ཐའེ་ཝན་དུ་བོད་བརྒྱུད་ནང་བསྟན་པས་སྟོན་པའི་འཁྲུངས་སྐར་སྲུང་བརྩི།

བདུན་ཕྲག་སྔོན་མའི་གཟའ་སྤེན་པ་སྟེ། ཕྱི་ཟླ་༤ ཚེས་༢༨ ཉིན། ཐའེ་ཝན་གྱི་རྒྱལ་ས་ཐའེ་པེ་རུ་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་གོ་སྒྲིག་འོག འདི་ལོའི་སངས་རྒྱས་ཀྱི་འཁྲུངས་སྐར་དུས་ཆེན་གཞི་རྒྱ་ཆེ་བ་ཞིག་སྲུང་བརྩི་ཞུས་འདུག

དེ་ཡང་། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་ས་ཁྱི་བོད་ཟླ་གསུམ་པའི་ཚེས་བཅུ་བཞི་དང་། ཕྱི་ལོ་༢༠༡༨ ཟླ་༤ ཚེས་༢༨ ཉིན། ཐའེ་ཝན་གྱི་རྒྱལ་ས་ཐའེ་པའི་མེ་འཁོར་འབབ་ཚུགས་ལྟེ་བའི་ལྷོ་སྒོའི་མདུན་ཐང་དུ་འདི་ལོའི་སྟོན་པའི་འཁྲུངས་སྐར་སྲུང་བརྩི་ཞུས་ཡོད་པ་དང་། སྟོན་པའི་ཞལ་ཐང་ཤིན་ཏུ་ཆེ་ཞིང་ལེགས་པ་བཤམས་པའི་མདུན། མེ་ཏོག་སོགས་མཆོད་པའི་རྫས་སྣ་ཚོགས་དང་། བོད་རྒྱའི་ལུགས་ཀྱི་ཁྲུས་གསོལ་གྱི་སྟེགས་བུ། སྟོན་པའི་འཁྲུངས་སྐར་སྲུང་བརྩི་དང་ཁྲུས་གསོལ་གྱི་ཕན་ཡོན་གྱི་བྱང་བུ་སོགས་བཤམས་ཤིང་། སྔ་དྲོ་ཆུ་ཚོད་བཅུ་པ་ནས་དངོས་གཞི་དབུ་འཛུགས་ཀྱིས། ཞིབ་འཇུག་ཚོགས་པའི་འགན་འཛིན་མཁན་སྤྲུལ་དགེ་བཤེས་སློབ་དཔོན་སོགས་ཐའེ་ཝན་གནས་བཞུགས་བོད་བརྒྱུད་ནང་པ་གཙོ་བོར་གྱུར་པའི་དགེ་འདུན་པ་དྲུག་ཅུ་ལ་ཉེ་བ་དང་། མི་མང་བརྒྱ་ཕྲག་འགའ་ཞིག་འདུ་འཛོམས་ཐོག འཁྲུངས་བསྐར་དང་འབྲེལ་བའི་ཞལ་འདོན་ཁག་དབུ་འཛུགས་དང་འབྲེལ་འདུས་མང་ཡོངས་ནས་སྟོན་པ་ཐུགས་རྗེ་ཅན་གྱི་སྐུ་ཐང་གི་དྲུང་དུ་ཁྲུས་གསོལ་དང་འབྲེལ་བའི་ཐོག་ནས་སྟོན་པའི་འཁྲུངས་སྐར་སྲུང་བརྩི་ཞུས།

