མང་གཙོའི་དུས་ཆེན་ཐེངས་༥༨ པའི་གཞུང་འབྲེལ་མཛད་

མང་ཚོགས་ལ་མང་གཙོའི་གོ་རྟོགས་ཞན་པར་བརྟེན་མང་གཙོའི་རང་དབང་དང་ཐོབ་ཐང་ལ་བསྙད་དེ་བོད་མི་ནང་ཁུལ་གྱི་མཐུན་ལམ་ལ་དོ་ཕོགས་འགྲོ་གཞིའི་རིགས་ཡོང་བཞིན་འདུག་པ་ནི་བློ་ཕམ་གྱི་རང་བཞིན་ལས་མ་འདས། དེའི་ཁར་རྒྱ་ནག་གཞུང་དང་དེའི་སོ་ཉུལ་བ་ཚོ་བོད་མིའི་སྤྱི་ཚོགས་ནང་འཛུལ་ཏེ་ཆིག་བསྒྲིལ་ལ་གནོད་སྐྱོན་གཏོང་ཐབས་བྱེད་བཞིན་ཡོད་པར་ཚང་མས་སྤྱང་གྲུང་དང་ཡིད་གཟབ་བྱེད་དགོས། ང་ཚོ་བོད་མི་ནང་ཁུལ་མཐུན་ལམ་རྡོག་རྩ་གཅིག་སྒྲིལ་བྱེད་རྒྱུ་ནི་ང་ཚོའི་འཐབ་རྩོད་ཀྱི་མ་རྩ་དང་སྟོབས་ཤུགས་གལ་ཆེ་ཤོས་ཤིག་ཡིན། ཞེས་སྲིད་སྐྱོང་བློ་བཟང་སེང་གེས་མང་གཙོའི་དུས་ཆེན་ཐེངས་༥༨ པའི་ཐོག་གསུངས་སོང་།

ཟླ་འདིའི་ཕྱི་ཚེས་༢ ཉིན་གྱི་སྔ་དྲོ་ཆུ་ཚོད་༡༠ པའི་ཐོག་དྷ་ས་མེག་གྷན་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་མང་གཙོའི་དུས་ཆེན་ཐེངས་༥༨ པའི་གཞུང་འབྲེལ་མཛད་སྒོ་སྲུང་བརྩི་གནང་སོང་ཞིང་། མཛད་སྒོའི་ཐོག་སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཀུན་ཝར་བྷ་ར་ཏེན་ཌར་སིན་(Kunwar Bharatendra Signh)དང་། སྲིད་སྐྱོང་བློ་བཟང་སེང་གེ། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ། ཁྲིམས་ཞིབ་པ་ཆོས་ཁྲི་སྟེང་པ་ངག་དབང་ཆོས་གྲགས་གསུམ་གྱིས་དབུས་པའི་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྲི་ཞུའི་ལས་བྱེད་རྣམས།  གཞན་ཡང་སེར་སྐྱ་མང་ཚོགས་དང་སློབ་གྲྭ་ཁག་གི་སློབ་མ་རྣམས་བཅས་འཛོམས་འདུག་པ་དང་། སྐབས་དེར་བོད་གཞུང་ཟློས་གར་ཚོགས་པ་དང་དྷ་ས་ཁུལ་གྱི་སློབ་གྲྭ་ཁག་ནས་གཞས་སྣ་འདྲ་མིན་ཁག་འཁྲབ་སྟོན་གཟིགས་འབུལ་ཞུས་སོང་།

མཛད་སྒོའི་ཐོག་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་བོད་མི་མང་སྤྱི་ལྷན་གྱི་གསུང་བཤད་སྒྲོག་སྦྱང་གནང་བའི་ནང་མང་གཙོའི་དུས་ཆེན་དང་འབྲེལ་ནས་གསུང་དོན་དུ་“དེ་རིང་གི་ཉིན་མོ་འདི་ནི་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་མི་མང་ཚོགས་ལ་མང་གཙོའི་ལམ་ལུགས་གསོལ་བསྩལ་གནང་བར་བཀའ་དྲིན་རྗེས་དྲན་དང་བོད་ཀྱི་ལོ་རྒྱུས་ནང་ཉིན་མོ་གལ་ཆེན་ཞིག་ཆགས་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་སྐུ་ན་ཕྲ་དུས་ནས་བོད་ཀྱི་སྤྱི་ཚོགས་ལམ་སྲོལ་ལ་དུས་དང་འཚམས་པའི་སྒྱུར་བཅོས་དགོས་གལ་གཟིགས་ཏེ་བོད་རྒྱལ་ཁབ་ཆེན་པོའི་ལུགས་གཉིས་ཀྱི་ཐུགས་འགན་བདག་གིར་བཞེས་རྗེས་ཕྱི་ལོ་༡༩༥༢ ལོར་ལེགས་བཅོས་ལས་ཁུངས་ཟུར་འཛུགས་དང་། ཕྱི་ལོ་༡༩༥༤ ལོའི་ལོ་མཇུག་ཏུ་ལྷ་སར་གྱོད་ཞིབ་ལས་ཁུངས་ཆེད་འཛུགས་མཛད་པ་སོགས་བོད་ཀྱི་ཆབ་སྲིད་ཀྱི་ལམ་ལུགས་རྙིང་པར་བཅོས་སྒྲིག་ཚུལ་བཞིན་མཛད་པའི་རྨད་བྱུང་ཐུགས་བསྐྱེད་ཟབ་མོའི་རླབས་ཆེན་མཛད་བཟང་རིམ་པར་བསྐྱངས་པའི་ཐུགས་རྗེའི་གཟི་བྱིན་ཁོ་ནས་བོད་འབངས་རྣམས་ལ་བདེ་སྐྱིད་རྫོགས་ལྡན་གྱི་སྤྱི་ཚོགས་ཤིག་བསྐྲུན་རྒྱུའི་ཐུགས་བརྩོན་ཆེ་བསྐྱེད་གནང་བཞིན་པའི་སྐབས། སྟབས་མ་ལེགས་པར་ཕྱི་ལོ་༡༩༤༩ ལོར་ཙམ་ནས་འགོ་བཙུགས་པའི་རྒྱ་ནག་དམར་ཤོག་གི་དབང་ཤུགས་དང་དྲག་གནོན་བོད་ཁྱོན་ཡོངས་སུ་ཇེ་ཆེར་སོང་སྟེ་མཐར་བོད་ཆོས་ལྡན་གྱི་ཞིང་ཁམས་དེ་ཉིད་ཡོངས་སུ་བཙན་བཟུང་བྱས་ཏེ་ཕྱི་ལོ་༡༩༥༩ ལོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ནང་བཙན་བྱོལ་དུ་ཕེབས་དགོས་གྱུར་བ་དང་། གང་ཉིད་ཀྱི་ཞབས་རྗེས་སུ་བོད་མི་ཁྲི་ཚོ་བརྒྱད་ལྷག་བཙན་བྱོལ་དུ་འབྱོར། ༸གོང་ས་མཆོག་རྒྱ་གར་དུ་ཞབས་སོར་འཁོད་མ་ཐག་ཐུགས་བསྐྱེད་དང་མཛད་འགན་ཆེ་བཞེས་ཀྱིས་རྒྱ་གར་ནང་བོད་ཕྱི་ནང་གཉིས་ཀྱི་ངོ་ཚབ་ཡོངས་སུ་མཚོན་པའི་བཙན་བྱོལ་བོད་གཞུང་གི་སྒྲིག་འཛུགས་རྟེན་གཞི་གསར་འཛུགས་གནང་བ་དང་། རིམ་གྱིས་ཆབ་སྲིད་ཀྱི་ལམ་ལུགས་དེང་གི་མང་གཙོའི་ལམ་ལུགས་ལ་བསྒྱུར་གནང་མཛད་དེ་བོད་མི་མང་ཚོགས་ལ་ཡིད་ཆེས་བློས་མངགས་ཀྱིས་མང་གཙོ་གསོལ་རས་གནང་སྟེ་ཕྱི་ལོ་༡༩༦༠ ཟླ་༩ ཚེས་༢ ཉིན་ཆོས་ལུགས་དང་ཆོལ་ཁའི་བོད་མི་མང་སྤྱི་འཐུས་སྐབས་དང་པོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་སྔར་མཇལ་ཕྱག་དམ་འབུལ་ཞུས་པ་ནས་བོད་མིའི་མང་གཙོའི་ལམ་ལུགས་འདི་ཐོག་མར་དབུ་བརྙེས་པ་ཞིག་ཡིན།”ཞེས་གསུངས་སོང་།

