མི་འཚོ་བའི་རྩ་བ་དེ་བརྩེ་བར་ཐུག་པའི་བཟོ་འདྲ་འདུག

ཕྱི་ལོ་༢༠༡༩ ཟླ་༩ ཚེས་༤ ཉིན་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་བཞུགས་སྒར་དྷ་སའི་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གསུམ་གྱི་གསུང་ཆོས་(ཚེས་ ༤ ནས་ ༦ བར) དབུ་འཛུགས་གནང་སོང་བ་དང་། ཐེངས་འདིའི་ཆོས་ཞུ་བ་དང་གསོལ་འདེབས་ཞུ་མཁན་གཙོ་བོ་ནི་ཨིན་ཌོ་ནེ་ཤི་ཡ་དང་། ཀོ་རི་ཡ། མ་ལེ་ཤི་ཡ། སིངྒ་པུར། ཐའེ་ལན་ཌི། ཝི་དི་ནམ་སོགས་ཀྱིས་མཚོན་པའི་ཨེ་ཤི་ཡའི་ནང་པའི་ཡུལ་གྲུ་ཁག་གི་དད་ལྡན་བ་རྣམས་ཡིན་ཞིང་། འཁྲིད་བྱའི་གཞུང་རྣམས་ནི་བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན། མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཅས་ཡིན་འདུག

