བོད་ཀྱི་གློག་བརྙན་དུས་སྟོན་ཐེངས་དགུ་པ་དང་གློག་བརྙན་འགྲན་སྡུར།

ཟླ་འདིའི་ཚེས་༡༣ ནས་ཉིན་གཉིས་རིང་བོད་ཀྱི་གློག་བརྙན་དུས་སྟོན་ཐེངས་དགུ་པ་དེ་དྷ་སར་འཚོགས་པ་དང་། བོད་མི་གློག་བརྙན་བཟོ་མཁན་གསར་པ་ཚོའི་བར་གློག་བརྙན་ཐུང་གྲས་འགྲན་སྡུར་བྱས་ཡོད་པ་རེེད། 

གློག་བརྙན་དུས་སྟོན་དེའི་ཐོག་བོད་མིས་བཟོས་པའི་གློག་བརྙན་དང་། ཡང་ན་བོད་སྐོར་གྱི་གློག་བརྙན་ཁོ་ན་སྟོན་གྱི་འདུག་ལ། གོ་སྒྲིག་པས་གློག་བརྙན་དུས་སྟོན་དེ་ནི་གཙོ་བོ་བོད་མི་ན་གཞོན་ཚོར་གློག་བརྙན་གསར་བཟོའི་གོ་སྐབས་བསྐྲུན་ཆེད་ཡིན་སྐོར་འགྲེལ་བརྗོད་བྱས་སོང་། 

ཐེངས་འདིར་གློག་བརྙན་སྐར་མ་༡༢ རིང་ལས་མ་མང་པའི་འགྲན་སྡུར་ནང་བོད་མི་གློག་བརྙན་གསར་པ་བཟོ་མཁན་དྲུག་མཉམ་ཞུགས་བྱས་པའི་ནང་ནས་ཚེ་རིང་དབང་མོས་བཟོས་པའི་གློག་བརྙན་<<བཙན་བྱོལ་བོད་མའི་འབྲོག་སྡེ་>>དང་། ཚེ་བསྟན་རྡོ་རྗེས་བཟོས་པའི་<<བྱང་ཐང་>> གཉིས་ལ་ཨང་དང་པོའི་བྱ་དགའ་ཐོབ་ཡོད་པ་རེད།

གློག་བརྙན་དུས་སྟོན་དེ་༢༠༠༨ ལོར་རྒྱ་ནག་གི་བཙན་འོག་དུ་ཡོད་པའི་བོད་མི་ཚོར་དོན་གྲུབ་དབང་ཆེན་གྱིས་བོད་དོན་དང་འབྲེལ་བའི་བཅར་འདྲི་བྱས་པའི་གློག་བརྙན་<<འཇིགས་བྲལ་>>ཞེས་པ་བཟོས་རྗེས། དོན་གྲུབ་དབང་ཆེན་རྒྱ་གཞུང་གིས་འཇུ་བཟུང་བྱས་ཏེ། ལོ་དྲུག་གི་བཙོན་འཇུག་ཁྲིམས་ཐག་བཅད་པར། རྗེས་དྲན་ཆེད་དུ་༢༠༠༩ ལོར་འགོ་འཛུགས་བྱས་པ་ཞིག་ཡིན་པ་རེད།།

གསར་འགོད་པ་ཆོས་ཉིད་འོད་ཟེར།

Share this:
༥༧༦ ཀློག་གྲངས།