རྒྱ་ནག་གིས་དགོན་སྡེ་ནི་ཁ་བྲལ་ལ་ངོ་རྒོལ་བྱེད་པའི་གཡུལ་ས་གཙོ་བོ་ཡིན་ཟེར།

ཟླ་འདིའི་ཚེས་༣ ཉིན་བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བ་ལྟར་ན། ཉེ་ཆར་“ལྗོངས་ཡོངས་ཀྱི་”ཚད་གཞི་བཞིར་བརྩི་སྲུང་གིས་སྔོན་ཐོན་གྲྭ་བཙུན་ཧུར་ཐག་བྱེད་རྒྱུའི་“སློབ་གསོ་ལག་ལེན་བྱེད་སྒོའི་སློབ་སྦྱོང་སྤེལ་རེས་ཀྱི་བཞུགས་མོལ་ཚོགས་འདུ་”ཞེས་པ་ཞིག་ཚོགས་ཡོད་འདུག

གཞིས་རྩེ་གྲོང་ཁྱེར་ས་སྐྱ་དགོན་དོ་དམ་ཨུ་ལྷན་གྱི་ལས་བྱེད་པ།  ལིའུ་ཐའོ་ཡིས། འཆར་འགོད་ཞིབ་ཚགས་བྱས་ནས་རྨང་གཞི་བརྟན་དུ་བཏང་བ། དགོན་སྡེ་དོ་དམ་ཨུ་ལྷན་གྱི་ཏང་གི་ལས་དོན་ཨུ་ལྷན་གྱིས་སྔ་རྗེས་སུ་ཏང་གི་ལས་དོན་ཨུ་ལྷན་གྱི་ཚོགས་འདུ་ཐེངས་༢ དང་སྐུལ་འདེད་ཚོགས་འདུ་ཐེངས་༥ འཚོགས་ནས། སློབ་གསོ་ལག་ལེན་བྱེད་སྒོར་ཞིབ་འཇུག་བྱས་ནས་སྐུལ་འདེད་བཏང་བ་དང་། དགོན་སྡེའི་ཆོས་ལུགས་བྱེད་སྒོ་སྤེལ་ཡུལ་༦ ལ་ཡོངས་སུ་ཁྱབ་པའི་ས་གནས་ས་ཐོག་གི་མཛུབ་ཁྲིད་བྱས་པ། ལས་བྱེད་པ་དང་དགེ་འདུན་པའི་བདག་པོའི་འདུ་ཤེས་དང་རང་འགུལ་གྱི་འདུ་ཤེས་ཆེ་རུ་ཏན་ཏིག་བཏང་བ། སློབ་གསོ་ལག་ལེན་བྱེད་སྒོར་ཏན་ཏིག་དང་། ཞིབ་ཚགས། ནན་པོ་བཅས་ཀྱི་སྒོ་ནས་ཞུགས་ཡོད། དོ་དམ་ཨུ་ལྷན་གྱི་དགེ་འདུན་པའི་ཚན་ཁག་གི་“ཟླ་རེའི་འཆར་ཅན་ཚོགས་འདུའི་”ལམ་ལུགས་མཐའ་འཁྱོངས་བྱས་ཏེ་གྲུབ་འབྲས་གླེང་བ་དང་། མྱོང་ཚོར་བརྗོད་པ། ཆོད་སེམས་མཚོན་པ་བཅས་བྱས་ཡོད། དགེ་འདུན་པའི་སློབ་སྦྱོང་ལམ་ལུགས་འཐུས་སྒོ་ཚང་དུ་བཏང་བ་དང་། ཁག་བགོས་ནས་སློབ་སྦྱོང་དང་བགྲོ་གླེང་བྱེད་པ། “གང་གི་ཆེད་དུ་སློབ་སྦྱོང་བྱེད་དགོས་པ་”བསྐྱར་བཤད་བྱས་པ། “སློབ་སྦྱོང་གང་ཞིག་བྱེད་དགོས་པ་”གསལ་སྟོན་བྱས་པ། “གང་འདྲ་བྱས་ནས་སློབ་སྦྱོང་བྱེད་དགོས་པ་”བསླབས་པ་མ་ཟད། ད་དུང་གྲྭ་དམངས་ལ་ཆབ་སྲིད་ཀྱི་འདུ་ཤེས་དང་། སྤྱི་ཡོངས་ཀྱི་འདུ་ཤེས། སྲོག་ཤིང་གི་འདུ་ཤེས། མིག་ལྟོས་ཀྱི་འདུ་ཤེས་བཅས་རྒྱུན་ཆད་མེད་པར་ཟབ་ཏུ་གཏོང་རྒྱུའི་ཁྲིད་སྟོན་ཡང་བྱས་ཡོད། “ཚད་གཞི་བཞི་”དང་བསྡུར་ནས་དགོན་པའི་དགེ་འདུན་པ་ཚོའི་ཁྲོད་དུ་ཐོན་པའི་སྣང་ཚུལ་ངན་པ་བརྡ་ཁྱབ་བྱས་པ་དང་། གསལ་ཐོ་འགོད་པ་དང་། འགན་འཁྲི་ཁ་གསལ་བཟོ་བ། དུས་མཚམས་གཏན་འཁེལ་བྱེད་པ་བཅས་ཀྱིས་བྱེད་སྒོ་ཏན་ཏིག་ནུས་ལྡན་ངང་སྤེལ་བར་ལམ་རིས་གསལ་པོ་བཀོད་དེ་སྐུལ་འདེད་ཤུགས་ཆེན་བཏང་ཡོད་ཅེས་བཤད།

