གྲོང་ཁྱེར་སྤྱི་ཁྱབ་དཔོན་ཞིག་གིས་རྒྱ་ནག་ལ་ཁ་གཏད་གཅོག་བཞིན་པ།

ཆེག་སྤྱི་མཐུན་རྒྱལ་ཁབ་ཀྱི་རྒྱལ་ས་པེ་རག་གྲོང་ཁྱེར་གྱི་སྤྱི་ཁྱབ་དཔོན་ཛཱེ་ནེག་ཧཱ་རིབ་ཀྱིས། རྒྱ་ནག་གཞུང་གི་ཆབ་སྲིད་དང་དཔལ་འབྱོར་གྱི་གནོན་ཤུགས་འོག་ལ་མགོ་མ་བསྒུར་ནས། རྒྱ་ནག་གཅིག་གྱུར་གྱི་སྲིད་བྱུས་ལ་ངོས་ལེན་མེད་པའི་ཐོག་ནས་བོད་དང་ཐའེ་ཝན་ལ་རྒྱབ་སྐྱོར་གྱི་ལས་འགུལ་སྤེལ་བཞིན་ཡོད་འདུག

ཟླ་༧ པའི་ཚེས་༣ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཆེག་སྤྱི་མཐུན་རྒྱལ་ཁབ་ཀྱི་སྲིད་གཞུང་གིས་རྒྱ་ནག་དང་འབྲེལ་བ་བཟང་དུ་གཏོང་ཐབས་གང་ཡོང་བྱེད་བཞིན་ཡོད་མེད་ལ་མ་ལྟོས་པར། རྒྱལ་ཁབ་དེའི་རྒྱལ་ས་པེ་རག་གྲོང་ཁྱེར་གྱི་སྤྱི་ཁྱབ་དཔོན་ཛཱེ་ནེག་ཧཱ་རིབ་ཀྱིས་ལས་ཁུར་བླངས་ནས་ཟླ་བ་གཅིག་ལས་མ་སོང་བའི་རྗེས་སུ། ཟླ་༡ པོའི་ནང་གྲོང་ཁྱེར་དེར་རྒྱལ་སྤྱིའི་རྒྱལ་ཁབ་ཁག་གི་སྐུ་ཚབ་ཀྱི་ལྷན་ཚོགས་ཤིག་བསྐོངས་འཚོགས་བྱེད་བཞིན་པའི་སྐབས་སུ། རྒྱ་ནག་གི་སྐུ་ཚབ་ཀྱིས་ཁོང་ལ་རྒྱ་ནག་གཅིག་གི་སྲིད་བྱུས་ལ་གུས་བརྩི་བྱས་ཏེ། ལྷན་ཚོགས་དེ་ནས་ཐའེ་ཝན་གྱི་སྐུ་ཚབ་ཕྱིར་འབུད་གཏོང་བའི་རེ་སྐུལ་བྱས་འདུག་ཀྱང་། ཁོང་གིས་ངོས་ལེན་བྱས་མེད་པས། ཐའེ་ཝན་སྐུ་ཚབ་རྣམས་ལྷན་ཚོགས་དེར་མཉམ་ཞུགས་བྱེད་ཐུབ་པ་བྱུང་འདུག

དེ་ཡང་ཆེག་སྤྱི་མཐུན་རྒྱལ་ཁབ་ནང་རྒྱ་ནག་གིས་མ་འཛུགས་ཆེན་པོ་བྱེད་བཞིན་ཡོད་ཁར། རྒྱལ་སའི་རྐང་སྤོལ་རྩེད་འགྲན་རུ་ཁག་གཅིག་དང་ཆང་རག་བཟོ་གྲྭ་ཉོས་ཡོད་པ་དང་། སྒེར་གྱི་བརྙན་འཕྲིན་ཁང་ཞིག་གི་མ་རྐང་ཉོས་པ་སོགས་བྱས་ཡོད་པས། པེ་རག་གྲོང་ཁྱེར་གྲོས་ཚོགས་ཀྱིས་སྐབས་སྔོན་མའི་སྤྱི་ཁྱབ་དཔོན་རྣམས་ཀྱི་སྐབས་སུ། པེ་ཅིང་དང་པེ་རག་གྲོང་ཁྱེར་གཉིས་བར་གྱི་འབྲེལ་ལམ་གྲོས་མཐུན་ནང་། རྒྱ་ནག་གཅིག་གྱུར་གྱི་སྲིད་བྱུས་ལ་མིང་རྟགས་བཀོད་ནས་རྒྱབ་སྐྱོར་བྱས་ཡོད་འདུག་ཀྱང་། ད་ལྟའི་སྤྱི་ཁྱབ་དཔོན་ཛཱེ་ནེག་ཧཱ་རིབ་ཀྱིས། ཕྱི་ལོ་༢༠༡༦ ལོར་པེ་རག་གྲོང་ཁྱེར་དང་པེ་ཅིང་གྲོང་ཁྱེར་གཉིས་བར་གྱི་འབྲེལ་ལམ་གྲོས་མཐུན་ནང་པེ་རག་གྲོང་ཁྱེར་གྱིས་རྒྱ་ནག་གཅིག་གྱུར་གྱི་སྲིད་བྱུས་ལ་རྒྱབ་སྐྱོར་བྱེད་ཀྱི་ཡོད་པའི་དོན་ཚན་དེ་ཕྱིར་འཐེན་བྱེད་དགོས་པ་དང་། གལ་ཏེ་དེ་ལྟར་མ་བྱས་ཚེ་གྲོས་མཐུན་གྱི་ཆ་རྐྱེན་ཚང་མ་རྩིས་མེད་གཏོང་རྒྱུའི་སྡིགས་བསྐུལ་ཡང་བྱས་འདུག ཁོང་གིས་དོན་ཚན་དེ་ནི་ཕྱོགས་གཅིག་གི་ཁས་ལེན་བསྒྲགས་གཏམ་ཡིན་པ་དང་། བསྒྲགས་གཏམ་དེ་རིགས་ཕྱོགས་གཉིས་བར་གྱི་གྲོས་མཐུན་ནང་འཇོག་པར་ངོས་ལེན་མེད་པ་དང་། རྒྱ་ནག་གཅིག་གྱུར་གྱི་སྲིད་བྱུས་དེ་ནི་རྒྱལ་སྤྱིའི་རྒྱལ་ཁབ་ཁག་བར་གྱི་གནད་དོན་མགོ་རྙོག་ཅན་ཞིག་ཡིན་པས། ཁོང་གིས་རྒྱལ་སའི་གྲོང་ཁྱེར་གཉིས་བར་གྱི་ཚད་གཞི་ལ་གཞི་འཛིན་གྱིས་གནད་དོན་སེལ་གྱི་ཡོད་སྐོར་བརྗོད་འདུག

རང་ལོ་༣༨ ཡིན་པའི་པེ་རག་གྲོང་ཁྱེར་གྱི་སྤྱི་ཁྱབ་དཔོན་ཁོང་དེ་སྔོན་ཐའེ་ཝན་དུ། སྨན་པའི་ཉམས་གསོག་སྦྱོང་བརྡར་བྱེད་མྱོང་ཡོད་འདུག ཁོང་ནི་སྲིད་དོན་ཚོགས་པ་ཁག་ཅིག་ཟླ་སྒྲིལ་གྱིས་གཞུང་འཛིན་ཚོགས་པས་སྤྱི་ཁྱབ་དཔོན་དུ་བསྐོ་གཞག་བྱས་པ་ཞིག་ཡིན་འདུག་པས། རྒྱ་ནག་ལ་ཁ་གཏད་ཀྱི་ལས་འགུལ་དེ་ཁོང་གི་སྲིད་དོན་ཚོགས་པ་དང་དེའི་ཟླ་སྒྲིལ་སྲིད་དོན་ཚོགས་པ་ཚོའི་སྲིད་བྱུས་ལག་བསྟར་བྱེད་པ་ཞིག་ཡིན་སྐོར་ནན་བརྗོད་བྱས་ཡོད་འདུག

ཟླ་༣ པའི་ནང་པེ་རག་གྲོང་ཁྱེར་སྲིད་གཞུང་གིས་དེ་སྔོན་པེ་རག་གི་མང་གཙོའི་སྲིད་འཛིན་དང་པོ་བོད་དོན་རྒྱབ་སྐྱོར་བ་ཧཱ་ཝིལ་སྐབས་སུ་བོད་ཀྱི་རྒྱལ་དར་སྒྲིང་འཛུགས་ཀྱི་ལས་དོན་དེ་བསྐྱར་གསོ་བྱས་ཡོད་པ་དང་། ལས་དོན་དེ་སྐབས་སྔོན་མའི་གྲོང་ཁྱེར་སྲིད་གཞུང་གིས་ཕྱིར་འཐེན་བྱས་ཡོད་འདུག ཁོང་གིས་རྒྱ་ནག་ལ་ཁ་གཏད་ཀྱིས་རྗེས་སུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་དང་ཐུག་འཕྲད་ཀྱས་བྱས་འདུག དེའི་རྗེས་སུ་ཐའེ་ཝན་གྱི་རྒྱལ་ས་ཐའེ་པི་ལ་གཞུང་འབྲེལ་ཕྱོགས་བསྐྱོད་བྱས་ཏེ། རྒྱ་ནག་གཞུང་གིས་ཧྥ་ལོང་གྷོང་དང་འབྲེལ་བའི་བཙོན་པ་རྣམས་ཀྱི་དབང་པོ་བཀོག་གི་ཡོད་པའི་སྐྱོན་བརྗོད་བྱས་འདུག ཁོང་གིས་ཐའེ་ཝན་ལ་ནུབ་ཕྱོགས་རྒྱལ་ཁབ་ཁག་གི་མང་གཙོའི་ལམ་ལུགས་ཡོད་པ་དང་འཕྲུལ་ཆས་གསར་གཏོད་ཀྱི་ཚད་གཞི་མཐོན་པོ་ཡོད་པས། ཐའེ་ཝན་གྱིས་པེ་རག་གྲོང་ཁྱེར་ནང་མ་འཛུགས་བྱས་ཚེ་ཁེ་ཕན་ཆེ་བ་ཡོད་སྐོར་བརྗོད་འདུག

ཆེག་རྒྱལ་ཁབ་ནང་གི་ཆབ་སྲིད་མི་སྣ་མང་ཆེ་བས། རྒྱ་ནག་གཞུང་གི་ལངས་ཕྱོགས་ལ་གུས་བརྩི་བྱེད་ཀྱི་ཡོད་པས། པེ་རག་གྲོང་ཁྱེར་གྱི་སྤྱི་ཁྱབ་དཔོན་ཁོང་གིས་རྒྱ་ནག་ལ་ཁ་གཏད་བཅག་ནས་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱེད་བཞིན་ཡོད་པར་བསྔགས་བརྗོད་བྱེད་མཁན་མང་པོ་ཡོད་འདུག །

གསར་འགོད་པ་སྐལ་བཟང་དོན་གྲུབ།

Share this:
༡༣༦༩ ཀློག་གྲངས།