རང་སྲེག་རྒྱ་རྒོལ་བ་བློ་བཟང་དཀོན་མཆོག་གློད་གྲོལ།

དགེ་འདུན་པ་གཉིས་ཀྱིས་མཉམ་དུ་རང་སྲེག་རྒྱ་རྒོལ་བྱེད་མཁན་བློ་བཟང་དཀོན་མཆོག་མི་ལོ་དྲུག་ལ་གར་སོང་ཆ་མེད་གྱུར་རྗེས།  ཕྱི་ཟླ་༣ ཚེས་༢༨ ཉིན་ཟི་ཁྲོན་མེན་ཡེང་བཙོན་ཁང་ནས་གློད་གྲོལ་བཏང་ཡོད་ཀྱང་། ཁོང་གི་རྐང་བ་གཡོན་པ་གཏུབ་ཡོད་པ་དང་། དགོན་པ་དང་གྲོང་ཁྱེར་དུ་འགྲོ་རུ་མ་བཅུག་པར་འབྲོག་ས་རུ་བཟང་བཙོན་ལྟ་བུ་བྱས་ཡོད་འདུག

དེ་ཡང་ཟླ་འདིའི་ཚེས་༤ ཉིན་དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བ་ལྟར་ན། ཕྱི་ལོ་༢༠༡༡ ཟླ་༩ ཚེས་༢༦ ཉིན་གྱི་བོད་ནང་གི་སྔ་དྲོ་རྔ་བ་ཀིརྟི་དགོན་པ་ནས་ཡིན་ཞིང་། སྐབས་དེར་དགུང་ལོ་༡༩ ཡིན་པའི་དགེ་འདུན་པ་བློ་བཟང་སྐལ་བཟང་དང་། དགུང་ལོ་༡༨ ཡིན་པའི་དགེ་འདུན་པ་བློ་བཟང་དཀོན་མཆོག་གཉིས་ཀྱིས་ཁྲོམ་གཞུང་དུ་མཉམ་པོར་རང་སྲེག་རྒྱ་རྒོལ་བྱེད་སྐབས། རྒྱ་མིའི་ཉེན་རྟོག་པ་དེ་མུར་སླེབས་ནས་ཁོང་གཉིས་ཀྱི་ལུས་སྟེང་གི་མེ་བསད་དེ་བཙན་འཁྲིད་བྱས་རྗེས། ད་ལྟའི་བར་གནས་ཚུལ་ཁ་གསལ་གང་ཡང་བྱུང་མེད་པ་རེད།

ཕྱི་ཟླ་༣ ཚེས་༢༨ ཉིན་དགེ་འདུན་པ་བློ་བཟང་དཀོན་མཆོག་བཙོན་ཁང་གི་འབྲེལ་ཡོད་ནས་ཚུར་ཁྱིམ་དུ་བསྐྱལ་ཡོད་འདུག་ལ། ཉེན་རྟོག་པས་མུ་མཐུད་ལྟ་རྟོག་ནན་མོ་བྱེད་བཞིན་ཡོད་པ་མ་ཟད། དགོན་པ་དང་རྫོང་ཐོག་སོགས་སུ་འགྲོ་རུ་མི་བཅུག་པ་དང་། གཉེན་ཉེ་དང་སློབ་གྲོགས་སོགས་ཐུག་འཕྲད་སྐབས་སུ་འདྲ་པར་རྒྱག་མི་ཆོག་པ།  གློད་གྲོལ་སྐོར་གྱི་གནས་ཚུལ་ཡང་ཁྱབ་བརྡལ་གཏོང་མི་ཆོག་པ་སོགས་རང་དབང་སྤུ་ཙམ་མེད་པར། ཕ་མ་ཡོད་སའི་འབྲོག་ས་རུ་བཟང་བཙོན་ལྟ་བུ་བྱས་ཡོད་འདུག

དགེ་འདུན་བློ་བཟང་དཀོན་མཆོག་ལགས་བཙོན་དུས་རྫོགས་ནས་གློད་གྲོལ་གྱི་ཚེས་གྲངས་དངོས་ནི་ཕྱི་ཟླ་གསུམ་པའི་ཚེས་མགོ་ཡིན་ཡང་། གསུམ་བཅུའི་དུས་དྲན་དང་གསུམ་པའི་བཅུ་དྲུག་སོགས། ཆབ་སྲིད་ཀྱི་ཚོར་བ་རྣོ་བའི་ཚེས་གྲངས་དེའི་སྐབས་སུ་རྙོག་ཟིང་ཡོང་དོགས་ཀྱི་ད་ལྟའི་བར་གློད་གྲོལ་མ་བྱས་པ་རེད་འདུག

བློ་བཟང་དཀོན་མཆོག་དང་བློ་བཟང་སྐལ་བཟང་གཉིས་ཀས་མཉམ་དུ་རང་ལུས་མེར་སྲེག་གནང་ནས་རྒྱ་གཞུང་གིས་བཙན་འཁྲིད་བྱས་རྗེས། བློ་བཟང་དཀོན་མཆོག་གི་སྐུ་གཟུགས་གནས་སྟངས་ཧ་ཅང་ཛ་དྲག་གིས་གཞུང་འབྲེལ་སྨན་ཁང་ཞིག་ཏུ་སྨན་བཅོས་བྱས་སྐབས་སུའང་། སྨན་པ་དང་ལྟ་རྟོག་པས། ཁོང་ལ་“རྒྱལ་ཁབ་ཀྱི་དགྲ་བོ་དང་མང་ཚོགས་ནང་དཀྲུགས་ཤིང་རྒྱག་མཁན་”ཡིན་ཚུལ་བཤད་དེ་ནམ་རྒྱུན་མཐོང་ཆུང་དང་ཁྱད་གསོད་བྱེད་ཀྱིན་ཡོད་འདུག་ལ།  དགེ་འདུན་པ་བློ་བཟང་སྐལ་བཟང་རྒྱ་གཞུང་གིས་བཙན་ཁྲིད་རྗེས་ད་ལྟ་བར་གར་སོང་ཅི་བྱུང་གི་གནས་སྟངས་ད་དུང་ཡང་ཅི་ཡང་ཤེས་རྟོགས་ཐུབ་མེད་པ་རེད།

