ཨ་རིར་གསུམ་བཅུའི་དུས་དྲན་སྐབས་བོད་རང་བཙན་གོམ་བགྲོད་ཀྱི་ལས་འགུལ་སྤེལ་རྒྱུ་རེད།

ཟླ་འདིའི་ཚེས་༡༣ ཉིན་ནིའུ་ཡོག་ཏུ་སྤོ་ཆུང་ཚང་དོན་གྲུབ་ལྷ་དར་གྱིས་འདི་ལོའི་གསུམ་བཅུའི་དུས་དྲན་ཐེངས་དྲུག་ཅུ་པ་སྲུང་བརྩི་དང་འབྲེལ་རང་བཙན་གོམ་བགྲོད་ཀྱི་ལས་འགུལ་སྤེལ་རྒྱུ་ཡིན་པའི་གསལ་བསྒྲགས་བྱས་པ་དང་། ༡༩༥༩ ལོའི་གསུམ་བཅུའི་སྒེར་ལངས་ཉིན་གྱི་འབོད་སྒྲ་གཙོ་བོ་༡། བོད་རང་བཙན་ཡིན། ༢། ༧རྒྱལ་བ་ཡིད་བཞིན་ནོར་བུ་སྐུ་ཚེ་ཁྲི་ལོར་བརྟན་པར་ཤོག ༣། རྒྱ་མི་བོད་ནས་ཕྱིར་རྒྱུགས་ཤིག་ཅེས་པ་དྲན་གསོ་དང་འབྲེལ་བོད་དོན་རྒྱབ་སྐྱོར་ཡོང་ཐབས་བྱེད་རྒྱུ་ཡིན་པ་རེད།

