རྒྱ་ནག་གི་གསར་འགོད་པར་སྤྱི་འཐུས་སྐལ་བཟང་རྒྱལ་མཚན་དེ་སྐུ་ཚབ་སྐལ་བཟང་རྒྱལ་མཚན་ཨེ་ཡིན་ངོ་སྤྲོད་གནང་རོགས།

སྒྲོ་བཀུར་རྫུན་འཆོས་ཡིན་ཤག་ཏུ་རྩིས་ཏེ། རྒྱལ་སྤྱིའི་ནང་ཡིད་ཆེས་དང་ཤུགས་རྐྱེན་བཟོ་མི་ཐུབ་པ་དངོས་ཡོད་ཡིན་ནའང་།

ཉེ་སྔོན་རྒྱ་ཕྱོགས་ནས་བཏོན་པའི་རྩོམ་ཡིག་འགའ་ཤས་ནང་བསམ་ཡུལ་ལས་འདས་པའི་ཆེས་ཚབས་ཆེན་གྱི་ནོར་འཛོལ་ཡོད་པ་མ་ཟད། ཐ་ན་བཙན་བྱོལ་བོད་གཞུང་གི་གནད་ཡོད་མི་སྣ་སུ་དང་གང་ཡིན་གྱི་མཚན་ཙམ་ཡང་འཁྲུག་བསྡད་པ་དེར་གསལ་བཤད་ཐེར་འདོན་མ་བྱས་ཀ་མེད་རེད།

དཔེར་ན། འདི་ཟླའི་འགོ་སྟོད་ལ་རྒྱ་ནག་གཞུང་གི་མི་དམངས་ཉིན་རེའི་ཚགས་པར་གྱིས་འདོན་སྤེལ་བྱས་པའི་”རྣམ་དཔྱོད་ཡངས་པའི་ཏཱ་ལའི་བླ་མས་དཔྱད་པ་ནོར་འཛོལ་ཁག་”ཞེས་པའི་རྩོམ་ཡིག་དེའི་ནང་། ཉེ་སྔོན་༧གོང་ས་མཆོག་ནས་རྒྱ་རིགས་མཁས་པ་ཁག་ནས་བོད་ལ་རྒྱབ་སྐྱོར་མཚོན་པའི་ རྩོམ་ཡིག་༨༠༠ ཙམ་འདོན་སྤེལ་བྱས་ཡོད་ཅེས་གསུངས་ཡོད་པའི་ནང་ནས་རྩོམ་ཡིག་གཅིག་ཀྱང་རྒྱ་ནག་ནང་ཁུལ་བཏོན་མེད་ལུགས་བཤད་འདུག

རྩོམ་ཡིག་དེའི་ནང་། ༧གོང་ས་མཆོག་གིས་གོང་གསལ་རྩོམ་ཡིག་༨༠༠ ནང་ནས་༣༠༠ རྒྱ་ནག་ནང་ཁུལ་ནས་འདོན་སྤེལ་བྱས་ཡོད་ལུགས་གསུངས་ཡོད་པ་དེ་དང་། ཁོང་”སྒེར་གྱི་སྐུ་ཚབ་སྐལ་བཟང་རྒྱལ་མཚན་”གྱིས་འདི་ལོ་ཟླ་༢ ཚེས་༢༡ ཉིན་ཨ་རི་རྒྱང་སྲིང་རླུང་འཕྲིན་ཁང་ལ་བཅར་འདྲི་དང་ལེན་སྐབས་གསུངས་པའི་བཀའ་ མོལ་གཉིས་མཐུན་གྱི་མེད་ལུགས་སོགས་གང་མིན་ཚད་བཤད་འདུག