དེ་བཞིན་ཁོང་གིས་“༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཆབ་སྲིད་ཀྱི་རང་བཞིན་མང་གཙོའི་ལམ་སྲོལ་གསར་གཏོད་མཛད་ཅིང་། བོད་མིའི་རང་དབང་འཐབ་རྩོད་ཀྱི་རང་བཞིན་འཚེ་མེད་ཞི་བའི་ཐབས་ལམ་ཁོ་ནར་བརྟེན་དགོས་པའི་ལམ་སྟོན་མཐའ་འཁྱོངས་མཛད་འབྲས་བོད་ཀྱི་བདེན་དོན་དང་བོད་མིར་འཛམ་གླིང་ཁྱོན་ཡོངས་ནས་རྒྱབ་སྐྱོར་ཐོབ་ཡོད་པ་མ་ཟད། རྒྱ་ནག་སྐམ་ས་ཆེན་པོའི་ཤེས་ཡོན་ཅན་དང་། བློ་གཟུ་བོར་གནས་པའི་རྒྱ་རིགས་མི་སྣ་མང་པོ་ནས་ཀྱང་རྒྱབ་སྐྱོར་འཐོབ་བཞིན་ཡོད། ཡང་སྒོས་༸གོང་ས་མཆོག་གི་དབུ་འཁྲིད་འོག་བོད་ཆོལ་གསུམ་གོང་བུ་གཅིག་ཏུ་བསྒྲིལ་ཏེ་ཆོལ་ཁ་དང་ཆོས་བརྒྱུད་དབྱེ་བ་མེད་པར་སྒྲིག་འཛུགས་འདྲ་མིན་ནང་ཚང་མ་འདྲ་མཉམ་དང་། མཉམ་གནས་ཀྱིས་རང་དབང་འཐབ་རྩོད་ཐོག་ནུས་པ་མཉམ་སྤུངས་བྱེད་བཞིན་པ་ནི་ང་ཚོས་དགའ་སྤོབས་བྱ་འོས་པ་ཞིག་ཏུ་གྱུར་ཡོད། དེར་བརྟེན་ད་རེས་ཀྱི་གོ་སྐབས་འདི་བརྒྱུད་ནས་བོད་མི་ཚང་མའི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་སྙིང་ཁོངས་རུས་པའི་གཏིང་ནས་ཐུགས་རྗེ་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་ཡིན།”གསུངས་སོང་བ་མ་ཟད། བཙན་བྱོལ་བོད་མིའི་མང་གཙོ་ནི་སྲིད་འཛིན་ལམ་ལུགས་དང་གྲོས་ཚོགས་ལམ་ལུགས་གཉིས་ཀའི་ཁྱད་ཆོས་ལྡན་པ་ཞིག་ཡིན་སྐོར་དང་། མང་གཙོའི་འཕེལ་རིམ། རྒྱ་ནག་དམར་གཞུང་གི་དབང་སྒྱུར་དང་བཙན་གནོན་འོག་ལྷག་པའི་བོད་ནང་གི་བོད་མིའི་དཀའ་སྡུག་དང་། རྒྱ་གཞུང་གིས་བོད་ཀྱི་ཆོས་རིག་གནས་ངོ་བོ་དང་བཅས་རྨེག་མེད་བཟོ་ཕྱིར་ད་བར་དུ་ལས་འགུལ་སྤེལ་བ་རྣམས་ཀྱི་སྐོར། འདི་ལོའི་ཕྱི་ཟླ་༧ ཚེས་༢༤ ནས་དབུ་འཛུགས་ཀྱིས་ཕྱི་ཚེས་༢༦ བར་ཨ་རིའི་རྒྱལ་ས་ཝ་ཤིང་ཊོན་དུ་ཨ་རིའི་ཕྱི་སྲིད་ལས་ཁུངས་ཀྱི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཆེས་མཐོའི་ཚོགས་འདུ་བསྐོང་ཚོགས་གནང་སྐབས། ཨ་རིའི་སྲིད་འཛིན་གཞོན་པ་མཱ་ཁལ་པཎ་སིས་བོད་འདི་རྒྱ་ནག་གི་འོག་ལ་ལོ་ངོ་༧༠ མིན་ཙམ་གྱི་རིང་ཆོས་དད་རང་དབང་ལ་རྡོག་རོལ་གཏོང་བའི་དཀའ་སྡུག་མྱངས་ཡོད་པ་རེད་ཅེས་གསུངས་ཏེ་རྒྱ་ནག་གཞུང་ལ་སྐྱོན་བརྗོད་གནང་བ་སོགསའཛམ་གླིང་གི་རྒྱལ་ཁབ་ཁག་དང་། རྒྱལ་སྤྱིའི་ཚོགས་སྡེ་ཁག་ནས་བོད་དོན་ལ་རྒྱབ་སྐྱོར་དང་རྒྱ་ནག་ལ་སྐྱོན་བརྗོད་བྱེད་བཞིན་ཡོད་སྐོར། གཞན་ཡང་ཁོང་གིས་“འདས་པའི་ལོ་ངོ་ ༤༠ ལྷག་ཙམ་རིང་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བཙན་བྱོལ་བོད་མིའི་སྒྲིག་འཛུགས་ཀྱི་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བ་གཞིར་བཟུང་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་ལག་བསྟར་རྒྱུན་འཁྱོང་གིས་བོད་རྒྱའི་དཀའ་རྙོག་གྲོས་མོལ་གྱི་ལམ་ནས་སེལ་ཐུབ་པའི་རེ་བ་དང་ཡིད་ཆེས་བྱེད་བཞིན་པ་དང་། རྒྱ་གཞུང་ནས་ཀྱང་རིམ་པས་བཟང་ཕྱོགས་ཀྱི་འགྱུར་བ་འགྲོ་རྒྱུའི་འགན་ཁུར་ལེན་དགོས་རྒྱུ་ནི་དུས་དང་སྤྱི་ཚོགས་ཀྱི་འགྱུར་འགྲོས་ལ་མ་བརྟེན་ཐབས་མེད་དུ་འགྱུར་ངེས་པས་རྒྱ་གཞུང་གི་འགོ་འཁྲིད་རྣམས་ཀྱིས་མཁྲེགས་བཟུང་གི་སྲིད་བྱུས་དོར་ཏེ་བོད་རྒྱ་གཉིས་སྨན་གྱི་ཐབས་ལམ་བརྒྱུད་དེ་གང་མགྱོགས་འབྲེལ་མོལ་འགོ་འཛུགས་དགོས་རྒྱུའི་འབོད་སྐུལ་བསྐྱར་ནན་བྱ་རྒྱུ་ཡིན།”ཞེས་སོགས་གསུངས་སོང་།

དེ་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེས་མཛད་སྒོ་དང་འབྲེལ་བའི་གསུང་བཤད་གནང་སོང་ཞིང་། སྐབས་དེར་ཁོང་གིས་༧གོང་ས་མཆོག་དགུང་ན་ཆུང་དུས་ནས་ཇི་ལྟར་དགོངས་བཞེད་ཡོད་པ་ལྟར། ཆོས་སྲིད་གཉིས་ཀྱི་ཐུགས་འགན་བཞེས་རྗེས་བོད་ཀྱི་སྤྱི་ཚོགས་ནང་འདྲ་མཉམ་སོགས་ཡོང་ཆེད་ལེགས་བཅོས་ལས་ཁུངས་བཙུགས་འགོ་གནང་ཡོད་པ་དང་། བཙན་བྱོལ་དུ་ཕེབས་རྗེས་བོད་མིའི་སྤྱི་ཚོགས་ནང་མང་གཙོའི་ལམ་སྲོལ་གསར་འཛུགས་གནང་སྟེ། ཡུལ་དུས་གནས་སྟངས་ལ་དཔགས་པའི་མང་གཙོ་ཚད་ལྡན་ཞིག་ཇི་ལྟར་བྱུང་ཐུབ་སྐོར་དང་། བཙན་བྱོལ་བོད་མིའི་མང་གཙོའི་འཕེལ་རིམ། ད་ལྟའི་བཀའ་ཤག་གིས་ཕྱག་ལས་གནང་ཕྱོགས་དང་བོད་མི་མང་ཚོགས་རྣམས་མཐུན་ལམ་རྡོག་རྩ་གཅིག་སྒྲིལ་ངང་གནས་དགོས་གལ་གྱི་སྐོར་སོགས་དང་འབྲེལ་ནས་གསུང་དོན་དུ་“བཀའ་ཤག་གིས་གཅིག་སྒྲིལ་དང་། གསར་གཏོད། རང་ཁ་རང་གསོ་བཅས་ཀྱི་ལྟ་གྲུབ་གཞིར་བཞག་ཐོག་རང་ནུས་གང་ལྕོགས་དང་ལྷག་བསམ་རྣམ་དག་གིས་འགན་འཁུར་ཞུས་དང་ཞུ་མུས་ཡིན་པ་མ་ཟད། ལས་དོན་ཁག་ཕྱོགས་ལྷུང་མེད་པར་ཕྱི་གསལ་ནང་གསལ་གྱི་སྒོ་ནས་བསྒྲུབས་དང་སྒྲུབ་བཞིན་ཡོད། གོང་དུ་ཞུས་པ་ལྟར་ང་ཚོའི་གནས་དུས་ལ་གཞིགས་པའི་མང་གཙོའི་སྒྲོམ་གཞི་སོགས་ཚད་ལྡན་ཞིག་ཆགས་ཐུབ་ཡོད་ནའང། མང་ཚོགས་ལ་མང་གཙོའི་གོ་རྟོགས་ཞན་པར་བརྟེན་མང་གཙོའི་རང་དབང་དང་ཐོབ་ཐང་ལ་བསྙད་དེ་བོད་མི་ནང་ཁུལ་གྱི་མཐུན་ལམ་ལ་དོ་ཕོགས་འགྲོ་གཞིའི་རིགས་ཡོང་བཞིན་འདུག་པ་ནི་བློ་ཕམ་གྱི་རང་བཞིན་ལས་མ་འདས། དེའི་ཁར་རྒྱ་ནག་གཞུང་དང་དེའི་སོ་ཉུལ་བ་ཚོས་ཀྱང་བོད་མིའི་སྤྱི་ཚོགས་ནང་འཛུལ་ཏེ་ཆིག་བསྒྲིལ་ལ་གནོད་སྐྱོན་གཏོང་ཐབས་བྱེད་བཞིན་ཡོད་པ་ལའང་ཚང་མས་སྤྱང་གྲུང་དང་ཡིད་གཟབ་བྱེད་དགོས། ང་ཚོ་བོད་མི་ནང་ཁུལ་མཐུན་ལམ་རྡོག་རྩ་གཅིག་སྒྲིལ་བྱེད་རྒྱུ་ནི་ང་ཚོའི་འཐབ་རྩོད་ཀྱི་མ་རྩ་དང་སྟོབས་ཤུགས་གལ་ཆེ་ཤོས་ཤིག་ཡིན། ང་ཚོས་རང་ཡུལ་བཞག་ནས་མི་ཡུལ་དུ་ཡོང་བའི་དགོས་དམིགས་མ་བརྗེད་པའི་ཐོག ཕྱི་ལོ་༡༩༦༠ ལོའི་ཟླ་༢ པའི་ནང་ཆོལ་གསུམ་ཆོས་བརྒྱུད་ཡོངས་རྫོགས་མཚོན་པའི་ང་ཚོའི་ཕ་མེས་དང་མི་རབས་གོང་མ་ཚོས་གནས་མཆོག་རྡོ་རྗེ་གདན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འཁྲིད་འོག། བོད་མི་ཡོངས་རྫོགས་མཐུན་ལམ་རྡོག་རྩ་གཅིག་སྒྲིལ་ལྕགས་ཀྱི་གོང་བུ་ལྟར་གནས་རྒྱུའི་མནའ་གན་མཐུ་མོ་ཆེའི་དམ་བཅའ་ཕུལ་ཡོད་པ་དེ་ང་ཚོས་བསྐྱར་དྲན་དང་། ཁྱད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་ཀྱི་བླ་ཆེན་ཁག་ཅིག་གིས་བོད་མི་ནང་ཁུལ་དམ་ཚིག་རྡོག་རྩ་གཅིག་སྒྲིལ་ཐོག་ནས་བོད་མིའི་བདེན་དོན་འཐབ་རྩོད་ཐོག་ནུས་པ་མཉམ་སྤུངས་བྱེད་དགོས་པའི་བཀའ་སློབ་ལམ་སྟོན་རིམ་ཕེབས་རྣམས་ཀྱང་སྙིང་བཅངས་ཞུ་དགོས་པའི་སྐུལ་འདེབས་ཤུགས་ཆེ་བྱ་རྒྱུ་ཡིན།”ཞེས་གསུངས་སོང་།