དེ་ཡང་ཞོགས་པའི་ཆུ་ཚོད་ ༨:༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དུས་རྒྱུན་ལྟར་བདུན་བསུ་རྗེས་འབྲང་གིས་ཕོ་བྲང་ནས་མར་ཐེག་ཆེན་ཆོས་གླིང་གཙུག་ལག་ཁང་དུ་ཕེབས་ཏེ་༧བཞུགས་ཁྲིར་འཁོད་རྗེས། དེར་འདུས་པའི་དད་ལྡན་ཆོས་ཞུ་བ་རྣམས་ལ་གསུང་ཆོས་ཀྱི་སྔོན་འགྲོའི་བཀའ་སློབ་བསྩལ་དོན། “ཁྱེད་རང་ཚོ་ཚང་མ་ཆེད་མངགས་འདིར་ཡོང་བར་བརྟེན་དགའ་བསུ་དང་འཚམས་འདྲི་ཡོད། འཛམ་གླིང་ཤར་ལྷོ་ཡུལ་ཁག་དེ་དག་ཕ་མེས་ནས་ནང་ཆོས་དར་བ་ཞིག་རེད། ཁྱེད་རང་ཚོས་དོན་གཉེར་ཆེན་པོ་བྱས་ཏེ་འདིར་ཆོས་འབྲེལ་བྱེད་རྒྱུ་རེད། དེ་རིང་འདིར་ཐེངས་འདིའི་ཆོས་འབྲེལ་བྱེད་རྒྱུ་ཡིན། ཁྱེད་རང་ཚོ་གྲ་སྒྲིག་བྱེད་མཁན་ཡོངས་ལ་ཐུགས་རྗེ་ཆེ་ཞེས་ཟེར་གྱི་ཡིན། ང་ཚོ་ནི་ནང་པ་སངས་རྒྱས་པའི་ཆོས་བྱེད་མཁན་ཡིན་པ་རེད། འཛམ་གླིང་འདིའི་སྟེང་ཆོས་ལུགས་མང་པོ་ཡོད་པ་དེ་དག་ལ་ལྟ་གྲུབ་མི་འདྲ་བ་ཡོད། འོན་ཀྱང་ཆོས་ལུགས་ཚང་མའི་བསླབ་བྱ་གཙོ་བོ་ནི་བྱམས་པ་དང་བརྩེ་བ། བཟོད་པ། ཆོག་ཤེས། རང་ཁྲིམས་རང་སྲུང་ཟེར་རྒྱུའི་གྲས་ནི་ཆོས་ལུགས་ཚང་མས་ཤོད་ཀྱི་འདུག དེ་ལྟར་ཡིན་པ་མ་ཟད་ཡིན་དགོས་ཀྱི་ཡང་རེད། མིར་སྐྱེས་པའི་ཉིན་མོ་ནས་བཟུང་བརྩེ་བ་ཟེར་རྒྱུ་འདི་ཧ་ཅང་གལ་ཆེན་པོ་རེད་འདུག རྫུས་སྐྱེས་ཟེར་རྒྱུ་དེ་འདྲ་ཡོད་པ་ཡིན་ན་གང་ཤེས། ཐོག་མར་འཛམ་གླིང་ཆགས་པའི་སྐབས་ཕལ་ཆེར་རྫུས་སྐྱེས་ལྟ་བུ་རེད། དེ་མིན་མངལ་སྐྱེས་དང་སྒོང་སྐྱེས་དེ་དག་མ་དང་བུ་ཕྲུག་གི་བརྩེ་བ་ཚང་མ་ལ་འདུག དེར་བརྟེན་ང་ཚོ་མི་ཡང་མ་ལས་བཙའ་བ་རེད། མས་བསྐྱངས་ནས་ང་ཚོ་གསོན་པ་རེད། དེ་ནས་འཚར་ལོངས་ཡོང་གི་ཡོད་པ་རེད།  མིའི་རང་བཞིན་ལྷན་སྐྱེས་བརྩེ་བ་ཟེར་རྒྱུ་འདི་མི་ལ་འབྲེལ་བ་ཧ་ཅང་ཡོད་པ་དང་། གང་ལྟར་མི་འཚོ་རྒྱུའི་རྩ་བ་ནི་བརྩེ་བར་ཐུག་པའི་བཟོ་འདྲ་ཞིག་འདུག དེར་བརྟེན་ཆོས་ལུགས་ཁག་དེ་དག་མིའི་ཆོས་ལུགས་རེད། མིའི་ཆོས་ལུགས་ཡིན་སྟབས་མིའི་རང་བཞིན་གྱི་བརྩེ་བ་ཟེར་རྒྱུ་འདི་ལ་དགའ་བོ་བྱེད་ཀྱི་ཡོད། ང་ཚོ་ཐོག་མར་མའི་བརྩེ་བས་འཚོ་བ་རེད། དེར་བརྟེན་མིའི་སྤྱི་ཚོགས་ནང་བརྩེ་བ་ཟེར་རྒྱུ་འདི་གལ་ཆེན་པོ་ཆགས་ཡོང་དུས་ཆོས་ལུགས་ཚང་མ་མིའི་བཀོད་པ་ཟེར་ན་མི་འདུག གང་ལྟར་མིའི་སྤྱི་ཚོགས་ནང་ཆགས་པའི་ལྟ་གྲུབ་ཡིན་སྟབས། བྱམས་བརྩེ་ཟེར་རྒྱུ་འདི་ཚང་མས་གསུང་བཞིན་འདུག  བྱམས་བརྩེ་དགོས་ཀྱི་རེད་ཟེར་རྒྱུའི་སྒྲུབ་བྱེད་ནང་ལྟ་གྲུབ་མི་འདྲ་བ་ཡོང་བཞིན་ཡོད། ལྟ་གྲུབ་མི་འདྲ་བ་དེ་དག་གིས་དམིགས་ཡུལ་ནི་བྱམས་བརྩེ་གོང་འཕེལ་གཏོང་རྒྱུ་གཅིག་གྱུར་རེད་འདུག ངོས་ཀྱིས་ནམ་རྒྱུན་འདི་ལྟར་ཤོད་ཀྱི་ཡོད། དཔེར་ན་ང་ཚོས་སྨན་ཞིག་ཡར་བླངས་ནས་སྨན་འདི་ཡག་ཤོས་རེད་ཅེས་བརྗོད་ཐུབ་ཀྱི་མ་རེད། ནད་པའི་གཟུགས་པོའི་བབ་དང་ལོ་སོགས་མང་པོ་ཞིག་ལ་བལྟས་ནས་ནད་པ་འདི་ལ་སྨན་འདི་ཡག་ཤོས་རེད་ཅེས་བརྗོད་ཐུབ་ཀྱི་རེད་མ་གཏོགས་སྤྱི་ཡོངས་ཀྱི་སྨན་ཞིག་ཡར་བླངས་ནས་འདི་ཡག་ཤོས་རེད་ཅེས་བརྗོད་ཐུབ་ཀྱི་མ་རེད་”ཅེས་དང་།

