གྷུ་གྷལ་གྱིས་རྒྱ་ནག་གི་ཞིབ་བཤེར་ཁྲིམས་དང་མཐུན་པའི་འཚོལ་ཞིབ་མ་ལག་བཟོ་འཆར།

རྒྱལ་སྤྱིའི་ནང་འཚོལ་ཞིབ་མ་ལག་ཁྱབ་ཆེ་ཤོས་གྷུ་གྷལ་(GOOGLE) གྱིས། རྒྱ་ནག་གི་དྲ་རྒྱའི་ཁྲོམ་རའི་ནང་ཁེ་བཟང་ཡོང་ཆེད་དུ། རྒྱ་ནག་གི་ཞིབ་བཤེར་ཁྲིམས་དང་མཐུན་པའི་འཚོལ་ཞིབ་མ་ལག་ཐོན་མི་འདྲ་བ་ཞིག་བཟོ་བཞིན་ཡོད་པའི་གནས་ཚུལ་འདུག་ཀྱང་། ཚོང་ལས་ཁང་གིས་གནས་ཚུལ་དེ་བདེན་པ་ཡིན་པ་ངོས་ལེན་བྱས་མི་འདུག

ཟླ་༨ པའི་ཚེས་༣ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཉེ་ཆར་དྲ་ཐོག་བརྒྱུད་ལམ་ཞིག་གིས་གྷུ་གྷལ་ཚོང་ལས་ཁང་གིས། རྒྱ་ནག་ནང་བཀོལ་སྤྱོད་བྱེད་ཐུབ་པའི་འཚོལ་ཞིབ་མ་ལག་ཐོན་གཞན་པ་ཞིག་བཟོ་བཞིན་ཡོད་པ་དང་། དེ་ཡང་རྒྱ་ནག་གི་ཞིབ་བཤེར་ཁྲིམས་དང་མཐུན་པའི་ཐོག དེའི་ནང་འགྲོ་བ་མིའི་ཐོབ་ཐང་དང་གནམ་སྡེ་སྒོ་མོ་ཐང་ཆེན་གྱི་མང་གཙོའི་ལས་འགུལ་སོགས་རྒྱ་ནག་གཞུང་ལ་སེམས་ཚོར་རྣོན་པོ་ཡོད་པའི་གནད་དོན་རྣམས་རྙེད་རྒྱུ་མེད་པ་བྱ་རྒྱུ་ཡིན་པའི་གནས་ཚུལ་བཏོན་ཡོད་འདུག

དེ་ཡང་བརྒྱུད་ལམ་དེ་ལ་གྷུ་གྷལ་ཚོང་ལས་ཁང་གི་ནང་ཁུལ་ཡིག་ཆ་ཞིག་དང་གནས་ཚུལ་མཁོ་སྤྲོད་བྱེད་མཁན་ལས་བྱེད་ཡོད་འདུག་པ་དང་། གྷུ་གྷལ་གྱིས་ཕྱི་ལོ་༢༠༡༧ ལོའི་དཔྱིད་ཀ་ནས་ལས་གཞི་དེ་འགོ་འཛུགས་བྱས་ཡོད་འདུག་པ་དང་། ལོ་དེའི་ཟླ་༡༢ པའི་ནང་ཚོང་ལས་ཁང་གི་སྤྱི་ཁྱབ་འགན་འཛིན་རྒྱ་ནག་གཞུང་གི་ལས་བྱེད་ཅིག་དང་ཐུག་རྗེས། ལས་གཞི་དེ་མགྱོགས་ཏུ་བཏང་ཡོད་འདུག གནད་དོན་དེ་རྒྱལ་སྤྱིའི་བརྒྱུད་ལམ་གཞན་གཉིས་ལ་གནས་ཚུལ་མཁོ་སྤྲོད་པ་ཁག་ཅིག་གིས་བདེན་པ་ར་སྤྲོད་བྱས་ཡོད་འདུག་ཀྱང་། ཚོང་ལས་ཁང་གིས་ངོས་ལེན་བྱས་མི་འདུག

ཕྱི་ལོ་༢༠༡༦ ལོར་གྷུ་གྷལ་གྱི་སྤྱི་ཁྱབ་འགན་འཛིན་གྱིས་གྷུ་གྷལ་འཚོལ་ཞིབ་མ་ལག་དེ་ནི་མི་ཚང་མའི་ཆེད་དུ་ཡིན་པས། རྒྱ་ནག་ནང་དྲ་རྒྱལ་བཀོལ་སྤྱོད་བ་རྣམས་ལ་ཡང་ཞབས་ཞུ་སྒྲུབ་རྒྱུའི་འདོད་པ་ཡོད་སྐོར་བརྗོད་ནས། དམིགས་ཡུལ་གསལ་སྟོན་བྱས་ཡོད་འདུག འོན་ཀྱང་ཐེངས་འདིའི་གནད་དོན་ཐད་ཚོང་ལས་ཁང་དེའི་མགྲིན་ཚབ་པས་བརྒྱུད་ལམ་ཁག་ཏུ། ཁོ་ཚོའི་མ་འོངས་པའི་ལས་འཆར་ཐོག་ལ་གཞན་གྱིས་ཚོད་དཔག་བྱས་པའི་གནད་དོན་ཐད་བཤད་རྒྱུ་གང་ཡང་མེད་སྐོར་བརྗོད་འདུག