དེ་ནས་མུ་མཐུད་ཕྱི་དྲོའི་ཆུ་ཚོད་གསུམ་པའི་བར་དུ་ཆེད་དུ་ཕེབས་མཁན་དང་། འབབ་ཚུགས་སུ་རྒྱུ་འགྲུལ་བྱེད་པའི་མི་མང་བྱིངས་ལ་འཁྲུངས་སྐར་ལ་མཉམ་ཞུགས་ཀྱི་གོ་སྐབས་བསྐྲུན་ཏེ། སྣེ་ལེན་གནང་བས་དུས་རྒྱུན་བོད་བརྒྱུད་ནང་བསྟན་དང་འབྲེལ་བ་ཡོད་པའི་སློབ་མ་དག་ལས་གཞན་པའི་ལམ་འགྲོ་བ་མང་པོ་ཞིག་ཀྱང་ཡ་མཚན་དང་དང་བའི་བློས་སྐུལ་ནས་རང་འགུལ་གྱིས་ཁྲུས་གསོལ་དང་བྱིན་རླབས་ཞུ་བ་སོགས་ཀྱིས་མཉམ་ཞུགས་བྱེད་པ་དང་། དུས་རྒྱུན་འབབ་ཚུགས་སུ་ངེས་མེད་དུ་རྒྱུ་བའི་ཉམ་ཐག་སྤྲང་པོ་དེ་འདྲས་ཀྱང་མཛད་སྒོ་ལ་ཁ་ཟས་ཀྱི་གནང་སྦྱིན་ཡོད་མེད་དྲིས་ནས་མཉམ་ཞུགས་བྱེད་པ་སོགས་འཁྲུངས་སྐར་ལ་མཐོང་ཐོས་དྲན་རེག་གིས་འབྲེལ་བ་འཇོག་མཁན་ཧ་ཅང་མང་པོ་ཞིག་བྱུང་།

ཞིབ་ཚོགས་ཀྱི་ངོས་ནས་ཀྱང་། གསུང་ཆོག་དང་ཁྲུས་གསོལ་ལས་གཞན་དུ། ཡུལ་དངོས་སུ་སྔར་ནས་གྲ་སྒྲིག་ཡོད་པའི་བག་ལེབ་རིགས་བགོ་འགྲེམ་དང་། འཁྲུངས་སྐར་གྱི་དྲན་རྟེན་ལག་རྟགས་སྤྲོད་པ། སྟོན་པའི་འཁྲུངས་སྐར་གྱི་ཕན་ཡོན་དང་དགོས་དམིགས་ངོ་སྤྲོད་སོགས་གང་ལ་གང་འདོད་ཀྱིས་བློ་ཡིད་ཚིམ་པར་བྱས་པ་སོགས་ལས་འགུལ་སྤེལ་ཡོད་པ་རེད།

ཐེངས་འདིའི་འཁྲུངས་སྐར་མཛད་རིམ་གོ་སྒྲིག་འགན་ཁུར་བ། ཞིབ་ཚོགས་འགན་འཛིན་བླ་མ་ཡེ་ཤེས་རབ་རྒྱས་ཀྱིས་གསུངས་པར། སྤྱིར་ཆོས་བརྒྱུད་སོ་སོར་རང་རང་གི་བླ་མ་དང་ལྷག་པའི་ལྷ་ཡོད་པ་དེ་ཚོ་རྩ་ཆེན་ཡིན་ན་ཡང་། དེང་སང་ནང་པའི་ཆོས་གྲོགས་གཞན་དང་མཉམ་དུ་རང་ཉིད་ནང་པ་སངས་རྒྱས་པ་ཞིག་ཡིན་པ་མཚོན་པ་ལ། བསྟན་པ་སྤྱི་བཙན་གྱི་དབང་དུ་བྱས་ན་སྟོན་པ་ཤཱཀྱ་ཐུབ་པའི་རྗེས་འཇུག་ཅིག་ཡིན་པ་གསལ་སྟོན་གནང་རྒྱུ་དེ་རང་ཉིད་ནང་པ་ཞིག་ཡིན་པའི་ཐུན་མོང་གི་ངོས་འཛིན་ཆགས་ཀྱི་ཡོད་པར་མ་ཟད། ཐའེ་ཝན་སོགས་སུ་རང་རེ་ལ་བླ་མའི་ཆོས་ལུགས་ཞེས་བསམ་བཞིན་དུ་ནང་པ་ལས་ལོགས་སུ་དབྱེ་འབྱེད་ལོག་འགྲེལ་བྱེད་མཁན་ཅི་རིགས་ཡོང་བཞིན་ཡོད་པ་སོགས་ཀྱི་གནས་སྟངས་ཀྱི་ཐད་ནས་དེ་བས་ཀྱང་། ང་ཚོ་ས་གནས་འདིར་བསྡོད་མཁན་ཚོས་ཀྱང་། སྒེར་གྱི་གྲོང་ཆོག་དང་རྙེད་འཚོལ་ཁོ་ན་མ་ཡིན་པར། ས་གནས་རྒྱ་བརྒྱུད་ནང་པ་ཚོས་ལོ་རེ་བཞིན་ཧ་ཅང་རྒྱ་ཆེན་པོའི་སྒོ་ནས་སྟོན་པའི་འཁྲུངས་སྐར་སྲུང་བརྩི་བྱེད་པ་ནང་བཞིན། བོད་བརྒྱུད་ནང་བསྟན་པའི་ངོས་ནས་ཀྱང་སྟོན་པའི་འཁྲུངས་སྐར་སྲུང་བརྩི་བྱེད་པ་གལ་གནད་ཆེན་པོར་གཟིགས་ནས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་ངོས་ནས་ཕྱི་ལོ་༢༠༡༤ ལོ་ནས་སྟོན་པའི་འཁྲུངས་སྐར་སྲུང་རྩི་ཞུ་མགོ་ཚུགས་པ་ཞིག་ཡིན་སྐོར་འགྲེལ་བརྗོད་བྱས་འདུག