གསར་འགོད་གསལ་བསྒྲགས་ནང་འཁོད་དོན། “སྤྱི་ལོ་༡༩༡༣ ལོར་བོད་དང་སོག་པོ་དབར་བོད་སོག་ཆིངས་ཡིག་བཞག་པ་དང༌། ལོ་དེའི་ཟླ་༢ ཚེས་༡༣ ཉིན་༸གོང་ས་སྐུ་ཕྲེང་བཅུ་གསུམ་པ་ཆེན་པོ་ཐུབ་བསྟན་རྒྱ་མཚོ་མཆོག་གིས་བོད་མི་སེར་སྐྱ་ཡོངས་ལ་སྤང་བླང་རྩ་ཚིག་དོན་ཚན་ལྔ་འཁོད་པའི། འདས་དང་ད་ལྟར་བོད་རང་བཙན་ཡིན་པ་མ་ཟད། མ་འོངས་པར་ཡང་བོད་དེ་རང་བཙན་ལྡན་པའི་རྒྱལ་ཁབ་ཅིག་ཏུ། ཇི་ལྟར་འཛིན་སྐྱོང་གནང་རྒྱུའི་སྐོར། བོད་རང་བཙན་གྱི་བསྒྲགས་གཏམ་སྤེལ་བའི་ཉིན་མོ་གལ་ཆེན་ཞིག་ཡིན་པས། མེས་རྒྱལ་བོད་ནས་ཐག་རིང་དུ་གྱར་བའི་ངེད་བོད་ཀྱི་བུ་ཕྲུག་ཚོས། ཕ་ས་དང་མེས་རྒྱལ་ལྷག་ཏུ་དྲན་བཞིན། ས་མཐའ་ནིའུ་ཡོག་ནས་བོད་མིའི་གསུམ་བཅུའི་སྒེར་ལངས་ཐེངས་༦༠ པ་སྲུང་བརྩིའི་ལས་འགུལ་ཞིག་དེ་རིང་རང་ཁྱིམ་ནས་གསལ་བསྒྲགས་བྱ་རྒྱུ་ཡིན། འདི་ལོ་ནི་དགྲ་བོ་རྒྱ་ནག་གིས་བོད་རྒྱལ་ཁབ་ལ་བཙན་འཛུལ་བྱས་པར། བོད་རྒྱ་ཆེའི་མི་དམངས་ཀྱིས་སྙིང་སྟོབས་ཆེན་པོས་ཡར་ལངས་ངོ་རྒོལ་དང་། བདག་དབང་གསལ་སྟོན། དབུ་འཁྲིད་སྲུང་སྐྱོབ། རྡོག་རྩ་ཆིག་སྒྲིལ། བོད་རང་བཙན་སླར་གསོ་བཅས་ཀྱི་ཆོད་སེམས་དང་། མངོན་འདོད་གསལ་པོར་བསྒྲགས་པའི་གཟི་བརྗིད་ཅན་གྱི་ཉིན་མོ་རླབས་ཆེན་ཞིག་སྟེ། བོད་མིའི་གསུམ་བཅུའི་སྒེར་ལངས་བྱས་ནས་མི་ལོ་༦༠ འཁོར་བའི་ལོ་དུས་ཡིན་པས། བོད་མིའི་གསུམ་བཅུའི་སྒེར་ལངས་ཐེངས་༦༠ པ་སྲུང་བརྩི་ཞུ་བ་དང་། བོད་ཀྱི་རྒྱལ་ས་ལྷ་སར་དང་བླང་མི་དམངས་གཙོས་གསུམ་བཅུའི་སྒེར་ལངས་ཐེངས་དང་པོའི་དཔའ་བོ་དཔའ་མོ་རྣམས་ལ་རྗེས་དྲན་གུས་འདུད་ཞུ་སླད། ཁོང་ཚོའི་ལས་འགུལ་གྱི་ངོ་བོ་དང་ཁ་ཕྱོགས་རྩ་འཛིན་བྱས་ཏེ། ང་ཚོས་གསུམ་བཅུའི་སྒེར་ལངས་ཐེངས་དང་པོའི་དཔའ་བོ་དཔའ་མོ་རྣམ་པའི་ཁ་ཆེམས་ཀྱི་སྦྱར་བྱང་ཕྲག་ཏུ་འཁྱེར་ནས། སྤྱི་ལོ་༢༠༡༩ ཟླ་༣ ཚེས་༣ ཉིན་ནས་འགོ་བཙུགས་ཏེ། བོད་རང་བཙན་གོམ་བགྲོད་སོགས། ལས་འགུལ་ཁག་ཅིག་རིམ་པས་སྤེལ་རྒྱུ་ཡིན།  ང་ཚོ་སྒེར་ངོས་ནས་ལས་འགུལ་འདི་དག་སྤེལ་དགོས་དོན་གཞན་ཞིག་ནི། དཔའ་བོ་དཔའ་མོའི་བཀའ་དྲིན་རྗེས་དྲན་དང་། ཁོང་ཚོས་རྩ་འཛུགས་དང་ལམ་སྟོན་གནང་བའི་བོད་རང་བཙན་སླར་གསོའི་རྩ་དོན་རྒྱུན་འཁྱོངས་ཀྱིས་འཐབ་རྩོད་གསོན་གནས་མདུན་སྐྱོད་ཐུབ་ཐབས་སླད་ཡིན་”ཞེས་འཁོད་འདུག

ཨ་རིའི་གྲོང་འཁྱེར་ཧྥི་ལ་ཌེ་ཧྥེ་ཡར་ཡོད་པའི་རང་བཙན་ཚོགས་ཁང་ཆེན་མོ་དང་ཨ་རི་བའི་རང་དབང་གི་མཚོན་རྟགས་སུ་འབོད་པའི་རང་བཙན་དྲིལ་བུའི་མདུན་ནས་འགོ་བཙུགས་ཏེ། ཧྥི་ལ་ཌེ་ཧྥེ་ཡ་དང་། ནིའུ་འཇེར་སི། ནིའུ་ཡོག་བཅས་མངའ་སྡེ་གསུམ་ནང་གོམ་བགྲོད་ཀྱིས་མཐར་ནིའུ་ཡོག་ཏུ་ཡོད་པའི་མཉམ་སྦྲེལ་རྒྱལ་ཚོགས་ཀྱི་ལས་ཁུངས་དབུས་མའི་མདུན་དུ། གོམ་བགྲོད་མཇུག་སྡོམ་བྱ་རྒྱུ་ཡིན་འདུག

