གལ་ཆེའི་གསལ་བསྒྲགས།

དེ་ནས་བཟུང་ལོ་འཁོར་མོར་རྣམ་དཀར་གྱི་ལས་འཆར་མི་ཉུང་བ་ཞིག་སྤེལ་རྒྱུར་དཔལ་ལྡན་བཀའ་ཤག་ནས་དུས་སྟོན་འཆར་འགོད་དང་ལག་བསྟར་ཚོགས་ཆུང་ཟུར་འཛུགས་གནང་བའི་ཚོགས་ཆུང་གིས། ཕྱི་ལོ་༢༠༡༠ ཟླ་༢  ཚེས་༢༠ འཁོད་ལས་འཆར་ཞུ་སྒོ་ཁག་ཕུལ་ཁོངས་ལས་འཆར་གྲངས་༣༡ གཏན་འཁེལ་གནང་ཁོངས་འདི་ལས་བརྒྱུད་སྒྲུབ་དགོས་དོན་ཚན༡༤ ཡོད་ཁོངས་ནས། དོན་ཚན་ཨང་༡༧ གནང་གསལ། བཙན་བྱོལ་ནང་ཡོད་པའི་བོད་མི་ཟ་ཁང་འཛིན་མཁན་རྣམས་ལ་ལྷ་རབས་བྱུང་ནས་ཤ་རིགས་དམར་ཟས་གཉེར་ལས་འཁྲུངས་ཚེས་ནས་ལོ་འཁོར་མོར་སྤོང་རྒྱུ་དང། དེ་ལྟར་མ་བྱུང་ཡང་༧སྐུའི་བླ་གཟའ་ནམ་འཁེལ་དང། ཉ་སྟོང་བརྒྱད་གསུམ་བཅས་ལ་དམར་ཟས་སྤོང་ཐབས་འབོད་སྐུལ་ཞུ་རྒྱུ་དང། དོན་ཚན་ཨང་༡༨ ནང་གསལ། འདི་ལོའི་འཁྲུངས་སྐར་ནས་རྗེས་ལོའི་འཁྲུངས་སྐར་བར་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་སྡུག་དང་སྒེར་སོ་སོའི་དགའ་སྟོན་འདུ་འཛོམས་སར་དཀར་ཟས་ཁོ་ན་སྤྱོད་ཐབས་དང།  བོད་མི་མང་ཚོགས་ནས་ཀྱང་ལོ་འཁོར་རིང་ངམ། ཡང་ན་༧སྐུའི་བླ་གཟའ་ནམ་འཁེལ་དང། ཉ་སྟོང་བརྒྱད་གསུམ་བཅས་ལ་དཀར་སྐྱོང་ངེས་པར་གནང་ཐབས་ཡོང་བའི་འབོད་སྐུལ་ཞུ་རྒྱུ། དོན་ཚན་ཨང་༡༩ ནང་གསལ། འཁྲུངས་སྐར་ཉིན་མོ་དང། དྲུག་པའི་ཚེས་བཞི། དགུ་པའི་ལྷ་བབས་དུས་ཆེན། ནོ་སྦེལ་ཞི་བདེའི་གཟེངས་རྟགས་ཉིན་མོ། ཕྱི་ལོ་༢༠༡༡ ལོའི་ལོ་གསར། ཆོ་འཕྲུལ་དུས་ཆེན། ས་ཟླའི་དུས་ཆེན། འཛམ་གླིང་སྤྱི་བསངས་བཅས་ཀྱི་དུས་ཆེན་སོ་སོར་༧སྐུ་ཚེའི་ཚེ་སྒྲུབ་དང། སྲོག་བླུ་གང་མང་གཏོང་རྒྱུར་ས་གནས་སོ་སོའི་མང་ཚོགས་ནས་རྒྱུ་སྦྱོར་གནང་སྟེ་རྗེས་སུ་འདི་བྱས་ལས་བསྡོམས་ཆོས་རིག་ལས་ཁུངས་སུ་འབུལ་དགོས། དོན་ཚན་ཨང་༢༦ ནང་གསལ། བོད་མི་གནས་སྡོད་ས་གནས་སོ་སོར་༧སྐུའི་བླ་གཟའ་ལྷག་པ་ནམ་འཁེལ་ལ་མི་མང་འདུ་འཛོམས་ཀྱིས་བསངས་གསོལ་གནང་ལམ་ཡོད་ན་བརྗོད་མེད་དང། མེད་ན་༢༠༡༠ ཟླ་༧ ཚེས་༦ ༧སྐུའི་འཁྲུངས་ཚེས་ནས་བཟུང་བསངས་གསོལ་རྒྱུན་མཐུད་གནང་དགོས། དོན་ཚན་ཨང་༢༧ ནང་གསལ། གཞིས་སྒར་ས་གནས་སོ་སོར་ཆེད་བཙུགས་ཡོད་པའི་ནང་ཆོས་ངོ་སྤྲོད་ཚོགས་ཆུང་སོ་སོས་འགན་འཁུར་འོག་དམངས་ཁྲོད་དུ་ནང་ཆོས་ངོ་སྤྲོད་ལས་འགུལ་སྔར་ལྷག་ཚགས་ཆུད་ཡར་རྒྱས་གཏོང་རྒྱུ་དང། ནང་ཆོས་ངོ་སྤྲོད་ཚོགས་ཆུང་ཆེད་འཛུགས་མ་ཐུབ་པའི་ས་གནས་ཁག་ནས་ཀྱང་ཚོགས་ཆུང་ཆེད་འཛུགས་ཐུབ་ཐབས་ངེས་པར་གནང་སྟེ་མང་ཚོགས་ལ་ནང་ཆོས་ངོ་སྤྲོད་རྒྱུན་བསྲིང་གནང་ཐབས་བཅས་གོང་གསལ་དོན་ཚན་ཁག་ལྔ་ལ་འབྲེལ་ཡོད་ཚང་མས་ཕྱར་གྲུ་མཉམ་འདེགས་དང་ཐུགས་སྣང་ཟབ་བསྐྱེད་གནང་གལ་དང་འབྲེལ། ༧མགོན་པོ་གང་ཉིད་སྐུ་ཚེ་༧ ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་ཟབ་མོ་མཐའ་དག་གེགས་མེད་ལྷུན་གྱིས་འགྲུབ་ཆེད། རང་ཅག་གཞིས་བྱེས་བོད་འབངས་ཡོངས་ནས་རྣམ་དཀར་དགེ་སྦྱོར་གྱི་ལས་ལ་འབད་འབུངས་ཧུར་བསྐྱེད་རྒྱུན་བསྲིང་གནང་གལ་ཐོག ཁུངས་སོ་སོ་ནས་རྣམ་དཀར་ལས་དོན་ཇི་སྒྲུབ་ལས་བསྡོམས་གནང་ཐབས་ཡོང་བའི་གལ་ཆེའི་འབོད་སྐུལ་གསལ་བསྒྲགས་སུ།
བཙན་བྱོལ་བོད་གཞུང་ཆོས་རིག་ལས་ཁུངས་ནས་༢༠༡༠ ཟླ་ ༥ ཚེས་༢༥ ལ།

Share this:
༨༤ ཀློག་གྲངས།