ཡང་ཁོང་གིས། ས་ཆ་དམིགས་བསལ་འདི་འདྲ་ཞིག་ཏུ་ལས་འགུལ་འདི་འདྲ་ཞིག་སྤེལ་བ་བརྒྱུད་ནས་སྤྱིར་སྐྱེ་བོ་མང་པོ་ཞིག་ལ་སྟོན་པ་ཐུགས་རྗེ་ཅན་གྱི་སྐུ་གསུང་ཐུགས་ཀྱི་སྣང་བརྙན་མཇལ་བའི་སྐལ་བཟང་བསྐྲུན་པ་དང་། ཁྱད་པར་དུ་ལོ་གཅིག་ནང་ཐེངས་གཅིག་ལས་མེད་པའི་ནང་པའི་རྗེས་འཇུག་པའི་དུས་ཆེན་གལ་ཆེ་ཤོས་འདིར་ཐའེ་ཝན་གྱི་སྤྱི་ཚོགས་སུ་ཡོད་པའི་བོད་བརྒྱུད་ནང་པ་རྣམས་ཀྱིས་ཀྱང་སྲུང་བརྩི་ཞུ་བའི་དགོས་ངེས་ཀྱི་འགན་འཁྲི་སྒྲུབ་པ་ཞིག་ལ་ངོས་འཛིན་བྱེད་ཀྱི་ཡོད་ལ། འདི་ནི་ད་ལྟའི་ཆར་ཐའེ་ཝན་དུ་ཀུན་གྱིས་ངོས་འཛིན་ཡོད་པའི་ཐའེ་ཝན་བོད་བརྒྱུད་ནང་བསྟན་ཐུན་མོང་མཉམ་ཞུགས་ཀྱི་ཐོག་ནས་སྟོན་པ་ཐུགས་རྗེ་ཅན་གྱིས་སྟོན་པའི་འཁྲུངས་སྐར་སྲུང་བརྩི་བྱེད་བཞིན་པའི་སྡིངས་ཆ་གཅིག་པུ་དེ་ཆགས་ཀྱི་ཡོད་པ་རེད་ལ། དེ་རིང་གི་ལས་འགུལ་འདི་ཡང་། ས་ཆ་དམིགས་བསལ་ཞིག་ཆགས་ཡོད་སྟབས་མི་མང་པོར་གོ་སྐབས་འབུལ་ཐུབ་པ་བྱུང་ཡོད་པ་དང་། མཉམ་ཞུགས་གནང་མཁན་གྱི་རྒྱའི་དགེ་འདུན་པ་ཚོས་ཀྱང་ཧ་ཅང་སྔགས་བརྗོད་གནང་གིན་འདུག་ལ། ང་ཚོ་རང་གི་ངོས་ནས་ཀྱང་ཡག་པོ་བྱུང་སོང་བསམ་གྱི་ཡོད་ཅེས་དང་། ད་དུང་ཁོང་གིས། འཛམ་གླིང་ཡུལ་གྲུ་ཁག་གི་བོད་བརྒྱུད་ནང་པའི་རྗེས་འཇུག་ཚང་མའི་ངོས་ནས་ཀྱང་སྟོན་པའི་འཁྲུངས་སྐར་ལ་གལ་ཆེན་དུ་རྩི་རྒྱུ་ཧ་ཅང་གལ་ཆེན་པོ་མཐོང་གི་འདུག ཅེས་སོགས་གསུངས་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

 

Share this:
༣༠༥ ཀློག་གྲངས།