ཉི་ཧོང་དུ་༧གོང་ས་མཆོག་གིས་མཛད་འཕྲིན་བསྐྱངས་བཞིན་པ།

ཟླ་༡༡ པའི་ཚེས་༡༤ ཉིན་༸གོང་ས་མཆོག་གིས་ཉི་ཧོང་གི་ཡོ་ཀོ་ཧ་མ་གྲོང་ཁྱེར་དུ་རྟེན་གཞི་བྱས་པའི་ཡོ་ཀོ་ཧཱ་མ་རྒྱལ་ཡོངས་ལྷན་ཚོགས་ཚོགས་ཁང་དུ། དད་ལྡན་པ་༥༠༠༠ ལྷག་ལ་ཤེས་རབ་སྙིང་པོ་དང་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ། སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པ་བཅས་ཀྱི་གསུང་ཆོས་དབུ་འཛུགས་གནང་ཡོད་པ་རེད།

༸གོང་ས་མཆོག་གིས་སྔོན་འགྲོའི་བཀའ་སློབ་རྩལ་དོན། དེ་རིང་ཉི་ཧོང་ལ་ཡང་བསྐྱར་བསླེབས་ནས་ང་ཚོ་ཆོས་གྲོགས་ངོ་ཤེས་རྙིང་པ་མང་པོ་ཐུག་པ་རེད། ཉི་ཧོང་ཙམ་མ་ཟད་ཀོ་རི་ཡ་དང་། ཆེན་པོ་ཧོར་གྱི་ཡུལ། རྒྱ་ནག་སྐམ་ས་ཆེན་པོ། ཐའེ་ཝན་བཅས་ནས་ཕེབས་པའི་ཆོས་གྲོགས་ཚོ་དེ་རིང་འདིར་འཛོམས་པར་ངོས་ཀྱིས་ཚང་མ་ལ་འཚམས་འདྲིའི་བཀྲ་ཤིས་བདེ་ལེགས་ཞུ་ཡི་ཡོད། དེ་རིང་ང་ཚོ་འདིར་འཛོམས་པ་དེ་ཚོང་དང་ལྟད་མོའི་དོན་དུ་འཛོམས་པ་མ་རེད། གཙོ་བོ་སངས་རྒྱས་ཀྱི་ལྟ་གྲུབ་སྐོར་འགྲེལ་བཤད་རྒྱག་རྒྱུའི་དོན་དུ་ང་ཚོ་འཛོམས་པ་རེད། ངོས་ཀྱིས་ནམ་རྒྱུན་ང་ཚོ་དུས་རབས་ཉི་ཤུ་རྩ་གཅིག་པར་སླེབས་ཡོད་པ་རེད་ཅེས་བརྗོད་ཀྱི་ཡོད། འཕྲུལ་ཆས་ཡར་རྒྱས་ཧ་ཅང་འགྲོ་དང་འགྲོ་བཞིན་པ་རེད། དེ་རིང་ཁ་སང་འཕྲུལ་ཆས་ལག་རྩལ་བ་དེ་ཚོས་མིའི་བསམ་བློ་ལྟར་ལས་ཀ་བྱེད་ཐུབ་མཁན་གྱི་འཕྲུལ་ཆས་བཟོ་རྒྱུའི་སྐོར་སྐད་ཆ་བཤད་ཀྱི་འདུག  དེ་ཧ་ཅང་ཁག་པོ་རེད།

