བོད་ཀྱི་མང་གཙོའི་དུས་དྲན་སྲུང་བརྩི་ཞུས་སོང་།

ཟླ་༩ པའི་ཚེས་༢ ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བཙན་བྱོལ་བོད་མིའི་མང་གཙོ་ལམ་ལུགས་དབུ་བརྙེས་ནས་མི་ལོ་༥༩ འཁོར་བའི་དུས་དྲན་མཛད་སྒོ་འཚོགས་པ་དང་། དེར་སྐུ་མགྲོན་གཙོ་བོ་རྒྱ་གར་ཧི་མ་ཅཱལ་མངའ་སྡེའི་གྲོང་ཁྱེར་དང་གྲོང་སྡེ་འཛུགས་བསྐུན་དང་འཆར་གཞིའི་བློན་ཆེན་ལྕམ་སཱར་ཝེན་ཆཱོ་ཌེ་རི་གཙོས། ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་དང་ཁྲིམས་ཞིབ་པ་རྣམ་པ་དང་། སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་དང་། བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་གཙོས་སྤྱི་འཐུས་རྣམ་པ་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། ཉེ་འཁོར་གྱི་སེར་སྐྱ་མི་མང་བཅས་ཀྱིས་མཉམ་ཞུགས་གནང་སོང་།

མཛད་སྒོའི་ཐོག་བོད་ཀྱི་ཟློས་གར་ཚོགས་པ་དང་། ཡོངས་གླིང་སློབ་གྲྭ དཔེ་སྟོན་སློབ་གྲྭ བོད་ཁྱིམ་ཉིན་སློབ། དྷ་སྟེང་བོད་ཁྱིམ། དྷ་ཤོད་བོད་ཁྱིམ་བཅས་ནས་གཞས་སྣ་འཁྲབ་སྟོན་བྱས་སོང་བ་དང་། དེ་བཞིན་སྲིད་སྐྱོང་གཟེངས་རྟགས། ལས་བྱེད་ཞབས་ལོ་༢༥ འཁོར་མཁན་ལ་ལེགས་གསོ། ནང་སྲིད་ལས་ཁུངས་ཀྱི་ན་གཞོན་ནུས་སྤེལ་ལས་གཞིའི་གཟེངས་བསྟོད། དགའ་ལྡན་ཕོ་བྲང་སློབ་ཕྲུག་གཟེངས་རྟགས། ཡར་ལུང་ཟོ་ཐང་གཟེངས་བསྟོད་བཅས་ཕུལ་སོང་།

བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ཚོགས་གཙོ་པདྨ་འབྱུང་གནས་ཀྱི་སྒྲོགས་སྦྱང་གནང་བའིནང་བཙན་བྱོལ་བོད་མིའི་མང་གཙོའི་འཕེལ་རིམ་ལོ་རྒྱུས་དང་༧གོང་ས་མཆོག་གི་བཀའ་དྲིན་མཛད་རྗེས་དང་ལམ་སྟོན། ད་ལྟའི་མང་གཙོ་གནས་བབ་དང་དེར་བསྔགས་བརྗོད་གནང་མཁན་མང་པོ་ཡོད་སྐོར་འཁོད་རྗེས། “༧གོང་ས་༧སྐྱབས་མགོན་ཆེན་པོ་མཆོག་གིས་གསོལ་རས་གནང་བའི་བྱིན་རླབས་དང་རིན་ཐང་ཅན་གྱི་མང་གཙོའི་འགྲོ་ལུགས་དེ་བོད་མི་རྩམ་ཟན་ཡོངས་ཀྱིས་སྣང་མེད་དུ་མ་བཞག་པར་འགན་འཁུར་བའི་ཐོག་ནས་ཡར་རྒྱས་གོང་སྤེལ་དང་ཚགས་ཚུད་ཡོང་ཕྱིར་ཚང་མས་ཐུགས་བསམ་བཞེས་གལ་ཆེ། མང་གཙོ་ཁ་ལ་འཁྱེར་ནས་ཕྱོགས་རིས་འཐེན་འཁྱེར་གྱིས་སྤྱི་ཚོགས་གཡས་དཀྲུག་གཡོན་དཀྲུག་དང་༸གོང་ས་མཆོག་ལ་མཚན་སྨད་ཞུ་རྒྱུ་ལ་སོགས་པའི་ཐལ་ཆ་ཆེ་བའི་བྱ་ངན་རིགས་བྱེད་གྱིན་བསྡད་པ་ཡིན་ན། ཕན་ཐོགས་སུ་གང་ལ་ཡང་ཡོང་རྒྱུ་མེད་པ་གང་ཞིག་བོད་སྤྱི་བའི་རྩ་དོན་ལ་དོ་ཕོགས་འགྲོ་ཉེན་ཆེ་བས་དེ་རིགས་ལ་མང་གཙོའི་ཁེ་ཕན་ལོངས་སྤྱོད་བྱས་པར་ངོས་འཛིན་ཐུབ་ཐབས་མེད། བཙན་བྱོལ་བོད་མིའི་བཅའ་ཁྲིམས་ནང་བོད་མི་ཚང་མར་མང་གཙོའི་ཁེ་དབང་ལོངས་སུ་སྤྱོད་ཆོག་པའི་ཆ་རྐྱེན་བསྐྲུན་ཡོད་པ་ནང་བཞིན་སྤྱི་ཚོགས་ཀྱི་བདེ་སྐྱིད་དང་ལྷིང་འཇགས་བསྲུང་རྒྱུའི་འགན་དབང་ཡང་ང་ཚོ་ཚང་མར་ཡོད་པ་མཁྱེན་དགོས། ང་ཚོ་སུ་ཡིན་ནའང་རྟག་པར་སོ་སོའི་སྒེར་གྱི་ཁ་ཆག་སྣ་རལ་རྐྱང་རྐྱང་བསམ་ནས་མ་བཞུགས་པར་བོད་སྤྱི་བའི་རྩ་དོན་ལ་དམིགས་ཏེ་བསམ་རྒྱ་གུ་ཡངས་བཞེས་ཏེ་ཕྱག་ལས་གནང་རྒྱུའི་འབད་བརྩོན་གནང་དགོས། ད་ལྟ་བར་དུ་༸རྒྱལ་བའི་ཐུགས་རྗེ་བཀའ་དྲིན་ལ་བརྟེན་ནས་འདས་ལོ་༦༠ ནང་བོད་མི་རིགས་ཀྱི་ངོ་བོ་དང་། ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་ཐོག་གོང་སྤེལ་དང་། རང་རེའི་རྩ་དོན་རྩོད་རྒྱུ་བཅས་ལ་ཕན་པའི་མང་གཙོའི་ཀ་བ་གསུམ་ལྡན་གྱི་སྒྲིག་འཛུགས་སྲ་བརྟན་ཞིག་དང་། རྒྱ་བལ་འབྲུག་གསུམ་ནང་བོད་མིའི་གཞིས་ཆགས་ཁག སློབ་གྲྭ་ཆེ་ཆུང་དང་། དགོན་སྡེ་གྲྭ་ཚང་དང་བཙུན་དགོན་ཁག རིག་གཞུང་གཅེས་སྐྱོང་ཁང་དང་། ཕྱི་རྒྱལ་ཡུལ་གྲུ་ཁག་གི་ནང་སྐུ་ཚབ་དོན་གཅོད་ཁང་ལ་སོགས་པའི་ངོམས་སུ་ཆོག་པའི་མང་གཙོའི་སྒྲིག་འཛུགས་ཆེ་ཆུང་མང་དག་ཅིག་བཙུགས་ཐུབ་ཡོད་པ་དེ་དག་ཇི་སྲིད་བོད་ཀྱི་དཀའ་རྙོག་མ་བསལ་བར་དེ་སྲིད་དུ་ཡུན་གནས་ཡར་རྒྱས་གོང་སྤེལ་བཏང་བ་དང་ལྷན་དུ་ང་ཚོ་མི