༧གོང་ས་མཆོག་དྷ་ས་བཞུགས་སྒར་དུ་ཞབས་སོར་འཁོད།

ཟླ་འདིའི་ཚེས་༡ ཉིན་༧གོང་ས་མཆོག་གི་རྒྱ་གར་ལྷོ་ཕྱོགས་དང་ལྡི་ལི་བཅས་ནས་མཛད་འཕྲིན་ཁག་ལེགས་པར་གྲུབ་སྟེ། དྷ་ས་བཞུགས་སྒར་དུ་ཟབས་སོར་འདེ་བར་འཁོད་ཡོད་པ་རེད།

དེ་ཡང་ཕྱི་ཟླ་༨ ཚེས་༢༩ ཉིན་༧གོང་ས་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་གྲོང་ཁྱེར་མེངྒ་ལོར་དུ་༸ཞབས་སོར་འཁོད་སྐབས། མངའ་སྡེ་གཞུང་གི་སྐུ་ཚབ་དང་ལྷོ་སྤྱི་ཆོས་འཕེལ་ཐུབ་བསྟན་ལགས་སོགས་ཀྱིས་ཕེབས་བསུའི་སྣེ་ལེན་ཞུས་པ་དང་། ཉིན་གུང་ཆུ་ཚོད་༡༢།༣༠ ཙམ་ལ་མེངྒ་ལོར་གྲོང་ཁྱེར་དུ་རྟེན་གཞི་བྱས་པའི་Hotel Gateway ཞེས་པའི་བཞུགས་གནས་གསོལ་མགྲོན་ཁང་དུ་༸ཞབས་སོར་བདེ་བར་འཁོད་སྐབས་མངའ་སྡེའི་རྫོང་དཔོན་དང་སྤྱི་ཁྱབ་སྐོར་སྲུང་བ། རྒྱ་གར་རྒྱལ་ཡོངས་ཡེ་ཤུ་རྣམ་དག་ཆོས་ལུགས་ཀྱི་སློབ་གྲྭ་མཐུན་ཚོགས་ཀྱི་ཚོགས་གཙོ་དང་དྲུང་ཆེ་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། སྐབས་དེར་གདན་ཞུ་གོ་སྒྲིག་ཚོགས་ཆུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མེངྒ་ལོར་གྲོང་ཁྱེར་དུ་ཆིབས་སྒྱུར་བཀའ་དྲིན་བསྐྱངས་པར་ཐུགས་རྗེ་ཆེ་ཞུས་རྗེས། ༧གོང་ས་མཆོག་གིས་འདི་ངོས་ཀྱི་ལས་འགན་ཞིག་ཡིན། ངོས་ཀྱི་དམ་བཅའ་གཅིག་ནི། འགྲོ་བ་མིའི་རྒྱུད་ཀྱི་བཟང་སྤྱོད་གོང་མཐོར་སྤེལ་ཐབས་བྱ་རྒྱུ་དེ་ཡིན། ཆོས་ལུགས་གཙོ་ཆེ་བ་ཚང་མར་ལྟ་གྲུབ་མི་འདྲ་བ་ཡོད་ཀྱང་འཚེ་བ་མེད་པ་དང་བྱམས་བརྩེའི་བསླབ་བྱ་གཅིག་གྱུར་གསུང་གི་ཡོད། འདི་ལྟ་བུའི་ལྷན་ཚོགས་ཀྱིས་ཆོས་ལུགས་ནང་ཁུལ་མཐུན་སྒྲིལ་དང་གདུང་སེམས་མཉམ་སྐྱེད་མཚོན་གྱི་ཡོད་སྟབས་ཧ་ཅང་གལ་ཆེན་པོ་ཡིན་བཀའ་སློབ་བསྩལ་ཡོད་པ་རེད། །

གསར་འགོད་པ་ཆོས་ཉིད་འོད་ཟེར།

Share this:
༥༢༣ ཀློག་གྲངས།