འོན་ཀྱང་གསང་བའི་ཐོག་ནས་བརྒྱུད་ལམ་ཁག་ཏུ་གནས་ཚུལ་མཁོ་སྤྲོད་བྱེད་མཁན་ཚོང་ལས་ཁང་དེའི་ལས་བྱེད་ཁག་ཅིག་གིས། རང་ཉིད་ལས་གཞི་དེ་ལ་ལས་ཀ་བྱེད་འདོད་མེད་པས་སྡེ་ཚན་གཞན་ལ་ལས་སྤོ་བྱས་སྐོར་དང་། ཚོང་ལས་ཁང་ནང་ལས་བྱེད་མང་པོ་ཞིག་ལས་གཞི་དེ་ལ་བརྟེན་ནས་སེམས་འཚབ་དང་ཁོང་ཁྲོ་བྱེད་ཀྱི་ཡོད་སྐོར་བརྗོད་འདུག

རྒྱལ་སྤྱིའི་ཉེས་ཡངས་ཚོགས་པའི་རྒྱ་ནག་གི་ཞིབ་འཇུག་པས། གལ་ཏེ་གྷུ་གྷལ་གྱིས་ཁྲོམ་རའི་ཆེད་དུ་རྒྱ་ནག་གི་ཞིབ་བཤེར་ཁྲིམས་ཁས་ལེན་བྱས་ཚེ། དེ་ནི་དྲ་རྒྱའི་རང་དབང་ལ་མུན་ནག་གི་ཉིན་མོ་ཞིག་ཡིན་པ་དང་། གལ་ཏེ་ཁེ་བཟང་དེ་འགྲོ་བ་མིའི་ཐོབ་ཐང་ལ་གལ་ཆེ་བ་བརྩིས་ཚེ། གྷུ་གྷལ་གྱིས་སེམས་འཚབ་སྐྱེ་འོས་པའི་བྱ་སྤྱོད་ཀྱི་བརྒྱུད་རིམ་ཞིག་འགོ་འཛུགས་བྱས་ཡོད་པ་དང་། རྒྱ་ནག་གཞུང་ལ་རྒྱལ་ཁ་སྤྲད་པ་ཡིན་སྐོར་བརྗོད་འདུག

རྒྱ་ནག་གཞུང་འབྲེལ་བརྒྱུད་ལམ་ཐོག་ཏུ་གྷུ་གྷལ་འཚོལ་ཞིབ་མ་ལག་རྒྱ་ནག་ནང་བསྐྱར་དུ་བཀོལ་སྤྱོད་བྱེད་རྒྱུ་ཡོང་སྲིད་པའི་གནས་ཚུལ་དེ་བདེན་པ་མིན་སྐོར་བརྗོད་འདུག་པ་དང་། གཞུང་གི་ལས་བྱེད་ཅིག་གིས་གྷུ་གྷལ་གྱིས་གནད་དོན་དེའི་ཐད་རྒྱ་ནག་གཞུང་དང་འབྲེལ་བ་བྱེད་ཀྱི་ཡོད་ཀྱང་། ད་ལྟའི་ཆར་ལས་གཞི་དེར་ཆོག་མཆན་ཐོབ་མེད་སྐོར་བརྗོད་འདུག

ཕྱི་ལོ་༢༠༡༠ ལོར་གྷུ་གྷལ་གྱིས་རྒྱ་ནག་ནང་དུ་སྨྲ་བརྗོད་རང་དབང་ཚད་བཀག་བཟོ་ཡི་ཡོད་སྐོར་བརྗོད་ནས། འཚོལ་ཞིབ་མ་ལག་དེ་རྒྱ་ནག་ནས་ཕྱིར་འཐེན་བྱས་ཡོད་ཀྱང་། ད་ལྟའི་ཆར་རྒྱལ་སྤྱིའི་ནང་དྲ་རྒྱའི་ཁྲོམ་ར་ཆེ་ཤོས་དེ་རྒྱ་ནག་ཆགས་ཀྱི་ཡོད་པས། གྷུ་གྷལ་གྱིས་རྒྱ་ནག་གི་ཞིབ་བཤེར་ཁྲིམས་དང་མཐུན་པའི་འཚོལ་ཞིབ་མ་ལག་ཐོན་གཞན་ཞིག་བཟོ་བཞིན་ཡོད་པའི་གནས་ཚུལ་ཐོན་འདུག་པ་དང་། དེ་སྔོན་ངོ་དེབ་ཚོང་ལས་ཁང་གིས་ཀྱང་རྒྱ་ནག་ནང་བཀོལ་སྤྱོད་ཡོང་ཐབས་བྱེད་ཀྱི་ཡོད་པའི་གནས་ཚུལ་ཐོན་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།

Share this:
༦༨ ཀློག་གྲངས།