བློ་བཟང་དཀོན་མཆོག་འཇུ་བཟུང་བྱས་ནས་ལོ་དྲུག་གི་ཁྲིམས་ཐག་བཅད་པ་དེང་འདིར་གཞི་ནས་ཤེས་རྟོགས་བྱུང་བ་ལས། ཁོང་ལ་ནག་ཉེས་ཅི་ཞིག་འཛུགས་མིན་ཡང་གསལ་ཁ་བྱུང་མེད་ཀྱང་། རྒྱ་གཞུང་གིས་དུས་རྒྱུན་རང་ལུས་མེར་སྲེག་གནང་མཁན་ལ་སྤྱི་ཚོགས་ཀྱི་བདེ་འཇགས་ལ་གནོད་སྐྱོན་བཟོས་པ་ཞེས་པའི་ཉེས་འགེལ་བྱེད་ཀྱི་ཡོད་ཅིང་། ལྷག་པར་སྔར་ལོ་༢༠༡༦ ཟླ་༥ ནང་། རྒྱ་གཞུང་གིས་རང་སྲེག་ནི་ནག་ཉེས་ཡིན་པའི་ཁྲིམས་སྲོལ་གསལ་བསྒྲགས་བྱས་ཡོད་ལ། བོད་ནང་དུ་ད་ལྟའི་བར་རང་ལུས་མེར་སྲེག་གི་ངོ་རྒོལ་གནང་མཁན་ཤེས་རྟོགས་བྱུང་བ་༡༤༦ བྱུང་ཁྲོད། མི་༡༨ གྲོངས་མེད་ནའང་། རྒྱ་གཞུང་གིས་ཁོང་ཚོར་སྤྱི་ཚོགས་ཀྱི་བདེ་འཇགས་ལ་གནོད་སྐྱོན་བཟོས་པའི་ནག་ཉེས་བཙུགས་ནས། ཁྲིམས་ཐག་གི་དུས་ཡུན་ལོ་༣ ནས་༡༠ གཅོད་ཀྱིས། ཐ་ན་སྲོག་ཁྲིམས་གཅོད་པ་བྱུང་ཡོད། ཕྱི་ལོ་༢༠༡༦ ཟླ་༣ ནང་། རང་ལོ་༡༦ ཡིན་པའི་དགེ་འདུན་པ་བསམ་གྲུབ་ཅེས་པ་ཞིག་གིས་རང་སྲེག་བྱ་གྲབས་བྱས་འདུག་ཅེས་འཇུ་བཟུང་བཀག་ཉར་གྱི་ཁྲིམས་ཆད་ལོ་༣ བཅད་ནས་གློད་གྲོལ་བྱུང་ཞིང་། ཕྱི་ལོ་༢༠༡༦ ཟླ་༩ ནང་། ཕྱི་ལོ་༢༠༡༦ ཟླ་༩ ནང་། བོད་ནང་ནས་ཐོག་མར་རང་ལུས་མེར་སྲེག་གནང་མཁན་བཀྲ་བྷེ་ལགས་མེན་ཡེང་ཞེས་པའི་བཙོན་ཁང་དུ་བཅུག་པའི་གནས་ཚུལ་གཞི་ནས་ཤེས་རྟོགས་བྱུང་བ་རེད།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས། རྒྱ་གཞུང་གིས་བློ་བཟང་དཀོན་མཆོག་གི་འགྲོ་བ་མིའི་གཞི་རྩའི་ཐོབ་ཐང་ཁག་ཏེ། འགྲོ་བསྐྱོད་རང་དབང་དང་། ཤེས་ཡོན་སློབ་སྦྱོང་གི་ཐོབ་ཐང་། བསམ་བློ་རང་དབང་སོགས་ལོངས་སུ་སྤྱོད་བཅུག་དགོས་པའི་འབོད་སྐུལ་དང་སྦྲགས། བློ་བཟང་དཀོན་མཆོག་གང་བྱུང་འཇུ་བཟུང་གིས་ལོ་མང་བཙོན་འཇུག་བྱས་པ་ནི། ཁོང་གི་བསམ་བློའི་རང་དབང་དང་ལྷག་པར་ངོ་རྒོལ་ཁྲོམ་སྐོར་བྱ་ཆོག་པའི་རང་དབང་སོགས་བརྩི་མེད་རྡོག་རོལ་བཏང་བ་ཞིག་ཆགས་ཡོད་པ་དང་། རང་བསྲེགས་ངོ་རྒོལ་ནི་དུས་ནམ་ཡང་སྤྱི་ཚོགས་ཀྱི་བདེ་འཇགས་གཏོར་སྐྱོན་བཏང་བའི་ཉེས་པར་ཆགས་མི་སྲིད་པར། དེ་བས་སྤྱི་ཚོགས་ཀྱི་བདེ་འཇགས་ལ་འཇིགས་དངངས་དང་གནོད་སྐྱོན་ནི་སྲིད་གཞུང་གིས་བཙན་ཤེད་ཀྱི་མི་དམངས་ཀྱི་བསམ་སྦྱོར་ལ་དམ་དྲག་ཤུགས་ཆེར་བྱས་པ་ལས་བྱུང་གི་ཡོད་པ་ཤེས་དགོས་པའི་དུས་ལ་སླེབས་ཡོད་ཅེས་དྲན་སྐུལ་ཞུ་ཡི་ཡོད་ཅེས་བརྗོད་འདུག །
གསར་འགོད་པ་ཆོས་ཉིད་འོད་ཟེར།

 

Share this:
༢༠༩ ཀློག་གྲངས།