དབུ་མའི་ལམ་ལ་ལྟ་སྟངས་མི་འདྲ་བ་ཁག་བཞིའི་སྒོ་ནས་ལྟ་དགོས། 

ཟླ་འདིའི་ཚེས་༢༧ ནས་ཉིན་གསུམ་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་གྱི་ལས་འཆར་གོ་སྒྲིག་ཚན་པའི་གོ་སྒྲིག་འོག རྡ་སའི་ཉེ་འཁྲིས་སུ་ཡོད་པའི་འཛིན་སྐྱོང་སྦྱོང་བརྡར་ཁང་དུ་གཞུང་འབྲེལ་མིན་པའི་ཚོགས་པ་ཁག་ཅིག་གི་དབུས་ས་གཉིས་ཀྱི་ཚོགས་མི་རྣམས་ལ་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་སྟངས་སྐོར་ཟབ་ཁྲིད་པ་ཚོར་ཟབ་སྦྱོང་སྤྲད་ཡོད་པ་རེད།

ཟབ་སྦྱོང་དབུ་འབྱེད་ཀྱི་མཛད་སྒོའི་ཐོག སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་དང་། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ། དྲིལ་བསྒྲགས་དྲུང་ཆེའི་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་སོགས་ཕེབས་ཡོད་པ་རེད། དེ་བཞིན་བོད་ཀྱི་བུད་མེད་ལྷན་ཚོགས་དང་། རྒྱལ་སྤྱི་དབུ་མའི་ལམ་མི་མང་ལས་འགུལ་ཚོགས་པ། ཆིག་སྒྲིལ་ཚོགས་པ། མདོ་སྟོད། མངའ་རིས་ཚོགས་པ་བཅས་དང་། གཞན་ཡང་ཕྱི་དྲིལ་ལས་ཁུངས་ནས་ལས་བྱེད་༥ བཅས་ཁྱོན་མི་གྲངས་༢༩ ཚོགས་ཞུགས་བྱས་ཡོད་པ་རེད། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུས་དབུ་མའི་ལམ་གྱི་ངོ་བོ་དང་བྱུང་རིམ། ཐབས་ལམ་སོགས་ཀྱི་སྐོར་ལ་གསུང་བཤད་གནང་ཡོད་པ་རེད།

སྲིད་སྐྱོང་བློ་བཟང་སེང་གེས་གསུང་བཤད་གནང་དོན། “བོད་མིའི་སྒྲིག་འཛུགས་ནས་བཙན་བྱོལ་བོད་མིའི་གཞིས་ཆགས་ཁག་དང་མི་མང་རྣམས་ལ་བཀོད་ཁྱབ་དང་ལམ་སྟོན་ཇི་འདྲ་ཞིག་གནང་ཡང་། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་དང་། བོད་མིའི་སྒྲིག་འཛུགས་ཀྱི་བཀའ་གསུང་དང་ལེན་ཞུ་བཞིན་ཡོད་བསམ་པའི་ལྷག་བསམ་གྱིས་བསྐུལ་ནས་ཕྱག་ལས་གནང་མཁན་ཤ་སྟག་རེད།  དེར་བརྟེན་ང་རང་ཉིད་ལ་མཚོན་ན་དེ་རིང་འདིར་ཡོང་དགོས་དོན་གཙོ་བོ་ནི་ཟབ་སྦྱོང་དབུ་འབྱེད་དང་ཚོགས་བཅར་བ་ཡོངས་ལ་འཚམས་འདྲི་ཞུ་རྒྱུའི་སླད་ཡིན། རྣམ་པ་ཚོ་འདིར་བདེ་ཐང་ངང་འབྱོར་བ་ཧ་ཅང་དགའ་པོ་བྱུང་། གོང་དུ་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་ལོ་རྒྱུས་ཐོག་ནས་དབུ་མའི་ལམ་ཇི་ལྟར་གལ་ཆེན་པོ་ཡིན་སྐོར་དང་། རྒྱ་ནག་དང་ལྷན་འབྲེལ་བ་ཆགས་སྟངས་སྐོར་སོགས་གསུང་གནང་སོང་། སྤྱི་ཡོངས་ནས་དབུ་མའི་ལམ་ཞེས་པ་གང་འདྲ་ཞིག་ཡིན་པའི་སྐོར་དང་། དབུ་མའི་ལམ་གྱི་སྲིད་བྱུས་དང་ཐབས་བྱུས་ཞེས་ག་འདྲ་ཟེར་དགོས་མིན། བཀའ་ཤག་སྐབས་༡༤ དང་སྐབས་༡༥ ནང་གང་དང་གང་གནང་ཡོད་པའི་སྐོར། རྒྱལ་སྤྱིའི་ཐོག་ནས་ག་འདྲ་ཆགས་ཡོད་མེད་སོགས་ཀྱི་སྐོར་ཞུ་རྒྱུ་ཡིན་”ཞེས་གསུངས་ཡོད་པ་རེད།

