ཀརྟི་དགོན་པའི་གྲྭ་པ་བོད་དོན་ལས་འགུལ་བ་ཁག་ཅིག་རྒྱ་ནག་ཉེན་རྟོག་པས་བཀག་ཉར་བྱས་འདུག

ཟླ་འདིའི་ཚེས་༥ ཉིན་བོད་མདོ་སྨད་རྔ་པ་ཀིརྟི་དགོན་གྱི་གྲྭ་རྡོ་རྗེ་རབ་བརྟན་གྱིས་རྔ་བའི་རྫོང་མཁར་ནས་བོད་དོན་སྐད་འབོད་བྱེད་སྐབས། རྒྱ་གཞུང་གི་ཉེན་རྟོག་པས་བཙད་ཁྲིད་བྱས་ཏེ་ད་ལྟ་བཀག་ཉར་བྱས་ཡོད་འདུག ཟླ་འདིའི་ཚེས་༦ ཉིན་རྔ་པ་ཀིརྟི་དགོན་པའི་གྲྭ་བསྟན་འཛིན་དགེ་ལེགས་ཀྱིས་རྔ་པའི་རྫོང་མཁར་ནས་བོད་ལ་རང་དབང་དགོས་པའི་སྐད་འབོད་བྱེད་སྐབས་རྒྱ་ནག་གཞུང་གི་ཉེན་རྟོག་པས་བཙན་ཁྲིད་བཀག་ཉར་བྱས་ཡོད་འདུག

དྷ་ས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པས་གནས་ཚུལ་འགྲེལ་བརྗོད་གནང་བ་ལྟར་ན། གྲྭ་རྡོ་རྗེ་རབ་བརྟན་ནི་རྔ་པ་རྨེའུ་རུ་མ་ཡིན་ཞིང་། རང་ལོ་ ༢༣ ཡས་མས་ཡིན་པ་དང་། ཤག་གི་དགེ་རྒན་བློ་བཟང་ཟླ་བ་ཡིན་པ་ཙམ་ལས་ད་བར་གྱི་ཞིབ་ཕྲའི་གནས་ཚུལ་ཤེས་རྟོགས་མ་བྱུང་།

གྲྭ་བསྟན་འཛིན་དགེ་ལེགས་ནི་རང་ལོ་༡༨ ཡིན་ཞིང་། ཁོང་རྔ་པ་རྨེའུ་རུ་མ་རུ་ཆེན་གཉིས་པའི་ཡོ་ཚང་དང་། ཕ་མིང་ལ་མ་ཉོ། མ་མིང་དཀོན་སྒྲོན་ཡིན་ཞིང་། ཁོང་གིས་སྐད་འབོད་མ་བྱས་གོང་དུ་སྔ་ཕྱི་བྱས་ནས་རྩོམ་ཡིག་གཉིས་བྲིས་ཏེ་སྐད་འཕྲིན་བར་སྟོང་དུ་བཞག་ཡོད་པ་དང་། རྒྱུན་དུ་མྱུག་མིང་ལ་ས་རིན་བཀོལ་ནས་རྩོམ་ཐུང་མང་པོ་འབྲི་མཁན་ཞིག་ཀྱང་ཡིན་འདུག

དེ་མིན་ཕྱི་ཟླ་༩ ཚེས་ཤར་ལ་རྔ་པའི་རྫོང་མཁར་ནས་གྲྭ་པ་གཞན་ཞིག་གིས་ཀྱང་བོད་དོན་སྐད་བྱས་ཏེ་ཉེན་རྟོག་པས་འཛིན་བཟུང་བཙན་ཁྲིད་བྱས་ཡོད་པའི་གནས་ཚུལ་ཡོད་ནའང་། མིང་སོགས་ད་བར་ཤེས་རྟོགས་ཐུབ་མེད་པ་རེད།

