འབྲུག་ཆུ་རྫོང་དུ་ཆུ་ལོག་བྱུང་བར་སྤྱི་འཐུས་ཀྱི་འཚམས་འཕྲིན།

འཚམས་འཕྲིན་གྱི་ནང་དུ་འཁོད་དོན། བོད་རྒྱལ་ལོ་ ༢༡༣༧ རབ་གནས་ལྕགས་སྟག་ལོའི་བོད་ཟླ་ ༦ ཚེས་ ༢༨ ཕྱི་ལོ་ ༢༠༡༠ ཟླ་ ༨ ཚེས་ ༨ ཀྱི་སྔ་དྲོ་ཐོ་རེངས་སྐབས་སུ། དེང་སང་རྒྱ་ནག་གིས་ཀན་སུའུ་ཞིང་ཆེན་ཞེས་པར་བགོས་པའི་ཀན་ལྷོ་བོད་རིགས་རང་སྐྱོང་ཁུལ་འབྲུག་ཆུ་རྫོང་དུ་གློ་བུར་ཆུ་ལོག་ཚབས་ཆེན་བྱུང་སྟེ། ད་ལྟའི་བར་མི་ ༡༢༧ ཙམ་རྐྱེན་ལམ་དུ་ཕྱིན་པ་དང༌། མི་ ༢༠༠༠ ལྷག་གར་སོང་ཆ་མེད་དུ་གྱུར་པ། དུད་ཚང་ ༣༠༠ ཅན་གྱི་གྲོང་སྡེ་རྨེག་མེད་དུ་དེད་དེ་འབྲུག་ཆུའི་སྨད་རྒྱུད་ཡུལ་གྲུ་ཁག་གི་མང་ཚོགས་ཀྱི་བདེ་འཇགས་ལའང་ཉེན་ཁ་ཚབས་ཆེན་འཕྲད་བཞིན་པའི་གནས་ཚུལ་སྐྱི་གཡའ་བ་བརྗོད་ཀྱི་མི་ལངས་པ་ཐོན་བཞིན་པར་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས། ད་ཐེངས་ཆུ་ལོག་གི་འཇིགས་པའི་ཁྲོད་ནས་རྐྱེན་ལམ་དུ་ཕྱིན་པའམ། རྨས་སྐྱོན་ཕོག་པའི་བོད་རིགས་སྤུན་ཟླ་གཙོས་མི་རིགས་ཁག་གི་མི་མང་ལ་ཐུགས་གསོའི་འཚམས་འདྲི་ཞུ་རྒྱུ་དང༌། རྐྱེན་འདས་དུ་ཕྱིན་པ་རྣམས་ལ་དལ་འབྱོར་མི་ལུས་མྱུར་དུ་ཐོབ་པའི་སྨོན་ལམ་ཡང་ཞུ་རྒྱུ་ཡིན།

ཆུ་ལོག་གི་དོན་རྐྱེན་བྱུང་མ་ཐག རྒྱ་ནག་དབུས་གཞུང་གིས་མཐོང་ཆེན་པོའི་ངང་ཛ་དྲག་མྱུར་སྐྱོབ་རིམ་པ་ཨང་གཉིས་པ་དང༌། འཕྲལ་སྐྱོབ་མ་དངུལ་རྒྱ་སྒོར་དུང་ཕྱུར་ལྔ་འཕྲལ་མར་གནང་སྟེ་མྱུར་སྐྱོབ་ཀྱི་ལས་འགོ་བརྩམས་པ་དང༌། ལྷག་པར་དུ་རྒྱ་ནག་གི་སྲིད་བློན་སྐུ་ཞབས་ཝེན་ཅཱ་པའོ་མཆོག་དུས་ཚོད་དང་པོའི་སྐབས་སུ་ཆུ་ལོག་བྱུང་ཡུལ་འབྲུག་ཆུ་ས་ཁུལ་དུ་ཕེབས་འབྱོར་བྱུང་བ་བཅས་ལ་རྗེས་སུ་ཡི་རངས་ཞུ་ཡི་ཡོད།