ཉིང་ཁྲི་གྲོང་ཁྱེར་སྨན་གླིང་རྫོང་བཀྲིས་རབ་བརྟན་དགོན་དོ་དམ་ཨུ་ལྷན་གྱི་ལས་བྱེད་པ། ཡཱ་ཡིང་གིས། དགོན་སྡེ་ནི་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་གཡུལ་ས་གཙོ་བོ་ཡིན་པས། ང་ཚོས་རྒྱ་ཆེའི་རྒྱལ་གཅེས་ཆོས་གཅེས་ཀྱི་གྲྭ་བཙུན་དང་མཉམ་དུ་དགོན་སྡེའི་འགོ་ཁྲིད་ཀྱི་དབང་ཆར་སྟངས་འཛིན་ཡག་པོ་བྱེད་ཐུབ་མིན་ནི་བོད་ཀྱི་འཕེལ་རྒྱས་དང་བརྟན་ལྷིང་གི་སྤྱི་ཡོངས་དང་ཐད་ཀར་འབྲེལ་བ་ཡོད། དགོན་སྡོད་བྱས་ཚུན་ང་ཚོས་སློབ་སྦྱོང་ལ་འབད་བརྩོན་བྱས་ཏེ་ཆོས་ལུགས་དང་མི་རིགས་ཀྱི་ལས་དོན་སྒྲུབ་པའི་རང་ཉིད་ཀྱི་ནུས་པ་དང་འཇོན་ཐང་ཆེ་རུ་བཏང་བ་དང་། ལྷག་བསམ་ཟོལ་མེད་ངང་གྲྭ་བཙུན་ཚོ་དང་གྲོགས་པོ་བསྒྲིགས་ཏེ་ཁྱིམ་ཚང་གཅིག་ལྟར་བརྩེ་བའི་གཉེན་ཉེ་དང་གྲོགས་པོ་བློ་ཐུབ་ཏུ་གྱུར་པར་བྱས་པ། ལས་དོན་ཏན་ཏིག་སྤེལ་ཏེ་དགོན་སྡེ་དོ་དམ་ལ་ཤུགས་སྣོན་དང་གསར་གཏོད་བྱེད་རྒྱུའི་སྐོར་གྱི་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་དང་དགོན་ཕན་གྲྭ་ཕན་གྱི་སྲིད་ཇུས་དང་བྱེད་ཐབས་ཇི་མ་ཇི་བཞིན་དང་ཆད་ལུས་མེད་པར་དོན་འཁྱོལ་བྱས་ཡོད། དགོན་སྡེ་དོ་དམ་ལས་བྱེད་པས་ལས་དོན་ཏན་ཏིག་དང་ནུས་ལྡན་སྤེལ་བའི་རྨང་གཞིའི་ཐོག ང་ཚོས་དགོན་སྡེ་མེས་རྒྱལ་གཅིག་གྱུར་ལ་སྲུང་སྐྱོང་དང་། མི་རིགས་མཐུན་སྒྲིལ་ལ་ཤུགས་སྣོན། ཁ་བྲལ་དང་ཕྱིར་བཤོལ་ལ་ངོ་རྒོལ། གྲྭ་བཙུན་གྱི་སེམས་པ་གཅིག་ཏུ་སྒྲིལ་བ་བཅས་ཀྱི་གཡུལ་ས་གཙོ་བོར་གྱུར་ཡོད་ཅེས་བཤད།

