༸གོང་ས་མཆོག་གིས་བྱང་ཆུབ་སེམས་འགྲེལ་གྱི་བཀའ་ཆོས་བསྩལ།

༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་ལྡན་འོན་མངའ་རིས་གྲྭ་ཚང་ནས་ཇི་ལྟར་གསོལ་འདེབས་ཞུས་དོན་ལྟར། ཟླ་འདིའི་ཚེས་༡༤ ཉིན་མ་ནཱ་ལི་ས་གནས་གྲོང་སྡེ་ལས་ཁུངས་ཀྱི་སྣུམ་འཁོར་འཇོག་ཡུལ་དུ་སེར་སྐྱ་མི་མང་ལ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་བསྩལ་འདུག

བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བ་ལྟར་ན། སྐབས་དེར་༧གོང་ས་མཆོག་གིས་བཀའ་ཆོས་སྔོན་འགྲོར་བཀའ་སློབ་བསྩལ་དོན། “དཔལ་མགོན་འཕགས་པ་ཀླུ་སྒྲུབ་ནི་བསྟན་པ་འདི་ལ་སྟོན་པ་གཉིས་པ་ལྟ་བུར་གྲགས་པ་རེད། དེ་ཡང་ལོ་རྒྱུས་ཀྱི་བཤད་སྲོལ་ཙམ་མིན་པར་ཁོང་གིས་བརྩམས་པའི་དཔེ་ཆ་དེ་དག་ལ་བལྟས་པ་ཡིན་ན། དངོས་འབྲེལ་སྨྲ་བ་ཟླ་མེད་པའི་སྟོན་པ་གཉིས་པ་ལྟ་བུ་ཕལ་ཆེར་ཆགས་ཡོད། དེ་ལྟ་བུ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་ཟེར་རྒྱུ་འདི་མགོན་པོ་ཀླུ་སྒྲུབ་ཀྱིས་གསང་སྔགས་ཆོས་ལའང་ཉམས་བཞེས་གནང་སྟེ་གསང་བ་འདུས་པ་གཙོ་བོ་གནང་བ་རེད། མགོན་པོ་ཀླུ་སྒྲུབ་རང་ཉིད་ཀྱིས་གསང་བ་འདུས་པ་མི་བསྐྱོད་རྡོ་རྗེའི་བདག་བསྐྱེད་མདོར་བྱས་ཟེར་རྒྱུ་འདི་མཛད་ཡོད། གསང་བ་འདུས་པའི་སྐུ་གསུམ་ལམ་བྱེད་ཀྱི་བསྐྱེད་རིམ་གྱི་རྣམ་གཞག་འདི་རྩ་རྒྱུད་ཁུངས་སུ་སྦྱར་ནས་མདོ་བསྲེ་ཟེར་རྒྱུ་འདི་གསུང་པ་རེད། དེ་ནས་སློབ་དཔོན་དཔལ་ལྡན་ཟླ་བ་གྲགས་པས་གསང་འདུས་རྩ་རྒྱུད་ཀྱི་འགྲེལ་བ་སྒྲོན་གསལ་མཛད་དེ་གསང་བ་འདུས་པའི་སྐོར་ཀླུ་སྒྲུབ་རང་ཉིད་ཀྱིས་གཞུང་དེ་འདྲ་མཛད། རྫོགས་རིམ་སྐོར་ཆ་བཞག་ན་སློབ་དཔོན་ཀླུ་སྒྲུབ་ཀྱིས་གསང་བ་འདུས་པའི་རྫོགས་རིམ་རིམ་པ་ལྔ་སྟེ་རིམ་ལྔ་མཛད་ཡོད། དེའི་དོན་འགྲེལ་ཨརྱ་དེ་བས་སྤྱོད་བསྡུས་མཛད་དེ་གང་ལྟར་རྫོགས་རིམ་ཁུངས་གཏུག་ས་རེད་འདུག གསང་སྔགས་ལ་སྔ་འགྱུར་རྙིང་མའི་ལོ་ཙཱ་བ་རིན་ཆེན་བཟང་པོ་མ་ཕེབས་གོང་གི་དུས་ཚོད་གཅིག་ནི་བསྟན་པ་སྔ་དར་ཟེར་རྒྱུ་འདི་རེད། དེ་ནས་ལོ་ཙཱ་བ་རིན་ཆེན་བཟང་པོ་ཕེབས་པ་ནས་བསྟན་པ་ཕྱི་དར་ཞེས་གང་ལྟར་གསང་སྔགས་རྙིང་མ་དང་གསར་མ་ཞེས་ཕྱེ་བ་ཡིན་ན། གསང་སྔགས་གསར་མའི་རྒྱུད་སྡེ་གཙོ་བོ་གསང་བ་འདུས་པ་ཆགས་ཡོད། དེ་བཞིན་གསང་སྔགས་རྙིང་མའི་རྒྱུད་སྡེ་མང་པོ་ཞིག་ཡོད་”ཅེས་བཀའ་སློབ་བསྩལ་རྗེས་གསུང་ཆོས་དངོས་གཞི་དབུ་འཛུགས་གནང་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

Share this:
༧༥༧ ཀློག་གྲངས།