ངས་ངོ་ཤེས་པའི་ཨོག་སུ་སྤོར་(Oxford)སློབ་ཆེན་གྱི་བོད་ཡིག་དགེ་རྒན་ཚེ་རིང་དོན་གྲུབ། 

སྦྲ་རིགས་ཐོགས་མེད།

ཕྱི་ལོ་༢༠༡༨ ཟླ་༤  ཚེས་༢༧ ཉིན་གྱི་ཞོགས་པར།  བོད་རིག་པ་སློབ་གླིང་འགན་འཛིན་ཀྱིས་ཛ་དྲག་གློག་འཕྲིན་ཞིག་འབྱོར་འདུག  “རྒན་ཚེ་རིང་དོན་གྲུབ་ལུན་གྲོན་ནས་ཨོག་སུ་སྤོར་སློབ་ཆེན་དུ་འཆད་ཁྲིད་ལ་ཕེབས་སྐབས།  ལམ་བར་དུ་རླངས་འཁོར་དོན་རྐྱེན་བྱུང་ནས། ད་ལྟ་རང་སྨན་ཁང་དུ་ཁྱེར་འདུག” ཟེར།  སྐབས་དེར། ཕལ་ཆེར་ཛ་དྲག་དེ་འདྲ་ཡིན་རྒྱུ་མ་རེད་བསམ་སོང་།  ཞིབ་འཇུག་རྩོམ་ཡིག་ཅིག་གི་འཕྲོ་སྐྱོང་བཞིན་ཡོད་མོད།  ཉིན་དེར་སེམས་པ་ཟང་ཟིང་དུ་གྱུར་ཏེ་གཏན་ནས་བདེ་ལ་འབབ་མ་ཐུབ།  ཉིན་གུང་རྗེས་སུ།  བསྐྱར་དུ་གློག་འཕྲིན་ཞིག་འབྱོར་འདུག  “རྒན་ཚེ་རིང་ལགས། སྨན་ཁང་དུ་མྱུར་སྐྱོབ་བྱེད་མ་ཐུབ་པར་སྐུ་གཤེགས་སོང་” ཟེར།  ཐོག་མར་རང་གི་མིག་ལའང་ཡིད་མི་ཆེས་པ་ལྟ་བུ་ཞིག་བྱུང་།  “གཏམ་ངན་པ་དེ་ཚོ་བདེན་ཤས་ཆེ་” ཟེར་བ་ཅི་མ་བདེན།  མི་ཚེ་གང་བོར་བོད་ཀྱི་ལས་སྒོ་ཆེ་མ་ཆུང་གསུམ་ལ་ལྷག་བསམ་རྣམ་དག་གིས་ཕྱག་ལས་གནང་མྱོང་ཞིང་།  འདས་པའི་ལོ་ངོ་བཅུ་དྲུག་རིང་ཨོག་སུ་སྤོར་སློབ་ཆེན་གྱི་བོད་སྐད་ཡིག་གི་སྲོག་ཤིང་གནང་མཁན།  རྒན་ལགས་ཁོང་།   དགུང་ལོ་༦༦ སྟེང་མི་ཡུལ་འདི་ནས་ང་ཚོ་དང་གཏན་དུ་ཁ་གྱེས་འདུག