སྲིད་སྐྱོང་གིས་མུ་མཐུད་གསུང་དོན། “བཀའ་ཤག་སྐབས་༡༤ པའི་ཕྱི་ལོ་༢༠༡༤ ཟླ་༦ དང་༧ ནང་པར་སྐྲུན་གནང་བའི་དཔེ་དེབ་ནང་ཞིབ་ཕྲ་འཁོད་ཡོད། དབུ་མའི་ལམ་གྱི་སྲིད་བྱུས་སྐོར་གཙོ་ཆེ་ཤོས་ནི། དང་པོ་དུས་རྒྱུན་དུ་རྒྱ་ནག་གཞུང་གིས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་ཁྲིད་པའི་བཙན་བྱོལ་གཞུང་དེ་ཁ་བྲལ་བ་རེད། རྒྱ་ནག་དང་ཁ་བྲལ་བའི་སྲིད་བྱུས་ཡོད་པ་རེད་ཅེས་སྐྱོན་བརྗོད་ཤུགས་ཆེ་བྱེད་ཀྱི་ཡོད། དེ་སྔ་ནས་དེའི་ཐོག་ཁ་མཆུ་རྒྱག་བཞིན་ཡོད། རྒྱལ་སྤྱིའི་ཐོག་ནས་ང་ཚོར་དམ་དྲག་ཤུགས་ཆེ་ཡོད། དཔེར་ན། ལྷོ་ཨ་ཧྥི་རི་ཀའི་ནང་འགྲོ་རྒྱུའི་ཐད་དཀའ་ངལ་ཡོད་པ་མ་ཟད། ཨེ་ཤེ་ཡའི་ནང་ཡོད་པའི་ནང་པའི་རྒྱལ་ཁབ་ཁག་ཏུ་འགྲོ་རྒྱུར་ཡང་དཀའ་ངལ་ཡོད། ཡུལ་ལུང་དེ་དག་གི་ནང་ཕེབས་མི་ཐུབ་པའི་རྒྱུ་མཚན་གཙོ་བོ་རྒྱ་ནག་གཞུང་གིས་ང་ཚོ་ཁ་བྲལ་བ་རེད། རང་བཙན་རྩོད་ཀྱི་ཡོད་རེད་ཅེས་བཤད་ཀྱི་ཡོད། དབུ་མའི་ལམ་གྱི་སྲིད་བྱུས་ཐོག་ནས་ང་ཚོ་རྒྱ་ནག་གཞུང་གི་བདག་དབང་དང་རྒྱལ་ཁབ་ཁ་བྲལ་གྱི་ལས་འགུལ་སྤེལ་གྱི་མེད། དབུ་མའི་ལམ་གྱི་སྲིད་བྱུས་ཐོག་ནས་བོད་མི་རྣམས་ལ་རྒྱ་ནག་གི་རྩ་ཁྲིམས་གཞིར་བཞག་པའི་ཐོག་ནས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་དགོས་ཀྱི་ཡོད། དབུ་མའི་ལམ་ལ་ལྟ་སྟངས་མི་འདྲ་བ་ཁག་བཞིའི་སྒོ་ནས་ལྟ་དགོས། དང་པོ་རྒྱ་ནག་གཞུང་གི་སྐུ་ཚབ་དང་ལྷན་དུ་བོད་རྒྱ་གྲོས་མོལ་བྱ་རྒྱུ་ནི་གཙོ་ཆེ་ཤོས་རེད། གཉིས་པ་བཙན་བྱོལ་བོད་མིའི་སྒྲིག་འཛུགས་གནས་ས་དེ་རྒྱ་གར་ཆགས་ཡོད། རྒྱ་གར་གཞུང་མང་གཉིས་ལས་ལྷག་པའི་བཀའ་དྲིན་ཆེ་བ་མེད། རྒྱ་གར་ནང་བཙན་བྱོལ་བོད་མིའི་སྒྲིག་འཛུགས་ཀྱི་གཞུང་འཛུགས་ཐུབ་པ་ལས་ལུང་པ་གཞན་དུ་འཛུགས་ཐུབ་རྒྱུ་ཁག་པོ་རེད་བསམ་གྱི་འདུག