དོན་དངོས་ཐོག་ དེ་ནི་བོད་ཀྱི་ཁ་དཔེར་ར་མགོ་ལུག་སྦྱར་རམ་ཞྭ་དཔེ་ལྷམ་འགེབས་ལས་མ་འདས། གང་ལགས་ཞེ་ན། གོང་གསལ་གྱི་ཉིན་མོ་དེར་ཨ་རི་རླུང་འཕྲིན་ཁང་ནས་སྐུ་ཚབ་སྐལ་བཟང་རྒྱལ་མཚན་ ལགས་ལ་བཅར་འདྲི་གཏན་ནས་བྱས་མི་འདུག འོ་ན་རྒྱ་ནག་གིས་བརྗོད་པའི་སྐལ་བཟང་རྒྱལ་མཚན་དེ་སུ་ཡིན་པའི་སྐོར་རྩད་འཚོལ་ ཡུད་ཙམ་བྱས་སྐབས། དེ་ནི་སྤྱི་འཐུས་སྐལ་བཟང་རྒྱལ་མཚན་ལགས་རེད་འདུག ཁོང་ནི་བོད་མི་དམངས་སྤྱི་འཐུས་ཙམ་མ་ཟད། བཙན་བྱོལ་ནང་རྒྱ་ཡིག་གི་ཤེས་ཚད་ལེགས་གྲས་དང་། ཡོངས་གྲགས་སུ་བོད་རྒྱའི་གནད་དོན་ཐོག་དཔྱད་བརྗོད་པ་ཞིག་ཀྱང་ཡིན།

ཡང་སྤྱི་འཐུས་སྐལ་བཟང་རྒྱལ་མཚན་ལགས་ནས་གནད་དོན་འདིའི་ཐད་རྒྱ་སྐད་ནང་གང་ཞིག་གསུངས་ཡོད་པ་དེར་འཚོལ་ཞིབ་ཀྱིས་བལྟས་ན། ཁོང་གིས་གོང་གསལ་རྩོམ་ཡིག་༨༠༠ ནང་ནས་”མང་ཆེ་བ་རྒྱ་ནག་ཕྱི་ལོགས་སུ་འདོན་སྤེལ་བྱས་ཡོད་” ཅེས་གསུངས་ཡོད། དེའི་ཕྱིར་ཁོང་གིས་གསུངས་ཚུལ་དེ་དང་། གོང་གསལ་རྩོམ་ཡིག་༨༠༠ ནང་ནས་༣༠༠ རྒྱ་ནག་ནང་ཁུལ་ནས་འདོན་སྤེལ་བྱས་ཡོད་པའི་གསུངས་ཚུལ་དེ་གཉིས་དོན་གཅིག་འགྲེལ་ ཚུལ་མི་འདྲ་བ་གཉིས་ལས་གཞན་ཧེ་བག་ཅི་ཡང་མི་འདུག

རྒྱ་ནག་གསར་འགོད་པ་ཚོས་སྤྱི་འཐུས་སྐལ་བཟང་རྒྱལ་མཚན་དང་སྐུ་ཚབ་སྐལ་བཟང་རྒྱལ་མཚན་གཉིས་ནོར་འཁྲུལ་ཤོར་བ་དེ་ཡང་ཐོག་མ་ཕྱི་ལོ་༢༠༠༨ ནས་འགོ་བཙུགས་ཏེ་རྒྱུན་འབྱམས་སུ་ཕྱིན་ཡོད་འདུག བོད་ས་ཡོངས་སུ་ལོ་རྒྱུས་རང་བཞིན་ལྡན་པའི་མི་དམངས་ཞི་རྒོལ་ཆེན་མོ་ལངས་པའི་ལོ་དེའི་ཟླ་༥ ནང་༧གོང་ས་མཆོག་གི་སྐུ་ཚབ་རྣམས་རྒྱ་ནག་ལ་ནང་མོལ་བཀའ་བསྡུར་ཆེད་ཕེབས་སྐབས། རྒྱ་ནག་གསར་ལམ་ཁག་མང་པོའི་ནང་དུའང་གནས་ཚུལ་འདི་བཀོད་ཡོད་པ་མ་ཟད། སྐུ་ཚབ་གཉིས་ཀྱི་པར་ཡང་བཀོད་འདུག འོན་ཀྱང་ཁོང་ཚོས་སྐུ་ཚབ་སྐལ་བཟང་རྒྱལ་མཚན་གྱི་ཚབ་ལ་སྤྱི་འཐུས་སྐལ་བཟང་རྒྱལ་ མཚན་གྱི་འདྲ་པར་བཀོད་ནོར་ཤོར་ཡོད་པ་སྐབས་དེ་དུས་བོད་རིགས་བུད་མེད་རྩོམ་པ་པོ་གྲགས་ཅན་འོད་ཟེར་སོགས་ནས་ཐེར་འདོན་བྱས་ཡོད་པ་རེད།