རང་བཙན་གོམ་བགྲོད་ཀྱི་གསར་འགོད་གསལ་བསྒྲགས་ནང་འཁོད་དོན། “གོམ་བགྲོད་ཀྱི་ལས་རིམ་ཁྲོད། ལམ་བར་དུ་མི་མང་གི་རྒྱབ་སྐྱོར་ས་ཡིག་བསྡུ་ལེན་དང་། གྲོང་ཁྱེར་ཁག་ཏུ་སྐོར་སྐྱོད་ཀྱིས་གྲོང་ཁྱེར་སྤྱི་ཁྱབ་དང་། གྲོང་ཁྱེར་སྲིད་སྐྱོང་། དེ་བཞིན་གྲོས་ཚོགས་འཐུས་མི་སོགས། འབྲེལ་ཡོད་ཁག་གི་མཚན་ཐོག་ལ་ཞུ་སྙན་དང་མཇལ་འཕྲད་ཡོང་ཐབས། མཐར་ལོ་མཇུག་ཏུ་འདི་ལོར་སྤེལ་ཟིན་པའི་ལས་འགུལ་ཁག་རྒྱབ་ལྗོངས་སུ་འཁྱེར་ནས་ཨ་རིའི་དབུས་གཞུང་ལ་ཞུ་གཏུགས་ཡོང་ཐབས་བྱ་རྒྱུ། ད་དུང་ལོ་འདིར་རིམ་པས་ནིའུ་ཡོག་གི་མཐོ་སློབ་དང་། གཙུག་ལག་སློབ་གྲྭ་ཁག་ལ་གསུམ་བཅུའི་དུས་དྲན་སྐོར་ངོ་སྤྲོད་ཀྱི་ལས་འགུལ་སྤེལ་ཐབས། ལྷག་པར་འཛམ་གླིང་མཉམ་སྦྲེལ་རྒྱལ་ཚོགས་ཀྱི་དབུས་ལས་ཁུངས་ལ་དགོས་འདུན་གྱི་ཡིག་ཆ་འབུལ་ཐབས་དང་། དགྲ་བོ་རྒྱ་ནག་གི་གཞུང་ཚབ་ནིའུ་ཡོག་བཅའ་སྡོད་ལ་དགོས་འདུན་གྱི་ཡིག་ཆ་སྤྲོད་ཐབས་བྱ་འཆར། དེ་བཞིན་སྤྱི་ལོ་༡༩༥༩ ལོའི་སྤྱི་ཟླ་གསུམ་པར་ལྷ་སར་བོད་མི་ཁྲི་ཕྲག་མང་པོས་བོད་རང་བཙན་གྱི་སྐད་འབོད་བྱེད་བཞིན་རྒྱ་གར་གཞུང་ཚབ་དང་། བལ་ཡུལ་གཞུང་ཚབ་ཁང་དུ་ཕྱིན་ཏེ། བོད་དུ་རྒྱ་དམར་གྱིས་བཙན་འཛུལ་བྱས་པར་བར་དཔང་དང་། བོད་མི་དམངས་ཀྱི་རེ་འདུན་ལ་རྒྱབ་སྐྱོར་དགོས་ཞེས་འབོད་སྐུལ་བྱས་པ་ལྟར། ང་ཚོས་ཀྱང་ནིའུ་ཡོག་ཏུ་བཅའ་བཞུགས་རྒྱ་གར་དང་བལ་པོའི་གཞུང་ཚབ་ཁང་གཉིས་ལ་ལོ་རྒྱུས་དྲན་གསོ་དང་། ལས་འགུལ་གྱི་དགོས་འདུན་ཡི་གེ་འབུལ་རྒྱུ། དེ་བཞིན་སྤྱི་ལོ་༡༩༥༩ ལོར་ནིའུ་ཡོག་མཉམ་སྦྲེལ་རྒྱལ་ཚོགས་མདུན་དུ་སོག་པོ་ཚོས་སོག་ཡིག་དང་། བོད་ཡིག དབྱིན་ཡིག་གསུམ་གྱི་སྦྱར་བྱང་འཕྱར་ཏེ། བོད་ལ་རྒྱབ་སྐྱོར་གྱི་ལས་འགུལ་སྤེལ་བར་བཀའ་དྲིན་རྗེས་དྲན་ཞུ་སླད། ནིའུ་ཡོག་སོག་པོའི་གཞུང་ཚབ་ཁང་དུ་ལོ་རྒྱུས་དྲན་གསོའི་བཀའ་དྲིན་རྗེས་དྲན་གྱི་མཇལ་དར་དང། ལས་འགུལ་གྱི་དགོས་འདུན་ཡིག་ཆ་འབུལ་ཐབས་བྱ་རྒྱུ་བཅས། དེ་རིང་གི་གོམ་བགྲོད་འདི་ཉིད། ཧྥེ་ལ་ཌེ་ཧྥེ་ཡ་ནས་ནིའུ་ཡོག་ཏུ་ཐད་ཀར་གོམ་བགྲོད་ཀྱིས་ཡོང་བ་ཙམ་མིན་པར། གོམ་བགྲོད་ལས་འགུལ་འདི་ཉིད་སྒྲིག་འཛུགས་དང་། ཆེ་མཐོང་ངང་རྩ་དོན་ལ་གྲུབ་འབྲས་ཡོང་བར་འབད་རྩོན་བྱ་འཆར་ལགས་ན། བོད་རིགས་སྤུན་ཟླ་ཚོས་རང་འགན་རང་འཁུར་གྱིས་རྒྱབ་སྐྱོར་ཡོང་བའི་རེ་འབོད་ཞུ་རྒྱུ་ཡིན་”ཞེས་འཁོད་འདུག