ཕྱི་ལོ་༢༠༡༥ ལོའི་ཟླ་གཉིས་པར། བདག་ཨིན་ཡུལ་དུ་སློབ་སྦྱོང་བྱེད་པར་སླེབས་པ་ཡིན།  ལོ་དེའི་བོད་ཀྱི་ལོ་སར་སྐབས་སུ། ངས་རྒན་ཚེ་རིང་དོན་གྲུབ་ལགས་ཐོག་མར་ངོ་ཤེས་བྱུང་། སྐབས་དེར། ཕན་ཚུན་ངོ་སྤྲོད་རེ་བྱས་པ་ཙམ་ལས་རྒྱུས་ལོན་མ་བྱུང་།  རྗེས་སུ། གློག་ཀླད་ཆེད་མཁས་ཨ་ཁུ་སྨོན་ལམ་ལགས་ཨིན་ཡུལ་དུ་ཕེབས་སྐབས། རྒན་ཚེ་རིང་ལགས་ཀྱི་ནང་དུ་ཁྲིད་དགོས་བྱུང་། དེ་ནས་བཟུང་། རྒན་ཚེ་རིང་དོན་གྲུབ་ལ་འགྲོགས་འདྲིས་དང་རྒྱུས་མངའ་གཉིས་ཀ་ཆེ་རུ་ཕྱིན།  རྒན་ཚེ་རིང་ལགས།  བོད་མདོ་སྨད་ཤར་ཁོག་གི་གྲོང་གསེབ་ཅིག་ཏུ་སྐྱེས་ཤིང་ཆུང་དུས་ནས་རྒྱ་གར་དུ་སླེབས་པ་ཞིག་ཡིན་འདུག   ཁོང་ཇི་ལྟར་རྒྱ་གར་དུ་སླེབས་ཚུལ་མ་ཤེས་ཀྱང་།  ཕལ་ཆེར་ཁོང་ནང་མི་སྤུན་མཆེད་ཀྱིས་ཁྲིད་འོང་བ་ཞིག་ནི་མིན་པ་འདྲ།  ཁོང་གིས་ལོ་རབས་བདུན་ཅུ་བ་དང་བརྒྱད་ཅུའི་སྟོད་དུ་རྒྱ་གར་གྱི་བོད་སློབ་ཁག་ཏུ་སློབ་སྦྱོང་གནང་འདུག  ང་ཕྱི་ལོ་༢༠༠༢ ལ་རྒྱ་གར་དུ་སླེབས་ནས་སུ་ཇ་སློབ་གྲྭར་སློབ་སྦྱོང་བྱས་པ་ཡིན། སྐབས་དེའི་ལྟོ་སྐྱ་གོས་ཧྲུལ་གྱི་འཚོ་བ་དེ། ད་ལྟ་ཕྱིར་དྲན་བྱས་ན་གནའ་གཏམ་ལྟ་བུ་ཞིག་ཡིན་པར་བསམ་ན། ཕ་ཡུལ་དང་ནང་མིར་ཁ་བྲལ་བའི་ཚེ་རིང་དོན་གྲུབ་གྱི་ལོ་རབས་བདུན་ཅུའི་སྐབས་ཀྱི་རྒྱ་གར་ནང་གི་འཚོ་བ་ག་འདྲ་ཞིག་ཡིན་པ།  ཕལ་ཆེར་ང་ཚོའི་མིག་ལམ་དུ་འཆར་ཐུབ་པ་ཞིག་རེད།  འོན་ཀྱང་།  དབུ་སྐྲ་རིང་བོ་བསགས་ཤིང་རྐང་རྣམ་དུང་ཆེན་ཁ་གྱོན་མཁན།  ཕོ་སར་ཚེ་རིང་དོན་གྲུབ་གྱིས་སློབ་སྦྱོང་མཐར་ཕྱིན་པ་བྱས་འདུག་པ་མ་ཟད།  རྗེས་སུ་མི་ལོ་བཅུ་ཙམ་ལ་བོད་ཁྱིམ་སློབ་གྲྭའི་དགེ་ཆེའི་འགན་བཞེས་འདུག  ཕལ་ཆེར་བོད་མདོ་ཁམས་གཉིས་ཀྱི་གསར་འབྱོར་བའི་ཁྲོད་དུ་བོད་ཁྱིམ་གྱི་གོ་གནས་མཐོན་པོ་འཛིན་མྱོང་མཁན་ཉུང་ཤས་ཤིག་ཡོད་པའི་ཁྲོད་ཀྱི་གཅིག་ཁོང་ཡིན།

ཕྱི་ལོ་༡༩༨༧ ལོར་ཨིན་ཡུལ་དུ་ཕེབས།  ལུན་གྲོན་རྒྱལ་སྤྱིའི་ཨིན་ཡིག་སློབ་གྲྭ་རུ་ཆེད་ལས་ཨིན་ཡིག་དགེ་རྒན་གྱི་ཕྱག་ལས་གནང་ཞོར།  བོད་ཀྱི་ཐེབས་རྩ་དང་ཚོགས་སྡེ་གང་མང་ལ་ཞབས་ཞུ་ཞུས་འདུག  ཕྱི་ལོ་༢༠༠༡ ནས་ཨོག་སུ་སྤོར་སློབ་ཆེན་དུ་ཆེད་ལས་བོད་ཡིག་དགེ་རྒན་དུ་ཕེབས་པ་རེད།   ལོ་རབས་བདུན་ཅུའི་ནང་གི་བོད་མི་གསར་འབྱོར་བའི་ཁྲོད་དུ།  ཁོང་ལྟ་བུའི་བོད་ཨིན་གཉིས་ཀྱི་ཤེས་ཚད་མཐོན་པོ་ཅན་མང་བོ་མེད།  ཁོང་གིས་རྩོམ་ཡིག་དང་སྙན་ངག  དངོས་བཤུས་གློག་བརྙན་སོགས་གང་མང་སྐོར་གྱི་ཆེད་ལས་ཡིག་སྒྱུར་མཁན་གནང་མྱོང་བ་མ་ཟད།  བོད་ཀྱི་བརྡ་རྙིང་དང་གཏམ་དཔེའི་སྐོར་ལའང་ཁོང་གིས་དེབ་རྒན་ལོངས་པ་ཞིག་ཕྱོགས་བསྒྲིགས་གནང་འདུག  དེ་བཞིན། ཁོང་བོད་ཀྱི་ལོ་རྒྱུས་དང་རི་མོའི་སྒྱུ་རྩལ་ཕྱོགས་ལའང་དབྱིངས་ཆེན་པོ་ཡོད་མཁན་ཞིག་རེད། ལོ་སྔོན་མར།  རྒན་ལགས་ངེད་གཉིས་ཀྱིས་སྦ་བཞེད་ཀྱི་བརྡ་རྙིང་ཁ་ཤས་ཀྱི་གོ་དོན་སྐོར་ལ་ཆུ་ཚོད་གཅིག་ལྷག་བགྲོ་གླེང་བྱས་པ་དྲན།