གནད་དོན་འདིའི་ཐད་སྤྱི་འཐུས་སྐལ་བཟང་རྒྱལ་མཚན་ལགས་སུ་བཅར་འདྲི་བྱེད་སྐབས། ཁོང་གིས་བཞད་མོ་དང་བཅས། རྒྱ་ཕྱོགས་ནས་ནོར་འཁྲུལ་འདི་ཡང་ཡང་བཟོ་བར་སྤྲོ་སྣང་ཆེན་པོ་ཡོད་པ་མ་ཟད། སྐབས་འགར་དེ་ལས་ལྷག་ཏུ་འུད་སྒྲོག་བྱས་ཏེ། “ང་ལ་དེ་སྔ་༧གོང་ས་མཆོག་གི་སྐུ་ཚབ་ཡིན་པ་དང་། ད་ལྟ་བོད་མི་དམངས་སྤྱི་འཐུས་སྐལ་བཟང་རྒྱལ་མཚན་”ཞེས་འབྲི་མཁན་རིགས་ཀྱང་གང་ མང་ཡོང་བསྡད་པ་དང་། ” སྐབས་འགར་ནོར་འཁྲུལ་འདི་རིགས་ཤེས་བཞིན་དུ་རྫུན་སྒྲིག་བྱས་པ་ཞིག་མིན་ནམ་བསམ་ གི་འདུག  དོན་དངོས་ཐོག་རྒྱ་ནག་གསར་འགོད་པ་ཚོས་ཉམས་ཞིབ་ཡག་པོ་ མ་བྱས་པའི་རྐྱེན་གྱིས་ཡིན་པ་མངོན་གསལ་རེད་”སོགས་གསུངས།

དེར་བརྟེན། ཧམ་པ་རི་ཙམ་བཤད་ན། བདེན་པ་གཡག་ཙམ་ཐོབ་རེ་བྱས་ཏེ། རྒྱ་ཕྱོགས་ནས་དུས་རྟག་ཏུ་གང་ས་ཅི་ཐད་ནས་མི་བདེན་རྫུན་སྒྲིག་དང་། སྒྲོ་བཀུར་འཁྱོག་བརྗོད་སོགས་ཐབས་ཤེས་ཡོད་རྒུ་རྩལ་སྤྲུགས་ཀྱིས། ༧གོང་ས་སྐྱབས་མགོན་ཆེན་པོ་མཆོག་ལ་མཚན་དམོད་དང་། མཚན་ཤས་བཟོ་གང་ཐུབ་ཇི་ཙམ་ཞིག་བྱས་ཀྱང་། ཉིན་ཤར་སྦར་མོས་འཁེབས་མི་ཐུབ་པར་དེ་ལས་རང་ཉིད་སྔོ་ལོ་ལངས་ཕྱར་ཡོང་རྒྱུ་ གདོན་མི་ཟ།

མཇུག་མཆན།    གཞུང་ འབྲེལ་གྲངས་ཐོར་གཞིགས་ན། ད་ལྟའི་ཆར་བཙན་བྱོལ་བོད་མིའི་སྤྱི་ཚོགས་ནང་སྐལ་བཟང་རྒྱལ་མཚན་གྱི་མིང་ཡོད་མཁན་གི་གང་ཟག་ཉུང་མཐར་ཡང་༦༧ ཙམ་འདུག་ཅེས་རྒྱ་ནག་གི་གསར་འགོད་པའི་མཁྱེན་རྟོགས་སླད།

 

Share this:
༧༩ ཀློག་གྲངས།