༸གོང་ས་མཆོག་གིས་ལ་དྭགས་དབྱར་ཆོས་ཆེན་མོ་དབུ་འབྱེད་གནང་།

ཟླ་འདིའི་ཚེས་༡༥ རེས་གཟའ་ཉི་མའི་ཉིན་ལ་དྭགས་ལྡུམ་ར་བསམ་གཏན་གླིང་དགོན་པའི་གསུང་རའི་ནང་༸གོང་ས་མཆོག་གིས་ལ་དྭགས་དབྱར་ཆོས་ཆེན་མོ་ཐེངས་དྲུག་པ་དབུ་འབྱེད་གནང་བ་དང་། མཛད་སྒོའི་ཐོག་དགའ་ལྡན་ཁྲི་ཟུར་རི་རྫོང་རིན་པོ་ཆེས་༸གོང་ས་མཆོག་ལ་དྲན་རྟེན་གཟེངས་རྟགས་ཤིག་ཕུལ་ཡོད་པ་རེད།

སྐབས་དེར་༧གོང་ས་མཆོག་གིས་གནང་དོན། “ང་རང་ཚོའི་བོད་ལ་དེ་སྔ་ཕལ་ཆེར་ནཱ་ལེནྜའི་བཞེད་སྲོལ་རེད། རིག་གནས་ཆེ་བ་ལྔ་དང་ཆུང་བ་ལྔ་ཞེས་བཤད་སྲོལ་ཡོད། རིག་གནས་ཆེ་བ་ལྔའི་ནང་དུ་ཚད་མ་དང་སྒྲ། གསོ་བ་རིག་པ། བཟོ་རིག་པ་དེ་དག་དམིགས་བསལ་ཆོས་དང་མ་འབྲེལ་བ་རེད། ནང་དོན་རིག་པ་འདི་ནང་ཆོས་སྐོར་ཆགས་ཡོད། འདིར་དབྱར་ཆོས་སྐབས་མི་མང་པོ་འདུས་པའི་ཁོངས་ཆོས་དད་ཡོད་པ་དང་མེད་པ། ཆོས་དད་ཡོད་མཁན་ཁུངས་སུའང་ཆོས་ལུགས་འདྲ་མིན་ཡོད། ང་ཚོའི་གཞི་རྩའི་དམིགས་ཡུལ་གང་ཡིན་བརྗོད་ན། ཤེས་ཡོན་ཡར་རྒྱས་གཏོང་རྒྱུ་འདི་ཤོད་བཞིན་ཡོད། ཚད་མ་རིག་པ་དང་སེམས་ཁམས་རིག་པ་དེ་ཚོའི་གྲས་འགྲོ་བ་མི་ཡོངས་རྫོགས་ལ་འབྲེལ་བ་དང་ཕན་ཐོགས་ཡོད་པ་ཆགས་ཡོད། འདི་ཆོས་ཀྱི་སྐད་ཆ་མ་རེད། ད་ལྟ་གནའ་རབས་རྒྱ་གར་འཕགས་པའི་ཡུལ་གྱི་ཚད་མ་རིག་པ་དང་སེམས་ཁམས་རིག་པ་དེ་ཚོའི་གྲས་དེང་སྐབས་དངོས་ཡོད་གནས་ཚུལ་ལ་ནང་པའི་གཞུང་ནང་ཡོད་པ་དེ་དག་མུ་མཐུད་ནས་སློབ་སྦྱོང་བྱེད་མཁན་ཡོད་”ཅེས་གསུངས།