དེ་མིན་ཕྱི་ལོ་༢༠༡༥ ལོར་རྔ་པའི་རྫོང་མཁར་ནས་བོད་ལ་རང་དབང་དགོས་པའི་སྐད་འབོད་བྱས་རྐྱེན་འཛིན་བཟུང་གིས་ལོ་གཉིས་དང་གསུམ་སོགས་ལོ་དུས་འདྲ་མིན་གྱི་བཙོན་འཇུག་ཐག་གཅོད་བྱས་པའི་བཙོན་པ་རྣམས་རིམ་བཞིན་ལོ་དུས་ཚང་ནས་གློད་གྲོལ་གཏོང་བཞིན་ཡོད་ཀྱང་། ཡུལ་ཚོའི་ཉེན་རྟོག་ཁང་གིས་སློབ་གསོ་གཏོང་དགོས་ལུགས་ཀྱིས་བདུན་ཕྲག་གཅིག་ཙམ་ལ་བསྐྱར་དུ་བཀག་ཉར་བྱས་ཏེ་གཏོང་གི་མེད་པའི་ཚུལ་ཡོང་གི་ཡོད་པ་དཔེར་ན། འདི་ལོའི་ཕྱི་ཟླ་༩ ཚེས་༡༧ ཉིན་གློད་གྲོལ་ཐོབ་པའི་རྔ་པ་ཀིརྟི་དགོན་གྱི་གྲྭ་བློ་བཟང་སྐལ་བཟང་རྨེའུ་རུ་མའི་ཡུལ་ཚོའི་ཉེན་རྟོག་ཁང་དུ་ཉིན་ལྔའི་རིང་བཀག་ཉར་བྱས་ཡོད་པ་དང་། དེ་མིན་རྔ་པ་ཀིརྟི་དགོན་པའི་གྲྭ་འཇམ་དཔལ་རྒྱ་མཚོ་ཡང་གོང་བཞིན་ཕྱི་ཟླ་༩ ནང་གློད་གྲོལ་ཐོབ་ཡོད་ཀྱང་རྨེའུ་རུ་མའི་ཡུལ་ཚོའི་ཉེན་རྟོག་ཁང་དུ་བདུན་ཕྲག་གཅིག་རིང་བསྐྱར་དུ་བཀག་ཉར་བྱས་ཡོད་འདུག

གཞན་ཡང་ཆབ་སྲིད་བཙོན་པ་མང་པོ་ཞིག་ཕྱི་ཚུལ་དུ་ལོ་དུས་ཚང་རིམ་བཞིན་གློད་གྲོལ་ཐོབ་ཀྱང་རྔ་པ་རྫོང་གསང་བའི་ལས་ཁུངས་དང་ཉེན་རྟོག་ཁང་གིས་དུས་ངེས་མེད་དུ་སྐད་བཏང་སྟེ་འདྲི་རྩད་སྣ་ཚོགས་བྱེད་པ་དང་། རྫོང་ཁག་གཞན་པ་ཙམ་ལ་འགྲོ་བར་ཡང་ཁོང་ཚོ་ལ་སྔོན་ནས་བཤད་དགོས་པར་མ་ཟད། ཁོང་ཚོའི་འདོད་པ་མ་མཐུན་པ་བཀག་འགོག་བྱེད་པ། དེ་སྔོན་སློབ་གྲྭ་ཆེན་མོ་ཐོན་པ་སོགས་ཤེས་ལྡན་མི་སྣ་ཡིན་ཡང་གཞུང་འབྲེལ་གྱི་ལས་ཁུངས་ཙམ་མ་ཟད། སྒེར་ངོས་ནས་ཤེས་ཡོན་གྱི་ལས་ཀ་བྱས་པ་ཙམ་ལ་ཡང་སུན་གཙེར་སྣ་ཚོགས་བྱེད་པ། དགོན་པ་གཅིག་པ་དང་སྡེ་བ་གཅིག་པའི་ནང་ཆབ་སྲིད་དང་འབྲེལ་བའི་སྐད་འབོད་སོགས་བྱུང་སྐབས། ཁོང་ཚོ་ལ་དམིགས་གསལ་དོགས་གཞིའི་འོག་སུན་པོ་བཟོ་བ། ཚོང་ལས་སོགས་སྒེར་གྱི་འཚོ་ཐབས་འདྲ་མིན་གཉེར་སྐབས་གཞུང་གིས་ཆོག་མཆན་ཐོབ་དགོས་རིགས་ལ་དམིགས་གསལ་གྱིས་སྡང་པོ་བྱེད་པ། ཕྱི་བསྐྱོད་ལག་འཁྱེར་སྤྲོད་རྒྱུ་ཕར་ཞོགས་ཐོ་འགོད་ཙམ་ཡང་བྱེད་མི་འཇུག་པ་དང་། དེའི་ཕ་མ་སྤུན་མཆེད་དག་ལ་ཡང་ཕྱི་བསྐྱོད་ལག་འཁྱེར་སྤྲད་པར་དེ་འབྲེལ་གྱིས་དཀའ་ཁག་བཟོ་བ་སོགས་སྤྱི་དམངས་ཤིག་ལ་ཡོད་པའི་གཞི་རྩའི་ཐོབ་ཐང་ཕལ་མོ་ཆེ་རྩ་མེད་དུ་གཏོང་གི་ཡོད་པ་སོགས་ཀྱི་དཀའ་ངལ་སྣ་མང་མི་ཚེ་གང་བོར་མྱོང་དགོས་པ་ལྟ་བུར་གྱུར་ཡོད་འདུག །
གསར་འགོད་པ་ཆོས་ཉིད་འོད་ཟེར།

 

Share this:
༧༨༠ ཀློག་གྲངས།