དཀའ་ངལ་སེལ་ཐབས་ལ་དངོས་ཡོད་གནས་ཚུལ་དང་མཐུན་པའི་དཀའ་ངལ་གང་འདྲ་ཞིག་སེལ་དགོས་ཀྱི་འདུག དེའི་སྐོར་གོ་བསྡུར་ལྷུག་པོ་ཞིག་ཡོང་རྒྱུར་ངོས་ནས་རེ་བ་ཞུ་གི་ཡོད་”ཅེས་བཀའ་སློབ་གནང་ཡོད་པ་རེད།

དེ་བཞིན་༧གོང་ས་མཆོག་གིས་མཇུག་ཏུ་ཁོར་ཡུག་སྲུང་སྐྱོབ་དང་། བྱམས་བརྩེའི་སྐོར་ལ་བཀའ་སློབ་ལམ་སྟོན་གནང་ཡོད་པ་དང་། ཚོགས་ཆེན་ཐོག་རྒྱ་རིགས་བོད་དོན་རྒྱབ་སྐྱོར་བ་དང་མང་གཙོ་དོན་གཉེར་བ་སོགས་མཉམ་ཞུགས་བྱས་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།

Share this:
༢༩༢ ཀློག་གྲངས།