གང་ལྟར་ང་ཚོ་དུས་རབས་ཉི་ཤུ་རྩ་གཅིག་པའི་ནང་བསླེབས་ཡོད། འཕྲུལ་ཆས་དང་འབྲེལ་བའི་དངོས་པོ་ཡར་རྒྱས་ཚད་མཐོན་པོར་སླེབས་ཡོད། འདི་འདྲའི་དུས་ཚོད་གཅིག་ལ་ཆོས་ཟེར་བ་དེ་དགོས་མཁོ་འདུག་གམ་མི་འདུག  འབྲེལ་བ་འདུག་གམ་མི་འདུག   འདི་དྲི་བ་དང་པོ་རེད། ཁ་སང་རྒྱ་གར་གྱི་རྒྱལ་ས་ལྡི་ལིར་ནང་པའི་རྒྱལ་ཁབ་ཁག་ཁ་ཤས་ཀྱི་དགེ་སློང་འདུལ་བ་འཛིན་པ་ཚོ་དང་ལྷན་དུ་ང་ཚོ་ཚོགས་འདུ་ཚོགས་པ་རེད།  དེ་རིང་ཁ་སང་ཆོས་ཟེར་བ་དེ་དགོས་མཁོ་འདུག་གམ་མི་འདུག   དྲི་བ་དང་པོ་དེ་རེད། ཅེས་སྐབས་དེ་དུས་ཀྱང་ངོས་ཀྱིས་ཞུས་པ་ཡིན། དགོས་མཁོ་མེད་ན་གཡུག་ན་འགྲིག་གི་རེད། དངོས་ཡོད་གནས་ཚུལ་ལ་འཛམ་བུ་གླིང་འདིའི་སྒང་ལ་བལྟས་པ་ཡིན་ན། འཛམ་གླིང་ནང་མི་འབོར་དུང་ཕྱུར་བདུན་ཅུ་ཙམ་ཡོད། དེ་དག་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད།  སྡུག་བསྔལ་མང་པོ་ཞིག་འཛམ་གླིང་གི་ཚ་དྲོད་འཕེལ་ནས་མཚོ་རླབས་ཀྱི་ཉེན་ཁ་ཞིག་དཔེར་ན་ཉི་ཧོང་ནང་ཡོང་གི་འདུག

དེ་བཞིན་ཨ་རིའི་མངའ་སྡེ་ཁལ་ལི་ཧྥོར་ནི་ཡ་དང་ཡུ་རོབ་ཁུལ་དུའང་མེ་འབར་ནས་ཉེན་ཁ་བྱུང་འདུག   གང་ལྟར་འབྱུང་བ་འཁྲུགས་པའི་གནོད་པ་དེ་འདྲ་ཡོང་གི་འདུག  དེ་དག་ང་ཚོ་མི་ཡིས་བཟོ་རྒྱུ་གང་ཡང་མེད། དེ་མིན་སྤྱི་ཡོངས་ཀྱི་འཛམ་གླིང་འདིའི་སྒང་ལ་མི་ཡིས་མི་ལ་གསོད་རེས་གཏོང་བ་དང་། མི་དབུལ་ཕོངས་ཉམ་ཐག་དེ་དག་སྐྱབས་མེད་མགོན་མེད་བྱས་ནས་ལྷག་བསྡད་པ། དཔེར་ན་ཡེ་མན་ལུང་པར་ཆ་བཞག་ན། ཕྲུ་གུ་ཆུང་ཆུང་ཚོར་སྨན་བཅོས་ཀྱི་མཐུན་རྐྱེན་མེད་པ། བཟའ་བཅའི་མཐུན་རྐྱེན་མ་འདང་བ། ལྟོགས་ནས་ཤི་མཁན་མང་པོ་བྱུང་འདུག ཨ་ཕི་རི་ཁའི་ནང་ཆ་བཞག་ན། ནང་ཁུལ་ལ་འཁྲུག་པ་རྒྱག་པ་དང་། ཉམ་ཐག་དེ་དག་བདག་མེད་བྱས་ནས་བཞག་སྟེ་དཀའ་ངལ་ཧ་ཅང་འདུག  དེ་དག་ཚང་མ་ང་ཚོ་མི་ཡིས་བཟོས་པའི་དཀའ་ངལ་རེད།