རྒན་ཚེ་རིང་དོན་གྲུབ་ལགས།  སེམས་པ་བཟང་ཞིང་གཤིས་ཀ་འཇམ།  ལུན་གྲོན་གྱི་བོད་རིགས་ཁོང་ངོ་ཤེས་མཁན་ཚང་མས།  རྒན་ལགས་ཞེས་ཧ་ཅང་བརྩེ་མཐོང་ཆེན་པོ་གནང་བཞིན་འདུག  དེ་བཞིན།  རྒན་ཁོང་གཏམ་ཀུ་རེ་ལ་ཡང་ཧ་ཅང་དགའ་མཁན་ཞིག་རེད།   ཨོག་སི་སྤོར་སློབ་ཆེན་གྱི་བོད་ཀྱི་ལོ་སར་སྐབས་རྟག་པར་ཁོང་གིས་མགོ་ཁྲིད་དང་།  མདོ་འཛིན་པ།  རོལ་གཞས་གཏོང་མཁན་སོགས་ཚང་མ་གཅིག་ལྕོགས་གནང་ཀི་ཡོད།  མཚམས་རེར་སློབ་ཕྲུག་ཚོ་དང་མཉམ་དུ་འུར་འདྲ་ལངས་ནས་ཞབས་བྲོ་འཁྲབ་ཅིང་གླུ་གཞས་གཏོང་བ་སོགས་ཀྱང་བྱེད།  ད་དུང་།  ཁོང་ལ་མི་ལོ་བཞི་བཅུ་ལྷག་ལ་ལུས་དང་གྲིབ་མ་བཞིན་དུ་འགྲོགས་པའི་ཨ་ཅག་གཤིས་བཟང་ཞིག་དང་།  སྙིང་ནང་གཅེས་པའི་བུ་མོ་གཉིས་དང་བུ་གཅིག་བཅས་ཡོད།  ཁོང་གི་ལས་གྲོགས་ཚོས།  “ཨ་ཅག་སྒྲོལ་དཀར་ལགས།  རྒན་ཚེ་རིང་དོན་གྲུབ་གྱི་རྔ་མ་རེད་” ཅེས། མཚམས་རེར་ཀུ་རེའང་རྩེད་བཞིན་ཡོད།  རྒན་ལགས་གང་དུ་ཕེབས་ན།   ཨ་ཅག་སྒྲོལ་དཀར་ཡང་དེར་སླེབས་ནས་ཡོད་ཅིང་།  རྒན་ལགས་ཀྱི་དགོད་སྒྲ་གང་དུ་ཡོད་ན།  ཨ་ཅག་སྒྲོལ་དཀར་གྱི་འཛུམ་མདངས་ཀྱང་དེ་ན་ཡོད། ན་ནིང་།  ནོར་ཝེར་བོད་རིག་པའི་འཚོགས་འདུར་ཕེབས་མྱོང་མཁན་ཚོས།  གཅིག་བྱས་ན། ཁོང་ཁྱོ་ཤུག་གཉིས་ཀྱང་སྐབས་དེར་ཕེབས་ཡོད་པ་དོ་སྣང་བྱུང་ཡོད་སྲིད།

མདོར་བསྡུས་ན།  རྒན་ཚེ་རིང་དོན་གྲུབ་ལགས་ནི།  མི་ལོ་དྲུག་ཅུའི་སྐྱབས་བཅོལ་གྱི་ལོ་ཟླ།  མགོ་ནས་མཇུག་བར་བརྒྱུད་མྱོང་བའི་ང་ཚོའི་མི་རབས་རྒན་པ་ཚོའི་གྲས་ཀྱི་གཅིག་ཡིན་ལ།  ཁོང་ནི་བོད་མི་ཡུལ་གྱར་བ་མང་ཆེ་བ་དང་འདྲ་བར།   སྐྱབས་བཅོལ་ནས་སྐྱབས་བཅོལ་དུ་འགྲོ་དགོས་བྱུང་ཡང་།  རུས་པ་ལྕགས་ལས་སྲ་ཞིང་སྒལ་ཚིགས་རི་ལས་མཐོ་བའི་ང་ཚོའི་མི་རབས་རྒན་པ་ཚོའི་གྲས་ཀྱི་གཅིག་ཀྱང་ཡིན།  ད་དུང་།  ཁོང་ནི་མི་ཚེ་ས་མཐའ་རུ་རྫོགས་ཀྱང་རྣམ་ཤེས་མཐོ་སྒང་ལ་ལོག་ཡོད་པའི་མི་ཡུལ་གྱི་འབྲོང་རྒོད་ཅིག་ཀྱང་ཏན་ཏན་ཡིན་ངེས།།

༢༠༡༨ /༠༥ /༠༡

 

 

Share this:
༡༣༡༢ ཀློག་གྲངས།