་རེ་ངོ་རེ་ནས་ཉིན་མཚན་དུས་དྲུག་ཏུ་བཙན་བྱོལ་སྤྱི་ཚོགས་དང་བོད་ཀྱི་རྩ་དོན་ལ་འགན་འཁུར་བའི་ཐོག་ནས་སོ་སོའི་སྤྱོད་པ་སྲུང་ཐུབ་པ་ཡིན་ན་བཙན་བྱོལ་སྤྱི་ཚོགས་ནང་ཆིག་བསྒྲིལ་ཡོང་རྒྱུ་གདོན་མི་ཟ་ཞིང་། མ་འོངས་པར་བོད་གཞིས་བྱེས་མཉམ་འཛོམས་ཀྱི་སྐྱིད་པའི་ཉི་མ་ཤར་དུས་རང་རེ་བཙན་བྱོལ་བ་རྣམས་རང་དབང་བོད་ལ་ཕྱིར་ལོག་བྱེད་སྐབས་མང་གཙོའི་ལམ་བཟང་དེ་གཞིས་ལུས་སྤུན་ཟླ་རྣམས་ལ་འབུལ་རྒྱུའི་ཕྱག་རྟགས་ལེགས་ཤོས་དེ་ཆགས་རྒྱུ་ཡིན། དེར་བརྟེན་བོད་མི་ནང་ཁུལ་དམ་ཚིག་དར་གྱི་མདུད་པ་མ་ལྷོད་པའི་ཐོག་ནས་བོད་རང་དབང་སླར་གསོའི་གོམ་སྟབས་མདུན་ནས་མདུན་དུ་བསྐྱོད་ཐུབ་པར་བྱེད་པ་ལ་གོ་སྐབས་འདི་བརྒྱུད་ནས་ཚང་མར་ཐུགས་བསམ་བཞེས་རོགས་གནང་ཞེས་སྙིང་དབུས་ནས་འབོད་བསྐུལ་ཞུ་རྒྱུ་ཡིན།”ཞེས་དང་། 

དེ་བཞིན་བཙན་བྱོལ་ནང་མང་གཙོ་དབུ་བརྙེས་ཏེ་ལོ་ངོ་༥༩ ཧྲིལ་པོ་འཁོར་བའི་དུས་དྲན་སྲུང་བརྩི་ཞུ་བ་དང་ཆབས་ཅིག བོད་ས་རྒྱ་ལག་ཏུ་ཤོར་ནས་གཞིས་ལུས་བོད་མི་རྣམས་ལ་མང་གཙོའི་ཁེ་དབང་ལྟ་ཞོག་འགྲོ་བ་མིའི་རང་ཆས་སུ་ཡོད་པའི་སྨྲ་བརྗོད་ཀྱི་རང་དབང་དང་། འགྲོ་འོང་གི་རང་དབང་། ཆོས་དད་ཀྱི་རང་དབང་སོགས་གཞི་རྩའི་རང་དབང་ཡེ་ནས་མེད་པར་རྒྱ་ནག་དམར་གཞུང་གི་བཙན་གནོན་དྲག་པོའི་འོག་སྡུག་སྦྱོང་མནར་གཅོད་ཚད་མེད་མྱངས་དང་མྱོང་བཞིན་པའི་ངང་ལོ་ངོ་༦༠ ལྷག་འཁོར་བཞིན་པར་བྱེས་སུ་གནས་པའི་བོད་མི་སྤྱི་བོ་གནམ་བསྟན་ཡོངས་ནས་གདུང་སེམས་མཉམ་བསྐྱེད་ཞུ་བཞིན་ཡོད་པ་དང་། འདས་པའི་ཟླ་ཤས་རིང་ནས་བཟུང་ཧོང་ཀོང་མི་མང་ས་ཡ་མང་པོས་མང་གཙོ་དང་རང་དབང་སྲུང་སྐྱོབ་ཀྱི་ཆེད་དུ་གཞི་རྒྱ་ཆེ་བའི་ཞི་བའི་ངོ་རྒོལ་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་བཞིན་པར་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་གདུང་སེམས་མཉམ་བསྐྱེད་ཞུ་རྒྱུ་ཡིན་ཞེས་འཁོད་འདུག 