འབྱུང་བ་འཁྲུགས་པའི་དཀའ་ངལ་ཡོད་པའི་སྒང་ལ་མིས་བཟོས་པའི་དཀའ་ངལ་ཧ་ཅང་མང་པོ་འདུག  སྡུག་ཤོས་ཏེ་ཆོས་ལུགས་མི་འདྲ་བ་རྒྱུ་མཚན་དུ་བྱས་ནས་གསོད་རེས་གཏོང་གི་འདུག  ཐབས་སྐྱོ་བ་ཞིག་ལ་འབར་མའི་ནང་ནང་པ་དང་ཁ་ཆེ་འཁྲུག་པ་བརྒྱབ་ནས་ཁ་ཆེ་མང་པོར་སྡུག་པོ་གཏོང་གི་འདུག  ངོ་ཚ་དགོས་པ་རེད། སི་རི་ཡ་དང་ཨ་ཧྥི་གྷ་ནི་སི་ཐན་དེ་འདྲའི་ཁ་ཆེ་ལུང་པ་མང་པོ་ཞིག་གི་ནང་ལ་སྟོན་པ་ཨ་ལ་གཅིག་རེད། གསུང་རབ་ཁུ་རན་གཅིག་རེད། ཉིན་རེ་ལ་ཐེངས་མ་ལྔ་སྨོན་ལམ་རྒྱག་གི་ཡོད་པ་གཅིག་གྱུར་རེད། འོང་ཀྱང་གཙོ་བོ་ཆབ་སྲིད་ཀྱི་ཐོག་ནས་སུ་ནཱི་དང་ཤཱི་ཡ་གཉིས་དབར་གསོད་རེས་གཏོང་གི་འདུག  དེ་དག་ཚང་མ་མི་ཡིས་བཟོས་པའི་སྡུག་བསྔལ་རེད། སྡོམ་བརྒྱབ་ན་འཛམ་གླིང་འདིའི་སྒང་ལ་མི་ཐམས་ཅད་སྡུག་བསྔལ་མི་འདོད་པ་དང་བདེ་བ་འདོད་པ་འབའ་ཞིག་རེད། ཡིན་ནའང་གཞན་ཕན་གྱི་བློ་དེ་མེད་པ་དང་། ང་ཞེས་པའི་སོ་སོ་གཅིག་པུར་བསམ་བློ་བཏང་སྟེ་རང་རྒྱལ་གཞན་ཕམ་གྱི་ལྟ་ཚུལ་ཐོག་ནས་མི་ཡིས་མི་ལ་སྡུག་པོ་ཧ་ཅང་གཏོང་གི་འདུག   འདི་དག་ཚང་མ་ཐུག་སའི་རྩ་བ་དེ་བྱམས་བརྩེ་ཕུང་བར་བརྟེན་ནས་བྱུང་བ་རེད་ཅེས་བཀའ་སློབ་བརྩལ་འདུག

དེ་བཞིན་༧གོང་ས་མཆོག་ནས་ཐུགས་བསྐྱེད་དམ་བཅའ་གསུམ་ཏེ། བྱམས་བརྩེ་ལ་སོགས་པ་འགྲོ་བ་མིའི་རིན་ཐང་དང་ཆོས་ལུགས་མཐུན་བསྒྲིལ་གོང་འཕེལ་གཏོང་ཐབས།  དེ་བཞིན་བོད་ཀྱི་ཁོར་ཡུག་དང་ཐོུང་མ་ཡིན་པའི་རིག་གཞུང་སྲུང་སྐྱོབ་དང་དར་སྤེལ་གཏོང་ཐབས་མཛད་རྒྱུ་སོགས་ངོ་སྤྲོད་གནང་ཞིང་།  ༧གོང་ས་༧སྐྱབས་མགོན་ཆེན་པོ་མཆོག་དཔལ་ལེཎྜའི་གཞུང་ལུགས་མདོ་སྡགས་གཉིས་ལ་སློབ་གཉེར་མཐིལ་ཕྱིན་པ་གནང་དགོས་ཚེ་བོད་པའི་སྐད་ཡིག་ལས་ལྷག་པའི་སྐད་ཡིག་གཞན་མེད་པ་གསལ་བཤད་གནང་པ་དང་།  བོད་མི་རྣམས་ཀྱིས་རང་ཉིད་ལ་ཡོད་པའི་འཛམ་གླིང་གི་གཅེས་ནོར་དེ་བརྒྱུད་འཇིག་རྟེན་ཀུན་ལ་ཕན་པ་ཇི་ལྟར་སྒྲུབ་དགོས་མིན་ཐད་བསམ་ཞིབ་དགོས་པའི་ལམ་སྟོན་བཀའ་སློབ་བསྩལ་གནང་འདུག

༧གོང་ས་མཆོག་གི་དྲ་རྒྱའི་ཐོག་ཏུ་གནས་ཚུལ་བཀོད་པར་གཞིགས་ན་ཟླ་༡༡ པའི་ཙེས་༡༨ བར་༧གོང་ས་མཆོག་ནས་ཉི་ཧོང་དུ་མཛད་འཕྲིན་བསྐྱངས་རྒྱུ་ཡིན་འདུག །

གསར་འགོད་པ་སྐལ་བཟང་དོན་གྲུབ།

 

 

Share this:
༩༤༡ ཀློག་གྲངས།