འགྲམ་འགག་སྒོའི་ཟོག་འདྲེན་བགྲོད་ལམ་ཚོད་ལྟའི་སྒོ་འབྱེད་བྱ་རྒྱུ་ཡིན་འདུག

ཕྱི་ལོ ༢༠༡༨ ལོར་བོད་རང་ལྗོངས་ཟེར་བས་མ་དངུལ་ཕོན་ཆེན་བཏང་སྟེ་ལོ་ལྔ་ཚན་བཅུ་གསུམ་པའི་དུས་དཀྱིལ་འཆར་འགོད་ཅེས་པའི་ནང་ཚན་འགྲམ་འགག་སྒོའི་ཟོག་འདྲེན་བགྲོད་ལམ་ཚོད་ལྟའི་སྒོ་འབྱེད་བྱ་རྒྱུ་ཡིན་འདུག

ཟླ་འདིའི་༡༨ ཉིན་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ནས་སྤེལ་བ་ལྟར་ན། ལོ་སྔོན་མར་བོད་རང་སྐྱོང་ལྗོངས་ཟེར་བས་ལོ་ལྔ་ཚན་བཅུ་གསུམ་གྱི་དུས་དཀྱིལ་འཆར་འགོད་ཅེས་པ་རྣམ་གྲངས་༡༩༧ ཅན་ཞིག་བཟོས་ཡོད་པ་ལས་༥༢ བསྐྲུན་ཟིན་པ་དང་༩༤ སྐྲུན་བཞིན་ཡོད་པར་བརྗོད་པ་ལས། གློག་དྲའི་དྲ་སྦྲེལ་དང་ཆུ་ཤུགས་གློག་ཁང་། ཞིང་འབྲོག་ཁུལ་གྱི་མི་འབོར་གྲོང་དང་གྲོང་བརྡལ་དུ་གཅིག་བསྡུས་བྱེད་པ་སོགས་དང་། གཞན་ཡང་འཆར་འགོད་དེའི་ནང་ཚུད་པ་ “སྐྱིད་གྲོང་འགག་སྒོ་དང་ལྷ་སའི་མཁའ་འགྲུལ་འགག་སྒོ་སྔར་བས་འཐུས་ཚང་བཟོ་རྒྱུ།  དེ་བཞིན་མངའ་རིས་དགུན་ས་འབབ་ཐང་གི་མཁའ་འགྲུལ་འགག་སྒོ་འཛུགས་སྐྱོང་།  འདྲེན་ཐང་དང་ལེགས་རྩེ་འགག་སྒོ་ལོ་ལྔ་ཚན་བཅུ་གསུམ་པའི་རིང་ཕྱི་ཕྱོགས་སུ་སྒོ་འབྱེད་བྱེད་རྒྱུ”། འགྲམ་འགག་སྒོའི་བགྲོད་ལམ་སྒོ་འབྱེད་བྱ་རྒྱུ་བཅས་ཡིན་པ་ལས་འགྲམ་འགག་སྒོའི་བགྲོད་ལམ་དེ་འདི་ལོའི་ཕྱི་ཟླ་༥ པའི་ནང་ཚོད་ལྟའི་སྒོ་འབྱེད་བྱ་རྒྱུ་ཡིན་པ་རེད།

རང་སྐྱོང་ལྗོངས་ཚོང་དོན་ཁང་ཞེས་པས་འགྲམ་འགག་སྒོ་དང་འབྲེལ་བའི་ཐོག་ནས་བརྗོད་དོན། “མཐའ་མཚམས་ཉོ་ཚོང་ནི་བོད་ལྗོངས་ཀྱིས་རྒྱལ་ཁབ་ཀྱི་རྒྱུད་གཅིག་ལམ་གཅིག་འཛུགས་སྐྲུན་ཁྲོད་ཨེ་ཤི་ཡ་ལྷོ་མར་ཕྱོགས་པའི་གལ་ཆེའི་བགྲོད་ལམ་འབྱེད་རྒྱུར་སྐུལ་འདེད་གཏོང་བའི་ལྟེ་བའི་ལས་འགན་ཞིག་ཡིན་པ་རེད། ཚོང་དོན་པུ་སོགས་རྒྱལ་ཁབ་ཀྱི་འབྲེལ་ཡོད་ཚན་པའི་རོགས་སྐྱོར་འོག བོད་ལྗོངས་ཀྱིས་ཕྱི་ཕྱོགས་རོགས་སྐྱོར་སོགས་སྲིད་ཇུས་རང་བཞིན་གྱི་མ་དངུལ་བེད་སྤྱོད་བཏང་ནས། སྐྱིད་རོང་དང་། འགྲམ་འགག་སྒོའི་ཁ་ཕྱོགས་སུ་བལ་ཡུལ་ལ་རོགས་སྐྱོར་བྱས་ནས་གཞུང་ལམ་དང་། ཟམ་པ་སོགས་རྨང་གཞིའི་སྒྲིག་བཀོད་འཛུགས་སྐྲུན་བྱེད་རོགས་དང་། སྐྱིད་རོང་དང་། སྤུ་ཧྲེང་སོགས་འགག་སྒོའི་རྨང་གཞིའི་སྒྲིག་བཀོད་འཛུགས་སྐྲུན་བྱེད་ཤུགས་ཟམ་མི་ཆད་པར་ཆེ་རུ་བཏང་བས། བལ་ཡུལ་སོགས་མཐའ་འཁོར་རྒྱལ་ཁབ་ཀྱི་རྨང་གཞིའི་སྒྲིག་བཀོད་བར་གྱི་མཉམ་འབྲེལ་མཉམ་མཐུད་ཆུ་ཚད་སྔར་བས་གོང་མཐོར་ཕྱིན་”ཞེས་དང་།  “རང་སྐྱོང་ལྗོངས་ཚོང་དོན་ཁང་གི་འབྲེལ་ཡོད་འགན་ཁུར་བས་ད་ལོ་བོད་ལྗོངས་ཀྱིས་“ཁེ་ལས་བརྒྱ་གྲངས་ཕྱིར་སྐྱོད་པའི”བྱ་སྤྱོད་ལག་བསྟར་བྱས་ཏེ་ཀྲུང་བལ་མཛའ་གྲོགས་བཟོ་ལས་ཁུལ་དང་། བལ་ཡུལ་ལ་ཀྲུང་གོའི་བོད་ལྗོངས་རིག་གནས་ཡུལ་སྐོར་ཐོན་ལས་ཁུལ་འཛུགས་སྐྲུན་གྱི་རྟེན་གཞིར་བྱས་ཏེ། ཁེ་ལས་“རྒྱལ་ཕྱིར་སྐྱོད་པའི་”འཇོན་ཐང་ཆེ་རུ་བཏང་བ་དང་རྒྱལ་སྤྱིའི་ཐོན་ནུས་མཉམ་ལས་ནང་ཧུར་ཐག་ཞུགས་པ། ཧི་མ་ལ་ཡ་སྐོར་བའི་དཔལ་འབྱོར་མཉམ་ལས་ཁུལ་འཛུགས་སྐྲུན་ལ་ཞབས་འདེགས་ཞུས་ཡོད་”ཅེས་བརྗོད་ཡོད་པ་རེད།།

གསར་འགོད་པ་བསྟན་འཛིན་ལམ་བཟང་།

Share this:
༢༡༡༠ ཀློག་གྲངས།