འཚོ་བ་དངོས་དང་སྦྱར་ནས་བདེན་པ་བཞི་ངོ་སྤྲོད།

སྡུག་བསྔལ་ཟེར་བ་དེ་ང་ཚོས་མི་འདོད་པ་རེད། བདེ་སྐྱིད་ཟེར་བ་དེ་ང་ཚོར་དགོས་ཀྱི་ཡོད་པ་རེད། སྤྱིར་ང་ཚོ་སྡུག་བསྔལ་མི་འདོད་པ་རེད། སྡུག་བསྔལ་མི་འདོད་པ་ཞིག་ཡིན་ན་སྡུག་བསྔལ་ཟེར་བ་དེ་གང་འདྲ་ཞིག་ཡིན་པ་དེ་ཞིབ་ཚགས་པོའི་ཐོག་ནས་ཤེས་དགོས་པ་ཞིག་རེད། དེ་འདྲ་ཡིན་དུས་བཅོམ་ལྡན་འདས་ཀྱིས། འདི་ནི་སྡུག་བསྔལ་འཕགས་པའི་བདེན་པའོ། ཞེས་ངོ་སྤྲོད་ཅིག་གནང་བ་རེད། འཕགས་པའི་བདེན་པ་གསུངས་པ་དེ། ནད་ན་ཚ་འདྲ་པོ་ཞིག་གི་སྡུག་བསྔལ་ཡིན་པ་ཡིན་ན། འཕགས་པའི་བདེན་པ་གསུངས་དགོས་པ་ཅང་མི་འདུག ང་རང་ཚོས་མཐོང་བསྡད་ཀྱི་འདུག སྡུག་བསྔལ་རིམ་པ་མང་པོ་ཡོད་པའི་ནང་ནས། དཔེར་ན་ནད་ཀྱི་སྡུག་བསྔལ་འདྲ་པོར་ཆ་བཞག་ན། ཐོག་མར་ང་རང་ཚོའི་གཟུགས་པོར་ཨ་ར་ཨུ་རུའི་ན་ཟུག་བརྒྱབ་བསྡད་པའི་སྡུག་བསྔལ་ཞིག་འདུག་གཱ། དེ་ཡོང་བ་དེ། དེའི་འོག་དེར་ཨ་ཚ་ཟེར་བསྡད་པ་དེ་ནད་རྟགས་སམ། རྟགས་མཚན་རེད། གཟུགས་པོའི་ནང་ལ་ཅིག་མ་འགྲིགས་པར། དེའི་འབྲས་བུ་ལྟ་བུར་ཚོར་བ་སྡུག་བསྔལ་དེ་ཡོང་བསྡད་ཀྱི་ཡོད་པ་རེད། དེ་ཡོང་བའི་གཞི་འདྲ་པོ་བྱེད་མཁན་དེ་ལུས་ཀྱི་ནང་ལ་ནད་འབུ་ཕྲ་རབ་ཡིན་ནམ་ཅིག་སླེབས། དེའི་རྐྱེན་པས་ལུས་ཀྱི་འབྱུང་བ་འཁྲུག་བསྡད་མཁན་ཞིག་ཆགས། དེའི་རྐྱེན་པས་ན་ཟུག་དེ་བྱུང་བ་རེད། སྡུག་བསྔལ་ཤེས་པར་བྱ་ཟེར་དུས། འདི་ནི་སྡུག་བསྔལ་འཕགས་པའི་བདེན་པའོ། གསུངས་པ་དེ། སྡུག་བསྔལ་ཨ་ར་ཨུ་རུ་ཟེར་བའི་ན་ཟུག་ཙམ་དེ་མ་ཡིན་པར། དེ་ཡོང་བའི་གཞི་འདྲ་པོ་དེ་དག་ཤེས་དགོས་ཀྱི་ཡོད་པ་རེད་ཟེར་བ་དེ་གསུང་གི་ཡོད་པ་རེད། ཤེས་སོང་ངམ། དེ་འདྲ་ཡིན་དུས། བཅོམ་ལྡན་འདས་ཀྱིས་འདི་ནི་སྡུག་བསྔལ་འཕགས་པའི་བདེན་པའོ། ཞེས་གསུང་དུས་འཕགས་པའི་བདེན་པ་ཞེས་བློ་ཡར་བསམ་བློ་གཏིང་རིང་པོ་གཏོང་མཁན་ཞིག་གིས་བདེན་པ་མཐོང་བསྡད་པ་ཞིག་དང༌། སྡུག་བསྔལ་མཐོང་བསྡད་པ་ཞིག་རེད་ཅེས་གསུངས་ཀྱི་འདུག་གཱ།
