རྒྱ་ནག་གི་ཆབ་སྲིད་སློབ་གསོའི་ལྟེ་གནས་ཁང་དུ་བོད་མིར་བཙན་གཡེམ་དང་མནར་གཅོད།

བོད་པའི་དགེ་འདུན་པ་ཞིག་གི་ཉིན་ཐོ་ལས། རྒྱ་ནག་གཞུང་གིས་བོད་ཁུལ་དུ་བཙུགས་པའི་ཆབ་སྲིད་སློབ་གསོའི་ལྟེ་གནས་ཁང་དུ། བོད་པའི་བཙུན་མ་རྣམས་ལ་བཙན་གཡེམ་དང་བོད་མི་ཚོར་མནར་གཅོད་མྱོང་གི་ཡོད་སྐོར་བྲིས་ཡོད་འདུག

ཟླ་༥ པའི་ཚེས་༢༨ ཉིན་དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་ལྟར་ན། ལྟེ་གནས་ཁང་དེར་བོད་ནག་ཆུ་ས་ཁུལ་སོག་རྫོང་ནང་ཡོད་པའི་རྒྱ་ནག་གི་ཆབ་སྲིད་སློབ་གསོའི་ལྟེ་གནས་ཁང་དུ་ཟླ་བ་༤ རིང་བཀག་ཉར་འོག་བསྡད་པའི་དགེ་འདུན་པ་ཞིག་གིས་ཉིན་ཐོ་བརྒྱུད་སྤྲོད་བྱུང་ཡོད་འདུག་པ་དང་། དེའི་ནང་ཁོང་དང་འདྲ་བའི་གྲྭ་བཙུན་མང་པོ་ཞིག བོད་རང་སྐྱོང་ལྗོངས་ཀྱི་ཕྱི་ལོགས་སུ་སློབ་གཉེར་དུ་ཕྱིན་པར་བཙན་དབང་དང་སྡིགས་སྐུལ་ཐོག་ནས་ཚུར་སྐད་བཏང་ནས། ཆབ་སྲིད་སློབ་གསོའི་ལྟེ་གནས་ཁང་དུ་བཀག་ཉར་འོག་འཇོག་གི་ཡོད་འདུག

ཁོང་གིས་ཉིན་ཐོའི་ནང་དུ་ཁོང་བཀག་ཉར་བྱེད་ཡུལ་གྱི་ལྟེ་གནས་ཁང་དེའི་ནང་། སློབ་གསོའི་སྐབས་སུ་༧གོང་ས་མཆོག་ལ་ངན་དམོད་བྱེད་དུ་འཇུག་གི་ཡོད་པ་དང་། སྐབས་རེ་སྒོ་ཁར་དམག་སྦྱོང་བྱེད་དུ་འཇུག་གི་ཡོད་ཁར། འཛིན་གྲྭ་ཚང་མ་རྒྱ་སྐད་ཐོག་ཡིན་པ། དེ་བཞིན་ལྟེ་གནས་ཁང་དེའི་ནང་དུ་བཙུན་པ་ཚོར་བཙན་གཡེམ་བྱེད་ཀྱི་ཡོད་པའི་ཐོག་ལ་“བཙུན་མ་མང་པོ་ཞིག་དབང་པོ་ཤོར་ནས་རྒྱལ་འགྲོ་གི་འདུག སྐབས་རེ་བཙུན་མ་ཚོ་རྒྱལ་སོང་དུས། ཁོ་ཚོ་བཙོན་སྲུང་མི་སྣ་ཚོས་ཡར་ཁང་པའི་ནང་དུ་ཁྲིད་ནས་ནུ་མ་དང་གཟུགས་པོ་ཡོངས་ལ་གང་བྱུང་འཕུར་མཉེད་གཏོང་གི་ཡོད་པ་ངས་ཀྱང་མཐོང་བྱུང་། བར་སྐབས་ཤིག་ལ་བཙུན་མ་དག་དབང་པོ་ཤོར་དུས་བཙོན་སྲུང་པ་ཚོས་འཚང་ཁའི་ངང་ཁྲིད་འགྲོ་འདུག ད་དུང་གཞན་ག་རེ་བྱེད་ཀྱིན་ཡོད་མིན་སུས་ཤེས། ལས་བྱེད་པ་བུ་འགའ་རེས་བཙུན་མ་ཚོ་ཉལ་ཁང་ནང་དུ་མནན་བསྡད་པ་ཡང་གོ་ཐོས་བྱུང་།”ཅེས་བྲིས་ཡོད་འདུག

དེ་བཞིན་དེ་གར་ཡོད་པའི་གྲྭ་བཙུན་དང་སྐྱ་བོ་རྣམས་ཀྱིས་དམག་ཆས་རང་ཉིད་ཀྱིས་རྒྱ་སྒོར་༡༥༠ རེ་སྤྲད་ནས་ཉོས་རྗེས་གྱོན་དགོས་པ་དང་། ཚེ་བརྟན་སྒྲོལ་མས་བཏང་བའི་གུང་ཁྲན་བསྟོད་གླུ་ཉི་མ་དང་ཟླ་བ། རྒྱ་ནག་གི་རྒྱལ་གླུ། རྒྱས་གཞས་གཞན་ཞིག་བཅས་སྦྱངས་ནས་གཏོང་ཐུབ་པ་དགོས་ཀྱི་ཡོད་པ། དེའི་ཐོག་བོད་མི་རྣམས་ལ་གཅར་རྡུང་དང་དུས་ཡུན་རིང་པོར་གྱང་རྩར་ལངས་སུ་འཇུག་པ། གཉིད་གཅོག་པ། ཟ་མ་འཕྲོག་པ། དམའ་འབེབས་བྱེད་པ་སོགས་ཀྱི་མནར་གཅོད་མྱོང་གི་ཡོད་སྐོར་བྲིས་ཡོད་འདུག །

གསར་འགོད་པ་སྐལ་བཟང་དོན་གྲུབ།

 

Share this:
༡༥༤ ཀློག་གྲངས།