ལྷོ་རྒྱ་ནག་རྒྱ་མཚོར་དྲག་པོའི་རྟེན་གཞི་མང་དུ་འགྲོ་བཞིན་པ།

རྒྱ་ནག་དང་ཝེ་ཏི་ནམ་གཉིས་ཀྱིས་ལྷོ་རྒྱ་ནག་རྒྱ་མཚོར་དྲག་པོའི་རྟེན་གཞི་འཛུགས་ཆེད། རང་མོས་ཀྱིས་གསང་བའི་ངང་བྱ་སྤྱོད་སྤེལ་བཞིན་ཡོད་འདུག
soth1དེ་ཡང་ཟླ་འདིའི་ཚེས་༡༠ ཉིན་གྱི་རྒྱལ་སྤྱིའི་བརྒྱུད་ལམ་སྦི་སྦི་སིའི་ཐོག་ཏུ་གནས་ཚུལ་སྤེལ་གསལ། ཟླ་༧ པའི་ཟླ་མཇུག་ཏུ་འཕྲུལ་སྐར་གྱིས་ལྷོ་རྒྱ་ནག་རྒྱ་མཚོར་རྒྱ་ནག་གིས་བཟོས་པའི་བཅོས་མའི་གླིང་ཕྲན་པར་བརྒྱབ་པ་རྣམས་དྲ་ཐོག་ཏུ་བཏང་ཡོད་འདུག་པ་དང་། དེ་དག་ལས་རྒྱ་ནག་གིས་གླིང་ཕྲན་དེར་གནམ་གྲུ་འཇོག་ཁང་གསུམ་གསར་དུ་འཛུགས་སྐྲུན་བྱས་ཚར་གྲབས་ཡོད་འདུག གནམ་དམག་འགོག་རྒོལ་གྱི་འཕྲུལ་ཆས་འཇོག་སའི་ཁང་བརྩེགས་ཁ་ཤས་ཀྱང་བརྒྱབ་ཟིན་ཡོད་པ་དང་། དེ་བཞིན་བཀོལ་སྤྱོད་བྱེད་ཐུབ་པའི་གནས་སྟངས་འོག་ཡོད་པའི་མཚོ་དམག་གྲུ་གཟིངས་འཇོག་སའི་ས་ཚུགས་གསུམ་གསར་དུ་བཟོས་ཡོད་འདུག
དེ་བཞིན་ཟླ་འདིའི་ཚེས་༡༠ ཉིན་རེའུ་ཊོར་གསར་ཁང་གིས་གནས་ཚུལ་སྤེལ་གསལ། ཉེ་བའི་ཟླ་ཤས་རིང་ཝེ་ཏི་ནམ་གྱིས་གསང་བའི་ངང་ལྷོ་རྒྱ་ནག་རྒྱ་མཚོའི་ནང་དུ་ཡོད་པའི་རང་ཁོངས་ཀྱི་གླིང་ཕྲན་ཆུང་ཆུང་ཁ་ཤས་ཐོག་ཏུ། མེ་ཤུགས་འཕུར་མདའ་གཏོང་བྱེད་ཀྱི་འཕྲུལ་འཁོར་གནས་གཞི་ཁག་ལྔར་དབོར་འདྲེན་བྱས་ཟིན་ཡོད་ཅིང་། མེ་ཤུགས་འཕུར་མདའ་གཏོང་བྱེད་ཀྱི་འཕྲུལ་འཁོར་དེ་དག་བར་སྣང་ལྟ་སྲུང་ལས་གཡོལ་ཐུབ་པ་བྱུང་འདུག་པ་དང་། ད་ལྟའི་ཆར་འཕྲུལ་འཁོར་དེ་དག་ལ་མཚོན་ཆ་སྤྲས་མེད་ཀྱང་། ཉིན་གཉིས་གསུམ་ནང་ཚུད་ལ་མེ་ཤུགས་འཕུར་མདའ་གཏོང་ཐུབ་པ་ཆགས་རྒྱུ་ཡིན་འདུག
ལྷོ་རྒྱ་ནག་རྒྱ་མཚོའི་བདག་དབང་ཐོག་ལྷོ་ཤར་ཨེ་ཤེ་ཡའི་རྒྱལ་ཁབ་ཝེ་ཏི་ནམ་དང་། རྒྱ་ནག ཧྥི་ལི་པིན་སོགས་ཀྱིས་རྩོད་ལེན་བྱེད་ཀྱི་ཡོད་པ་དང། དེ་བཞིན་རྒྱ་མཚོ་དེར་གླིང་ཕྲན་གཉིས་ཡོད་པས། དེ་གཉིས་ཐོག་ལ་ཡང་ལོ་རྒྱུས་བཤད་སྟངས་ཐོག་བདག་དབང་ལ་རྩོད་རྙོག་ཡོང་གི་ཡོད་པ་རེད།
ཕྱི་ལོ་༢༠༡༣ ནས་རྒྱ་ནག་གིས་ལྷོ་རྒྱ་ནག་རྒྱ་མཚོའི་གཏིང་ནས་རྡོ་དང་བྱེ་མ་སོགས་ཕྱིར་འདོན་གྱི་ལས་གཞི་བརྩམས་ཏེ། གླིང་ཕྲན་ཞིག་བཟོ་འགོ་ཚུགས་པ་ཡོད་པ་དང་། ཨ་རིས་གླིང་ཕྲན་དེ་དམག་འཐབ་ཀྱི་རྟེན་གཞི་ཡིན་པར་དོགས་པ་བྱེད་ཀྱི་ཡོད་ཀྱང། རྒྱ་ནག་ནས་དོགས་པ་དེར་ངོས་ལེན་བྱེད་ཀྱི་མེད་པ་རེད།
ད་བར་རྒྱལ་སྤྱིའི་འགྲོ་བ་མའི་ཐོབ་ཐང་གི་ལྷན་ཚོགས་དང་ཁྲིམས་ཞིབ་ཁང་། དེ་བཞིན་བར་འདུམ་ཁྲིམས་ཞིབ་ལྷན་ཁང་ལྟ་བུས། རྒྱ་ནག་ལ་ཁ་གཏད་པའི་བཅད་ཁྲ་དང་སྙན་ཐོ་མང་པོ་བཏོན་ཡོད་ཀྱང་། རྒྱ་ནག་གི་དཔལ་འབྱོར་དང་དམག་གི་སྟོབས་ཤུགས་རྐྱེན་པས། དེ་དག་གིས་རྒྱ་ནག་ལ་གནོན་ཤུགས་གང་ཡང་སྤྲོད་ཐུབ་ཀྱི་མེད་པ་རེད།།
གསར་འགོད་པ་སྐལ་བཟང་དོན་གྲུབ།

Share this:
༢༢༨ ཀློག་གྲངས།