དེ་ལའང་སྡུག་བསྔལ་རིམ་པ་གསུམ་བཤད་ཀྱི་ཡོད་པ་རེད། སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། འདུ་བྱེད་ཀྱི་སྡུག་བསྔལ། ཞེས་སྡུག་བསྔལ་རིམ་པ་གསུམ་བཤད་ཀྱི་འདུག་གཱ། སྡུག་བསྔལ་གྱི་སྡུག་བསྔལ་ཞེས་ལབ་དུས། ནམ་རྒྱུན་ང་ཚོ་ཡོངས་གྲགས་ཀྱི་སྡུག་བསྔལ་དེ་རེད། སྡུག་བསྔལ་དེ་ཡོང་བའི་གཞི་དེ་འདྲ་པོ་དེ་འགྱུར་བའི་སྡུག་བསྔལ་དང༌། ལྷག་པར་འདུ་བྱེད་ཀྱི་སྡུག་བསྔལ་ཟེར་བ་དེས་སྡུག་བསྔལ་དེ་དག་གི་གཞི་བྱས་ཡོང་གི་ཡོད་པ་རེད། དེ་འདྲ་ཡིན་དུས། ང་ཚོ་རང་བཞིན་གྱིས་སྡུག་བསྔལ་མི་འདོད་པ་ཡིན་དུས། སྡུག་བསྔལ་ཞེས་གཅིག་གསུངས། འདི་ནི་སྡུག་བསྔལ་འཕགས་པའི་བདེན་པའོ་ཟེར། སྡུག་བསྔལ་དེ་དཀོན་མཆོག་གིས་བཟོས་པའང་མ་རེད། རྒྱུ་མེད་རྐྱེན་མེད་གློ་བུར་དུ་བྱུང་བ་ཡང་མ་རེད། རང་རང་གི་རྒྱུ་ལ་བརྟེན་ནས་བྱུང་བ་རེད། དེ་འདྲ་ཡིན་དུས། སྡུག་བསྔལ་འགྲུབ་བྱེད་ཀྱི་རྒྱུ། འདི་ནི་ཀུན་འབྱུང་འཕགས་པའི་བདེན་པའོ། ཞེས་ནས་སྡུག་བསྔལ་ཀུན་ཏུ་འབྱུང་བ། ཤེས་སོང་ངམ། མི་འདོད་པའི་སྡུག་བསྔལ། འབྲས་བུ་སྡུག་བསྔལ་དེ་དང་དེ་འགྲུབ་བྱེད་ཀྱི་རྒྱུ་དེ་གསུངས། སྡུག་བསྔལ་མི་འདོད་པ་ཡིན་དུས། སྤྱིར་བཏང་ཡིན་ན་ཚོར་བ་སྡུག་བསྔལ་གྱི་འགལ་ཟླའི་བཟོ་འདྲ་པོ་ཚོར་བ་བདེ་བ་ཞིག་ཡོད་པ་རེད། ཚོར་བ་བདེ་བ་དེར་ཞིབ་ཏུ་བསམ་བློ་བཏང་བ་ཡིན་ན། ཟག་བཅས་ཀྱི་ཚོར་བ་བདེ་བ་དེ་རེད། ཉོན་མོངས་པའི་གཞན་དབང་ཅན་གྱི་ཚོར་བ་བདེ་བ་དེས་སྡུག་བསྔལ་ཡོང་བའི་རྒྱུ་བྱས་ཡོང་གི་ཡོད་པ་རེད། རྐྱེན་བྱས་ཡོང་གི་ཡོད་པ་རེད། དེ་འདྲ་ཡིན་དུས་ཚོར་བ་བདེ་བ་ཙམ་མ་ཡིན་པ། ངོ་ཐོག་རང་བདེ་བ་དེ་སྡུག་བསྔལ་ཡོང་བའི། སྡུག་བསྔལ་ཕྲ་རགས་ཡོང་བའི་རྒྱུ་ཁོ་རང་མེད་པ་ཞིག་བཟོ་ཐུབ་ན་དེ་གཏན་དུ་བདེ་བ་རེད། མེད་པ་ཆགས་པ་དེ་གཉེན་པོ་སྐྱེས་པའི་སྟོབས་ཀྱིས་མེད་པ་བཟོ་དགོས་པ་ཞིག་ཡིན་དུས་དེ་ལ་འགོག་པ་ཟེར་བ་ལབ་པ་རེད།
སྡུག་བསྔལ་རྒྱུ་དང་བཅས་པ་འབད་བརྩོན་བྱས་ནས་གཉེན་པོ་སྐྱེས་པའི་སྒོ་ནས་བཅོམ་པའམ་བཀག་པའི་སྒོ་ནས་མེད་པར་ཆགས་བསྡད་པ། དེ་འདྲ་དེ་ལ་སྡུག་བསྔལ་འགོག་པ་ཞེས་བཤད་པ་རེད། དེ་གཏན་དུ་བདེ་བ་རེད། ཚོར་བ་བདེ་བ་ཨེ་ཡིན་མི་ཤེས་ཏེ། གང་ལྟར་སྡུག་བསྔལ་རྒྱུ་དང་བཅས་པ་མེད་པ་ཆགས་པ་ཡིན་དུས། མེད་པ་ཆགས་པའི་རིམ་པ་ཞིག་སླེབས་ཡོང་བ་ཡིན་དུས། དེ་གཏན་དུ་བདེ་བ་རེད། དེ་ང་ཚོར་དགོས་པ་དེ་རེད། ང་ཚོས་བདེ་བ་འདོད་ཀྱི་ཡོད་པ་རེད།
དེ་ནས་འབྲས་བུ་བསྒྲུབ་བྱ་འགོག་པའི་བདེན་པ་ཟེར་བ་དེ། འདི་ནི་འགོག་པ་འཕགས་པའི་བདེན་པའོ་ཞེས་པ་དེ་རེད། འདི་ནི་ལམ་འཕགས་པའི་བདེན་པའོ་ཟེར་བ་དེ། དེ་འདྲའི་འགོག་པ་དེ་བསྒྲུབ་རྒྱུའི་ཐབས་དེར། དེ་སྒྲུབ་བྱེད་ཀྱི་ཐབས་སམ་དེར་བགྲོད་པའི་ལམ་ཡིན་དུས་ནས་ལམ་གྱི་བདེན་པ་གསུངས་པ་རེད། འདི་ནི་ལམ་འཕགས་པའི་བདེན་པའོ་ཞེས། བདེན་པ་བཞིའི་ངོ་བོ་ལ་བཟླས་པ་ཟེར་བ་དེ་བྱས། དེ་འདྲ་ཡིན་དུས། དེང་སང་གི་ཚན་རིག་དེ། སྔོན་ལ་དེ་བཤད་རྒྱུ་མི་འདུག ངས་ནམ་རྒྱུན་རྟག་པར་དེ་བཤད་བསྡད་ཀྱི་ཡོད། བདེན་བཞིའི་ངོ་བོ་ལ་བཟླས་པ་ཟེར་བ་དེ་དེས་དངོས་པོའི་གནས་ཚུལ་དེ་གསུངས། ཤེས་སོང་ངམ།
ད་འོ་ན་འགོག་པའི་བདེན་པ་ཟེར་བ་དངོས་པོའི་གནས་ཚུལ་རེད་དམ་ཟེར་ན། ད་ལྟ་གྲུབ་ཡོད་པ་མ་རེད་དེ། ཡིན་ནའང་དེ་གཞི་ཡོད་ཆོག་པ་ཞིག ག་རེ་རེད་ཅེ་ན་ཕྱིན་ཅི་ལོག་པའི་བློ་ཞིག་ཡིན་ན། ཐ་སྙད་ཟོར་ཡང་པ་བྱས་ནས། སྤྱིར་བཏང་བཤད་པ་ཡིན་ན། འཁྲུལ་པའི་བློ་ཞིག་ཡིན་པ་ཡིན་ན། ཕྱིན་ཅི་ལོག་པའི་བློ་ཞེས་ལབ་ན་ཡག་པ་འདུག