བཀའ་ཤག་གི་གསུང་བཤད་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་ཀྱིས་སྒྲོགས་སྦྱང་གནང་སོང་བ་དང་། དེའི་ནང་བཙན་བྱོལ་བོད་མིའི་མང་གཙོའི་འཕེལ་རིམ་ལོ་རྒྱུས་དང་༧གོང་ས་མཆོག་གི་བཀའ་དྲིན་མཛད་རྗེས་དང་ལམ་སྟོན། བོད་མིའི་མང་གཙོར་བསྔགས་བརྗོད་བྱེད་མཁན་མང་པོ་ཡོད་སྐོར་འཁོད་རྗེས། “མང་གཙོའི་སྤྱི་ཚོགས་ནང་རྒྱལ་ཁབ་དང་མི་རིགས་ཀྱི་ཁེ་ཕན་དོན་དུ་ཆབ་སྲིད་ཀྱི་ལྟ་བ་དང་ལངས་ཕྱོགས་མི་འདྲ་བ་མང་པོ་ཡོང་ཆོག་པ་ཡིན། དེ་བཞིན་མང་གཙོའི་ལམ་ལུགས་ནང་ཐོབ་ཐང་དང་ལས་འགན་གཉིས་ནི་ཕན་ཚུན་ཡ་མ་བྲལ་བར་འགྲོ་དགོས་པ་ལས། ལས་འགན་ལ་བརྩི་མེད་ཀྱིས་སྨྲ་བརྗོད་རང་དབང་སོགས་ཀྱི་ཐོབ་ཐང་ལོངས་སྤྱོད་བྱེད་རློམ་གྱིས་འགན་འཁུར་རྩ་བ་ནས་མི་དགོས་པའི་ནང་ཁུལ་འཁྲུག་རྐྱེན་བཟོ་བའི་བྱེད་བབ་སོགས་ནི་ཁྲིམས་ལུགས་དང་བཟང་སྤྱོད་གཉིས་ཀ་དང་ཡོངས་སུ་འགལ་བ་མ་ཟད། དགྲ་དགའ་གཉེན་སྡུག་གི་ལག་ཆར་ཡང་འགྱུར་ངེས་ཡིན་པས་རང་རིགས་རྒན་གཞོན་ཚང་མས་བྱ་སྤྱོད་དེ་རིགས་ལ་ཡིད་གཟབ་དགོས་པའི་སྐུལ་འདེབས་ནན་པོ་བྱ་རྒྱུ་ཡིན། མང་གཙོའི་ཆབ་སྲིད་ཀྱི་ལམ་ལུགས་ནི་སྤང་བླང་ཚུལ་བཞིན་བསྟེན་པའི་སྒོ་ནས་ཡར་རྒྱས་ཀྱི་ཕྱོགས་སུ་མདུན་བསྐྱོད་བྱེད་དགོས་ཀྱི་ཡོད་པར་བརྟེན། མང་གཙོ་ལག་བསྟར་བྱེད་པའི་བརྒྱུད་རིམ་ནང་འགོག་རྐྱེན་ཇི་སྙེད་ཅིག་འཕྲད་རྒྱུ་སྨོས་མེད་ཡིན་ནའང་སྐྱོན་རྣམས་ཡོ་བསྲང་བྱས་ནས་ཡར་རྒྱས་ཡོང་བར་འབད་བརྩོན་བྱེད་རྒྱུ་དེ་གནད་འགག་ཡིན་”ཞེས་དང་། 

“བོད་ནང་གི་བོད་མི་ཚོའི་གནས་སྟངས་ནི་མུ་མཐུད་སེམས་འཚབ་བྱེད་དགོས་ཀྱི་འོག་གནས་ཡོད། དེ་ཡང་ཕྱི་ལོ་ ༡༩༥༡ ལོར་བོད་ས་བཙན་བཟུང་བྱས་པ་ནས་བཟུང་བོད་མིའི་ཐོག་མི་སྤྱོད་ལས་འདས་པའི་སྡུག་གཅོང་མནར་གཅོད་སོགས་རྒྱུན་མི་ཆད་པར་བཏང་དང་གཏོང་བཞིན་ཡོད། བོད་མིའི་ཐོག་དམ་དྲག་ཇེ་ཆེར་གཏོང་ཆེད་སྔ་ལོའི་ལོ་འགོ་ཙམ་ནས་ནག་འཇོམས་ངན་སེལ་ལམ་ནག་གཤེད་ཕྱོགས་གཏོགས་ཀྱི་ཁྲིམས་འགལ་ཉེས་གསོག་ཐེར་འདོན་བྱ་རྒྱུའི་བརྡ་ཁྱབ་ཟེར་བ་ཞིག་བཏང་བ་དེའི་ནང་ཕ་སྐད་དང་ཁོར་ཡུག་སྲུང་སྐྱོབ་བྱེད་པ། དེ་བཞིན་དབུ་མའི་ལམ་སྐོར་དྲིལ་བསྒྲགས་བཅས་བྱས་པ་ཡིན་ན་ལོག་སྤྱོད་ཀྱི་བསམ་བློ་དང་གུ་དོག་གི་མི་རིགས་རིང་ལུགས་ཀྱི་བསམ་བློ་དྲིལ་བསྒྲགས་བྱེད་མཁན་གྱི་ཁ་བྲལ་བ་ཡིན་པའི་ཉེས་འཛུགས་བྱས་ཏེ་ཐེར་འདོན་གྱིས་རྡུང་རྡེག་གཏོང་དགོས་སྐོར་བརྗོད་ནས་ད་ལྟའི་བར་བོད་མི་མི་ཉུང་བ་ཞིག་དངོས་སུ་འཛིན་བཟུང་བཙོན་འཇུག་བྱས་དང་བྱེད་བཞིན་ཡོད་པ་ནི་དངོས་དོན་དང་མི་མཐུན་པ་ཞིག་ཡིན། དེ་ཙམ་མ་ཟད་ནག་ཚོགས་ཐེར་འདོན་དང་སྲིད་གཞུང་གི་འབྲེལ་ཡོད་ཚོར་མི་སྣ་རྩིས་སྤྲོད་བྱེད་མཁན་ཚོར་རྒྱ་སྒོར་ཁྲི་ལྔ་ནས་འབུམ་གཅིག་བར་བྱ་དགའ་སྤྲོད་རྒྱུ་ཡིན་པའི་གསལ་བསྒྲགས་སོགས་ཀྱང་སྤེལ་ཡོད། དེ་རིགས་དེ་ནི་མི་རིགས་རང་ཉིད་ཀྱི་སྐད་ཡིག་སྲུང་སྐྱོབ་དར་སྤེལ་དང་ཁོར་ཡུག་སྲུང་སྐྱོབ་བྱེད་པ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་ནང་འགན་སྲུང་བྱས་ཡོད་པ་དང་ཡོངས་སུ་འགལ་ཡོད། དེ་བཞིན་རྒྱ་གཞུང་གི་འགོ་འཁྲིད་ཚོས་བོད་ཀྱི་གནད་དོན་ཐོག་༸གོང་ས་མཆོག་དང་འབྲེལ་མོལ་བྱེད་རྒྱུའི་སྒོ་ཕྱེ་ནས་ཡོད་སྐོར་བསྒྲགས་བཞིན་ཡོད་ནའང། ༸གོང་ས་མཆོག་གི་ངོས་ནས་བོད་ཀྱི་གནད་དོན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་སེལ་རྒྱུ་དང་། དེ་ཡང་དབུ་མའི་ལམ་ནི་ཕན་ཚུན་དབར་གྱི་འབྲེལ་མོལ་གྱི་གཞི་རྩ་ཡང་ཡིན་པ་དེར་རྒྱབ་སྐྱོར་བྱེད་ན་ཁ་བྲལ་དང་ནག་གཤེད་ཕྱོགས་གཏོགས་ཀྱི་ཞྭ་མོ་གཡོགས་པའི་བྱེད་བབ་དེ་དག་ལ་བལྟས་ན་ཁ་བྲལ་བྱེད་མཁན་ངོ་མ་ནི་ས་གནས་ཀྱི་དབང་འཛིན་པ་ཚོ་རེད་ཅེས་ཚོར་ཤུགས་ཆེན་པོས་བརྗོད་འདོད་བྱུང་། དེ་བཞིན་བོད་མིའི་ཆོས་དད་རང་དབང་ཐོག་དམ་དྲག་ཧ་ཅང་ཆེན་པོ་བྱེད་བཞིན་ཡོད། སྤྱི་ཡོངས་ནས་དགོན་སྡེ་གྲྭ་ཚང་ཁག་