གོམ་བགྲོད་པས་“བོད་དུ་རྒྱ་ནག་གིས་བཙན་འཛུལ་བཙན་བཟུང་ལ་ངོ་རྒོལ་དང་། བོད་རང་བཙན་སླར་གསོ་ལ་རྒྱབ་སྐྱོར་ཡོད་ཅེས་པའི་དཔང་ཡིག་ཐོག་དྲ་ལམ་དང་། གོམ་བགྲོད་བྱ་ཡུལ་གཉིས་ཀ་ནས་ས་ཡིག་བསྡུ་རུབ་དང་། དཔང་ཡིག་བཟུང་ནས་དཔར་ལེན་པའི་ལས་འགུལ་ཞིག་ཀྱང་སྤེལ་རྒྱུ་ཡིན། འཛམ་གླིང་ཡུལ་གྲུ་གང་ས་ནས་ལས་འགུལ་འདིར་དྲ་ཐོག་རྒྱབ་སྐྱོར་མཉམ་ཞུགས་ཐུབ་པ་མ་ཟད། བརྗོད་སྙིང་འདི་འཁོད་པའི་འདྲ་དཔར་ཤོག་བྱང་ཐོག་དཔར་ཏེ། འདྲ་དཔར་བསྡུ་ལེན་བཅས་བྱ་ཐུབ་པས། ངེས་པར་དེ་ལྟར་རྒྱབ་སྐྱོར་དང་། མཉམ་ཞུགས་ཡོང་རོགས་”ཞེས་འབོད་སྐུལ་བྱས་འདུག

