བྱང་ཀོ་རི་ཡའི་རླངས་འཁོར་བརྡབ་སྐྱོན་ཁྲོད་མའོ་ཡི་ཚ་བོ་ཤི་ཡོད་པའི་དོགས་གཞི།

བྱང་ཀོ་རི་ཡའི་རླངས་འཁོར་བརྡབ་སྐྱོན་གྱི་དོན་རྐྱེན་འོག་མའོ་ཙེ་ཏུང་གི་ཚ་བོ་མའོ་ཤིན་ཡ་ཞེས་པའི་ཚེ་སྲོག་ཤོར་ཡོད་པའི་དོགས་གཞི།

ཟླ་འདིའི་ཕྱི་ཚེས་༡ ཉིན་ཐའེ་ཝན་གྱི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། ཉེ་ཆར་བྱང་ཀོ་རི་ཡར་སྤྱི་སྤྱོད་རླངས་འཁོར་བརྡབ་སྐྱོན་གྱི་དོན་རྐྱེན་བྱུང་ནས་མི་༣༦ ལ་སྲོག་སྐྱོན་ཤོར་བའི་ཁོངས་སུ། རྒྱ་ནག་དམར་ཤོག་གི་འགོ་ཁྲིད་ཟུར་པ་མའོ་ཙེ་ཏུང་གི་ཚ་བོ། མའོ་ཤིན་ཡ་ཞེས་པ་ཡང་ཡོད་པའི་དོགས་གཞི་ཡོད་འདུག

རླངས་འཁོར་བརྡབ་སྐྱོན་གྱི་དོན་རྐྱེན་དེ་ཕྱི་ཟླ་༤ པའི་ཚེས་༢༢ ཉིན་བྱུང་སྟེ། རྒྱ་ནག་གི་ཡུལ་སྐོར་སྤྲོ་འཆམ་པ་༣༢ དང་བྱང་ཀོ་རི་ཡའི་མི་༤ བཅས་ཁྱོན་མི་༣༦ གི་ཚེ་སྲོག་ཤོར་ཡོད་པ་རེད།

དོན་རྐྱེན་དེར་རྒྱལ་སྤྱིའི་ཁྱོན་ཡོངས་ནས་དོ་སྣང་ཆེན་པོ་བྱས་ཡོད་ཅིང་། དེའི་རྒྱུ་མཚན་ནི་བྱང་ཀོ་རི་ཡའི་སྲིད་འཛིན་ཀེམ་ཇོང་ཨེན་དོན་རྐྱེན་གྱི་ཁྲོད་ནས་ཚེ་སྲོག་མ་ཤོར་མཁན་རྒྱ་ནག་གི་མི་གཉིས་ལ་ཐུག་འཕྲད་བྱེད་ཕྱིར་སྨན་ཁང་དུ་བསྐྱོད་ཡོད་སྟབས་ཡིན་པ་དང་། ནམ་རྒྱུན་ནས་རླངས་འཁོར་བརྡབ་སྐྱོན་གྱི་དོན་རྐྱེན་ལྟ་བུའི་གནས་ཚུལ་མི་ལེགས་པ་རྣམས་ས་གནས་ཀྱི་གསར་ཁང་ཁག་ལ་བྱང་ཀོ་རི་ཡའི་གཞུང་གིས་སྤེལ་འཇུག་གི་མེད་འདུག་ཀྱང་། སྐབས་དེར་གནས་ཚུལ་དེ་སྤེལ་བཅུག་ཡོད་པ་རེད།

རླངས་འཁོར་བརྡབ་སྐྱོན་གྱི་དོན་རྐྱེན་དེ་བྱུང་སྐབས་རྒྱ་ནག་གི་སྲིད་འཛིན་ཞི་ཅིན་ཕིང་གིས་རྒྱ་ནག་ཕྱི་འབྲེལ་ལས་དོན་ལྷན་ཁང་དང་། བྱང་ཀོ་རི་ཡའི་རྒྱལ་སར་ཡོད་པའི་རྒྱ་ནག་གི་གཞུང་ཚབ་ཁང་བཅས་ལ། དོན་རྐྱེན་དེའི་ཁྲོད་ནས་ཚེ་སྲོག་མ་ཤོར་མཁན་གསོན་པོ་ལྷག་པ་རྣམས་ལ་རོགས་རམ་གང་དགོས་བྱེད་རྒྱུའི་རེ་འབོད་བྱས་ཡོད་འདུག

རླངས་འཁོར་བརྡབ་སྐྱོན་གྱི་དོན་རྐྱེན་དེར་དོ་སྣང་ཚད་མཐོན་པོ་བྱུང་དགོས་དོན་ནི། གནོད་འཚེ་ཕོག་ཡུལ་ཁྲོད་ཀྱི་རྒྱ་ནག་གི་མི་སེར་གཅིག་ལ་ཐུག་ནས་ཡིན་སྲིད་སྐོར་གྱི་གནས་ཚུལ་ལྷོ་ཀོ་རི་ཡའི་བརྒྱུད་ལམ་ཁག་ནས་ཐོན་བཞིན་ཡོད་འདུག

མའོ་ཤིན་ཡ་ནི་ད་ལྟ་རང་ལོ་༤༨ ཡིན་འདུག་ཅིང་། ཕྱི་ལོ་༢༠༠༩ ལོར་ཁོང་རྒྱ་ནག་གི་སྤྱི་ཁྱབ་དམག་དཔོན་(Major General)ཞིག་ཏུ་བསྐོ་བཞག་བྱས་ཡོད་འདུག་ཀྱང་། ད་བར་ཁོང་གིས་ལས་འཁུར་དུས་ཡུན་ཁྲོད་སྤེལ་བའི་གཏམ་བཤད་དང་། བྲིས་གཟུགས། རྒྱགས་དྲགས་ནས་གྲོད་ཁོག་ལུག་པ་སོགས། མདོར་ན་ཁོ་རང་གི་ལས་གནས་ཀྱི་དབང་གིས་རྒྱ་ནག་གི་སྤྱི་ཚོགས་དྲ་ལམ་ཁག་ནས་བགད་མོ་ཤོར་གནས་ཤིག་ཏུ་གྱུར་ཡོད་འདུག་པ་དང་། ཁོང་ནི་ད་བར་གྱི་རྒྱ་ནག་གི་ཆེས་ལོ་ན་ཆུང་ཤོས་ཀྱི་སྤྱི་ཁྱབ་དམག་དཔོན་དེ་ཆགས་ཡོད་འདུག

རླངས་འཁོར་བརྡབ་སྐྱོན་གྱི་དོན་རྐྱེན་ཁྲོད་ནས་མའོ་ཤིན་ཡའི་ཚེ་སྲོག་ཤོར་ཡོད་པའི་གནས་ཚུལ་ཐད། ད་བར་རྒྱ་ནག་གཞུང་དང་བྱང་ཀོ་རི་ཡ་གཞུང་གཉིས་ཀས་གསལ་བཤད་དང་ལན་འདེབས་གང་ཡང་བྱས་མེད་འདུག །

གསར་འགོད་པ་བཀྲ་ཤིས་དོན་གྲུབ།

Share this:
༦༦༨ ཀློག་གྲངས།