ལྷོ་ཁ་གྲོང་ཁྱེར་ནང་བསྟན་མཐུན་ཚོགས་ཀྱི་ཚོགས་གཙོ། ཟླ་བ་ཚེ་རིང་གིས། “ཏང་གི་བཀའ་དྲིན་བློ་ལ་བརྟན་པོར་ངེས་ནས་འགག་རྩའི་ནུས་པ་འདོན་རྒྱུ་ཡིན་”ཞེས་པའི་བརྗོད་གཞིའི་ཐོག་བཤད་དོན། “དུས་རབས་གསར་པའི་བོད་བརྒྱུད་ནང་བསྟན་གྱི་འཐུས་མི་ཞིག་ལ་ཆ་མཚོན་ན། འགག་རྩའི་སྐབས་སུ་ཏང་དང་མི་དམངས་ཀྱི་ཕྱོགས་སུ་ཐོག་མཐའ་བར་གསུམ་དུ་ལང་དགོས་པ་དང་། ཆབ་སྲིད་ཐད་ཏཱ་ལ་སྐྱེ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་དང་དབྱེ་མཚམས་གསལ་པོ་འབྱེད་དགོས་པ། མེས་རྒྱལ་ཁ་བྲལ་གྱི་བྱེད་སྤྱོད་མཐའ་དག་དང་འཐབ་རྩོད་བྱེད་ཕོད་པ། རང་ཉིད་ཀྱི་བྱ་སྤྱོད་ངོ་མར་བརྟེན་ནས་མེས་རྒྱལ་གཅིག་གྱུར་ལ་སྲུང་སྐྱོང་དང་མི་རིགས་མཐུན་སྒྲིལ་ལ་སྲུང་སྐྱོང་བྱེད་དགོས་པ་བཅས་ནི་ང་ཚོས་ཐོག་མཐའ་བར་གསུམ་དུ་སྲུང་དགོས་པའི་བདེན་དོན་ཞིག་རེད། ང་ཚོས་ཆུ་འཐུང་དུས་ཆུ་འགོ་དྲན་པ་དང་བཀའ་དྲིན་ལ་བསམ་ཤེས་བྱེད་དགོས་ཤིང་། པཎ་ཆེན་རིན་པོ་ཆེ་སྐུ་ཕྲེང་བཅུ་པ་སོགས་སྐབས་རིམ་བྱུང་གི་སྔོན་བྱོན་མཁས་དབང་རྣམས་མིག་དཔེར་བཟུང་སྟེ། རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་རྒྱུན་འཛིན་དང་དར་སྤེལ་གཏོང་བ་དང་། ཏང་གི་བཀའ་དྲིན་ཤེས་པ་དང་། ཏང་གི་བཀའ་དྲིན་དྲན་པ། ཏང་གི་དྲིན་ལན་འཇལ་བ་བཅས་བྱེད་པ། དགོན་སྡེའི་སྒྲིག་སྲོལ་དང་འདུལ་ཁྲིམས་གཙང་མ་སྲུང་བ། དར་ཆ་གསལ་སྟོན་དང་ལངས་ཕྱོགས་བརྟན་པའི་གྲྭ་བཙུན་དང་། ཐོས་བསམ་སྒོམ་གསུམ་ལ་གཞོལ་བའི་གྲྭ་བཙུན། སྒྲིག་བཀུར་ཁྲིམས་སྲུང་དང་ཀུན་སྤྱོད་བཟང་བའི་གྲྭ་བཙུན། ལས་དོན་ཧུར་ཐག་སྒྲུབ་པ་དང་ནུས་པ་འདོན་པའི་གྲྭ་བཙུན་བཅས་ཧུར་བརྩོན་ཆེན་པོས་བྱས་ནས་བོད་བརྒྱུད་ནང་བསྟན་སྐྱོན་བྲལ་ངང་རྒྱུན་འཛིན་བྱེད་པར་འབུལ་འོས་པའི་ལེགས་སྐྱེས་འབུལ་རྒྱུ་ཡིན་”ཞེས་བཤད་འདུག །

གསར་འགོད་པ་བསྟན་འཛིན་ལམ་བཟང་།

Share this:
༢༡༡༥ ཀློག་གྲངས།