༧གོང་ས་མཆོག་གིས་མུ་མཐུད་བཀའ་སློབ་གནང་དོན། “དེར་བརྟེན་ང་ཚོའི་ཆོས་ལ་ཆ་བཞག་ནའང་མིའི་ཁམས་དང་མོས་པ། དེ་བཞིན་སངས་རྒྱས་པའི་ཆོས་ནས་བཤད་པ་ཡིན་ན་ཚེ་སྔོན་མའི་བག་ཆགས་སོགས་ཀྱིས་རྐྱེན་མི་འདྲ་བ་སྣ་ཚོགས་ཡོད་པར་བརྟེན་ཁམས་དང་མོས་པ་བག་ལ་ཉལ་མི་འདྲ་བ་ཡོད་སྟབས། ལྟ་གྲུབ་མི་འདྲ་བ་འདི་ཡོད་དགོས་པ་རེད་འདུག དཔེར་ན། བཅོམ་ལྡན་འདས་ཀྱི་རྗེས་འབྲང་གཅིག་གྱུར་ཡིན་ནའང་ལྟ་གྲུབ་མི་འདྲ་བ་ཡོང་བཞིན་ཡོད། ལྟ་གྲུབ་མི་འདྲ་བ་འདི་བཅོམ་ལྡན་འདས་རང་ཉིད་ཀྱིས་གསུངས་པ་རེད། གང་ཡིན་ཞེ་ན། འདུལ་བྱའི་ཁམས་དང་མོས་པ་མི་འདྲ་བ་ཡོད་པར་བརྟེན་ལྟ་གྲུབ་གཅིག་ཁོ་ན་རན་པོ་ཞིག་ཡོང་གི་མ་རེད། དེར་བརྟེན་འཛམ་གླིང་འདིའི་སྟེང་གི་ཆོས་བརྒྱུད་དེ་དག་བྱམས་བརྩེ་འདོད་མཁན་གྱི་ལྟ་གྲུབ་གཅིག་པ་ཆགས་ཡོད། འོན་ཀྱང་བྱམས་བརྩེ་སྒྲུབ་སྟངས་སྐོར་ལ་གཙོ་ཆེ་བར་ཆ་བཞག་ན། འཇིག་རྟེན་བཀོད་པ་པོ་འདོད་མཁན་དང་འཇིག་རྟེན་བཀོད་པ་པོ་མི་འདོད་མཁན་གྱི་ཆོས་བརྒྱུད་ཡོད། འཇིག་རྟེན་བཀོད་པ་པོ་འདོད་མཁན་གྱི་ནང་དུའང་འཇིག་རྟེན་བཀོད་པ་པོ་དཀོན་མཆོན་ཟེར་མཁན་གྱི་ནང་དུ་ངོ་བོ་འཇོག་སྟངས་སོགས་མི་འདྲ་བ་འདུག སྤྱིར་ཁ་ཆེ་དང་། ཡེ་ཤུ། ཇིའུ་ལ་སོགས་པའི་ཆོས་ལུགས་མང་པོ་ཞིག་གིས་འཇིག་རྟེན་བཀོད་པ་པོ་འདོད་ཀྱི་ཡོད། ལོ་སྟོང་ཕྲག་རིང་ལ་ཇིའུ། ཡེ་ཤུ། ཁ་ཆེ་ཆོས་ལུགས་རྣམས་ཀྱིས་མི་ལ་ཕན་ཐོགས་ངེས་ཅན་བྱུང་འདུག”

གསར་འགོད་པ་དཀོན་མཆོག་རབ་བརྟན། 

Share this:
༥༣༥ ཀློག་གྲངས།