ལས་འགུལ་སྐབས་དགོས་འདུན་ཁག་ཅིག་བཏོན་ཡོད་པ་ནི་༡། རྒྱ་ནག་གི་བཙན་འཛུལ་བོད་ནས་ཕྱིར་འཐེན་བྱས་ཏེ། བོད་ཀྱི་བདག་དབང་བོད་མིར་ཕྱིར་སྤྲོད་དགོས། ༢། ༧ཀུན་གཟིགས་པཎ་ཆེན་རིན་པོ་ཆེའི་གཙོས་བོད་ཀྱི་སྲིད་དོན་བཙོན་པ་ཡོངས་རྫོགས་འཕྲལ་དུ་གློད་གྲོལ་དགོས། ༣།  ༡༩༥༩ ནས་ད་བར་མི་ལོའི་དྲུག་ཅུའི་བོད་མིའི་རང་དབང་སྒེར་ལངས་ཀྱི་བརྒྱུད་རིམ་དང་། དགོས་འདུན་ལ་ཨ་རིའི་ས་གནས་དང་། མངའ་སྡེ། གྲོས་ཚོགས་དང་། དབུས་གཞུང་བཅས་ཀྱིས་རྟོགས་ཞིབ་དང་ཉན་ཞིབ་བརྒྱུད། བོད་མིའི་མངོན་འདོད་འགྲུབ་པར་བདེན་རྒྱབ་གནང་རོགས། ༤། རྒྱལ་ཚོགས་ཀྱི་སྐུ་ཚབ་དང་རྒྱལ་སྤྱིའི་གསར་འགོད་ཚོགས་ཆུང་བོད་ནང་བསྐྱོད་དེ། བོད་ནང་དྲག་གནོན་དམ་དྲག་དང་། ད་བར་བོད་མི་ ༡༦༤ ཡིས་རང་ལུས་མེར་སྲེག་གནང་བའི་དགོས་འདུན་སོགས་ཀྱི་ཐད་རྟོགས་ཞིབ་གནང་དགོས། ༥། རྒྱ་ནག་གིས་བོད་དང་། ཤར་ཏུར་ཀི་སི་ཐན། ལྷོ་སོག མན་ཇུ་བཅས། བདག་དབང་ཁ་གསལ་ཡོད་པའི་རྒྱལ་ཁབ་བཞི་ལ་བཙན་འཛུལ་དང་མུ་མཐུད་བཙན་བཟུང་བྱེད་བཞིན་ཡོད་པ་མ་ཟད། དྲྭ་རྒྱ་དང་། སློབ་གྲྭ། བཟོ་ཚོང་ཁང་སོགས་བརྒྱུད་དེ། ཨ་རི་གཙོ་བོ་བྱས་པའི་རྒྱལ་ཁབ་གཞན་དག་གི་གསང་བ་རྐུ་འཁྱེར་དང་། རྒྱལ་ཁབ་གཞན་དག་གི་སྲིད་དོན་ནང་སིམ་འཛུལ་བྱེད་དེ། རྒྱ་ནག་གི་དབང་ཤུགས་རྒྱ་སྐྱེད་ཆེད། རྒྱལ་སྤྱིའི་ཁྱོན་ཡོངས་ཀྱི་རང་དབང་དང་། བདེ་འཇགས་ལ་རྒྱ་ནག་གིས་ཉེན་ཁ་ཚབས་ཆེན་བཟོ་བཞིན་ཡོད་པས། ཨ་རིའི་གཞུང་དང་མང་ཚོགས་ནས་རྒྱ་ནག་གི་བཙན་འཛུལ་རྒྱ་སྐྱེད་ལ་ངེས་པར་དོ་འཁུར་དང་འགོག་གནོན་དགོས་བཅས་ཡིན་པ་རེད།

ད་ལྟ་ལས་འགུལ་ནང་དངོས་སུ་ཞུགས་མཁན་སྟག་འཚེར་རིན་པོ་ཆེའི་སྲས་ཀུན་དགའ་ནོར་བུ་དང་། བསྟན་འཛིན་དབང་འདུས། སཱ་ནི་བསོད་ནམས། བློ་དགའ་རང་བཙན། དོན་གྲུབ་ལྷ་དར་བཅས་ཡོད་པ་དང་། མི་གང་མང་མཉམ་ཞུགས་ཡོང་བའི་འབོད་སྐུལ་ཡང་བྱས་འདུག །

གསར་འགོད་པ་ཆོས་ཉིད་འོད་ཟེར་གྱིས།

Share this:
༡༣༧༧ ཀློག་གྲངས།