ཕྱིན་ཅི་ལོག་པའི་བློ་ཞིག་ཡིན་ན་ཁོ་ཕྱིན་ཅི་ལོག་པ་ཞིག་ཡིན་ཕྱིན་ཆད་ལ། དོན་དངོས་པོའི་གནས་ཚུལ་དང་རྒྱབ་འགལ་ཆགས་བསྡད་ཡོད་པ་རེད། དོན་དངོས་པོའི་གནས་ཚུལ་དང་རྒྱབ་འགལ་ཆགས་ཡོད་ན། དུས་ནམ་གྱི་ཚེ་ཡང་དོན་དངོས་པོའི་གནས་ཚུལ་ངོ་མ་དེ་གནས་བསྡད་ཡོད་པ་རེད། དེ་འདྲ་ཡིན་དུས་དོན་དངོས་པོའི་གནས་ཚུལ་ཇི་ལྟར་གནས་པ་ནང་བཞིན་ཤེས་པའི་བློ་དེ་དང༌། དོན་དངོས་པོའི་གནས་ཚུལ་ལ་རྒྱབ་འགལ་དུ་འཛིན་བསྡད་པའི་བློ་གཉིས་པོ་དེ་ག་དུས་ཡིན་ཡང་འགལ་བ་རེད། གཅིག་གིས་གཅིག་ལ་གནོད་བྱ་གནོན་བྱེད་ཆགས་བསྡད་ཡོད་པ་རེད། འཛིན་སྟངས་འགལ་བའི་སྒོ་ནས། དེ་འདྲ་ཡིན་དུས་ཕྱིན་ཅི་ལོག་གི་བློ་ཞིག་ཡིན་ཕྱིན་ཆད་ལ། དེ་ལ་འཛིན་སྟངས་འགལ་བའི་ཕྱིན་ཅི་མ་ལོག་པའི་བློ་ཞིག་ནམ་ཡིན་ནའང་ཡོད་པ་རེད། གཞི་ལ་ཡོད་ཡོད་པ་རེད། དེ་སྐྱེས་མ་སྐྱེས་ཟེར་བ་དེ་གནས་ཚུལ་ཁ་ཁ་རེད།
ང་རང་ཚོས་འབད་བརྩོན་བྱས་ནས་ཕྱིན་ཅི་ལོག་པའི་བློ་དེ། དཔེར་ན། ད་གིན་ལབ་བསྡད་པའི་བདག་ཟེར་བ་ཞིག ཕུང་པོ་ལ་དབང་བསྒྱུར་མཁན་གྱི་ང་ཞིག་ཡོད་པ་རེད་བསམ་ནས་དྲན་བསྡད་མཁན་གྱི་དབང་བསྒྱུར་མཁན་གྱི་ང་ཕུང་པོ་ལ་ལྟོས་པ་མེད་པར་གནས་སྡོད་མཁན་ཞིག་ཡོད་པ་རེད་བསམ་ནས་འཛིན་སྡོད་མཁན་གྱི་བློ་དེ་ཕྱིན་ཅི་ལོག་པའི་བློ་བྱས། ཕྱིན་ཅི་ལོག་པའི་བློ་དེ་ལ་དུས་ནམ་གྱི་ཚེ་ཡང་ཕུང་པོ་ལས་དོན་གཞན་པའི་བདག་མེད་པ་ཡིན་དུས། ཕུང་པོ་ལས་དོན་གཞན་པའི་བདག་མེད་པ་ཤེས་བསྡད་མཁན་གྱི་བློ་གཅིག་ག་དུས་ཡིན་ནའང་ཡོང་སྲིད་པ་རེད། ག་དུས་ཡིན་ནའང་ཡོང་ཆོག་པ་ཞིག