སྐྱབས་བཅོལ་བ་ས་ཡ་དྲུག་བཅུའི་ནང་ནས་བཙན་བྱོལ་བོད་མི་རྣམས་ཚགས་ཚུད་ཤོས་རེད། རྒྱལ་ཁབ་ཡོད་པའི་ལུང་པའི་གནས་སྟངས་ལས་ང་ཚོས་བོད་མིའི་སྒྲིག་འཛུགས་ཀྱི་གནས་སྟངས་ཡག་པ་ཡོད་ཅེས་བརྗོད་ཆོག གཙོ་ཆེ་ཤོས་སྤྱི་ནོར་༸གོང་ས་༸སྐྱབས་མོགན་ཆེན་པོ་མཆོག་གིས་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་ཡིན་པ་དང་། དེ་སྔ་སྲི་ཞུ་བ་རྒན་པ་རྣམས་ཀྱི་སྐུ་ལས་བསྐྱོན་པ་ལ་བརྟེན་ནས་བྱུང་བ་ཞིག་ཡིན། མི་ཐོག་རྒན་པ་རྣམས་ཀྱིས་ཧ་ལས་པའི་སྐུ་ལས་བསྐྱོན་ཡོད། ང་ཚོའི་དབུ་མའི་ལམ་གྱི་སྲིད་བྱུས་ལ་བརྟེན་ནས་རྒྱ་གར་གཞུང་ལ་ཡིན་ནའང་རྒྱ་ནག་དང་འབྲེལ་ལམ་གནང་སྐབས་དོ་ཕོག་མི་འགྲོ་བར་ཧ་ལས་པ་ཕན་གྱི་ཡོད། གསུམ་པ་རྒྱལ་སྤྱིའི་ཐོག་ནས་དབུ་མའི་ལམ་གྱི་སྲིད་བྱུས་ལ་བརྟེན་ནས་ང་ཚོས་རྒྱལ་སྤྱིའི་སྟེང་བོད་དོན་ལས་འགུལ་སྤེལ་རྒྱུའི་སྡིངས་ཆ་སྐྲུན་པ་བརྒྱུད་རྒྱབ་སྐྱོར་ཤུགས་ཆེ་ཐོབ་བཞིན་ཡོད། དཔེར་ན། ཨ་རིའི་སྲིད་འཛིན་ཟུར་པ་ཨོ་བྷ་མ་མཆོག་གིས་ཕྱི་ལོ་༢༠༡༦ ལོར་ཨ་རིའི་སྲིད་འཛིན་གྱི་ཕོ་བྲང་དཀར་པོའི་གསར་འགོད་གསལ་བསྒྲགས་སྐབས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་སྔགས་བརྗོད་ཀྱང་གནང་ཡོད། བཞི་པ། དབུ་མའི་ལམ་གྱི་སྲིད་བྱུས་ཐོག་ནས་བོད་ནང་གི་བོད་མིའི་མངོན་འདོད་སྒྲུབ་རྒྱུ་དེ་ཡིན་”ཞེས་གསུངས་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

Share this:
༨ ཀློག་གྲངས།