ཚང་མས་མཁྱེན་གསལ་ལྟར། མདོ་སྨད་འབྲུག་ཆུ་ས་ཁུལ་ནི་བོད་ཁུལ་དུ་ནགས་ཚལ་རྒྱ་ཁྱོན་ཆེ་ཤོས་ཀྱི་ས་གནས་ཤིག་ཡིན་ཞིང༌། ལོ་རྒྱུས་ཐོག་ཆུ་ལོག་བྱུང་བའི་གནས་ཚུལ་མཐོང་ཐོས་དཀའ་ཡང༌། རྒྱ་ནག་གིས་བོད་དབང་བསྒྱུར་བྱས་པའི་རྗེས་སུ་ནགས་ཚལ་སྨྱོན་ཧམ་ལྟར་གཅོད་འབྲེག་བྱས་པའི་དབང་གིས་བོད་ཀྱི་སྐྱེ་ཁམས་ཁོར་ཡུག་ལ་གནོད་སྐྱོན་ཤིན་ཏུ་ཚབས་ཆེན་ཐེབས་ཡོད་པ་མ་ཟད། ཤིང་ནགས་གཅོད་ཟིན་མཚམས་གཙོ་བོ་གཏེར་ཁ་བསྔོག་འདོན་དང༌། ཆུ་གློག་གསར་རྒྱག་བཅས་སྐྱེ་ཁམས་ཁོར་ཡུག་ལ་སྲུང་སྐྱོབ་ཀྱི་འཆར་གཞི་གང་ཡང་མེད་པའི་ལས་གྲྭ་འབོར་ཆེན་སྤེལ་བཞིན་པ་སོགས་ནི་ད་ཐེངས་ཆུ་ལོག་ཚབས་ཆེན་ཡོང་བའི་རྐྱེན་རྩ་གཙོ་བོ་ཡིན་སྟབས། རྒྱ་ནག་གཞུང་ནས་ཚན་རིག་དང་མཐུན་པའི་གོང་སྤེལ་ལྟ་བའི་གཞུང་ལུགས་གཏན་ལ་ཕབ་པ་གཞིར་བཟུང༌། བོད་ཁུལ་དུའང་དེ་མཚུངས་ལག་བསྟར་ཐུབ་པའི་རེ་བ་དང༌།

ད་ཐེངས་མྱུར་སྐྱོབ་ཀྱི་ལས་འགུལ་ཁྲོད་དུའང་གཙོ་བོ་དམག་མི་དང༌། དྲག་ཆས་ཉེན་རྟོག་པ། ཉེན་རྟོག་པ་སོགས་འབོར་ཆེན་གཏོང་བཞིན་ཡོད་ན། ཁོང་ཚོའི་དཀའ་སྤྱད་འབད་བརྩོལ་དང་སྐུལ་སློང་ལ་དོགས་པ་མེད་ཀྱང༌། ནམ་རྒྱུན་ཀྱི་ཉམས་མྱོང་ལས་རྒྱ་ནག་གིས་སྤྱི་ཚོགས་བརྟན་ལྷིང་སྲུང་སྐྱོབ་དང༌། གསང་བ་ཕྱིར་བསྒྲགས་སོགས་ཀྱི་སྲིད་བྱུས་འོག་གྱོང་གུན་ཕོག་པའི་མང་ཚོགས་ལ་དགོས་མེད་ཀྱི་བརྡབ་གསིག་འཕར་མ་སོགས་མི་ཡོང་བའི་རེ་བ་དང་བཅས།
བོད་མི་མང་སྤྱི་འཐུས་རྒྱུན་ལས་ནས་ཕྱི་ལོ་༢༠༡༠ ཟླ་༨ ཚེས་༩ ལ་ཞེས་འཁོད་འདུག །

{jcomments on}

 

Share this:
༥༡ ཀློག་གྲངས།