ཤེས་སོང་ངམ། ངའི་རྒྱུད་ལ་སྐྱེས་མ་སྐྱེས་གནས་ཚུལ་ཁ་ཁ་རེད། ག་དུས་ཡིན་ཡང་ཁོ་ཕྱིན་ཅི་ལོག་ཏུ་འཛིན་པའི་བློ་ཞིག་ཡོད་ན། དོན་ཇི་མ་ཇི་བཞིན་ཤེས་པའི་བློ་ཞིག་ག་དུས་ཡིན་ནའང་ཡོད་པ་རེད། ཡོང་ཆོག་པ་རེད། དེ་འདྲ་ཡིན་དུས། དེའི་གནད་འགག་དེ་འགོག་པའི་བདེན་པ་ཟེར་བ་དེ། ད་ལྟ་ང་ཚོའི་རྒྱུད་ལ་སྐྱེས་ཡོད་པ་མ་རེད་དེ། ཡིན་ནའང་སྤྱིར་སྡུག་བསྔལ་ཡོང་བའི་རྒྱུ་ཀུན་འབྱུང་ཟེར་བ་དེའི་རྩ་བ་ཉོན་མོངས་པའི་ཀུན་འབྱུང་བྱས་ནས། དེའི་རྩ་བ་དེའི་ཉོན་མོངས་དེ་དག་ཕྱིན་ཅི་ལོག་པའི་བློ་ཆགས་བསྡད་ཡོད་པ་རེད། དེ་འདྲ་ཡིན་དུས་ཕྱིན་ཅི་ལོག་པའི་བློ་དེ་ལ་ནམ་ཞིག་གི་ཚེ་ཡང་འགལ་ཟླ་ཡིན་བསྡད་མཁན་ཕྱིན་ཅི་མ་ལོག་པའི་བློ་ཞིག་ཡོང་ཆོག་པ་རེད། དེ་ཕྱིན་ཅི་ལོག་མ་ལོག་ཟེར་བ་དེ་ཁོ་རང་གྲུབ་ཙམ་ནས་ཕྱིན་ཅི་མ་ལོག་སྐད་ཆ་བཤད་རྒྱུ་ཡོད་པ་མ་རེད། བློ་དེས་ཇི་ལྟར་བཟུང་བ་ནང་བཞིན་དོན་ལ་གནས་ཡོད་པ་ཡིན་ན་ཕྱིན་ཅི་མ་ལོག་པའི་བློ་རེད། བློ་དེས་ཇི་ལྟར་བཟུང་བ་ནང་བཞིན་དོན་ལ་གནས་མེད་པ་ཡིན་ན། ཕྱིན་ཅི་ལོག་པའི་བློ་ཆགས་ཀྱི་ཡོད་པ་རེད། ཤེས་སོང་ངམ།
དེ་འདྲ་ཡིན་དུས། ད་ལྟ་དེ་ངར་འཛིན་པའི་བློ། བདག་ཏུ་འཛིན་པའི་བློ་དེས་ཇི་ལྟར་བཟུང་བའི་ཡུལ་དེ་བདག་ཏུ་གྲུབ་པ་དེ་རེད། བདག་ཏུ་གྲུབ་པ་དེ་དུས་ནམ་གྱི་ཚེ་ཡང་བདག་ཏུ་གྲུབ་པ་དེ་མེད་པ་ཡིན་དུས། དེ་དངོས་པོའི་གནས་ཚུལ་ཆགས་འདུག་གཱ། རང་དབང་བའི་བདག་གིས་སྟོང༌། བདག་མེད་པ་ཟེར་བ་དེ་རང་བཞིན་ལྷན་སྐྱེས་ཀྱི་གནས་སྟངས་ཤིག་ཡིན་པ་རེད། དེ་འདྲ་ཡིན་དུས་འགོག་པའི་བདེན་པ་ཟེར་བ་དང༌། ལམ་གྱི་བདེན་པ་ཟེར་བ་དེ། ད་ལྟ་ཐོབ་མ་ཐོབ་དང་སྐྱེས་མ་སྐྱེས་ཀྱི་སྐད་ཆ་རེད་མ་གཏོགས་རྩ་བའི་གཞི་དེ། གཞི་དངོས་པོའི་གནས་ཚུལ་ལ་ཡོད་པ་རེད། འདི་ཤེས་པ་ལ་གཞི་བདེན་གཉིས་དེ་ཤེས་དགོས་ཀྱི་འདུག།
རྣམ་གྲྭ་ཤེས་ཡོན་ལྷན་ཚོགས་ནས་བསྒྲིགས་པ་ྋགོང་ས་མཆོག་གི་བཀའ་སློབ། བོད་ཀྱི་ནང་ཆོས་ངོ་སྤྲོད་ཅེས་པའི་དེབ་ལས་བཏུས།

Share this:
༤༨༧ ཀློག་གྲངས།