དེ་བཞིན་ཁོང་གིས་དབུ་མའི་ལམ་དང་འབྲེལ་ནས་གསུང་དོན་དུ་“བཀའ་ཤག་གི་ངོས་ནས་བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་གཏན་ལ་ཕབ་པའི་བོད་རྒྱ་གཉིས་སྨན་གྱི་དབུ་མའི་ལམ་གྱི་སྲིད་བྱུས་བརྒྱུད་རྒྱ་ནག་གཞུང་དང་གྲོས་མོལ་བསྐྱར་མཐུད་ཡོང་རྒྱུར་སྒོ་གང་ས་ནས་འབད་བརྩོན་བྱེད་བཞིན་ཡོད། གཞན་ཡང་རང་རེའི་སློབ་གྲྭ་ཁག་གི་བསླབ་གཞིའི་ནང་དུའང་དབུ་མའི་ལམ་གྱི་ངོ་སྤྲོད་སྐོར་སློབ་ཚན་འཆར་འགོད་བྱས་ཡོད། དེ་མཚུངས་རྒྱལ་སྤྱི་དང་རྒྱ་གར་ནང་དུ་སྲིད་སྐྱོང་གིས་གཙོས་བཀའ་བློན་རྣམ་པ་དང་། སྤྱི་འཐུས་ཚོགས་གཙོ་སྦྲེལ་པོས་གཙོས་སྤྱི་འཐུས་རྣམ་པས་ཀྱང་གོ་སྐབས་ནམ་བྱུང་ལ་གནད་ཡོད་མི་སྣ་ཚོར་མཇལ་འཕྲད་ཞུས་ཏེ་དབུ་མའི་ལམ་གྱི་སྲིད་བྱུས་གཞིར་བཞག་བོད་ཀྱི་གནད་དོན་སེལ་རྒྱུར་རྒྱབ་སྐྱོར་ཡོང་བའི་རེ་སྐུལ་ཞུས་དང་ཞུ་བཞིན་ཡོད། དེ་རིང་གི་གོ་སྐབས་འདི་བརྒྱུད་རྒྱ་གར་དབུས་སའི་གཞུང་དང་མི་མང་གཙོ་གྱུར་བོད་མིའི་རྩ་དོན་དང་ཆོས་རིག་རྒྱུན་འཛིན་ཐོག་རོགས་སྐྱོར་གནང་མཁན་རྒྱལ་སྤྱིའི་གཞུང་མང་དང་ཚོགས་སྒེར་ཡོངས་ལ་ཐུགས་རྗེ་ཆེ་ཞུ་རྒྱུ་དང་། བོད་དོན་བདེན་མཐའ་མ་གསལ་བར་དུ་རྒྱབ་སྐྱོར་མུ་མཐུད་ཡོང་བའི་འབོད་སྐུལ་དང་ཡིད་ཆེས་ཞུ་བཞིན་ཡོད་”ཅེས་གསུངས་སོང་།

གཞན་ཡང་མཛད་སྒོའི་སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཀུན་ཝར་བྷ་ར་ཏེན་ཌར་སིན་གྱིས་གཏམ་བཤད་གནང་སོང་བ་མ་ཟད། སྲིད་སྐྱོང་གཟེངས་བསྟོད་བཞེས་མཁན་སློབ་མ་གསུམ་དང་། བཙན་བྱོལ་བོད་མིའི་ཡར་ཐོན་ཚོང་ལས་མ་དངུལ་རོགས་སྐྱོར་གཟེངས་རྟགས་འགྲན་བསྡུར་ནང་འདེམས་ཐོན་བྱུང་བའི་མི་གསུམ་ལ་གཟེངས་རྟགས་དང་བྱ་དགའ། ༢༠༡༨ ལོའི་གཏན་ཉིན་སློབ་གྲྭ་ཁག་གི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་སྡེ་ཚན་གསུམ་གྱི་རྩེ་ཕུད་ཨང་རིམ་དང་པོ་སོན་པའི་སློབ་མ་༣ དང་། རྩེ་ཕུད་གཉིས་པ་སོན་པའི་སློབ་མ་༣ །རྩེ་ཕུད་གསུམ་པ་སོན་པའི་སློབ་མ་༣ བཅས་ལ་དགའ་ལྡན་ཕོ་བྲང་སློབ་ཕྲུག་གཟེངས་རྟགས་དང་བྱ་དགའ་བཅས་གནང་སོང་།།

གསར་འགོད་པ་བཀྲ་ཤིས་དོན་གྲུབ།

Share this:
༨༥༠ ཀློག་གྲངས།