༧གོང་ས་མཆོག་གིས་ནང་ཆོས་དང་སེམས་ཁམས་རིག་པ་འབྲེལ་ནས་གསུང་དོན། “སྤྱིར་རྩ་བའི་འབྱུང་ཁུངས་རྒྱ་གར་ཡིན་ཡང་སྔར་ནཱ་ལེནྜའི་གཙུག་ལག་སློབ་གྲྭའི་ནང་མཁས་དབང་དེ་འདྲ་ཡོད་སྐབས་མཁས་དབང་ཚིའི་གསུང་གི་ནང་ལ་ཕྱོགས་སྔ་མུ་སྟེགས་པའི་མཁས་དབང་མང་པོའི་བཞེས་པ་བཀོད་ནས་ཡོད། དེར་བརྟེན་དེའི་ཚེ་དེའི་དུས་རྒྱ་གར་གྱི་ཕྱི་ནང་དབྱེ་བ་མེད་པར་སེམས་ཁམས་རིག་པ། ཚད་མ་རིག་པ་དེ་དག་ཧ་ཅང་ཁྱབ་བརྡལ་ཆེན་པོ་ཡོད་པ་རེད་འདུག བར་སྐབས་ནས་དེ་དག་ཐད་དོ་སྣང་བྱ་རྒྱུ་ཉུང་དྲག་པ་དང་།  དེ་འདྲའི་མཁས་དབང་མང་པོ་ཞིག་དེང་སྐབས་མཐོང་རྒྱུ་མེད། བོད་གངས་ཅན་གྱི་ལྗོངས་ལ་རྒྱ་གར་མཁས་པའི་གཞུང་ནང་ནས་ཚད་མ་རིག་པ་དང་སེམས་ཁམས་རིག་པ་དེ་ཚོའི་གྲས་ད་ལྟ་ཡིན་ནའང་སློབ་གཉེར་བྱས་ནས་འགྲོ་བཞིན་ཡོད། སློབ་གཉེར་བྱེད་སྟངས་དེའང་ཚིགས་འགྲེལ་ཐེབས་པ་ཙམ་མིན་པར་དགག་བཞག་སྤོང་གསུམ་གྱི་ཐོག་ནས་འགྲོ་སྟངས་དེ་འདྲ་ཞིག་ཡོད། གཞན་ལུགས་དགག་པ། རང་ལུགས་བཞག་པ། དེར་རྩོད་པ་སྤོང་བ་དེ་ལྟར་རེད། དེ་དག་ཡོངས་རྫོགས་རིག་ལམ་ཐོག་ནས་འགྲོ་དགོས་པ་ཞིག་རེད། ལུང་ཙམ་ལ་བརྟེན་ནས་ཡོང་ཡག་མེད། གང་ལྟར་བོད་གངས་ཅན་གྱི་ལྗོངས་ལ་མཁན་ཆེན་ཞི་བ་འཚོ། སློབ་དཔོན་ཀ་མ་ལ་ཤཱི་ལ་དངོས་སུ་བོད་ལ་ཕེབས། དེ་དག་གི་ཐུགས་རྗེའི་བཀའ་དྲིན་ལ་བརྟེན་ནས་ད་ལྟར་བོད་གངས་ཅན་ལ་རིག་གནས་དེ་དག་གྲས་ཤུགས་ཆེན་པོ་བྱས་ནས་འཛིན་བཞིན་ཡོད། ང་ཚོ་བོད་རིགས་ངོས་ནས་སེམས་ཁམས་རིག་པ་དང་ཚད་མ་རིག་པ་ལོ་སྟོང་གི་རིང་ང་ཚོས་བདག་པོ་བརྒྱབ་ནས་གཅེས་སྤྲས་བྱས་ནས་ཉར་བ་དེ་དག་སྤྱིར་འཛམ་གླིང་འདིའི་སྒང་ལ་ལེགས་སྐྱེས་ཕུལ་ཐུབ་ཀྱི་རེད་བསམ་པའི་ཚོད་དཔག་བྱེད་ཐུབ་བཞིན་ཡོད། བྱེ་བྲག་ཏུ་ང་ཚོའི་ཧི་མཱ་ལ་ཡི་ས་ཁུལ་དེ་དག་ལོ་རྒྱུས་ཐོག་ནས་བོད་པའི་རིག་གཞུང་དེ་དག་འབྲེལ་བ་ཡོད་པ་རེད། ཁྱེད་ཚོས་དེར་དོ་སྣང་བྱས་ནས་ཡོད། དེང་སྐབས་ངོས་ཀྱིས་རྒྱ་གར་གྱི་གནའ་རབས་ཀྱི་ཤེས་ཡོན་སེམས་ཁམས་རིག་པ་རེད། སེམས་ཁམས་རིག་པ་ཤེས་པའི་ཐོག་ནས་སེམས་ལ་སྒྱུར་བཅོས་གཏོང་རྒྱུ། གང་ལྟར་རང་གཞན་ལ་གནོད་པ་འདྲེན་མཁན་གྱི་ emotion དེ་ཚོའི་གྲས་སྨོན་ལམ་བརྒྱབ་ནས་མེད་པ་ཆགས་མི་ཐུབ། འདོད་པ་ཙམ་གྱིས་མེད་པ་ཆགས་མི་ཐུབ། རྒྱུ་མཚན་ལ་བསམ་བློ་བཏང་ནས་རྣམ་རྟོག་འདྲ་མིན་ཡོད་པ་དེ་དག་ལས་རྣམ་རྟོག་གང་དང་གང་གིས་ང་ཚོར་ཕན་གྱི་འདུག རྣམ་རྟོག་གང་དང་གང་གིས་ང་ཚོར་གནོད་ཀྱི་འདུག་དེ་དག་དབྱེ་འབྱེད་བཏང་ནས་བློའི་འགྲོ་སྟངསདཔེར་ན་བྱམས་པ་དང་བརྩེ་བ། བཟོད་པ་ལ་སོགས་པ་དེ་ཚོའི་གྲས་སྐྱེ་བ་ཕྱི་མའི་སྐད་ཆ་མ་རེད། ཐར་པ་དང་ཐམས་ཅད་མཁྱེན་པའི་སྐད་ཆ་མིན། མི་ཚེ་འདི་རང་དུ་སེམས་ནང་ཞི་བདེ་ཡོང་ཡག ཕན་ཐོགས་ཡོང་བ་ཞིག་རེད། ཞེ་སྡང་དང་ཕྲག་དོག ང་རྒྱལ། ང་རྒྱལ་དང་སྤོབས་པ་དབྱེ་བ་འབྱེད་དགོས། སོ་སོས་གང་ཙམ་སྦྱངས་ནས་ཐོས་བསམ་སྒོམ་གསུམ་དང་འབྲེལ་བའི་ཐོག་ནས་གང་ཙམ་ཚོད་ཐིག་པོ་ཞིག་དང་རྒྱུས་ཡོད་པའི་ཐོག་ནས་སྤོབས་པ་བྱེད་དགོས་པ་ཆགས་ཀྱི་ཡོད། རྒྱུ་མཚན་ལྡན་པའི་ཐོག་ནས་ངས་དེ་བྱེད་ཐུབ་རྒྱུ་རེད་བསམ་པའི་བསམ་བློ་དེ་སྤོབས་པ་རེད་”ཅེས་བཀའ་སློབ་གནང་།