གི་ནང་གྲྭ་བཙུན་ཆོས་ཞུགས་བྱེེད་པའི་གྲངས་ཀར་ཚད་བཀག་བྱེད་བཞིན་ཡོད། དེའི་དཔེ་མཚོན་གསལ་ཤོས་ནི་ཉེ་བའི་ལོ་ཤས་ནང་གསེར་རྟ་བླ་རུང་སྒར་དང་ཡ་ཆེན་སྒར་གཉིས་སུ་གྲྭ་བཙུན་གྱི་གྲངས་ཀར་ཚད་བཀག་བཟོས་ཏེ་གདན་ས་དེ་གཉིས་ནས་བཙན་དབང་གིས་གྲྭ་བཙུན་སྟོང་ཕྲག་མང་པོ་ཕྱིར་འབུད་དང་གྲྭ་ཤག་སྟོང་ཕྲག་བརྒལ་བ་གཏོར་བཤིག་བཏང་དང་གཏོང་བཞིན་ཡོད་པ་དེ་ལས་ཤེས་ཐུབ། གསེར་རྟ་བླ་རུང་སྒར་གྱི་བཙུན་མ་གསུམ་ནས་རང་ཤི་བརྒྱབ་པའི་གནས་སྟངས་ཡང་བྱུང་ཡོད། རྒྱ་ནག་གཞུང་གིས་བོད་མིའི་ཆོས་དད་རང་དབང་ཐོག་དམ་དྲག་འདི་ལྟ་བུ་ཞིག་བྱེད་ཀྱི་ཡོད་པ་དང། ཡང་ཕྱོགས་གཞན་ཞིག་ནས་བོད་བརྒྱུད་ནང་བསྟན་གྱི་བླ་སྤྲུལ་གྱི་ཡང་སྲིད་ངོས་འཛིན་བྱེད་པའི་ལམ་ལུགས་ལ་ཐེ་བྱུས་དང་བདག་དབང་ཡོད་སྐོར་གྱི་སྨྱོ་ཧམ་གྱི་བྱེད་བབ་དེ་དག་ནི་དོན་དངོས་དང་མི་མཐུན་པ། འཛམ་གླིང་མི་མང་སུས་ཀྱང་ཁས་ལེན་བྱེད་ཐབས་བྲལ་བའི་གནད་དོན་ཞིག་རེད་ཅེས་ཀྱང་ད་རེས་ཀྱི་གོ་སྐབས་འདི་བརྒྱུད་གསལ་བཟོ་བྱ་འདོད་བྱུང་”ཞེས་འཁོད་འདུག 

སྐུ་མགྲོན་གཙོ་བོ་རྒྱ་གར་ཧི་མ་ཅཱལ་མངའ་སྡེའི་གྲོང་ཁྱེར་དང་གྲོང་སྡེ་འཛུགས་བསྐུན་དང་འཆར་གཞི་བློན་ཆེན་ལྕམ་སཱར་ཝེན་ཆཱོ་ཌེ་རི་ཡིས། དེང་གི་ཆར་འཛམ་གླིང་གང་སར་མང་གཙོའི་ལམ་ལུགས་ལ་ཉེན་ཁ་འཕྲད་བཞིན་པའི་སྐབས་དེར། ༧གོང་ས་མཆོག་གིས་གསོལ་རས་གནང་བའི་བོད་མིའི་མང་གཙོའི་ཉིན་མོ་ཐེངས་༥༩ ལ་དགའ་བསུའི་འཚམས་འདྲི་ཡོད་པ་དང་། མཛད་སྒོར་༧གོང་ས་མཆོག་ཆིབས་བསྒྱུར་བསྐྱང་ཐུབ་མེད་ཀྱང་། དཀོན་མཆོག་ལ་༧གོང་ས་མཆོག་སྐུ་ཚེ་རིང་པོ་བརྟན་པ་དང་ཁོང་གི་ལམ་སྟོན་བཟང་པོ་མུ་མཐུད་ཡོང་བའི་སྨོན་ལམ་ཞུ་རྒྱུ། དེ་བཞིན་མང་གཙོ་སྲུང་སྐྱོབ་བྱེད་པར་བོད་མི་ཚོས་མང་གཙོའི་གོ་རྟོགས་ཚད་མཐོ་ཡོད་པ་བྱེད་རྒྱུ་གལ་ཆེན་ཡིན་སྐོར་གསུངས་སོང་།།

གསར་འགོད་པ་སྐལ་བཟང་དོན་གྲུབ། 

Share this:
༦༡༤ ཀློག་གྲངས།