༧གོང་ས་མཆོག་གིས་མུ་མཐུད་དབྱར་ཆོས་དང་འབྲེལ་ནས་གསུང་དོན། “ང་ཚོས་དབྱར་ཆོས་ཚོགས་པ་རེད་ཟེར་ནས་རྟགས་གསལ་ཏོག་ཙམ་ཞིག་བཏང་། བགྲོ་གླེང་ཏོག་ཙམ་བྱས་པ་དེ་ཙམ་མིན་པར་གང་ལྟར་མང་ཚོགས་ལ་ཕན་ཐོགས་བྱེད་ཐུབ་པ་དང་། ལྷག་པར་ཤེས་ཡོན་ཐོག་ལ་ཡར་རྒྱས་གཏོང་ཆེད་ཐབས་ལམ་གང་འདྲ་འདུག་དེ་དག་ཐོག་བསམ་བློ་གཏོང་དགོས། དེ་རིང་འདིར་ཁྱིམ་པ་ཚོས་རྟགས་གསལ་བཏང་བ་དེ་ཧ་ཅང་ཡག་པོ་རེད། རྟགས་གསལ་གཏོང་སྐབས་སྐྱབས་འགྲོའི་སྐོར་བཏང་སོང་། འབྲེལ་ཡོད་རེད། ཡག་པོའང་རེད། ངོས་རང་ལ་མཚོན་ན་དབྱར་ཆོས་འཚོགས་སྐབས་བློ་རིག་དང་རྟགས་རིག་སྒང་ལ་རྟགས་གསལ་གཏང་ཐུབ་ན་ཡག་པོ་ཡོད། གོང་དུ་བརྗོད་པ་ལྟར་སེམས་ཁམས་རིག་པ་དང་ཚད་མ་རིག་པ་བཤད་ཀྱི་ཡོད། རྒྱུད་བླ་མ་ནས་གསུང་པའི་སངས་རྒྱས་དང་ཆོས་དགེ་འདུན་དཀོན་མཆོག་དེ་དག་ནང་པ་རང་གི་ཐོག་ནས་འགྲོ་བཞིན་ཡོད། ངོས་ཀྱིས་ནང་ཆོས་ཡག་ཤོས་རེད་རྩ་བ་ནས་ཟེར་གྱི་མེད། ཆོས་ཟེར་བ་དེ་སྒེར་སོ་སོའི་ཁམས་དང་མོས་པར་བསྟུན་ནས་འགྲོ་རྒྱུ་མ་གཏོགས་མི་གཅིག་གིས་ཆོས་འདི་ཡག་ཤོས་རེད། ཅེས་བརྗོད་ཐུབ་པ་མེད། བཅོམ་ལྡན་འདས་ལ་མཚོན་ནའང་ཉན་ཐོས་དང་རང་རྒྱལ། བྱང་སེམས་ཐེགས་པ་བཅས་ཐེགས་པ་རིམ་པ་གསུམ་གསུང་པ་དེ་དག་འདུལ་བྱའི་སྙིང་སྟོབས་ཆེ་ཆུང་དང་ཁམས་དང་མོས་པའི་ཁྱད་པར་ལ་བརྟེན་ནས་གསུང་ཡོད། ལྷག་པར་ལྟ་གྲུབ་སྐོར་བསླེབས་སྐབས་ཆོས་ཀྱི་བདག་མེད་འདོད་མཁན་དང་མི་འདོད་མཁན། ཆོས་ཀྱི་བདག་མེད་འདོད་མཁན་ནང་དུ་ཡིན་ནའང་རྣམ་རིག་པ་དང་དབུ་མ་པ་དེ་ཚོ་འདུལ་བྱའི་ཁམས་དང་མོས་པ་མི་འདྲ་བ་ཡོད་པར་བརྟེན་གསུང་ཡོད། དེར་བརྟེན་འཛམ་གླིང་ནང་གི་མི་དུང་ཕྱུར་བདུན་བཅུ་ཙམ་ཡོད་པ་དེ་དག་ནང་པ་བྱེད་དགོས། ཞེས་བརྗོད་ཐུབ་ཐབས་རྩ་བ་ནས་མེད། ངོས་ཀྱིས་ནང་ཆོས་སྤེལ་རྒྱུའི་བསམ་བློ་རྩ་བ་ནས་གཏང་གི་མེད། ནང་པ་ཡག་ཤོས་རེད་ཟེར་གྱི་མེད། ཆོས་འདི་སྨན་ལྟ་བུ་རེད། སྨན་གཅིག་ཡར་བསྒྲུགས་ནས་སྨན་འདི་ཡག་ཤོས་རེད། ཅེས་བརྗོད་ཐུབ་ཐབས་མེད། ནད་པའི་གཟུགས་པོའི་གནས་སྟངས། ལོ་སོགས་གནས་སྟངས་མང་པོ་ཞིག་ལ་བསྟུན་ནས་ནད་པ་དེ་ལ་སྨན་འདི་ཡག་ཤོས་རེད། ཅེས་བརྗོད་ཐུབ་རྒྱུ་མ་གཏོགས། སྤྱི་ཡོངས་ནས་སྨན་འདི་ཡག་ཤོས་རེད་ཅེས་བརྗོད་ཐུབ་ཐབས་བྲལ། འདི་དང་ཕྱོགས་མཚུངས་ཆོས་ལུགས་ཚང་མའི་ནང་ནས་ནང་པ་ཡག་ཤོས་རེད་རྩ་བ་ནས་བརྗོད་མི་ཐུབ་”ཅེས་བཀའ་སློབ་ལམ་སྟོན་གནང་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

 

 

Share this:
༦༠༢ ཀློག་གྲངས།